Nyuutɩna Wɩɩsɛ gáásɛ wɩ́ɛ́ Ziide nɩɛ ná há zʋ zʋ́zʋ́llɛ Ezipiti mí
44
1 Ná Nyuutɩna Wɩɩsɛ liŋó ná ʋ́ há píé pá Zeremi rʋ́ʋ́ pá Ziide nɩɛ ná wuu há mɩŋ Ezipiti tɔ́nɛ nyáŋ mɛ́: Migdɔl, Tapanɛsɛ, Maŋfisi arɩ́ Patʋrɔsɛ dɩtɩ́llɛ sɩɛrʋ: 2 «Ná Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ há sʋ́ʋ́ ná: “Ɩ́ ná wɩhálawa ná ŋ há ɛ́ɛ́ ɓa peri Zerizalɛmɛ arɩ́ Ziida tɔ́nɛ wuu rí. Zaa, ɓa zɔ́kɔ́, a bɩrmɛ tɔ́wuóle. 3 Ɓa há tʋ́ŋ bɔ́ŋbɔ́ŋ, a jáŋ nʋɔ mɛ́ nɛ́ tɛ nyɛ péríwó. Ɓa nyɩ́kɛ tulaalewa ká ɓáárɛ venni ná ɓa há wʋ́ɔ́ ɛ̃́. Ɩ́ tɩɩ arɩ́rɩ́wa naabálwa má há wʋ́ɔ́ ɛ̃́. 4 Ŋ tʋ́mɩ́ŋ tʋ́tʋnna há káŋ wɩ́laabʋlla ɩ́ rɩ́, ŋ wɩ bɔ́lɛ, rɩ́wɔ́ bʋl pɛ́ɩ́wa a bʋlɛ́: "Ɩ́ tɛ́ɩ́wa wɩ́tɩɛnnɛ ná ŋ há bɛ́rɛ ɛɛ." 5 Amá ɓa wɩ zésé, a wɩ lóé rɩ́ ɛ́ wɩ́ɛ́ zʋ́wɔ́ dɩlla, ɓa wʋ́ɔ́ málbɔmɔ ná tɛ́ɛ́, ɓa tulaalewa nyɩkɛ pá venni ná má tɛ́ɛ́. 6 Ɛ́ nɛ́ tɛ ŋ cɔwɩɩlɩ́zeno wɛ, a dí Ziida tɔ́nɛ arɩ́ Zerizalɛmɛ ŋmɛ́ŋsɛ; ɓa bɩrmɛ jɩɓorú, a a tɔ́wuóle, anɛ nyɛ́ ɓa zaa há nóú.”»
7 Mʋ́l né mí, ɩ́ ná Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ há sʋ́ʋ́ ná: “Beé rí tɛ, ɩ́ ɔsɛ aá bɛ́ŋsɩ́wa tɩɩ nyɛ́? Ɩ́ɩ́ já rɩ́wɔ́ ɓʋ́ʋ́sɛ Ziida báála, háála, heŋbiisi arɩ́ bipʋllɛ wuu ní? Ɩ́ baá wáá ja rɩ́ɩ́wa sɩɛrʋ nɛ́ŋ oro wuu káánɛ nɛ́? 8 Ɩ́ɩ́ já rɩ́ɩ́wa nyɩkɛ tulaalewa a pá venni ní, Ezipiti né ɩ́ há kúé a zʋ́zʋ́llɛ ʋ sɩɛrʋ, a tɩ́ŋɩ́wa wɩ́'állɛ mɛ́ a púsíŋ cɔ́ɛ́ nɛ́? Ɩ́ɩ́ já rɩ́wa sʋsɛ tenni ní, a nɛ́ a mállá, a pá dúníé wuu, rɩ́ ɓa nɛ́ kúé aá bʋl bʋra arɩ́ hɩɩ̃sɛ wɩ́ɛ́? 9 Ɩ́ sʋ́llɛ wɩ́bɔma ná ɩ́ ánáwa há ɛ́ɛ́, Ziida kuóre rɩ́wɔ́ háála há ɛ́ɛ́, ɩ́ tɩɩ arɩ́rɩ́wa háála há ɛ́ɛ́ Ziida tɔ́ɔ́ arɩ́ Zerizalɛmɛ ŋmɛ́ŋsɛ mɛ́? 10 A rɩ́ zaa, ɓa wɩ fa'ɩ́ɔ̃́ bʋlɛ́, ɓa wɩ́ŋ fɛ́ɛ́, ɓa wɩ́ŋ wɩ́makɛ́ arɩ́rɩ́ŋ wɩ́bile ná ŋ há máŋsɛ pɛ́ɩ́wa rɩ́rɩ́wa ánáwa tɩ́ŋɛ́.”»
11 Ɛ́ wɩ́ɛ́, ɩ́ ná Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ há sʋ́ʋ́ ná: “Ŋ sɩ́ hé wɩhála pɛ́ɩ́wa ká ɓʋ́ʋ́sɛ Ziida nɩɛ wuu. 12 Ŋ sɩ́ kɛsɛ Ziida nɩkáánɛ ná fa há bɩ́ɩ́nɛ rɩ́wɔ́ mʋ́ zʋ zʋ́zʋ́llɛ Ezipiti mí; ɓa wuu sɩ́ sʋsɛ. Ezipiti tɔ́ɔ́ sɩɛrʋ nɛ́ ɓa wuu sɩ́ sʋsɛ, a tɩŋ lal rɩ́ losu mí. Nɛ́ŋ wáá káánɛ, heŋbiisi rɩ́ nɩhɩ́ɛ̃sɛ sɩ́ sʋsɛ a tɩŋ lal rɩ́ losu mí. Ɓa wuu sɩ́ sʋsɛ, a a mállá rɩ́ ɓa nɛ́ kúé aá ja rɩ́wɔ́ bʋl bʋra wɩ́ɛ́, rɩ́ ɓa nɛ́ kúé aá bʋl wɩ́tɔ́k wɩ́ɛ́, ŋmɔ̃́ɔ̃́ wɩ́ɛ́ arɩ́ wɩ́ɛ́ ná há kéŋ hɩɩ̃sɛ wɩ́ɛ́. 13 Ŋ sɩ́ cɛ́ nɩɛ ná há ké Ezipiti mí, anɛ ɛ́ ŋ fa há cɛ́ Zerizalɛmɛ nɩɛ mɛ́, a tɩ́ŋ lal, losu arɩ́ dɩwɩ́lbɔmɔ mɛ́. 14 Ziida nɩkáánɛ ná há kúé zʋ zʋ́zʋ́llɛ Ezipiti mí rɛ́ɛ́, ɓa sɩɛrʋ oro wuu wáá wólli fá, rɩ́ɩ́ lú lɛ́, oro wuu wáá wólli bɩrko Ziida tíé, ráŋ ná ɓa fa háá bɩ́ɩ́nɛ́ rɩ́wɔ́ ko ké. Ɓa sɩɛ́ báá wɩ ráŋ ko, rʋ́ʋ́ nɛ́ tó nɩkáánɛ ná sɩɛrʋ nɩɛ mʋɔ́ yɔɔ dʋŋɔ.”»
Ziide nɩɛ ɔ́sɛ́ vʋka a pá veno ná ɓa háá yɩ́rɛ Bána nyúú Hákuóro
15 Báála ná wuu fa há ɩ́ɔ̃́ rɩ́ ɓa háála nyɩ́kɛ tulaalewa aá pá venni, arɩ́ háála ná má wuu fa há céŋ céŋzeno ráŋ, nɩɛ ná wuu fa há mɩŋ Ezipiti tíé mí, a ké Patʋrɔsɛ mɛ́, ɛ́ nɩɛ wuu bʋ́l Zeremi rɩ́ a bʋlɛ́: 16 Wɩ́ɛ́ ná ɩ há bʋ́lɛ́ aá párá Nyuutɩna Wɩɩsɛ yɩr mɛ́, á wáá zesi. 17 A háá bɩɩnɛ́ ráá ɔ́ɔ́ ná wuu, áá ɔ́ʋ́ nɛ́: á sɩ́ nyɩkɛ tulaalewa a pá veno ná ɓa háá yɩ́rɛ Bána nyúú Hákuóro, ká ɔ́ŋsɛ dɩvɛ́ŋ pɔ́ʋ́. Á tʋ́ŋ ɛ́ nɛ́ a ko aá lɛ́ zaa. Á tɩɩ, á ánáwa, á kuóre arɩ́rá sɩ́dííre má díé tʋ́ŋ ɛ́ nɛ́ Ziida tɔ́nɛ mɛ́ arɩ́ Zerizalɛmɛ ŋmɛ́ŋsɛ mɛ́. Á sɩɛ́ fa dí ɓɩdííle aá vɔksɛ, á wɩ́ɛ́ má fa cɛ́rɛ a pára, á fa wɩ wɩhála há kɔ́ʋ́ ɛ̃́. 18 Amá, a sɩɛ́ de pɔ́ tɛ́ŋ ná mɛ́, á báá há wɩ tulaale nyɩ́kɛ́ a pá bána nyúú Hákuóro, a wɩ dɩvɛ́ŋ má ɔ́ŋsɛ pɔ́ʋ́, á báá wɩ óŋ wuu kené, ká lal má rɩ́ losu cɩ́ rʋ́ʋ́ ɓʋ́ʋ́sɩ́rá tenni.»
19 Háála má súúri a bʋlɛ́: «Á fa há nyɩ́kɛ́ tulaalewa aá pá bána nyúú Hákuóro ná, ká ɔ́ŋsɛ dɩvɛ́ŋ má aá pɔ́ʋ́, á bálawa fa wɩ ɛ́ mɛ́ ɛ̃ rɛ́? Ɓa fa ɩ́ɔ̃́ weri, rɩ́ ráá pʋ́ʋ́rɛ gátóówa ɓa nɩ́ɛ́sʋ́ aá pɔ́ʋ́ rɛ́, ká fa ɔ́ŋsɛ dɩvɛ́ŋ má aá pɔ́ʋ́.»
20 Ɛ́ nɛ́ Zeremi bʋl pá ɛ́ nɩɛ wuu, báála arɩ́ háála, nɩɛ ná wuu fa há lɩ́sɛ nʋɔ nyɛ pɔ́ʋ́, a bʋlɛ́: 21 «Ɩ́ tɩɩ, ɩ́ ánáwa, ɩ́ kuóre, ɩ́ sɩ́dííre arɩ́ nɩɛ ná fa háá nyɩ́kɛ tulaalewa Ziida tɔ́nɛ mɛ́ arɩ́ Zerizalɛmɛ ŋmɛ́ŋsɛ mɛ́, ɩ́ bɩ́ɩ́nɔ́ rɩ́ Nyuutɩna Wɩɩsɛ sʋ́llɛ ɛ́ wɩ́ɛ́ mɛ́ nɛ́, a wʋ́ɔ́ wɩ́ɛ́ líísi? Aɩ́. 22 Nyuutɩna Wɩɩsɛ sɩɛ́ báá wɩ́ɩ́wa wɩ́bɔma ná rɩ́rɩ́wa wɩ́tɩ́ɛ́nnɛ ná ɩ́ há ɛ́ɛ́ wúó nyammɛ. Ɛ́ nɛ́ tɛ ɩ́ tɔ́ɔ́ a jɩɓoru, a a tɔ́wuóli, nɛ́ŋ wuu báá to ráŋ, ʋ nɛ́ ká bʋra malla, anɛ ʋ zaa há nɩhɩ̃́ nyɛ. 23 Ɩ́ há nyɩ́kɛ tulaalewa a pá venni, a aa zɔkɛ Nyuutɩna Wɩɩsɛ mɛ́, a wʋ́ʋ́ liŋó zésé, a wʋ́ʋ́ wɩ́bilé, ʋ wɩ́makɛ́ arɩ́rʋ́ cáánɛ́wa má tɩ́ŋɛ́, ɛ́ nɛ́ tɛ wɩhála né péríwa, anɛ ʋ zaa há nɩhɩ̃́ nyɛ.
24 Ɛ́ nɛ́ Zeremi bʋl ɛ́ nɩɛ wuu arɩ́ háála ná wuu rɩ́ a bʋlɛ́: «Ɩ́ zesi, Nyuutɩna Wɩɩsɛ há sʋ́ʋ́ ná, ɩ́ é Ziide nɩɛ ná wuu há mɩŋ Ezipiti mí. 25 Ɩ́ ná Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ há sʋ́ʋ́ ná: “Ɩ́ tɩɩ arɩ́rɩ́ɩ́wa háála sɛ́ rɩ́ɩ́wa nʋɔ há sʋ́ʋ́ ná, ɩ́ nɛ́ŋsa sɩ́ tʋ́mʋ́; ɩ́ sɛ́: "Á cɩ́nɔ́ tɩkɛ nʋtálɔ ná á há tɛ́ɛ́, a mʋ́ tɩ́ɩ́nɛ veno ná ɓa háá yɩ́rɛ bána nyúú Hákuóro mí, ráá nyɩkɛ tulaalewa pɔ́ʋ́ ká ɔ́ŋsɛ dɩvɛ́ŋ má pɔ́ʋ́. Ɩ́ sɩɛ́ ɓɩɛ́na tʋ́ŋ ɛ́ nɛ́. Ɛ́ wéró, ɩ́ a rɩ́wa nʋtallɛ nʋɔ sú! 26 Ɛ́ wɩ́ɛ́, ɩ́ zésí Nyuutɩna Wɩɩsɛ há sʋ́ʋ́ ná, ɩ́ é Ziida nɩɛ ná há mɩ́ŋ Ezipiti mí. Nyuutɩna Wɩɩsɛ sɛ́, ŋ ŋmɩ́ɛ́sɩ́ŋ yɩzeno ná mɛ́: Ezipiti wuu mí, Ziida nɛ́ŋ wuu báá wɩ́ŋ yɩr yɩ́rɛ rɩ́ɩ́ bʋlɛ́: “Nyuutɩna Wɩɩsɛ há wómmó yɩr mɛ́...” 27 Ŋ sɩ́ héŋ taŋá wuu, rɩ́ wɩhála nɛ́ péríwó, amá wér é rá. Lal arɩ́ losu nɛ́ sɩ́ ɓʋ́ʋ́sɛ Ziida nɩɛ ná wuu há mɩŋ Ezipiti mí a mʋ́ tenni. 28 Nɩɛ mʋɔ́ dʋŋɔ nɛ́ sɩ́ wólli lú lɛ́ lal mɛ́, a lɛ Ezipiti mí a bɩrko Ziida tɔ́ɔ́. Ɛ́ mɛ́ nɛ́ rɩ́ Ziida nɩkáánɛ ná há kúé zʋ zʋ́zʋ́llɛ Ezipiti mí sɩɛ́ zɩ́ŋ, nɛ́ŋ ná wɩ́bʋlɛ́ háá cɩ́nɛ́, rɩ́ŋ wɩ́bʋlɛ́ nɩ́ɩ́ cɩ́nɛ́, ɛ́ ráá má rɩ́ ɓa ɓɩɛ́ nɩ́ɩ́ cɩ́nɛ́. 29 Ná nyɩ́nɛ ná háá máŋsɛ́ rɩ́ŋ sɩ́ cɩ́nɩ́wa mɛ́, dɩhɩ̃́ né, a a rɩ́wa zɩ́ŋ rɩ́ŋ wɩ́bʋlɛ́ ná nʋɔ sɩ́ sú, rɩ́ wɩhála péríwa. Nyuutɩna Wɩɩsɛ nɛ́ bʋl ɛ́. 30 Nyuutɩna Wɩɩsɛ há sʋ́ʋ́ ná: Ŋ sɩ́ ká Ezipiti kuóro Faarɔŋ Hofra hóú dɩŋdɔma, nɩɛ ná háá jɔ́ʋ́ mɩɩsɛ lɩ́sɛ, nɛ́sɛ mɛ́ anɛ ɛ́ ŋ há kéŋ Ziida kuóro Sedesiyasɛ hóú dɩŋdɔmɔ Babɩlɔɔnɛ kuóro Nabikanezaarɛ háá jɔ́ʋ́ mɩɩsɛ lɩ́sɛ, nɛ́sɛ mɛ́.”»