Ɓa kéŋ Zeremi bɩbarɩ́ a mʋ́ Ezipiti
43
1 Zeremi há bʋ́l wɩ́ɛ́ ná wuu Nyuutɩna Wɩɩsɛ, ɓa Wɩɩsɛ há bʋ́lɛ́ pɔ́ʋ́, a pá nɩɛ ná wuu fa há mɩŋ ráŋ, wɩ́ɛ́ ná wuu Nyuutɩna Wɩɩsɛ, ɓa Wɩɩsɛ há sʋ́ʋ́ bʋl pɔ́wɔ́, 2 Hosaya bio Azariya, rɩ́ Kareya bio Yohanaŋ arɩ́ nɩmɔnna ná wuu bʋl Zeremi rɩ́ a bʋlɛ́: «Ɩ wɩ́bʋlɛ́ ná ká nyɩ́ɛ́nnʋ́! Nyuutɩna Wɩɩsɛ, á Wɩɩsɛ raa wɩ́ɩ́ tʋ́mɛ́, rɩ́ɩ́ bʋl párá, a bʋlɛ́: Ɩ́ sɩ́ Ezipiti mʋ́, rɩ́ɩ́ a zʋ́zʋ́llɛ. 3 Amá Neriya bio Baruki ní yíkí rɩ́ɩ́ bʋl wɩ́ɛ́ cɩ́ŋrá mɛ́. Ʋʋ́ ja rɩ́ Kalde nɩɛ kɛ́sɩ́rá, a ɓʋ́ʋ́sɩ́ra ɛ́ rá má rɩ́wɔ́ kɛ́sɩ́rá col Babɩlɔɔnɛ nɛ́.»4 Ɛ́ nɛ́ Kareya bio Yohanaŋ rɩ́ sóójipúlli nyúútɩ́náwa ná wuu arɩ́ nɩɛ ná fa há tɩ́ŋwɔ́ har vɛ rɩ́wɔ́ zesi Nyuutɩna Wɩɩsɛ fa há bʋ́lʋ́ ná aá pɔ́wɔ́, a vɛ rɩ́wɔ́ ké Ziida tíé mí. 5 Kareya bio Yohanaŋ arɩ́ sóójipúlli sɩ́dííre ná wuu kɛ́sɛ́ Ziida nɩkáánɛ ná wuu fa há la sɩ́ɛ́ a pɩsɛ zʋ duowa ná wuu há lɛ́lwɔ́ sɩɛnnɛ, ká bɩr ko ké Ziida tíé mí: 6 báála, háála rɩ́ heŋbiisi, kuóro tolé, nɩɛ ná wuu pʋ́pɔ́ɔ́rɔ nyúútɩ́na Nebuzaradaŋ fa há píé hé Ahikaŋ bio Gedaliya ná há ká Safaŋ nihĩ nɛ́sɛ mɛ́. Ɓa pɛ́ ka Wɩɩsɛ wɩ́laabʋllɔ Zeremi má arɩ́ Neriya bio Baruki a kaa col. 7 Ɛ́ wɩ́ɛ́, ɓa vɛ́ Nyuutɩna Wɩɩsɛ há sʋ́ʋ́ ná a pɔ́wɔ́, ká mʋ́ Ezipiti, a mʋ́ ké Tapanɛsɛ mɛ́.
Zeremi bʋ́l Ezipiti lɛɛ wɩ́ɛ́
8 Tapanɛsɛ mɛ́, Nyuutɩna Wɩɩsɛ bʋ́l Zeremi rɩ́ a bʋlɛ́: 9 «Pa dɔ́wɩ́zeŋse, a húwó koro ná há mɩŋ Faarɔŋ jaa dánnʋɔ mɛ́ tɛŋ sɩɛrʋ, Tapanɛsɛ mɛ́. Tʋŋ ɛ́ Ziida nɩɛ sɩ́ɛ́ mɛ́. 10 Ká rɩ́ɩ́ bʋ́lwɔ́ rɩ́ a bʋlɛ́: “Ná Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ há sʋ́ʋ́ ná: Ŋ sɩ́ a rɩ́wɔ́ mʋ́ kánɩ́ŋ tʋtʋnnɔ, Babɩlɔɔnɛ kuóro Nebikanezaarɛ ko. Dɔ́wʋ́ɔ́ nyáŋ ŋ há húé daha nɛ́, ŋ sɩ́ bílú kuóɓasa. Ɛ́ dɩhɩ̃́ nɛ́ ʋ sɩ́ cíkú kuótáŋtɛ. 11 Ʋ sɩ́ ko, a zɔkɛ Ezipiti. Ɛ́ mɛ́ nɛ́, rʋ́ʋ́ ɓʋ́ nɩɛ ná há mɔhɛ̃́ rɩ́wɔ́ sʋsɛ, a kɛsɛ nɩɛ ná há mɔhɛ̃́ rɩ́wɔ́ mʋ́ yomí sɩɛrʋ, rɩ́wɔ́ a yósí, ká rɩ́ tókowí ɓʋ́ʋ́sɛ nɩɛ ná há mɔhɛ̃́ rʋ́ʋ́ ɓʋ́ʋ́sɛ. 12 Ŋ sɩ́ a rɩ Nebikanezaarɛ nyɩkɛ Ezipiti nɩɛ veŋjɩɩsɛ. Ʋ sɩ́ nyɩ́kwɔ́ ká pɔ́wɔ́ venni kaa col Babɩlɔɔnɛ, ʋ sɩ́ ɓósi Ezipiti kuóɓɩ́ɛ́ wuu anɛ ɛ́ penʋɔlɔ háá ɓósú gɛrɔ kʋ́ɛ́wa. Ká col rɩ́ tɛŋfɩ́ɛ́l. 13 Ʋ sɩ́ yɛ́rkɛ dɔ́wɩ́zeŋse ná ɓa há cɔ́ŋsɛ aá ɓaarɛ́ Bɛtsemɛɛsɛ mɛ́, Ezipiti tíé mí, ká nyɩkɛ Ezipiti nɩɛ veŋjɩɩsɛ.”