Nɩkáánɛ ná sʋ́l cáánɛ Zeremi rɩ́
42
1 Ɛ́ nɛ́ sóóji nyúútɩ́náwa ná wuu, Kareya bio Yohanaŋ, rɩ́ Hosaya bio Yezaniya, arɩ́ nɩɛ ná wuu fa há mɩŋ púlli ná sɩɛnnɛ, a pɔ́ heŋbie mí ká mʋ́ yakɛ nɔhɔ̃́ mɛ́, isi, 2 a mʋ́ ná Wɩɩsɛ wɩ́laabʋllɔ Zeremi.Ɓa bʋ́lʋ́ rɩ́ a bʋlɛ́: «Áá jɛ́nnɩ́ rɛ́, sáŋrá sʋlɛ́: Sʋl Nyuutɩna Wɩɩsɛ ɩ Wɩɩsɛ wérí a pá rá é nɩkáánɛ nyáŋ wuu, bee wɩ́ɛ́, ɩ tɩɩ nóó rí, á nɩɛ fa káŋ, ká á báá wɩ óŋ mɔhɛ̃́. 3 Bɔsɛ Nyuutɩna Wɩɩsɛ, ɩ Wɩɩsɛ a pára, rʋ́ʋ́ a ráá zɩŋrá dɩmʋ́ɩ́ arɩ́rá wɩ́'aalɩ́.»
4 Wɩɩsɛ wɩ́laabʋllɔ Zeremi bʋ́lwɔ́ rɩ́ a bʋlɛ́: «Ŋ nɩ́ɔ́ rɛ́! Ŋ sɩ́ sʋl Nyuutɩna Wɩɩsɛ, ɩ́ Wɩɩsɛ anɛ ɛ́ ɩ́ há bʋ́lɛ́; ɛ́ har mɛ́, ŋ sɩ́ a rɩ́ɩ́wa zɩŋ Nyuutɩna Wɩɩsɛ há sʋ́ʋ́ ná; ŋ wɩ wɩ́ɩ́ káá féŋsíwa mɛ́.»
5 Ɓa bʋ́l Zeremi rɩ́ a bʋlɛ́: «Rɩ́ raá nɛ́ wɩ Nyuutɩna Wɩɩsɛ, ɩ Wɩɩsɛ há sʋ́ʋ́ ná wuu a pɛ́ɩ́, ɩ bʋl párá tɩ́ŋɛ́ rɩ́ taŋá, rɩ́ Nyuutɩna Wɩɩsɛ nɛ́ a ráá nʋtálɔ́ né dáŋsɩ́ɛ́ taŋá nɛrɔ ná há wáá báásɛ, a cɩ́rá mɛ́. 6 Ráá có, ráá wɩ có, á sɩ́ zesi Nyuutɩna Wɩɩsɛ, á Wɩɩsɛ ná á há tʋ́mɩ́ ʋ rɩ́ liŋó; ɛ́ é, á wɩ́ɛ́ wuu sɩ́ cɛ́rɛ párá, bee wɩ́ɛ́, á sɩ́ saŋ Nyuutɩna Wɩɩsɛ, á Wɩɩsɛ liŋó.»
7 Tápʋlɛ́ fí har mɛ́, Nyuutɩna Wɩɩsɛ púú liŋó a pá Zeremi. 8 Ɛ́ nɛ́, ʋ yɩ́rɛ Kareya bio Yohanaŋ rɩ́ lalyóórípúlli nyúútɩ́náwa ná wuu há tɩ́ŋʋ́ mɛ́, arɩ́ nɩɛ ná wuu, a pɔ́ heŋbie mí ká mʋ́ yakɛ nɔhɔ̃́ mɛ́. 9 Ʋ bʋ́lwɔ́ rɩ́ a bʋlɛ́: «Ɩ́ tʋ́mɩ́ŋ rɩ́ŋ sʋl Nyuutɩna Wɩɩsɛ, Ɩzɩrayɛl Wɩɩsɛ, a pɛ́ɩ́wa; ɩ́ sɩɛ́ nóú há sʋ́ʋ́ ná:
10 “Rɩ́ɩ́wa nɛ́ sáŋɛ́ ké tɔ́ɔ́ né sɩɛrʋ,
ŋ sɩ́ bɩr sɔ́ɩ́wa tɔ́ɔ́ pɛ́ɩ́wa, ŋ báá wʋ́ʋ́ zɔkɛ;
ŋ sɩ́ a rɩ́ɩ́wa nalursi zʋ tíé, ŋ báá wɩ́ɩ́wa cúnni.
Ŋ sɩ́ bʋlɛ́, rɩ́ŋ fa ɩ́ɔ̃́;
ŋ wɩ lóé rɩ́ wɩhála péríwa.
11 Mʋ́l né mí, ɩ́ báá sɩ́ Babɩlɔɔnɛ kuóro ná, ɩ́ fa háá fɛ́ɛ́ fá.
Ŋ é Nyuutɩna Wɩɩsɛ nɛ́ bʋ́lɛ́:
Ɩ́ sʋ́ʋ́ fá, bee wɩ́ɛ́, ŋ mɩ́nɩ́wa har,
rɩ́ŋ lɛ́ɩ́wa tá, ká kɛ́rʋ́ mɛ́ rʋ́ʋ́ sɩ́ɩ́wa wɩ́bɔ́ŋ a.
12 Ŋ sɩ́ fɛ́ɩ́wa susu,
rʋ́ʋ́ má fɛ́ɩ́wa susu,
a ló rɩ́ɩ́wa bɩr kóíwa tɔ́ɔ́.”»
13 Amá rɩ́ɩ́wa nɛ́ sɛ́: Á wɩ tɔ́ɔ́ né sɩɛrʋ́ ké, rɩ́ɩ́wa nɛ́ vɛ́ rɩ́ɩ́wa zíl Nyuutɩna Wɩɩsɛ, ɩ́ Wɩɩsɛ liŋó, 14 káá bʋ́lɛ́: Aɩ́, á ráá mʋ́ Ezipiti ní, a makɛ ráá sɩ́ɩ́ báá sɩ́ lal ná, a báá sɩ́ lalnyɩ́la mui nɛ̃, a báá sɩ́ losu wɩɩla ná. Ráŋ nɛ́ á sɩ́ ké. 15 Ɛ́ wɩ́ɛ́, ɩ́ zesi Nyuutɩna Wɩɩsɛ liŋó né wérí, ɩ́ é Ziida nɩkáánɛ nyáŋ. Ná Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ há sʋ́ʋ́ ná:
“Rɩɩ́wa nɛ́ ɓɩɛ́na já
rɩ́ɩ́wa mʋ́ Ezipiti,
rɩɩ́wa nɩ́ɩ́ ja rɩ́ɩ́wa mʋ́ ráŋ a a zʋ́zʋ́llɛ,
16 lal ná héwíŋ há keníwa,
sɩ́ púíwa ráŋ, Ezipiti mí;
losu ná wɩ́ɛ́ há ká hiĩne a pɛ́ɩ́wa,
sɩ́ tɩ́ŋɩ́wa naasɛ a ko kɛ́sɩ́wa ráŋ, Ezipiti mí,
ráŋ nɛ́ sɩɛ́ rɩ́ɩ́wa sʋsɛ.
17 Nɩɛ ná wuu há sɩ́ bɩɩnɛ
rɩ́wɔ́ mʋ́ a zʋ́zʋ́llɛ Ezipiti mí
sɩ́ sʋsɛ ráŋ, a tɩŋ lal, losu arɩ́ dɩwɩlbɔmɔ mɛ́.
Nɛ́ŋ oro wuu waá lúú lɛ, rɩ́ɩ́ káánɛ,
wɩhála ná ŋ há sɩ́ a rʋ́ʋ́ kówó mí.”»
18 Zeremi báá sɛ́: Ɛ́ wɩ́ɛ́, ná Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ há sʋ́ʋ́ ná: “Anɛ ɛ́ ŋ cɔwɩɩlɩ́zeno há túwí Zerizalɛmɛ nɩɛ nyúú, ɛ́ tɩɩ nɛ́, ŋ cɔwɩɩlɔ́ sɩ́ túwíwa nyúú, rɩɩ́wa nɛ́ mʋ́ Ezipiti. Rɩ ɓa nɛ́ kúé aá ja rɩ́wɔ́ bʋrɛ, ɛ́ rá má rɩ́ ɓá bʋl wɩ́tɔ́k wɩ́ɛ́, ŋmɔ́ɔ́ wɩ́ɛ́, ɛ́ rá má wɩ́ɩ́ ná há kéŋ hɩɩ̃sɛ wɩ́ɛ́, ɩ́ nɛ́ rɩ́wɔ́ pii máŋsɛ. Ɩ́ wáá bɩr ná dɩhɩ̃́ né.”»
19 Ziida nɩkáánɛ, Nyuutɩna Wɩɩsɛ nɛ́ sɛ́: Ɩ́ sɩ́ Ezipiti mʋ́. Zaa, ŋ cáásɔ́ bʋ́lʋ́ fɛ́l sɩ́ɩ́ aá pɛ́ɩ́wa, ɩ́ zesi wérí. 20 Ɩ́ tɛ́lɩ́wa tɩɩ, bee wɩ́ɛ́, ɩ́ tʋ́mɩ́ŋ Nyuutɩna Wɩɩsɛ, ɩ́ Wɩɩsɛ rɩ́, a bʋlɛ́: “Sʋl Nyuutɩna Wɩɩsɛ, á Wɩɩsɛ párá; bʋl Nyuutɩna Wɩɩsɛ, á Wɩɩsɛ há sʋ́ʋ́ ná wuu párá, á sɩ́ tɩŋ.” 21 Zaa sɩɛ́, ŋ bʋ́lʋ́ pɛ́ɩ́wa, amá ɩ́ wɩ Nyuutɩna Wɩɩsɛ, ɩ́ Wɩɩsɛ liŋó zésé, ɩ́ wɩ wɩ́ɛ́ ná má wuu ʋ há sɩ́ŋ bʋl pɛ́ɩ́wa zésé. 22 Mʋ́l né mí sɩɛ́, ɩ́ zɩŋ rɩ́ lal rɩ́ losu ɛ́ rá má dɩwɩlbɔmɔ nɛ́ sɩ́ ɓʋ́ɩ́wa ráŋ ná tɩɩ, ɩ́ háá já rɩ́ɩ́wa mʋ́ a zʋ́zʋ́llɛ!»