2Kuo 25.25-26
41
1 Ɛ́ bɩna sɩɛrʋ, caŋsɛ balpɛ nyúú mí, Netaniya bio Ɩsɩmayɛl há ká Elisama nihĩ, a a kuóro dunɛ́ŋ, ká a kuóro tʋtʋnnɩhɔ̃́ nɔ́ŋɔ má, kó Ahikaŋ bio Gedaliya rɩ́, Misipa mɛ́. Ʋ rɩ́ báála fí ní fa kúé. Tɛ́ŋ ná mɛ́, ɓa rɩ́ kuóro há kéné aá dí ɓɩɛ, 2 naasɩ́ balá rɩ Netaniya bio Ɩsɩmayɛl rɩ́ báála ná fí déé isi ɓʋ́ Ahikaŋ bio Gedaliya há ká Safaŋ nɩhĩ, rɩ́ tokowíé. Nyɛ́ nɛ́ ɓa ɓʋ́ nɛ́ŋ ná Babɩlɔɔnɛ kuóro fa há lɩ́sɛ́ rʋ́ʋ́ ka tɔ́ɔ́ ná ké. 3 Ká Ɩsɩmayɛl ɓʋ́ʋ́sɛ Ziide nɩɛ ná má wuu fa há mɩŋ Gedaliya rɩ́, Misipa mɛ́, a súúri Kalde nɩɛ sóójiwa ná má fa há mɩŋ ráŋ.Ɩsɩmayɛl ɓʋ́ nɩɛ mɛɛ́sɩ́baná
4 Ɓa há ɓʋ́ Gedaliya, tápʋlɛ́ bɛllɛ nɛ́ ká nɛ́ŋ wʋ́ʋ́ sʋʋ wɩ́ɛ́ nɩ́ɛ́. 5 Ɛ́ tɛ́ŋ mɛ́, rɩ báála mɛɛ́sɩbaná má lɛ́ Sɩsɛmɛ, Silo arɩ́ Samari a ko. Ɓa tɔmɔ fa píéró, ɓa gɛnnɛ má cɔ́nnɛ, ká ɓa tɛŋkɛnnɛ wuu kʋsɛ kʋsɛ. Ɓa fa cɩ́ɩ́nɛ bilé arɩ́ áŋsáŋsɛ rɩ́wɔ́ kaa mʋ́ Wɩcʋɔlɩjɩzeno ná há mɩŋ Zerizalɛmɛ mɛ́ a a satɔ́ɔ́rɩ́pálɔ a pá Nyuutɩna Wɩɩsɛ. 6 Netaniya bio Ɩsɩmayɛl lɛ́ Misipa mɛ́ a céŋwó, a vaá wi. Ʋ há mʋ́ɛ́ a péríwó, ʋ bʋ́lwɔ́ rɩ́ a bʋlɛ́: «Ɩ́ ko Ahikaŋ bio Gedaliya jaa.»
7 Amá ɓa há zʋ́ tɔ́ɔ́ sɩɛrʋ a tenni, Netaniya bio Ɩsɩmayɛl rɩ́rʋ́ nɩɛ ná ísó a ɓʋ́ʋ́sɩ́wɔ́ a paa yoo hé vílɓoo sɩɛrʋ. 8 Ká ɓa sɩɛrʋ nɩɛ fí sɩɛ́ fa bʋ́l Ɩsɩmayɛl rɩ́ a bʋlɛ́: «Sɩ́ rá ɓʋ́ʋ́sʋ́, bee wɩ́ɛ́, á bɩ́rmɛ́ ɓɩdííle a féŋsi gɩr sɩɛrʋ: bilé, ɔ́rzɛ, nʋʋ arɩ́ tʋʋ.»
Ɛ́ nɛ́ Ɩsɩmayɛl wʋ́ɔ́ é ɓʋ́ʋ́sɛ́ anɩ́wɔ́ náŋá ná. 9 Vilɓoo ná sɩɛrʋ Ɩsɩmayɛl há ɛ́ɛ́ ɓa pa báála ná rɩ́ Gedaliya ʋ há ɓʋ́ʋ́sɛ́, a yoo hé ní fa ká vilzeno ná kuóro Aza fa há ɛ́ɛ́ ɓa lú tɛ́ŋ ná mɛ́ ʋ rɩ́ Ɩzɩrayɛl kuóro Basa háá yo náŋá. Netaniya bio Ɩzɩmayɛl ɔ́ɔ́ ɓa pa sʋsɛ súú.
10 Ɛ́ har mɛ́ nɛ́, Ɩsɩmayɛl kɛsɛ nɩkáánɛ ná wuu fa há mɩŋ Misipa mɛ́, a kaa mʋ́ yomí sɩɛrʋ:ɓa nɛ́ ká kuóro tolé, arɩ́ nɩɛ ná pʋ́pɔ́ɔ́rɔ nɔhɔ̃́ Nebuzaradaŋ fa há sɛ́ Ahikaŋ bio Gedaliya bíbélwó mí, a kaa col. Netaniya bio Ɩsɩmayɛl kéŋ ɛ́ yósi col, a kaa mʋ́ Amɔŋ duo nɩɛ rɩ́.
Ɩsɩmayɛl nɩkɛ́sɛ́ ná laatɛ́
11 Kareya bio Yohanaŋ arɩ́ lalyóórípúlli nyúútɩ́náwa ná wuu fa há mɩ́nʋ́ har nɛ̃́ bɔ́ŋbɔ́ŋ ná wuu Netaniya bio Ɩsɩmayɛl fa há ɛ́ɛ́ wɩ́ɛ́. 12 Ɛ́ nɛ́ ɓa kɛ́sɩ́wɔ́ lalyoore wuu rɩ́wɔ́ mʋ́ yo Netaniya bio Ɩsɩmayɛl. Ɓa kiri mʋ́ púú Gabaɔŋ fozeno ná laka. 13 Ɩsɩmayɛl nɩkɛsɛ́ ná wuu há yó sɩ́ɩ́ a ná Kareya bio Yohanaŋ arɩ́rʋ́ lalyóórípúlli nyúútɩ́náwa ná wuu há mɩ́nʋ́ har, ɓa tɛŋ pɔ́rɔ́. 14 Ɛ́ mɛ́ nɛ́ sɩɛ́, nɩɛ ná wuu Ɩsɩmayɛl fa há kɛ́sɛ́ Misipa mɛ́ ɓa a bɩnajaa nɩɛ́, bɩr mʋ́ a tɩŋ Kareya bio Yohanaŋ mɛ́. 15 Amá Netaniya bio Ɩsɩmayɛl kéŋ nɩɛ córi a fá Yohanaŋ sɩ́ɛ́ mɛ́, a daarɛ Amɔŋ duo nɩɛ rɩ́.
16 Ɛ́ har mɛ́, Kareya bio Yohanaŋ arɩ́ lalyóórípúlli nyúútɩ́nawa ná wuu fa há mɩ́nʋ́ har, la nɩkáánɛ ná wuu Netaniya bio Ɩsɩmayɛl fa há kɛsɛ Misipa mɛ́, Ahikaŋ bio Gedaliya ɓʋ́ɩ́ ná har mɛ́, a tɩ́ŋwɔ́ har. Ɓa ɛ́ nɩɛ nɛ́ ká: báála ná há ká sóójiwa, háála, heŋbíísi, tʋtʋnnɩhɩ́ɛ̃́sɛ arɩ́ nɩɛ ná wuu ɓa fa há kené lɛ Gabaɔŋ mɛ́. 17 Ɓa mʋɔ́ a cɛ́ Kimehaŋ nɩhʋɔra dɩcɩkɩ́ ná há mɩŋ Betelɛyɛmɛ laka ká rɩ́wɔ́ isi mʋ́ Ezipiti, 18 a fá kɛkɛ Kalde nɩɛ mɛ́, bee wɩ́ɛ́, a de pɔ́ tɛ́ŋ ná mɛ́ Netaniya bio Ɩsɩmayɛl há ɓʋ́ Ahikaŋ bio Gedaliya, ɓaá fá Kalde nɩɛ. Gedaliya náá nɛ́ fa Babɩlɔɔnɛ kuóro fa lɩ́sɛ rʋ́ʋ́ ka tɔ́ɔ́ ná ké.