39
1 Sedesiyasɛ há dí Ziida kuorí bɩŋsɛ nɛ́mɛ́ nyúú mí, ʋ caŋsɛ fí nyúú mí ní, Babɩlɔɔnɛ kuóro Nabikanezaarɛ rɩ́rʋ́ lalyoore wuu ko cɛ́ Zerizalɛmɛ sɩ́ɛ́, a tɔ́ʋ́ hé.2 Sedesiyasɛ kuorí díí bɩŋsɛ fí arɩ́ balá nyúú mí, ʋ caŋsɛ baná, tápʋlɛ́ nɛ́mɛ́ kal, Babɩlɔɔnɛ lalyoore vúrki tɔ́ɔ́ ná zekɛ́rɛ.3 Babɩlɔɔnɛ kuóro tʋtʋnna ná wuu sɩɛ́ zʋ tɔ́ɔ́ ná sɩɛrʋ a ké Sɩsɩɛrʋ dánnʋɔ mɛ́. Nɩɛ nyáŋ nɛ́ fa mɩŋ ráŋ: Sóójiwa nɔhɔ̃́ Nerigalsarɛsɛr ná há ká zɩmɛ́tɩ́náwa nɔhɔ̃́, Samɩgarɛnebo, Sarisekiŋ arɩ́ Babɩlɔɔnɛ kuóro tʋtʋnna ná náŋa wuu.
4 Ziida kuóro Sedesiyasɛ arɩ́rʋ́ lalyoore ná wuu há nówó, ɓa fɔ́ɔ́. Tɩ́táŋ nɛ́, ɓa tɩŋ kuóro záádɛ́ ŋmɛ́nɔ a mʋ́ tɩŋ dánnʋɔ ná há mɩŋ zeŋe ná bɛllɛ pɛ́kɛ, a lɛ́ tɔ́ɔ́ ná mɛ́, a pi Zʋrdɛŋ polo ŋmɛ́nɔ a fá. 5 Amá Kalde nɩɛ lalyoore kíró tɩ́ŋwɔ́ mɛ́, a mʋ́ pu Sedesiyasɛ Zeriko típaŋtaŋɩ́ ná mɛ́. Ɓa kánʋ́ mʋ́ pá Babɩlɔɔnɛ kuóro Nabikanezaarɛ, rʋʋ fa ha mɩŋ Ribila mɛ́, Hamatɛ dɩtɩ́llɛ mɛ́. Ráŋ nɛ́ Nabikanezaarɛ dí Sedesiyasɛ sarɩ́ya. 6 Ribila mɛ́, Babɩlɔɔnɛ kuóro ɔ́ɔ́ ɓa kɔ́rkɛ Sedesiyasɛ bɛlɛ, ʋ sɩ́ɛ́ mɛ́. Babɩlɔɔnɛ kuóro ɔ́ɔ́ ɓa kɔ́rkɛ Ziida nɩhɩ́ɛ̃́sɛ má wuu. 7 Ɛ́ har mɛ́ nɛ́, ʋ a ɓa tóksí Sedesiyasɛ sɩ́ɛ́, ká vɔ́wʋ́ rɩ́ kɔmɔ́ bɛŋzɛllɛ bɛllɛ, a kánʋ́ mʋ́ Babɩlɔɔnɛ.
8 Kalde nɩɛ nyɩ́kɛ kuóro jaa arɩ́ nɩɛ jɩɩsɛ. Ɓa gínni Zerizalɛmɛ tɔ́ɔ́ zeŋkɛ́rɛ. 9 Ká kuóro pʋ́pɔ́ɔ́ra nyúútɩ́na Nebuzaradaŋ kɛsɛ nɩɛ ná fa há mɩŋ tɔ́ɔ́ pʋmmɔ sɩɛrʋ rɩ́ nɩɛ ná fa há saŋɛ́ a píwó tɩɩ a pɔ́wɔ́, arɩ́ nɩkáánɛ ná wuu, a kaa col Babɩlɔɔnɛ. 10 Nɩyaara ná há wɩ óŋ kené, náŋa nɛ́ ʋ lɩ́sɛ a tá Ziida mɛ́, a pɔ́wɔ́ víínyi baksɛ arɩ́ bakparɛ́.
Zeremi ná laatɛ́
11 Ná líŋsi ná kuóro Nabikanezaarɛ há máŋsɛ a pá pʋ́pɔ́ɔ́ra nyúútɩ́na Nabuzaradaŋ a mʋ́ tɩɩnɛ Zeremi mí: 12 «Mʋ́ ká Zeremi, a bélú mí, sʋ́ʋ́ bɔ́ŋbɔ́ŋ á, amá a óŋ ná wuu ʋ háá jɛɛ́ a pɔ́ʋ́!» 13 Pʋ́pɔ́ɔ́ra nyúútɩ́na Nebuzaradaŋ rɩ́ Nebusazbaŋ há ká zɩmɛ́tɩ́náwa nɔhɔ̃́, rɩ́ sóójiwa nɔhɔ̃́ Nɛrgasarɛsɛr arɩ́ Babɩlɔɔnɛ kuóro tʋtʋnnɩhɩ́ɛ̃́sɛ náŋá; 14 tʋŋ nɩɛ rɩ́wɔ́ mʋ́ lɩ́sɛ Zeremi kuóro pʋ́pɔ́ɔ́ra wuolo ná sɩɛrʋ, a kánʋ́ mʋ́ hé Ahikaŋ bio Gedaliya há ká Safaŋ nihĩ nɛ́sɛ mɛ́, rɩ́ Gedaliya lo rʋ́ʋ́ mɩ́nʋ́ rɩ́. Ɛ́ nɛ́ ɓɩɛ́na ɛ́ɛ́ Zeremi ko mɩŋ nɩɛ sɩɛrʋ.
Ebɛdmɛlɛkɛ laatɛ́ wɩ́ɛ́
15 Nyuutɩna Wɩɩsɛ liŋó né pérí Zeremi, rʋʋ fa ha mɩŋ kuóro pʋ́pɔ́ɔ́ra wuolo ná sɩɛrʋ nɛ́. Ʋ nɛ́ ká: 16 «Mʋ́ bʋl pá Etiopi nɩɛ báálɔ Ebɛdmɛlɛkɛ a bʋlɛ́: “Ná Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ há sʋ́ʋ́ ná: Ŋ sɩ́ a rɩ́ŋ wɩ́bʋlɛ́ ná nʋɔ sú, rɩ́ bɔ́ŋbɔ́ŋ pérí tɔ́ɔ́ né, ká rɩ́ wér sʋ́ʋ́ pérú; ɛ́ kál, ɩ tɩɩ sɩ́ɩ́ sɩ́ nóú. 17 Ɛ́ kal, ŋ sɩ́ lɛ́ɩ́ tá; ŋ sɩ́ pɔ́ rɩ́ɩ́ sɩ́ nɩɛ ná ɩ háá fɛ́ɛ́ sɩ́ɩ́ kánʋ́, Nyuutɩna Wɩɩsɛ nɛ́ bʋl ɛ́. 18 Ŋ sɩ́ lɛ́ɩ́ tá, tókowí wɩ́ɩ́ ɓʋ́, ɩ sɩ́ ká mɩɩsɛ, beé wɩ́ɛ́, ɩ láŋ dí rɩ́ taŋá, Nyuutɩna Wɩɩsɛ nɛ́ bʋl ɛ́.”»