Ɓa yo Zeremi hé vilɓoo sɩɛrʋ
38
1 Mataŋ bio Sefatiya rɩ́ Pasehur bio Gedaliya, rɩ́ Selemiya bio Yukal, arɩ́ Malkiya bio Pasehur nɛ̃́ wɩ́ɛ́ ná Zeremi fa há bʋ́lɛ́ aá pá nɩɛ wuu, a bʋlɛ́: 2 «Ná Nyuutɩna Wɩɩsɛ há sʋ́ʋ́ ná: “Nɛ́ŋ ná wuu há sɩ́ káánɛ tɔ́ɔ́ né sɩɛrʋ, lal ɛ́ rá má losú ɛ́ rá má dɩwɩ́lbɔmɔ nɛ́ sɩ́ ɓʋ́ʋ́. Amá nɛ́ŋ ná há sɩ́ saŋ a púú tɩɩ a hé Kalde nɩɛ nɛ́sɛ mɛ́, ɓa wʋ́ʋ́ ɓʋ́, ká rʋ́ʋ́ wólli ká mɩɩ̃sɛ é, aá hiẽsi.”»3 Zeremi báá sɛ́: Ná Nyuutɩna Wɩɩsɛ há bʋlʋ́ ná: Tɔ́ɔ́ né ɓɩɛ́na sɩ́ zʋ Babɩlɔɔnɛ kuóro lalyoore nɛ́sɛ, rɩ́wɔ́ tɩ́llʋ́.»
4 Ɓa há zésí ɛ́ wɩ́ɛ́ ko tenni, kuóro Sedesiyasɛ minísíwa bʋ́lʋ́ rɩ́ a bʋlɛ́: «Áá sʋ́lɩ́, a rɩ́wɔ́ ɓʋ́ Zeremi, bee wɩ́ɛ́, ʋ wɩ́bʋlɛ́ ná yʋ́ɔ́rɛ́ sóójikáánɛ ná naasɛ arɩ́ nɩɛ ná wuu há mɩŋ tɔ́ɔ́ né mí. Ʋ wɩ bʋ́lɛ́ aá ja nɩɛ ɔsɛ́ nɛ́, ʋ bʋ́lɔ́ aá jáwɔ́ zɔ́kɛ́ nɛ́.»
5 Ɛ́ nɛ́ kuóro Sedesiyasɛ bʋ́lwɔ́ rɩ́ a bʋlɛ́: «Ʋ mɩ́nɩ́wa nɛ́sɛ mɛ́, ŋ é kuóro wɩ́ɩ́wa mɛ́ wuó kɛ́rɛ.»
6 Ʋ minísíwa sɩɛ́ ɓɩɛ́na ka Zeremi mʋ́ hé kuóro bio Malkiya vilɓoo sɩɛrʋ. Ɛ́ vilɓoo fa mɩŋ bɩnajaa wuolo ná sɩɛrʋ nɛ́. Ŋmɛ́sɛ nɛ́ ɓa píí vɔwɛ Zeremi, a tɔ́ʋ́ ʋ tuwi vilɓoo ná sɩɛrʋ. Nyii fa to ɛ́ vilɓoo sɩɛrʋ, amá vɩcɔ dʋŋɔ nɛ́ fa, Zeremi zʋʋ mʋ́ʋ́rɩ́wɔ́ sɩɛrʋ.
7 Etiopi nɩɛ báálɔ oro sɩɛ́ fa há ká tʋtʋnnɩhɔ̃́, a mɩŋ kuóro jaa mɛ́, ɓaá yɩ́rʋ́ Ebɛdmɛlɛkɛ. Ʋ nɩ́ɔ́ rɩ ɓa pí Zeremi hé vilɓoo sɩɛrʋ. Rɩ́ kuóro é fa ké Bɛŋzamɛ dánnʋɔ mɛ́. 8 Ebɛdmɛlɛkɛ lɛ kuóro jaa mɛ́, a ko bʋ́lʋ́ rɩ́, a bʋlɛ́: 9 «Nyuutɩna, ŋ kuóro, nɩɛ nyáŋ há tʋ́mʋ́ ná wuu wɩ́laabʋllɔ Zeremi mí, ká wɩ́bɔ́ŋ rɛ́; ɓa yóú hé vilɓoo sɩɛrʋ! Losu sɩ́ ɓʋ́ʋ́ ráŋ, bee wɩ́ɛ́, ɓɩdííli yɩr báá waá yɩ́rɛ tɔ́ɔ́ ná sɩɛrʋ.»
10 Ɛ́ nɛ́ kuóro Sedesiyasɛ máŋsɛ nyɛ ná, a pá Etiopi tɩ́náwa báálɔ Ebɛdmɛlɛkɛ: «Yɩ́rɛ báála mɛrɛ́ rɩ́ fí tɩ́ŋɩ́ŋ tɩɩ mɛ́ a mʋ́ lɩ́sɛ Zeremi vilɓoo ná sɩɛrʋ, rʋʋ ha wɩ sʋ́wɛ́.»
11 Ebɛdmɛlɛkɛ yɩ́rɛ ɛ́ báála, ʋ rɩ́wɔ́ mʋ́ kuóro jaa, a zʋ jaa ná há mɩŋ cɩksɛ jaa tíé rí; a tʋɔsɛ gɛkɔŋsa, a kaa mʋ́ vɔsɛ rɩ́ ŋmɛ́sɛ, a tá ɓa tuwi Zeremi rɩ́. 12 Ká Etiopi tɩ́náwa báálɔ Ebɛdmɛlɛkɛ sɩɛ́ bʋl Zeremi rɩ́ bʋlɛ́: «Pi gɛkɔŋsa nyáŋ héí valuke mʋ́l ká rɩ́ ŋmɛ́sɛ ná mɩ́ŋwɔ́ mʋ́l.»
Zeremi tʋ́ŋ ɛ́ nɛ́. 13 Báála ná pɔ́ŋ Zeremi rɩ́ ŋmɛ́sɛ ná a lɩ́sɛ vilɓoo ná sɩɛrʋ. Ɛ́ har mɛ́, Zeremi káánɛ kuóro zʋɔ pʋ́pɔɔra wuolo ná sɩɛrʋ.
Kuóro Sedesiyasɛ báá bɔ́sɛ́ Zeremi rʋ́ʋ́ ná wɩ́ɛ́ sɩ́ɛ́
14 Kuóro Sedesiyasɛ tʋ́mɔ́ ɓa mʋ́ yɩ́rɛ wɩ́laabʋllɔ Zeremi, a kánʋ́ ko cɛ́ Wɩcʋɔlɩjɩzeno dánnʋʋsɛ botoro nyúú mí ɓɩnɔ mɛ́. Kɔ́ʋ́ bɔ́sʋ́ a bʋlɛ́: «Ŋ có rɩ́ŋ bɔ́sɩ́ wɩ́ɩ́ balá rɛ́, sɩ́ wɩ́ɩ́ káá féŋsíŋ mí.»
15 Zeremi bʋ́l Sedesiyasɛ rɩ́ a bʋlɛ́: «Rɩŋ nɛ́ bʋ́lʋ́ ná há mɔhɛ̃́ rɩ́ŋ bʋl pɛ́ɩ́, ɩ sɩ́ a rɩ́wɔ́ ɓʋ́ŋ. Rɩ́ŋ sɩɛ́ báá cáánɩ́ má, ɩ waá a rɩ́ɩ́ zésíŋ.»
16 Ɛ́ nɛ́ kuóro Sedesiyasɛ lʋɔrɛ ŋmɩ́ɛ́sɛ a pá Zeremi a bʋlɛ́: Nyuutɩna Wɩɩsɛ ná há wómmó háá párá hiẽsó yɩr mɛ́, ŋ wɩ́ɩ́ ɓʋ́, ŋ wɩ́ɩ́ káá hé nɩɛ ná háá jɛ́ɩ́ mɩɩsɛ lɩ́sɛ nɛ́sɛ mɛ́.»
17 Ɛ́ nɛ́ Zeremi bʋl Sedesiyasɛ rɩ́ a bʋlɛ́: «Ná Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ há sʋ́ʋ́ ná: «Rɩɩ nɛ́ píí tɩɩ rɩ́ɩ́ hé Babɩlɔɔnɛ kuóro tʋtʋnna nɛ́sɛ mɛ́, ɩ rɩ́rɩ́ɩ́ jaa nɩɛ sɩ́ ka mɩɩ̃sɛ, ká níŋ má báá wɩ tɔ́ɔ́ né zɔkɛ. 18 Amá rɩɩ nɛ́ vɛ́, rɩ́ɩ́ píí tɩɩ hé Babɩlɔɔnɛ kuóro tʋtʋnna nɛ́sɛ mɛ́, tɔ́ɔ́ né sɩ́ a Kalde nɩɛ tɩ́llɛ, rɩ́wɔ́ nyɩ́kʋ́ rɩ́ níŋ; ká rɩ́ tɩɩ má sɩ́ wólli lúú lɛ.» 19 «Kuóro Sedesiyasɛ bʋ́l Zeremi rɩ́ a bʋlɛ́: Ŋŋ́ fá Ziide nɩɛ ná há mɩŋ Kalde nɩɛ nɛ́sɛ mɛ́ nɛ́, rɩ́wɔ́ háá píŋ héwó nɛ́sɛ mɛ́, rɩ́wɔ́ bɛ́ŋsɩ́ŋ.»
20 Amá Zeremi bʋ́lʋ́ rɩ́ a bʋlɛ́: Ɓa wɩ́ɩ́ píí héwó nɛ́sɛ mɛ́; ŋŋ́ sʋ́lɩ́, zesi Nyuutɩna Wɩɩsɛ há sɛ́ rɩ́ŋ bʋ́lʋ́ ná pɛ́ɩ́. Ɩ wɩ́ɛ́ sɩ́ cɛ́rɛ a pɛ́ɩ́, ká rɩ́ɩ́ ka mɩɩ̃sɛ má. 21 Amá rɩ́ɩ́ nɛ́ vɛ́ rɩ́ɩ́ píí héwó nɛ́sɛ mɛ́, nóú ná há sɩ́ pérí, Nyuutɩna Wɩɩsɛ makɛ páŋ: 22 Ɓa sɩ́ kɛsɛ háála ná wuu há káánɛ Ziida kuóro jaa mɛ́, a kaa mʋ́ pá Babɩlɔɔnɛ kuóro tʋtʋnna. Ká rɩ́ ɛ́ háála bʋlɛ́:
“Ɩ nanɔ́ŋtaŋáwa ná,
ɓa nyɩ́sɩ́, ɓa yɩ́ɩ́ nyúú mí.
Tɛ́ŋ ná mɛ́ ɩ há zʋ́ɛ́ a mʋʋrɛ pɩpɛrɛ́ sɩɛrʋ,
ɓa sɩɛ́ fá ká tɛ́ɩ́!”
23 Ɓa sɩ́ kɛ́sɩ́ háála wuu arɩ́rɩ́ɩ́ bɛlɛ a kaa mʋ́ pá Kalde nɩɛ; ká rɩ́ɩ́ má tɩɩ sɩ́ wólli lú lɩ́wɔ́ nɛ́sɛ mɛ́. Babɩlɔɔnɛ kuóro sɩ́ kánɩ́, ká nyɩkɛ tɔ́ɔ́ né rɩ́ɩ́ níŋ.»
24 Ɛ́ nɛ́ Sedesiyasɛ bʋl Zeremi rɩ́ a bʋlɛ́: «Rɩɩ jɛ́ɩ́ mɩɩ̃sɛ, ɩ pɔ́ rɩ́ nɛ́ŋ sɩ́ ráá wɩ́bʋlɛ́ nyáŋ oro wuu nɛ̃́. 25 Rɩ́ minísíwa nɛ́ nɩ́ɛ́ rɩŋ rɩ́rɩ́ɩ́ bʋ́l wɩ́ɛ́, ɓa sɩ́ ko bɔ́sɩ́ a bʋlɛ́: A ráá zɩŋ wɩ́ɛ́ ná ɩ há bʋlɛ́ pá kuóro. A makɛ rɩ́ɩ́ ká mɩɩ̃sɛ, sɩ́ wɩ́ɩ́ káá féŋsírá mɛ́. Kuóro sɩ́ béé rí pɛ́ɩ́? 26 Ɛ́ wɩ́ɛ́, nóú ná ɩ há sɩ́ bʋl a pɔ́wɔ́: “Ŋ jɛ́nnɛ́ kuóro, rʋ́ʋ́ sɩ́ ló rɩ́ŋ bɩrmʋ́ zʋ́ Zonataŋ jaa, rɩ́ŋ háá sʋwɛ ráŋ.”»
27 Minísíwa ná wuu kúó bɔsɛ Zeremi. Amá kuóro fa há máŋsɛ ɛ́ ná pá Zeremi, ɛ́ nʋ́ʋ́ bʋl pɔ́wɔ́. Ɛ́ nɛ́ ɓa tɔ́ʋ́ cɩ́m, bee wɩ́ɛ́, wɩ́ɩ́ ná fa wɩ nyɩ́ɩ́sɛ. 28 Zeremi káánɛ kuóro zʋɔ pʋ́pɔɔra wuolo ná sɩɛrʋ ɛ́ nɛ́, a mʋ́ peri kal ná ɓa há yóé a la Zerizalɛmɛ.
Babɩlɔɔnɛ nɩɛ yóó la Zerizalɛmɛ
Zer 52.4-16; 2 Kuo 25.1-12
Ná wɩ́ɩ́ ná há kúé Zerizalɛmɛ lɛɛ tɛ́ŋ mɛ́: