Kuóro Sedesiyasɛ sʋ́l Zeremi rʋ́ʋ́ cáánʋ́
37
1 Babɩlɔɔnɛ kuóro Nebikanezaarɛ bíl Zoziyasɛ bio Sedesiyasɛ nɛ́ rʋ́ʋ́ la Zʋwakimi bio Koniya nyúú mí, a dí Ziida kuorí. 2 Amá Sedesiyasɛ tɩɩ, ʋ tʋtʋnna arɩ́ Ziida nɩɛ oro wuu wɩ cáánɛ ná Nyuutɩna Wɩɩsɛ fa há tɩ́ŋ Wɩ́laabʋllɔ Zeremi mí, a bʋl pɔ́wɔ́ zésé.3 Rɩ kuóro Sedesiyasɛ sɩɛ́ fa tʋ́ŋ Selemiya bio Yukal arɩ́ vʋk'ɔɔsɔ Sefaniya, há ká Maaseya bio, wɩ́laabʋllɔ Zeremi rɩ́, rɩ́wɔ́ mʋ́ bʋ́lʋ́ rɩ́ a bʋlɛ́: «Á kúó ráá sʋ́lɩ́ rɩ́ɩ́ sʋl Nyuutɩna Wɩɩsɛ, á Wɩɩsɛ nɛ́ párá.»
4 Ɛ́ tɛ́ŋ mɛ́, rɩ́ ɓa fa ha wɩ Zeremi tɔ́ɛ́ bɩnajaa mɛ́, ʋ fa tʋ́ʋ́ tɩɩ nɩɛ sɩɛrʋ, aá mʋ́ ráŋ ná wuu ʋ háá jɛɛ́ ká bɩr aá ko. 5 Faarɔŋ lalyoore ná há lɛ́ Ezipiti mí aá ko, Kalde nɩɛ ná fa há tɔ́ Zerizalɛmɛ hé, há nɛ̃́ ɛ́ labáárɛ, ɓa ísó kɛkɛ Zerizalɛmɛ mɛ́. 6 Ɛ́ nɛ́ sɩɛ́ Nyuutɩna Wɩɩsɛ bʋl wɩ́laabʋllɔ Zeremi rɩ́ a bʋlɛ́: 7 «Ná Nyuutɩna Wɩɩsɛ, Ɩzɩrayɛl Wɩɩsɛ há sʋ́ʋ́ ná: “Ɩ́ mʋ́ bʋl pá Ziida kuóro ná há tʋ́mɩ́wa rɩ́ɩ́wa ko bɔ́sɩ́ŋ ná: Faarɔŋ lalyoore ná fa há lɩ́ɛ́ rɩ́wɔ́ pɛ́ɩ́wa mɛ́, bɩ́rɔ́ mʋ́ Ezipiti, ɓa tɔ́ɔ́. 8 Kalde nɩɛ sɩ́ bɩrko yo tɔ́ɔ́ né, a lɔ́ʋ́, ká nyɩ́kʋ́ rɩ́ níŋ. 9 Ná Nyuutɩna Wɩɩsɛ há sʋ́ʋ́ ná: ɩ́ sɩ́ɩ́wa tɩɩ nyɩ́sʋ́, rɩ́ɩ́ bɩɩnɛ rɩ́ Kalde nɩɛ sɩ́ bɩrcol ɓóŋ. Ɓa waá col! 10 Rɩ́ɩ́wa có rɩ́ɩ́wa dí dóé Kalde nɩɛ ná wuu nyúú há cákɩ́wa cɛ́ rɩ́ lal, rʋʋ kúó káánɛ hɛ́mɛ́ nɩbʋ́rmɛ dʋŋɔ má, ɓa sɩ́ lɩ́wɔ́ táŋtɛwa mɛ́, a nyɩkɛ tɔ́ɔ́ né.”»
Ɓa tɔ́ Zeremi bɩnajaa mɛ́
11 Tɛ́ŋ ná mɛ́ Faarɔŋ lalyoore haá kué, ɓa héwíŋ zʋ́ Kalde lalyoore, ɓa isi kɛkɛ Zerizalɛmɛ mɛ́, 12 rɩ́ Zeremi faá já rʋ́ʋ́ lɛ Zerizalɛmɛ mɛ́, a mʋ́ Bɛŋzamɛŋ dɩtɩ́llɛ, ʋ maábináŋá sɩɛrʋ, a rʋ́ʋ́ lɔ́ʋ́ ɓaalɛ ker. 13 Ʋ sɩɛ́ há mʋɔ́ peri Bɛŋzamɛ jɩmʋ́l nɩɛ dánnʋɔ, rɩ Selemiya bio Iriya há ká Hananiya nihĩ, ká a dánnʋpɔ́ɔ́ra nɔhɔ̃́ nɛ́ fa ráŋ. Ɛ́ nɛ́ ʋ ka wɩ́laabʋllɔ Zeremi cɛ́, ká bʋ́lʋ́ rɩ́ a bʋlɛ́: «Ɩɩ́ mʋ́ rɩ́ɩ́ zʋ Babɩlɔɔnɛ nɩɛ har nɛ́!» 14 Ɛ́ nɛ́ Zeremi sɛ́: «Ʋ tó táŋa; ŋ waá mʋ́ rɩ́ŋ zʋ́ Kalde nɩɛ har nɛ́.»
Amá Iriya wʋ́ʋ́ wɩ́bʋlɛ́ ná lɛ́ɛ́ dí, ká kánʋ́ a kaa mʋ́ minísiwa rɩ́. 15 Minísiwa ná cɔ́ɛ́ wɛ́ Zeremi, ɓa ŋmɔ́wʋ́; ká kánʋ́ mʋ́ tɔ́ɔ́ Gɔmɩŋtɛ kɛŋpʋ́ŋsɔ Yonataŋ jaa ná sɩɛrʋ, ɓa há kené bɩrmɛ bɩnajaa. 16 Ɓa kéŋ Zeremi a tɔ́ bɩnajaaa, jiwie sɩɛrʋ.
Ʋ mɩŋ ráŋ dáánɛ. 17 Ká kuóro Sedesiyasɛ tʋŋ nɛrɔ, ʋ mʋ́ yɩ́rʋ́, rʋ́ʋ́ kóú jaa rʋ́ʋ́ lʋɔrɛ bɔ́sʋ́ rɩ́ɩ́ wɩ́ɩ́. Ʋ bɔ́sʋ́ a bʋlɛ́: «Ɩ wɩ Nyuutɩna Wɩɩsɛ liŋó kené aá páŋ?» Ɛ́ nɛ́ Zeremi sɛ́: «Ŋ kenó. Ʋ nɛ́ nyɛ: “Babɩlɔɔnɛ kuóro sɩ́ kánɩ́ hóú nɛ́sɛ mɛ́.” 18 Ká Zeremi bɔsɛ kuóro Sedesiyasɛ a bʋlɛ́: «Beé rí ŋ aa zɔ́kɩ́ mɛ́, ɩ tʋtʋnna mɛ́, ɛ́ rá má tɔ́ɔ́ né nɩɛ mɛ́, a mɔ́ rɩ́ɩ́wa kánɩ́ŋ tɔ́ɔ́ bɩnajaa mɛ́? 19 Ɩ́ wɩ́laabʋlla ná fa há la wɩ́ɛ́ bʋl pɛ́ɩ́wa, a bʋlɛ́ rɩ́ Babɩlɔɔnɛ kuóro wáá kóó yóíwa, rʋ́ʋ́ wɩ tɔ́ɔ́ né máá yo, ɓa mɩŋ nɛ́ɛ́?»
20 Zeremi sɩɛ́ tenni a súúri a bʋlɛ́: «Mʋ́l né mí, ŋ nyúútɩ́na, Kuóro, saŋ wɩ́ɩ́ né ŋ há kené aá jɛ́nnɩ́: Sɩ́ a rɩ́ŋ bɩrmʋ́ Gɔmɩŋtɛ kɛŋpʋ́ŋsɔ Yonataŋ jaa, rɩŋ mʋ́ ráŋ, ŋ dɩsʋwɩ́ nɛ́ ɛ́.»
21 Ɛ́ nɛ́ kuóro Sedesiyasɛ pá ŋmɛ́nɔ ɓa lɩ́sɛ Zeremi hé bɩnajaa wuolo sɩɛrʋ, aá pɔ́ʋ́ dɩpɛ́ŋgílle ná ɓa haá wasɛ dɩpɛ́ŋ'aara ŋmɛ́nɔ laka, balá tápʋ́l wuu, a kaá ja tɛ́ŋ ná mɛ́ dɩpɛ́ŋ báá há wáá a rʋ́ʋ́ mɩŋ tɔ́ɔ́ ná mɛ́. Ɛ́ nɛ́ tɛ Zeremi káánɛ bɩnjaa wuólo sɩɛrʋ.