Kɛŋgumí ná Zʋwakimi há nyɩ́kɛ́ wɩ́ɛ́
36
1 Zoziyasɛ bio Zʋwakimi há dí Ziida kuorí bɩŋsɛ baná nyúú mí ní, ká Nyuutɩna Wɩɩsɛ liŋó né peri Zeremi a bʋlɛ́: 2 «Já kɛŋgumí, a pʋ́ŋsɛ wɩ́ɛ́ ná wuu ŋ há púlé bʋ́lɩ́ rɩ́, a pɔ́ Zoziyasɛ kuorí díí tɛ́ŋ mɛ́, a ko aá lɛ zaa, a mʋ́ tɩɩnɛ Ɩzɩrayɛl dɩtɩ́llɛ rɩ́ Ziida dɩtɩ́llɛ arɩ́ duowa ná wuu mí, a hóú mí. 3 Ʋ wólóó, Ziida nɩɛ sɩ́ tɩŋ ɛ́ mɛ́, a zɩŋ rɩ́ŋ já rɩ́ŋ yiki wɩhálawa nɛ́ a héwó mí, rɩ́ oro wuu tɔ́ʋ́ málbɔmɔ, ká rɩ́ŋ héwó wɩ́nyɔ́rkɛ arɩ́wɔ́ wɩ́bɔma suúri.»4 Ɛ́ nɛ́ Zeremi yɩ́rɛ Neriya bio Baruki, a cesi Nyuutɩna Wɩɩsɛ líŋsi ná wuu ʋ fá há nɩ́ɛ́ a pɔ́ʋ́, Baruki pʋ́ŋsɛ a hé kɛŋgumí ná mɛ́.
5 Ká Zeremi máŋsɛ nyɛ a pá Baruki: «Ɓa pɔ́ŋ mɛ́,rɩ́ ŋ sɩ́ Wɩcʋɔlɩjɩzeno sɩɛrʋ mʋ́. 6 Amá ɩ é tɩɩ, mʋ́ ráŋ nʋvɔ́wɔ tápʋl, a ɓɔ́ɩ́ liŋó a karmɛ Nyuutɩna Wɩɩsɛ líŋsi ná wuu ŋ há césé pɛ́ɩ́, ɩ pʋ́ŋsɛ. Karmɩ́wɔ́ rɩ́ Wɩcʋɔlɩjɩzeno nɩɛ, arɩ́ nɩɛ ná wuu há lɛ́ Ziida tɔ́nɛ ko, rɩ́wɔ́ nɛ ɛ́ líŋsi. 7 Ʋ wólóó, ɓa sɩ́ jɛnnɛ Nyuutɩna Wɩɩsɛ, ká rɩ́wɔ́ oro wuu tɔ́ʋ́ málbɔmɔ. Bee wɩ́ɛ́, Nyuutɩna Wɩɩsɛ cɔwɩɩlɩzeno ná isi nɩɛ nyáŋ nyúú.»
8 Neriya bio Baruki tɩ́ŋ wɩ́ɛ́ ná wuu ɛ́ ná tɩɩ wɩ́laabʋllɔ Zeremi fa há máŋsɛ a pɔ́ʋ́. Ʋ mʋ́ Wɩcʋɔlɩjɩzeno ná sɩɛrʋ, a karmɛ Nyuutɩna Wɩɩsɛ líŋsi ná fa há mɩŋ kɛŋgumí ná sɩɛrʋ. 9 Zoziyasɛ bio Zʋwakimi há dí Ziida kuorí bɩŋsɛ bɔmmʋ́ɔ́ nyúú mí, ʋ caŋsɛ nɛ́mɛ́ nyúú mí ní ɛ́ tʋŋ. Rɩ ɓa fa yɩ́rɛ Zerizalɛmɛ nɩɛ wuu arɩ́ Ziida dɩtɩ́llɛ nɩɛ wuu, rɩ́wɔ́ ko Nyuutɩna Wɩɩsɛ sɩ́ɛ́ Zerizalɛmɛ mɛ́, a vɔwɛ nʋɔ. 10 Ɛ́ nɛ́ Baruki karmɛ Zeremi líŋsi ná wuu fa há mɩŋ kɛŋgumí ná sɩɛrʋ, Wɩcʋɔlɩjɩzeno ná sɩɛrʋ, a pá nɩɛ ná wuu fa há mɩŋ ráŋ. Ʋ fa cɛ́ Safaŋ bio Gemariya, fa há ká Gɔmɩŋtɛ kɛŋpʋ́ŋsɔ jaa sɩɛrʋ nɛ́. Ɛ́ jaa fa mɩŋ Wɩcʋɔlɩjɩzeno daha rɩ́ wuolo ná rɩ́ɩ́ nɛ́, dánnʋfɛlɔ ná laka.
11 Gemariya bio Mika há ká Safaŋ nɩhĩ há nɛ̃ Nyuutɩna Wɩɩsɛ líŋsi ná wuu há mɩŋ kɛnɔ ná sɩɛrʋ, 12 ʋ mʋ́ kuóro jaa, a zʋ kɛŋpʋ́ŋsɔ dɩtʋmɩ́. Ɛ́ tɛ́ŋ mɛ́, rɩ minísiwa ná wuu fa céŋ náŋá ráŋ: Gɔ́mɩ́ŋtɛ kɛŋpʋ́ŋsɔ Elisama, Semeya bio Delaya, Akɩbɔrɛ bio Ɛlɛnataŋ, Safaŋ bio Gemariya, Hananiya bio Sedesiyasɛ, arɩ́ minísiwa ná náŋa má wuu fa mɩŋ ráŋ. 13 Baruki há kármɛ́ kɛnɔ ná pá nɩɛ ná wuu fa há mɩŋ ráŋ, Mika má nɛ́, ʋ cesi ɛ́ líŋsi wuu pɔ́wɔ́.
14 Ɛ́ nɛ́ minísiwa ná tʋ́ŋ Netaniya bio Yehudi, há ká Selemiya nɩhĩ ká a Kusi é nihĩkokú rʋ́ʋ́ mʋ́ yɩ́rɛ Baruki rʋ́ʋ́ ka kɛŋgumí ná ʋ há kármɛ́ nɩkana wuu sɩ́ɛ́ mɛ́ ko. Neriya bio Baruki ɓɩɛ́na pi kɛŋgumí ná, a kaa kówó rɩ́. 15 Ɓa bʋlʋ́ rɩ́ a bʋlɛ́: «Ké rɛ́ɛ́, a karmɛ kɛŋgumí né a párá.»
Ɛ́ nɛ́ Baruki kármʋ́ a pɔ́wɔ́. 16 Minísiwa ná há zésí ɛ́ wɩ́ɛ́ wuu ko tenni, héwíŋ zʋ́wɔ́, ɓa bɩ́rɛ aá dɛllɛ náŋá ká bʋl Baruki rɩ́ a bʋlɛ́: A sɩ́ cesi wɩ́ɛ́ nyáŋ wuu a pá kuóro.»
17 Ká ɓa bɔsɛ Baruki a bʋlɛ́: «Máŋsɛ ɛ́ ná ɩ há ɛ́ɛ́ ká pʋ́ŋsɛ wɩ́ɛ́ nyáŋ wuu, a párá.» 18 Ɛ́ nɛ́ Baruki bʋlwɔ́ rɩ́ a bʋlɛ́: «Zeremi ní césí líŋsi nyáŋ wuu a páŋ, ŋ zesi ká ŋmʋ́ŋsɩ́wɔ́ rɩ́ dawituurínyii a hé kɛŋgumí ná sɩɛrʋ.»
19 Minísiwa ná sɩɛ́ bʋl Baruki rɩ́ a bʋlɛ́: «Ɩ rɩ́ Zeremi mʋ́ féŋsi; rɩ́ nɛ́ŋ wuu sɩ́ɩ́wa dɩmɩnɩ́ zɩ́mʋ́!»
20 Ká ɓa pi kɛŋgumí ná tá gɔ́mɩ́ŋtɛ kɛŋpʋ́ŋsɔ Elisama dɩtʋmɩ́ ká isi mʋ́ kuóro wuolo, a cesi wɩ́ɛ́ ná há ɛ́ɛ́ naasɛ wuu a pá kuóro.
21 Ɛ́ nɛ́ kuóro tʋŋ Yehudi rʋ́ʋ́ mʋ́ kɛŋpʋ́ŋsɔ Elisama dɩtʋmɩ́ a pi kɛŋgumí ná ko. Yehudi mʋ́ pii ko, a kármʋ́ pá kuóro arɩ́ minísiwa ná wuu fa há ísé cɛ́ kíl kuóro. 22 Bɩna sɩɛrʋ caŋsɛ nɛ́mɛ́ nyúú mí, Kuóro tɩɩ fa mɩ́nʋ́ waarʋ tɛ́ŋ mɛ́ jaa sɩɛrʋ nɛ́, a ké kurpóóti níŋ sɩ́ɛ́. 23 Yehudi nɛ́ kármɛ́ peri cɔrɛ botoro ɛ́ rá má baná, kuóro pi kɛŋpʋ́ŋsɔ nyúfʋŋwie ní a cónníwó é a yoo hé kurpóóti níŋ ná mɛ́. Ʋ tʋ́ŋ ɛ́ nɛ́ a nyɩkɛ kɛŋgumí ná wuu tenni kurpóóti níŋ ná sɩɛrʋ. 24 Kuóro rɩ́rʋ́ tʋtʋnna wuu sɩɛ́ fa nɛ̃́ líŋsi ná há mɩŋ kɛŋgumí ná mɛ́, amá ɓa wɩ lóé rɩ́wɔ́ hé héwíŋ pɔ́wɔ́, ɓa wʋ́ɔ́ gɛnnɛ kené cɔ́nnɛ rɩ́ɩ́ mákwɔ́ sazɔkɔ́. 25 Amá Ɛlnataŋ rɩ́ Delaya arɩ́ Gemariya fa cáásɔ́ sʋl kuóro wérí, rʋ́ʋ́ sɩ́ kɛŋgumí ná nyɩ́kʋ́ rɛ́, amá kuóro wʋ́ɔ́ rɩ́ɩ́ zésé. 26 Ʋ fa pɔ́ʋ́ bio Yerameyɛl, rɩ́ Azɩrɩyɛl bio Seraya arɩ́ Abɩdɩyɛl bio Selemiya ŋmɛ́nɔ má tɩɩ, rɩ́wɔ́ fa ka kɛŋpʋ́ŋsɔ Baruki arɩ́ Wɩɩsɛ wɩ́laabʋ́llɔ Zeremi. Amá Nyuutɩna Wɩɩsɛ kéŋ Baruki arɩ́ Zeremi féŋsi.
27 Kuóro nyɩ́kɛ́ kɛŋgumí ná Zeremi fa ha césí Nyuutɩna Wɩɩsɛ líŋsi wuu pá Baruki, ʋ zesi ká pʋ́ŋsɛ hóú sɩɛrʋ. Ɛ́ har mɛ́ Nyuutɩna Wɩɩsɛ, bʋ́l Zeremi rɩ́ a bʋlɛ́: 28 «Ja kɛŋgumí nɔ́ŋɔ, a baa pʋ́ŋsɛ líŋsi ná wuu fa há mɩŋ dʋ́ŋdʋ́ʋ̃́ ɓɩnɔ ná Ziida kuóro Zʋwakimi há nyɩ́kɛ́ mɛ́, a hóú mí. 29 Ká rɩ́ɩ́ bʋl nyɛ pá Ziida kuóro Zʋwakimi a bʋlɛ́:
“Ná Nyuutɩna Wɩɩsɛ há sʋ́ʋ́ ná: Ɩ nyɩ́kɛ́ kɛŋgumí ná ká gáásɩ́ŋ nʋɔ mɛ́, a bʋlɛ́ beé rí tɛ́ ŋ pʋ́ŋsʋ́ sɩɛrʋ a bʋlʋ́ ká pʋmmɩ́ rɩ́ Babɩlɔɔnɛ kuóro sɩ́ ko zɔkɛ tɔ́ɔ́ né, ká ɓʋ́ʋ́ nɩbííne arɩ́rʋ́ pʋsɛ. 30 Ɛ́ wɩ́ɛ́, ná Nyuutɩna Wɩɩsɛ há sʋ́ʋ́ ná a pá Ziida kuóro Zʋwakimi: ʋ waá a rʋ́ʋ́ ná nɛ́ŋ, ʋ duo sɩɛrʋ, rʋ́ʋ́ ké dí Davidi kuóɓasa daha a dí kuorí, ʋ sʋʋ har mɛ́. Ʋ lɛl sɩ́ pɛ́ pʋmmʋ, wɔhɔ cɩ́ɩ́ka mɛ́, ká rɩ́ tɩ́taŋ rʋ́ʋ́ cɔ waarʋ mɛ́. 31 Ŋ sɩ́ cɩ́nʋ́ mɛ́, ʋ dunɩɛ arɩ́rʋ́ tʋtʋnna mɛ́, a bɛ́ŋsɩ́wɔ́ túŋwó wɩ́zɔ́kɛ́ kɩŋ. Ká a rɩ́ wɩhálawa ná wuu ŋ fa há bʋ́lwɔ́ wɩ́ɛ́ pɔ́wɔ́ ká ɓa pii yɩ́rɛ yɔ́ɔ́ péríwó, a peri Zerizalɛmɛ nɩɛ arɩ́ Ziida nɩɛ wuu.” »
32 Ɛ́ nɛ́ Zeremi ja kɛŋgumí nɔ́ŋɔ, a pá kɛŋpʋ́ŋsɔ Baruki há ká Neriya bio. Ʋ pʋ́ŋsɛ wɩ́ɛ́ ná Zeremi há césé aá pɔ́ʋ́, ʋ zesi, a hóú mí; líŋsi ná wuu fa há mɩŋ dʋ́ŋdʋʋ̃ kɛŋgumí ná mɛ́, Ziida kuóro Zʋwakimi há nyɩ́kɛ́, arɩ́ wɩ́ɛ́ ɓɩkana náŋa rɩ́wɔ́ há nɩhɩ̃́ náŋá a súúri.