Rekaab duo nɩɛ wɩ́ɛ́
35
1 Zoziyasɛ bio Zʋwakimi há dí Ziida kuorí tɛ́ŋ ná mɛ́ nɛ́, Nyuutɩna Wɩɩsɛ bʋl Zeremi rɩ́ a bʋlɛ́: 2 «Mʋ́ bʋl ka Rekaab dunɩɛ, a ko Wɩcʋɔlɩjɩzeno jiwie nɔ́ŋɔ sɩɛrʋ, a pɔ́wɔ́ dɩvɛ́ŋ ráŋ, rɩ́wɔ́ nyɔ.»3 Ɛ́ nɛ́ ŋ ɓɩɛ́na mʋ́ yɩ́rɛ Zeremi bio Yazaniya há ká Habasiniya nɩhĩ, a yɩ́rɛ Yazaniya bɛlɛ rɩ́rʋ́ maábináŋá má súúri. Rekaab dunɩɛ wuu ní ŋ yɩ́rɛ. 4 Ŋ a ɓa zʋ Igdaliya bio Hanaŋ, há ká Wɩɩsɛ báálɔ, bɛlɛ jaa ná há mɩŋ Wɩcʋɔlɩjɩzeno sɩɛrʋ. Ɛ́ jaa fa mɩŋ sɩ́dííre jaa laka nɛ́, Salumi bio Maaseya há ká vʋk'ɔɔsɔ aá pɔ́ Wɩcʋɔlɩjɩzeno dánnʋɔ mɛ́, jaa nyúú rí. 5 Ŋ sɩɛ́ pá dɩvɛ́ŋ loŋni há súó rɩ́ dɩvɛ́ŋ, a súúri dɩvɛ́ŋ gbáŋsɛ mɛ́, a kaa mʋ́ bílwó sɩ́ɛ́. Ká bʋ́lwɔ́ rɩ́ a bʋlɛ́: «Ɩ́ la dɩvɛ́ŋ nyɔ.»
6 Amá ɓa sɛ́: «Á wɩ dɩvɛ́ŋ nyɔ, bee wɩ́ɛ́, á naabál Yonadabɛ, há ká Rekaab bio, bíl nyɛ nɛ́ a párá:
“Ɩ́ pɔ́ rɩ́ɩ́wa sɩ́ dɩvɛ́ŋ nyɔ́,
ɩ́ tɩɩ sɩ́ nyɔ, rɩ́ɩ́wa bɛlɛ má sɩ́ nyɔ.
7 Ɩ́ wɩ mɔhɛ̃́ rɩ́ɩ́wa sɔ jɩɩsɛ,
ɩ́ wɩ mɔhɛ̃́ rɩ́ɩ́wa parɛ,
ɩ́ wɩ mɔhɛ̃́ rɩ́ɩ́wa cɔ́ŋsɛ viínyi tuuni baksɛ
ɩ́ wɩ mɔhɛ̃́ rɩ́ɩ́wa káŋwɔ́ má.
Amá ɩ́ hiẽsó wuu mí,
táŋtɛwa sɩɛnnɛ nɛ́ mɔhɛ̃́ rɩ́ɩ́wa cɩcɔ;
ɛ́ nɛ́ sɩ́ a rɩ́ɩ́wa ka mɩgbó
tɔ́ɔ́ né mí, ɩ́ há ká nɩhʋ́ɔ́rá a mɩ́nʋ́ sɩɛrʋ.”
8 «Ɛ́ nɛ́ á sáŋ rá naábál Rekaab bio Yonadabɛ fa há bíl wɩ́ɛ́ ná wuu a párá. Ɛ́ nɛ́ tɛ, á tɩɩ, á háála, á heŋbólli, á tolé, á wɩ dɩvɛ́ŋ nyɔ. 9 Á wɩ jɩɩsɛ sɔ́ɛ́ rɩ́ɩ́ zʋ́zʋ́, á wɩ viínyi baksɛ kené, á wɩ baksɛ kené, á wáá parɛ, 10 amá táŋtɛwa sɩɛnnɛ nɛ́ á cɩ́cɔ́. Ɛ́ nɛ́ á tʋ́tʋŋ, aá zílrá naábál Yonadabɛ wɩ́makɛ́ ná wuu ʋ há bílé párá. 11 Amá tɛ́ŋ ná mɛ́, Babɩlɔɔnɛ kuóro Nabikanezaarɛ há lá tɔ́ɔ́ ná, á bɛ́llɔ́ lɩ́sɛ ráá mʋ́ ké Zerizalɛmɛ mɛ́, a makɛ ráá lú lɛ Kalde nɩɛ arɩ́ Siiri nɩɛ lalyoore nɛ́sɛ mɛ́. Ɛ́ tɛ́ŋ mɛ́ nɛ́, á ké Zerizalɛmɛ mɛ́.»
12 Ɛ́ nɛ́ Nyuutɩna Wɩɩsɛ bʋl Zeremi rɩ́ a bʋlɛ́: 13 «Mʋ́l né mí, bʋl Ziida nɩɛ arɩ́ Zerizalɛmɛ nɩɛ rɩ́ a bʋlɛ́: «Ná Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ há sʋ́ʋ́ ná: Ɩ́ wáá saŋ cáánɛ, a zésíŋ wɩ́bʋlɛ́? Nyuutɩna Wɩɩsɛ nɛ́ bʋ́l ɛ́. 14 Rekaab bio Yonadabɛ fa bʋ́lɔ́ pɔ́ʋ́ dunɩɛ a bʋ́lwɔ́ sɩ́ dɩvɛ́ŋ nyɔ. Rekaab dunɩɛ sɩɛ́ fa tɩ́ŋ ɛ́ wɩ́ɛ́ arɩ́ táŋa: ɓa wɩ dɩvɛ́ŋ nyɔ́ɛ́ a ko aá lɛ zaa, bee wɩ́ɛ́, ɓaá tɩ́ŋwɔ́ naabál nʋɔ nɛ́. Ŋ é Nyuutɩna Wɩɩsɛ waá bɔl ɩ́ cáánɛ mɛ́, amá ɩ́ wɩ́ŋ rɩ́ɩ́ zesé. 15 Ŋ tʋ́mɩ́ŋ tʋtʋnna, ŋ wɩ́laabʋlla a tʋkɛ náŋá mɛ́, ŋ waá bɔl, rɩ́wɔ́ bʋ́lɩ́wa rɩ́ a bʋlɛ́: “Nɛrɔ wuu tɔ́ʋ́ málbɔmɔ. Mʋ́l né mí, nɛrɔ wuu tʋŋ ɛ́ há cɛ́rɛ́; Ɩ́ tá venni ɓaarɛ́, ɩ́ báá sɩ́ɩ́wa tɩɩ káá mʋ́ cɔ́wɔ́ mɛ́. Ɛ́ mɛ́ nɛ́, rɩ́ɩ́wa wólli a ké tɔ́ɔ́ ná sɩɛrʋ, ŋ há píé pɛ́ɩ́wa naabálwa arɩ́rɩ́ɩ́wa tɩɩ.” Amá, ɩ́ wɩ́ɩ́wa dɩlla ɓílé rɩɩ́wa zésíŋ rɩ́, ɩ́ wɩ́ŋ rɩ́ɩ́ zésé. 16 Rekaab bio Yonadabɛ dunɩɛ é tɩ́ŋ wɩ́ɛ́ ná ɓa naabál fa há bílé a pɔ́wɔ́; amá ɩ́ é Ziida nɩɛ, ɩ́ wɩ́ŋ rɩ́ɩ́ zésé.»
17 Zeremi súúro a bʋlɛ́: «Ɛ́ wɩ́ɛ́ sɩɛ́, ná Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ há sʋ́ʋ́ ná: Ziida nɩɛ arɩ́ Zerizalɛmɛ nɩɛ wuu, ŋ sɩ́ a rɩ́ wɩhálawa ná wuu ŋ há lá sɩ́ɛ́ a bʋ́lwɔ́ wɩ́ɛ́ péríwa. Bee wɩ́ɛ́, ŋ cáánɩ́wa, kɛ́ɩ́ wɩ́ŋ zésé; ŋ yɩ́rɩ́wa, amá ɩ́ wɩ sáŋɛ́.»
18 Ká Zeremi bʋl Rekaab duo nɩɛ ná rɩ́ a bʋlɛ́: «Ɩ́ ná Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ há sʋ́ʋ́ ná: Ɩ́ zílíwa naabál Yonadabɛ wɩ́makɛ́, ɩ́ tɩ́ŋʋ́ wɩ́makɛ́ ná wuu arɩ́ táŋa; 19 ɛ́ nɛ́ tɛ́ Rekaab bio Yonadabɛ jaa mɛ́, tɛ́ŋ wuu mí, nɩɛ sɩ́ lɛ ráŋ, a mɩ́nɩ́ŋ sɩ́ɛ́, a tʋŋ aá páŋ.”
«Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ há sʋ́ʋ́ ná nɛ́ ɛ́.»