Ná Wɩɩsɛ liŋó ná Zeremi há píé pá Sedesiyasɛ
34
1 Babɩlɔɔnɛ kuóro Nabikanezaarɛ fa kéŋ lal cɛ́ Zerizalɛmɛ arɩ́rʋ́ kíle tɔ́nɛ mɛ́. Ʋ lalyoore wuu fa cɩ́nʋ́ har, duníé wuu lalyoore, arɩ́ duówa ná ʋ fa há dí dóé ɓa nyúú má fa mɩnʋ́ har nɛ́. Ɛ́ tɛ́ŋ mɛ́ nɛ́ sɩɛ́ Nyuutɩna Wɩɩsɛ bʋl Zeremi rɩ́ a bʋlɛ́: 2 Ná ŋ é Nyuutɩna Wɩɩsɛ, Ɩzɩrayɛl Wɩɩsɛ há sʋ́ʋ́ ná: «Mʋ́ bʋl Ziida kuóro Sedesiyasɛ rɩ́ a bʋlɛ́: “Ná, Nyuutɩna Wɩɩsɛ sɛ́: ŋ sɩ́ pi tɔ́ɔ́ né a hé Babɩlɔɔnɛ kuóro nɛ́sɛ mɛ́, rʋ́ʋ́ nyɩ́kʋ́. 3 Ɩ má wáá wólli lú lʋ́ʋ́ nɛ́sɛ mɛ́, ɓa sɩ́ kánɩ́, a hóú nɛ́sɛ mɛ́. Ɩ sɩ́ cɩ́nʋ́ sɩ́ɛ́, rɩ́ɩ́wa sɩ́ɛ́ caasɛ náŋá, rʋ́ʋ́ bɔ́sɩ́ rɩ́ɩ́ wɩ́ɛ́, ká rɩ́ɩ́ sɩɛ́ zɩŋ mʋ́ Babɩlɔɔnɛ.4 «Ziida kuóro Sedesiyasɛ, zesi Nyuutɩna Wɩɩsɛ há sʋ́ʋ́ ná. Ŋ é Nyuutɩna Wɩɩsɛ nɛ́ bʋ́l ɛ́ pɛ́ɩ́. Tókowí wɩ́ɩ́ ɓʋ́. 5 Ɩ sɩ́ sʋwɛ tɛŋfɩ́ɛ́l sɩɛrʋ. Ɓa sɩ́ nyɩkɛ tulaaléwa pɛ́ɩ́ lal anɛ ɛ́ ná ɓa há nyɩ́kɛ́ pɛ́ɩ́ naabálwa ná há lɛ́ɩ́ sɩ́ɛ́ a dí kuorí lɛlɛ: ká ɓá yúwííri zeŋbíí né pɛ́ɩ́: “Bee nyúbɔ́ŋ rɛ́! ŋ nyúútɩ́na!” Ŋ é Nyuutɩna Wɩɩsɛ nɛ́ bʋ́l ɛ́ pɛ́ɩ́.»
6 Wɩ́laabʋllɔ Zeremi lá ɛ́ wɩ́ɛ́ wuu ní a bʋl pá Ziida kuóro Sedesiyasɛ Zerizalɛmɛ mɛ́. 7 Ɛ́ tɛ́ŋ mɛ́, rɩ Babɩlɔɔnɛ kuóro lalyoore fa kéŋ lal a cakɛ Zerizalɛmɛ arɩ́ Ziida tɔ́nɛ ná wuu fa há wólle cɩ́ tɩkɛ lal, a súúri Lakiisi rɩ́ Azeka mɛ́. Bee wɩ́ɛ́, Ziida tɔ́nɛ sɩɛrʋ, ɓa dʋŋɔ nɛ́ fa ká tɔ́sɔkɛ́rɛ a káánɛ.
Yosi tɛ́ɛ́ rɩ́wɔ́ bɩrkɛsɛ́ wɩ́ɛ́
8 Kuóro Sedesiyasɛ há tá nʋɔ a pá Zerizalɛmɛ nɩɛ wuu, a bʋlɛ́ rɩ́ yósi sɩ́ ná laatɛ́ɛ́, ɛ́ har mɛ́ nɛ́ Nyuutɩna Wɩɩsɛ bʋl Zeremi rɩ́, a bʋlɛ́: 9 Nɛ́ŋ wuu fa mɔhɔ̃́ rʋ́ʋ́ tɔ́ʋ́ yósi ná há ká Ebirewa: báála rɩ́ háála; nɛ́ŋ báá fa wɩ mɔhɛ̃́ rʋ́ʋ́ lo rʋ́ʋ́ maábinɔ́ŋɔ, Ziide nɛ́ŋ a yómó, a mɩ́nʋ́ dɩhɩ̃́. 10 Ɛ́nɛ́ Zerizalɛmɛ tɔ́ɔ́ sɩ́dííre ná wuu arɩ́rʋ́ nɩɛ ná fa há máánɛ ɛ́ nʋtálɔ mɛ́, sáŋɔ́ rɩ́wɔ́ tá báála ná arɩ́ háála ná fa há káwɔ́ yósi a tʋ́ŋ aá pɔ́wɔ́. Nɛrɔ wuu sɩɛ́ ɓɩɛ́na sáŋ ɛ́ nʋtálɔ a tɔ́ʋ́ yósi ɓa col. 11 Amá ɛ́ har mɛ́, ɓa sabɩŋsɛ bɩ́rsɔ́, ɛ́ nɛ́ ɓa bɩr kɛsɛ báála ná arɩ́ háála ná ɓa fa há tɛ́ɛ́, a fɩ́kwɔ́ rɩ́wɔ́ baa bɩrmɛ yósi.
12 Ɛ́ mɛ́ nɛ́ Nyuutɩna Wɩɩsɛ sɩɛ́ bʋl Zeremi rɩ́ a bʋlɛ́: 13 Ná Nyuutɩna Wɩɩsɛ, Ɩzɩrayɛl Wɩɩsɛ há sʋ́ʋ́ ná: Ŋ fa tá nʋɔ, a pɛ́ɩ́wa naabálwa tɛ́ŋ ná mɛ́ ŋ há lɩ́sɩ́wɔ́ Ezipiti yomí ná sɩɛrʋ. 14 Rɩ nɛrɔ wuu maábinɔ́ŋɔ Ebire nɛ́ púú tɩɩ yɛ́llɩ́ pɛ́ɩ́, rɩ́ɩ́ ɛ́ɩ́ yómó, rɩ́ɩ́ peri bɩŋsɛ balpɛ, ɩ mɔhɔ̃́ rɩ́ɩ́ tɔ́ʋ́ rʋ́ʋ́ col. Ʋ sɩ́ ɛ́ɩ́ yómo bɩŋsɛ balgo, ɛ́ har mɛ́ nɛ́ rɩ́ɩ́ lo rʋ́ʋ́ tɩ́llʋ́ tɩɩ col. Amá ɩ́ naabálwa wɩ́ŋ rɩ́ɩ́ zésé, ɓa wɩ lóé rɩ́ŋ wɩ́bʋlɛ́ ná zʋ́wɔ́ dɩlla má tɩɩ. 15 Amá zaa, ɩ́ é sabɩŋsɛ kɔ́wɔ́ dʋŋɔ rɛ́. Ŋ nóú rɩ́ɩ́wa oro wuu tɩ́ŋ taŋá; ɩ́ oro wuu tɔ́ʋ́ maábinɔ́ŋɔ fa há ká yomó ʋ tɩ́llʋ́ tɩɩ a col. Ɩ́ cɩ́nɩ́ŋ sɩ́ɛ́, a tá nʋɔ má tɩɩ, Wɩcʋɔlɩjɩzeno ná há káŋ tɩ́llɛ sɩɛrʋ. 16 Ɩ́ táŋa báá bɩ́rsɛ sabɩɩna, a tɩŋ ɛ́ mɛ́ a múúríŋ yɩr: ɩ́ fa ha tɛ́ɩ́wa yósi, báála arɩ́ háála, rɩ́wɔ́ tɩ́llɩ́wɔ́ tɩɩ, ɩ́ bɩ́rɔ́ kɛsɛ ɛ́ báála arɩ́ ɛ́ háála, a fɩ́kwɔ́ mɛ́ ɓa baa ɛ́ɩ́wa yósi.
17 Zeremi súúro a bʋlɛ́: «Ɛ́ wɩ́ɛ́, ɩ́ ná Nyuutɩna Wɩɩsɛ há sʋ́ʋ́ ná: Ɩ́ oro wuu fa mɔhɔ̃́ rʋ́ʋ́ tɔ́ʋ́ yómo há kɔ́ʋ́ maábinɔ́ŋɔ, a ɔ́ʋ́ kénninɔ́ŋ má, rʋ́ʋ́ tɩ́llʋ́ tɩɩ rɛ́. Amá ɩ́ wɩ́ŋ há sʋ́ʋ́ ná tɩ́ŋɛ́. Ɛ́ wɩ́ɛ́, ŋ é sɩ́ tá tókowí rɩ́ dɩwɩlbɔmɔ arɩ́ losu rɩ́wɔ́ kóíwa mɛ́. Dɩtɩ́llɛ ná wuu nɩɛ há sɩ́ néíwa, héwíŋ sɩ́ zʋ́wɔ́. Nyuutɩna Wɩɩsɛ nɛ́ bʋ́l ɛ́.
18 Nɩɛ ná há zɔ́kɛ́ nʋtʋmɛ ná ŋ fa há bílíŋ rɩ́wɔ́ pɛ́kɛ, a wʋ́ɔ́ nʋtʋmɛ wɩ́bʋlɛ́ ná ɓa há ɓʋ́ nɔwie, a kaa cɛsɛ bɛllɛ, a bílíŋ sɩ́ɛ́, a tɩ́ŋʋ́ pɛ́kɛ daarɛ tɩŋ, ŋ sɩ́ kɛ́sɩ́wɔ́ pɔ́wɔ́ dɩŋdɔma. 19 «Ziida arɩ́ Zerizalɛmɛ nɩhɩ́ɛ̃́sɛ, ɓa tʋtʋmɛ nɩhɩ́ɛ̃́sɛ, ɓa vʋk'ɔɔsa, arɩ́ tɔ́ɔ́ nɩɛ ná wuu há tɩ́ŋ nɔwie ná cɔrɛ ná bɛllɛ pɛ́kɛ a daarɛ, 20 ŋ sɩ́ kɛ́sɩ́wɔ́ a héwó dɩŋdɔma ná háá jáwɔ́ ɓʋ́ɩ́ nɛ́sɛ mɛ́. Ɓa ɓɩsʋsɛ sɩ́ dɩ́ɛ́sɛ bána nyúú diíwiisi arɩ́ tíé nyúú pʋsɛ. 21 Ŋ sɩ́ ká Ziida kuóro Sedesiyasɛ má rɩ́rʋ́ minísiwa a héwó dɩŋdɔma ná háá jáwɔ́ ɓʋ́ɩ́ nɛ́sɛ mɛ́. Ŋ sɩ́ píwó hé Babɩlɔɔnɛ kuóro lalyoore nɛ́sɛ mɛ́. Bee wɩ́ɛ́, rɩ ɛ́ lalyoore nɛ́ tɛ́ɩ́wa mʋ́l né mí ká mʋ́ dɩbólí má, 22 ŋ sɩ́ pɔ́wɔ́ ŋmɛ́nɔ, rɩ́wɔ́ bɩrko cɛ́ tɔ́ɔ́ né mí rɩ́ lal, a yóú, a dúú, ká nyɩ́kʋ́. Ká rɩ́ŋ a rɩ́ Ziida tɔ́nɛ bɩrmɛ gɩrbétéke nɛ́ŋ há to ráŋ. Nyuutɩna Wɩɩsɛ nɛ́ bʋ́l ɛ́.