Tɔ́nɛ bɩrsɔɛ wɩ́ɛ́
33
1 Zeremi fá mɩŋ bɩnajaa wuolo ná sɩɛrʋ nɛ́ ká Nyuutɩna Wɩɩsɛ baa bʋ́lʋ́ rɩ́ bʋllɛ nyúú mí a bʋlɛ́: 2 «Ná Nyuutɩna Wɩɩsɛ ná háá a wɩ́ɛ́, a lo óŋ wuu kánʋ́ dɩhɩ̃́, ʋ yɩr nɛ́ ká Nyuutɩna Wɩɩsɛ, ʋ liŋó nɛ́ nyɛ: 3 Ŋmɔwɛ búŋse páŋ, ŋ sɩ́ sáŋɩ́ sʋlɛ́, ŋ sɩ́ makɛ wɩ́zeŋse pɛ́ɩ́, wɩ́ɛ́ ná há féŋsé ɩ wʋ́ɔ́ ɛ̃, a pɛ́ɩ́. 4 Bee wɩ́ɛ́, Nyuutɩna Wɩɩsɛ, Ɩzɩrayɛl Wɩɩsɛ nɛ́ bʋ́l nyɛ a mʋ́ tɩɩnɛ tɔ́ɔ́ né jɩɩsɛ, arɩ́ Ziida kuóre jɩɩsɛ mɛ́. Ɓa wuu zɔ́kɔ́ a tɩŋ tɛ́ŋ kurtɩɛkɛ́ wɩ́ɛ́ arɩ́ tókowí wɩ́ɛ́: 5 Ɛ́ jɩɩsɛ súó rɩ́ sʋsɛ ɓa nɩɛ ná fa há lɩ́ɛ́ rɩ́wɔ́ yoo Kalde nɩɛ; ɛ́ jɩɩsɛ súó rɩ́ sʋsɛ lalyoore ná ŋ há ɓʋ́ʋ́sɛ ŋ cɔ́wɩɩlzeno ná sɩɛrʋ. Zerizalɛmɛ nɩɛ tʋ́ŋ sahaksi, ɛ́ nɛ́ tɛ ŋ sɩ́ɛ́ báá tówó tɔ́ɔ́ mɛ́.6 «Amá ŋ sɩ́ váárɛ tɔ́ɔ́ ná, rʋ́ʋ́ fʋʋ fɩɛlɛ, rʋ́ʋ́ dúóri. Ŋ sɩ́ a rʋ́ʋ́ nɩɛ ná tɛŋfɩ́ɛ́l rɩ́ wér kɩ́ŋkáŋ. 7 Ŋ sɩ́ a rɩ Ziida nɩɛ arɩ́ Ɩzɩrayɛl nɩɛ bɩrkowó tɔ́ɔ́, ká rɩ́ŋ a rɩ́wɔ́ bɩr kéŋwó dɩkéŋsi anɛ́ tésíé mí. 8 Ŋ sɩ́ pa wɩ́bɔma ná wuu ɓa há píé áŋ mɛ́ a tá, ká ɓa fa há ísé cɩ́nɩ́ŋ mɛ́ ɛ́, a tʋŋ wɩ́bɔma ná wuu ŋ mɛ́, ŋ sɩ́ héwó suúri. 9 Ɛ́ mɛ́, Zerizalɛmɛ sɩ́ ká satɔrɔ́ a páŋ; dúníé nɩɛ sɩ́ bɩ́ŋ mɛ́, a píŋsíŋ, ɓa há sɩ́ nɛ́ wɩwéré ná wuu wɩ́ɛ́, ŋ há ɛ́ɛ́ pá Ziida arɩ́ Ɩzɩrayɛl nɩɛ; héwíŋ sɩ́ zʋ́wɔ́, rɩ́wɔ́ váklɛ, ɓa há sɩ́ nɛ wér arɩ́ nɛ́rɛ́ ná ŋ há ɛ́ɛ́ pá Zerizalɛmɛ nɩɛ.
10 Ná Nyuutɩna Wɩɩsɛ há sʋ́ʋ́ ná: «Ɩ́ é Ziida nɩɛ, ɩ́ sɩ́ɩ́wa tɔ́ɔ́ zɔ́kɔ́, nɩbíŋ báá to ráŋ, pʋna má báá to ráŋ. Ʋ ká táŋa, Ziida tɔ́nɛ arɩ́ Zerizalɛmɛ ŋmɛ́ŋsɛ wuu ká wúólí, oŋhiẽsí to ráŋ, nɩbíŋ to ráŋ, pʋna má to ráŋ. Ɛ́ wɩ́ɛ́, tɔ́ɔ́ né tɩɩ sɩɛrʋ, ɓa báá sɩ́ nɛ, 11 cana díí kʋɔllɛ arɩ́ satɔrɩ́cááse. Ɓa báá sɩ́ nɛ́ háfɛlɔ bála arɩ́ háfɛlɔ yɩɩla, ɓa báá sɩ́ nɛ rɩ nɩɛ yɩ yɩl né:
Ɩ́ dɛnnɛ Nyuutɩna Wɩɩsɛ, Doewuutɩna
bee wɩ́ɛ́, Nyuutɩna Wɩɩsɛ wéró,
ʋ cólle wɩ tokó kené.
Ɓa sɩ́ nɛ̃ nɩɛ ná háá ko Nyuutɩna Wɩɩsɛ Wɩcʋɔlɩjɩzeno sɩɛrʋ rɩ́wɔ́ ɔsɛ cʋɔla vʋka yɩɩla. Beé wɩ́ɛ́, ŋ sɩ́ káŋwɔ́ bɩrkowó tɔ́ɔ́ rɩ́wɔ́ bɩrkéŋwó dɩkéŋsi anɛ́ tésíé mí.» Nyuutɩna Wɩɩsɛ nɛ́ bʋ́l ɛ́.
12 Ná Nyuutɩna Wɩɩsɛ, Doewuutɩna báá há sʋ́ʋ́ ná: «Tɔ́zɔkɩ́ né sɩɛrʋ, nɩbíŋ há to ráŋ, pʋna há to ráŋ, arɩ́rʋ́ tɔ́nɛ wuu sɩɛnnɛ, pʋnʋɔla báá sɩ́ ka pʋsɛjaa, rɩ́wɔ́ pʋwɩɛla pɛ́ ráŋ aá fɩɛlɛ. 13 Pallɛ daha tɔ́nɛ sɩɛrʋ, Sefela tɔ́nɛ sɩɛrʋ, arɩ́ Nɩgɛɛvɛ tɔ́nɛ sɩɛrʋ, Bɛŋzamɛ dɩtɩ́llɛ sɩɛrʋ, Zerizalɛmɛ kíle tɔ́nɛ sɩɛrʋ arɩ́ Ziida tɔ́nɛ sɩɛrʋ, pʋwɩɛla báá sɩ́ mɩŋ, rɩ́ pʋnʋ́ɔ́lɔ ɓɔ́ pʋnʋ́ɔ́lɩ́daa aá dɩɩsɛ.» Nyuutɩna Wɩɩsɛ nɛ́ bʋ́l ɛ́.
Nyuutɩna Wɩɩsɛ a ʋ nʋtalɔ́ nʋɔ sú ní tɛ́ŋ wuu
14 Tápʋ́lɛ́ rɩ́ɩ́ kué, rɩ́ŋ a rɩ́ nʋtálwero ná ŋ há tɛ́ɛ́ a pá Ɩzɩrayɛl arɩ́ Ziida nɩɛ nʋɔ sú. Nyuutɩna Wɩɩsɛ nɛ́ bʋ́l ɛ́. 15 Rɩ́ ɛ́ tápʋlɛ nɛ́ péré, ŋ sɩ́ a rɩ́wɔ́ lʋl bíí há ká Davidi dunɛ́ŋ, ɛ́ cɛ́rɛ tɩɩ mɛ́. Ʋ sɩ́ a rɩ́ yɛ́rɛ́ arɩ́ táŋa mɩ́ŋ tɔ́ɔ́ ná sɩɛrʋ. 16 Ɛ́ tɛ́ŋ mɛ́ nɛ́, rɩ́ Ziida dɩtɩ́llɛ nɩɛ tɩ́llɩ́wɔ́ tɩɩ, ká rɩ́ Zerizalɛmɛ nɩɛ má ké tɛŋfɩ́ɛ́l sɩɛrʋ. Sɩɛ́ ná ɛ́ ná ɓa há sɩ́ yɩrɛ Zerizalɛmɛ: “Nyuutɩna Wɩɩsɛ nɛ́ kárá taŋá.”»
17 Ɛ́ wɩ́ɛ́, ná Nyuutɩna Wɩɩsɛ báá há sʋ́ʋ́ ná: «Davidi jaa mɛ́, nɛ́ŋ sɩ́ mɩŋ tɛ́ŋ wuu mí, a dí Ɩzɩrayɛl kuorí. 18 Ʋ sɩɛ́ ká ɛ́ nɛ́, vʋk'ɔɔsa ná há ká Levi dunɩɛ sɩɛrʋ, vʋk'ɔɔsa sɩ́ mɩŋ tɛ́ŋ wuu mí, a cɩ́nɩ́ŋ sɩ́ɛ́, a ɔsɛ vʋk'físe, a nyɩkɛ satɔ́ɔ́rɩ́pállɛ, ká ɔsɛ vʋka má aá páŋ tápʋl wuu.»
19 Nyuutɩna Wɩɩsɛ bʋ́l Zeremi rɩ́ a bʋlɛ́: 20 «Ŋ é Nyuutɩna Wɩɩsɛ nɛ́ bʋ́l nyɛ: Rɩ́ɩ́wa nɛ́ wóŋ rɩ́ wɔhɔ pɛ́kɛ nʋtʋmɛ ná aá zɔkɛ, arɩ́ nʋtʋmɛ ná há mɩ́nɩ́ŋ rɩ́ tɩ́taŋ pɛ́kɛ aá zɔkɛ, aá pɔ́ rɩ́ wɔhɔ rɩ́ tɩ́taŋ sɩ́ náŋá mɛ́ lá ɓa tɛ́ŋ mɛ́, 21 ɛ́ é, nʋtʋmɛ ná há mɩ́nɩ́ŋ rɩ́rɩ́ŋ tʋtʋnnɔ Davidi pɛ́kɛ, má sɩ́ zɔkɛ. Ʋ wɩ dunɛ́ŋ ka rʋ́ʋ́ kénú ɓasa mɛ́ a dí kuorí. Ʋ ká ɛ́ nɛ́ arɩ́ nʋtʋmɛ ná há mɩ́nɩ́ŋ rɩ́ Levi dunɩɛ ná há ká vʋk'ɔɔsa, a tʋŋ pɩ́páŋ. 22 Ŋ sɩ́ a rɩ́ŋ tʋtʋnnɔ Davidi dunɩɛ pul, ká rɩ́ Levi dunɩɛ ná má há ká vʋk'ɔɔsa, a tʋŋ pɩ́páŋ má pul. Ɓa sɩ́ pul anɛ bána nyúú caŋwʋllɛ nɛ́ŋ há wʋ́ɔ́ wuó dɩɩsɛ, ɛ́ ráá má mʋʋ nʋɔ hɩɛl há kánɔ́ ɛ́, nɛ́ŋ wʋ́ɔ́ wuó dɩɩsɛ.»
23 Ná Nyuutɩna Wɩɩsɛ liŋó ná ʋ báá há píé a pá Zeremi, ʋ sɛ́: 24 «Ɩ wɩ nɩɛ háá bʋ́lwɔ́ ná zesi? Ɓa sɛ́ rɩ́ŋ é Nyuutɩna Wɩɩsɛ vɛ́ jɩɩsɛ ná bɛllɛa, ŋ há bɛ́llɛ́ lɩ́sɛ, a tá rɛ́! Ɓa guóníŋ nɩɛ, a báá wʋ́ɔ́ bélé rɩ́ ɓa ká duó. 25 Amá náŋ é Nyuutɩna Wɩɩsɛ há sʋ́ʋ́ ná: Ŋ bíl nʋtʋmɛ ŋ rɩ́ wɔhɔ arɩ́ tɩ́táŋ pɛ́kɛ; a makɛ wɩ́ɛ́ a pá bána arɩ́ tíé má. 26 Ʋ wɩ́ɛ́, ʋ cɛ́ ɛrɛ́ɛ́ rɛ́, nɩɛ bɩɩnɛ rɩŋ vɛ Zakɔbɛ dunɩɛ arɩ́rɩ́ŋ tʋtʋnnɔ Davidi dunɩɛ a tá? Ŋ sɩɛ́ sɩ́ wólli a vɛ rɩ́ŋ lɩ́sʋ́ dunɩɛ rɩ́wɔ́ dí Abɩrahaŋ rɩ́ Ɩzakɛ arɩ́ Zakɔbɛ dunɩɛ sɩ́ɛ́:
«Aɩ́! Ɓa kéŋ susu páŋ, ŋ sɩ́ bɩ́rkáŋwɔ́ kówó tɔ́ɔ́.