Zeremi rɩ́ Hananiya wɩ́ɛ́
28
1 Sedesiyasɛ há púle dí Ziida kuorí, ʋ bɩŋsɛ baná nyúú mí, ɛ́ bɩna tɩɩ mɛ́, ʋ caŋsɛ bɔmmʋ́ɔ́ nyúú mí, tápʋl oro, wɩ́laabʋllɔ Hananiya há lɛ́ Gabaɔŋ, Azuuri bio, fa mɩŋ Wɩcʋɔlɩjɩzeno sɩɛrʋ. Ʋ bʋ́lɩ́ŋ rɩ́ vʋk'ɔɔsa arɩ́ nɩɛ ná wuu fa há mɩŋ ráŋ sɩ́ɛ́ mɛ́, a bʋlɛ́: 2 «Ná Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ há sʋ́ʋ́ ná: “ Ŋ sɩ́ zɔkɛ Babɩlɔɔnɛ kuóro baŋdabaasɩ́ ná. 3 Ná, rɛ́ rɩ́ bɩŋsɛ bɛllɛ, ŋ sɩ́ a rɩ́ Wɩcʋɔlɩjɩzeno cɩksɛ ná wuu Babɩlɔɔnɛ kuóro Nabikanezaarɛ fa há pá rɛɛ́, a kaa mʋ́ʋ́ tɔ́ɔ́ bɩrko rɛɛ́. 4 Ŋ sɩ́ a rɩ́ Ziida kuóro Yekoniya, há ká Zʋwakimi bio arɩ́ Ziida nɩɛ ná wuu fa há mʋ́ yomí Babɩlɔɔnɛ mɛ́, rɩ́wɔ́ má bɩrko rɛɛ́. Bee wɩ́ɛ́, ŋ sɩ́ zɔkɛ Babɩlɔɔnɛ kuóro baŋdabaasɩ́ ná. Nyuutɩna Wɩɩsɛ nɛ́ bʋ́l ɛ́.”»5 Ɛ́ nɛ́ Wɩɩsɛ wɩ́laabʋllɔ Zeremi bʋl wɩ́laabʋllɔ Hananiya rɩ́ vʋk'ɔɔsa ná arɩ́ nɩɛ ná wuu fa há mɩŋ Wɩcʋɔlɩjɩzeno ná sɩɛrʋ, sɩ́ɛ́ mɛ́ a bʋlɛ́: 6 «Wɩɩsɛ Wɩ́laabʋllɔ Zeremi sɛ́: Amɩɩ! Rɩ́ Nyuutɩna Wɩɩsɛ tʋŋ ɛ́. Rʋ́ʋ́ a rɩ́ɩ́ wɩ́laabʋlɛ́ ná nʋɔ sú, rʋ́ʋ́ a rɩ́ nɩkɛsɛ́ ná arɩ́ Wɩcʋɔlɩjɩzeno cɩksɛ ná wuu lɛ Babɩlɔɔnɛ a bɩrko rɛɛ́. 7 Ŋŋ́ sʋ́lɩ́ rɛ́ taŋa zesi wɩ́ɩ́ ná ŋ há có rɩ́ɩ́ zɩŋ, ɩ rɩ́ rɛɛ́ nɩcɩ́nɛ ná wuu: 8 Wɩ́laabʋlla ná há láŋ rɩ́rɩ́ɩ́ sɩ́ɛ́ fól wuu a ko bʋ́l wɩ́ɛ́ a pá tɔ́kana arɩ́ dɩtɩ́llɩzeŋse ní. Ɓa bʋ́l lal, wɩɩla, arɩ́ dɩwɩ́bɔmɔ wɩ́ɛ́. 9 Amá rɩ wɩ́laabʋ́llɔ nɛ́ bʋ́l tɛŋfɩ́ɛ́l wɩ́ɛ́, tɛ́ŋ ná mɛ́ ʋ wɩ́bʋlɛ́ ná nʋɔ há súé ní, ɓa sɩ́ zɩŋ rɩ́ Nyuutɩna Wɩɩsɛ nɛ́ ɓɩɛ́na tʋ́mʋ́.»
10 Ká wɩ́laabʋllɔ Hananiya sɩɛ́ kóri baŋdabaasɩ́ ná fa há mɩŋ Wɩɩsɛ wɩ́laabʋllɔ Zeremi baŋ mɛ́, a bónni. 11 Ká Hananiya bʋl nɩɛ ná wuu sɩ́ɛ́ mɛ́, a bʋlɛ́: «Ná Nyuutɩna Wɩɩsɛ há sʋ́ʋ́ ná: “Rɛɛ́ rɩ́ bɩŋsɛ bɛllɛ, ŋ sɩ́ zɔkɛ Babɩlɔɔnɛ kuóro Nabikanezaarɛ baŋdabaasɩ́ ná, ʋ há píé aá baasɛ duówa wuu baŋa mɛ́.”»
Ɛ́ nɛ́ Wɩɩsɛ wɩ́laabʋ́llɔ Zeremi ja cɔɔ́, a col.
12 Amá wɩ́laabʋllɔ Hananiya há kóri baŋdabaasɩ́ ná Zeremi baŋ mɛ́, a bónni ɛ́, ʋ har mɛ́, Nyuutɩna Wɩɩsɛ bʋ́l Zeremi rɩ́ a bʋlɛ́: 13 «Mʋ́ bʋl Hananiya rɩ́ a bʋlɛ́: Ná Nyuutɩna Wɩɩsɛ há sʋ́ʋ́ ná: “Daa baŋdabaasɩ́ nɛ́ ɩ bónni, hɔɔ ɓɩnɔ nɛ́ mʋ́l né mí rɩ́ɩ́ bɩ́rmɛ rʋ́ʋ́ lɔ́ʋ́ nyúú mí.”» 14 Ká Zeremi súúri a bʋlɛ́: «Bee wɩ́ɛ́, ná Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ há sʋ́ʋ́ ná: “Baŋhɔbaasɩ́ nɛ́ ŋ sakɛ duowa nyáŋ wuu baŋa mɛ́; rɩ́wɔ́ tʋŋ aá pá Babɩlɔɔnɛ kuóro Nabikanezaarɛ, a múúríwó tɩɩ pɔ́ʋ́. Ŋ sɩ́ a rʋ́ʋ́ dí dóé balla má tɩɩ nyúú.”»
15 Ká Wɩɩsɛ wɩ́laabʋllɔ Zeremi baa bʋl wɩ́laabʋllɔ Hananiya rɩ́ a bʋlɛ́: «Ŋŋ́ sʋ́lɩ́ Hananiya, zesi : Nyuutɩna Wɩɩsɛ wɩ́ɩ́ tʋ́mɛ́; ɩ taŋa nyɩ́sɛ́ nɩɛ nyáŋ nɛ́, ɓa la nyɩɛnnɛ dí. 16 Ɛ́ wɩ́ɛ́ ná Nyuutɩna Wɩɩsɛ há sʋ́ʋ́ ná: Ŋ sɩ́ a rɩ́ɩ́ yɩr yʋ́ksɛ tíé nyúú. Bɩná né tɩɩ sɩɛrʋ nɛ́ rɩ́ɩ́ sʋwɛ, bee wɩ́ɛ́, ɩ yíkí nɩɛ ɓa cɛ́ Nyuutɩna Wɩɩsɛ mɛ́.»
17 Ɛ́ bɩna tɩɩ sɩɛrʋ, ʋ caŋsɛ balpɛ nyúú mí, wɩ́laabʋ́llɔ Hananiya ɓɩɛ́na sʋ́wɔ́.