Zeremi báásɛ baŋdabaasɩ́
27
1 Zoziyasɛ bio Zʋwakimi há púle dí Ziida kuorí, Nyuutɩna Wɩɩsɛ pi liŋó né pá Zeremi, a bʋlɛ́: 2 Ná Nyuutɩna Wɩɩsɛ há sʋ́ʋ́ ná a páŋ: Ja vɔ́wsɛ, a já daasɛ a bɩrmɛ́ baŋdabaasɛ́; a pii báásɩ́ baŋ mɛ́. 3 Ɛ́ har mɛ́, a rɩ́ ɛ́ baŋdabaasɛ́ peri Edoŋ kuóro, Mʋwabɛ kuóro, Amɔŋ dunɩɛ kuóro, Tiiri kuóro arɩ́ Siidoŋ kuóro, a tɩ́ŋ ɛ́ tɔ́nɛ nɩtʋmɛ́ ná há kó Ziida kuóro Sedesiyasɛ rɩ́, Zerizalɛmɛ mɛ́ rɛ́. 4 Ká bʋlɩ́ŋ há sʋ́ʋ́ ná a pɔ́wɔ́, rɩ́wɔ́ bʋl pɔ́wɔ́ nyúútɩ́náwa, a bʋlɛ́: Ná Nyuutɩna Wɩɩsɛ, Doewuutɩna Ɩzɩrayɛl Wɩɩsɛ, há sʋ́ʋ́ ná: Nóú ná ɩ́ há sɩ́ bʋl pɛ́ɩ́wa nyúútɩ́náwa:5 Ŋ nɛ́ a tíé rɩ́ nɩbííne arɩ́ pʋsɛ ná wuu há mɩ́ŋ tíé nyúú a tɩ́ŋɩ́ŋ dóé zeno arɩ́rɩ́ŋ vádóé mí. Ŋ pí tíé aá pá nɛrɔ ná ŋ há có ní. 6 Mʋ́l né mí, ŋ nɛ́ pi tɔ́nɛ nyáŋ wuu a héŋ tʋ́tʋ́nnɔ Babɩlɔɔnɛ kuóro Nabikanezaarɛ nɛ́sɛ mɛ́, ŋ nɛ́ pi balla má tɩɩ pɔ́ʋ́, rʋ́ʋ́ tɩ́llɩ́wɔ́. 7 Duó wuu nɩɛ sɩ́ tʋŋ pɔ́ʋ́, a tʋŋ pɔ́ʋ́ tɩɩ, ʋ ko tóú har mɛ́ rɩ́wɔ́ tʋ́ŋ pɔ́ʋ́ bio, ʋ bio má ko tóó har mɛ́ rɩ́wɔ́ tʋ́ŋ a pɔ́ʋ́ bio má bio, a káá jɔ́ʋ́ má tɔ́ɔ́ tɛ́ŋ péré, rɩ́ duówa náŋá há kánɔ́ arɩ́ kuóré náŋá dóé há kɩ́wɔ́ há sɩ́ ko dí dóé ʋ nyúú.
8 Duo ná rɩ́ dɩtɩ́llɛ ná há sɩ́ vɛ rʋ́ʋ́ tʋŋ pá Babɩlɔɔnɛ kuóro Nabikanezaarɛ, a vɛ rɩ Babɩlɔɔnɛ kuóro hé baŋdabaasɩ́ ʋ baŋ mɛ́, ŋ sɩ́ cɩ́nʋ́ mɛ́ rɩ́ tókowí, rɩ́ losu arɩ́ dɩwɩbɔmɔ, a kaá já rɩ́ŋ zɔ́kʋ́ ɓóŋɓóŋ, a tɩŋ Babɩlɔɔnɛ kuóro nɛ́sɛ mɛ́, Nyuutɩna Wɩɩsɛ nɛ́ bʋ́l ɛ́.
9 «Ɩ́ é, ɩ́ sɩ́ɩ́wa wɩ́laabʋlla, ɩ́ muulináára, ɩ́ tɩɩ duose, ɩ́ nɩɛ ná háá karmɛ caŋwʋllɛ rɩ́rɩ́ɩ́wa hɩla wɩ́bʋlɛ́ zésú. Ɓa sɛ́: «Ɩ́ wáá tʋ́ŋ pá Babɩlɔɔnɛ kuóro. 10 Bee wɩ́ɛ́, ɓa wɩ́laabʋlɛ́ ká nyɩɛnnɛ nɛ́; a mákɛ́ rɩ́wɔ́ a rɩ́ɩ́wa kɛ́kɩ́wa tɔ́ɔ́ mɛ́, rɩ́ŋ kíríwa tá, a a rɩ́ɩ́wa yʋ́ksɛ.
11 Amá duó ná wuu há sɩ́ saŋ baasɛ baŋdabaasɩ́ ná Babɩlɔɔnɛ kuóro há sɩ́ hé pɔ́ʋ́, a tʋ́ŋ aá pɔ́ʋ́, ŋ sɩ́ lo rʋ́ʋ́ káánʋ́ tɔ́ɔ́ mɛ́ rɩ́ tɛŋfɩ́ɛ́l, a ké ráŋ aá párʋ́ tíé mí, Nyuutɩna Wɩɩsɛ nɛ́ bʋ́l ɛ́.»
12 Ɛ́ liŋó tɩɩ nɛ́ ŋ bʋl pá Ziida kuóro Sedesiyasɛ, a bʋlɛ́: «Ɩ́ baasɛ baŋdabaasɩ́ ná Babɩlɔɔnɛ kuóro há sɩ́ hé pɛ́ɩ́wa. Ɩ́ saŋ pɔ́ʋ́, a saŋ pɔ́ʋ́ nɩɛ má, ɩ́ sɩ́ ka mɩɩsɛ. 13 Beé rí tɛ, rɩ́ tókowí, losu, arɩ́ dɩwɩ́bɔmɔ ɓʋ́ɩ́ rɩ́rɩ́ tɔ́ɔ́ nɩɛ wuu, a nɛ ɛ́ Nyuutɩna Wɩɩsɛ há bʋlɛ́ pá duo ná wuu nɩɛ há sɩ́ vɛ rʋ́ʋ́ tʋ́ŋ pá Babɩlɔɔnɛ kuóro? 14 Ɩ́ sɩ́ wɩ́laabʋlla ná há sɛ́ rɩ́ɩ́wa wáá tʋ́ŋ pá Babɩlɔɔnɛ kuóre wɩ́bʋlɛ́ zésú. Ɓa wɩ́laabʋlɛ́ ka nyɩ́ɛ́nnnʋ́. 15 Ŋ wʋ́ɔ́ tʋ́mɛ́. Wɩ́ɛ́ ná ɓa há lɛ́ aá bʋ́lɩ́ŋ yɩr mɛ́, ka nyɩ́ɛ́rʋ, a mákɛ́ rɩ́ŋ kíríwa tá, rɩ́ɩ́wa rɩ́ ɛ́ wɩ́laabʋlla há lá ɛ́ wɩ́ɛ́ bʋl aá pɛ́ɩ́wa sʋsɛ. Nyuutɩna Wɩɩsɛ nɛ́ bʋ́l ɛ́:”»
16 Ŋ bʋ́l vʋk'ɔɔsa arɩ́ nɩɛ nyáŋ wuu rɩ́, a bʋlɛ́: «Ná Nyuutɩna Wɩɩsɛ há sʋ́ʋ́ ná: «Ɩ́ sɩ́ɩ́wa wɩ́laabʋlla ná há sɩ́ rɩ́ Nyuutɩna jaa cɩksɛ ná wáá dáánɛ káá bɩ́rɩ́ lɛ Babɩlɔɔnɛ rɩ́ɩ́ ko mʋ́l né mí rɩ́ zésú. Bee wɩ́ɛ́, nyɛ́wɩ́ɛ́ nɛ́ ɓa lá bʋl aá pɛ́ɩ́wa. 17 Ɩ́ sɩ́wɔ́ zésú. Ɩ́ tʋ́ŋ pá Babɩlɔɔnɛ kuóro, ɩ́ sɩ́ ka mɩɩsɛ. Beé rí tɛ rɩ́ tɔ́ɔ́ né a tɔ́ɓóó?”»
18 Ká Zeremi súúri a bʋlɛ́: «Rɩ́ nɩɛ nyáŋ nɛ́ ka wɩ́laabʋ́llá é, a la Nyuutɩna Wɩɩsɛ nʋɔ wɩ́ɛ́ aá bʋl é, rɩ́wɔ́ sʋl Nyuutɩna Wɩɩsɛ, Doewuutɩ́na Wɩɩsɛ, rʋ́ʋ́ sɩ́ lo rɩ́wɔ́ pa cɩksɛ ná há káánɛ Nyuutɩna jaa sɩɛrʋ rɩ́ Ziida kuóro jaa mɛ́ arɩ́ Zerizalɛmɛ tɔ́ɔ́ sɩɛrʋ, a kaa mʋ́ Babɩlɔɔnɛ. 19 Beé wɩ́ɛ́, ná Nyuutɩna Wɩɩsɛ, Doewuutɩna há sʋʋ ná a mʋ́ tɩɩnɛ nafarsɛ ná, rɩ́ kɔmɔ́ gbaŋjɛlɔ ná, rɩ́ sórsi ná arɩ́ cɩksɛ ná náŋa ha há káánɛ́ Zerizalɛmɛ mɛ́, 20 tɛ́ŋ ná mɛ́ Babɩlɔɔnɛ kuóro Nabikanezaarɛ fa há kéŋ Ziida kuóro Yekoniya há ká Zʋwakimi bio, a súúri Zerizalɛmɛ arɩ́ Ziida nɩhɩ́ɛ̃́sɛ wuu mí, ʋ fa wɩ ɛ́ cɩksɛ pɛ́ɛ́ Zerizalɛmɛ mɛ́, a káá mʋ́ Babɩlɔɔnɛ. 21 Ʋ ká ɛ́ nɛ́, ná Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ há sʋ́ʋ́ ná, a mʋ́ tɩɩnɛ cɩksɛ ná há káánɛ Nyuutɩna jaa mɛ́ rɩ́ Ziida kuóro jaa mɛ́ arɩ́ Zerizalɛmɛ tɔ́ɔ́ mɛ́: 22 “Ɛ́ cɩksɛ wuu sɩ́ mʋ́ Babɩlɔɔnɛ, a kaánɛ ráŋ, a kaá ja tápʋl ná, ŋ báá há sɩ́ bɩ́ɩ́nɩ́wɔ́ wɩ́ɛ́, a bɩrɛ káŋwɔ́ ko rɛɛ́.” »
Nyuutɩna Wɩɩsɛ nɛ́ bʋ́l ɛ́.