Ɓa vʋ́ʋ́rɛ Zeremi ɓʋ́ɩ́ wɩ́ɛ́
26
1 Zoziyasɛ bio Zʋwakimi há Ziida kuorí díí púle mí ní, Nyuutɩna Wɩɩsɛ pi liŋó né a pá Zeremi, a bʋlɛ́: 2 «Ná ŋ é Nyuutɩna Wɩɩsɛ há sʋ́ʋ́ ná: Mʋ́ cɛ́ Wɩcʋɔlɩjɩzeno wuolo sɩɛrʋ, ká búóli wɩ́ɛ́ ná ŋ há bʋ́lɛ́ pɛ́ɩ́, a pá nɩɛ ná wuu há lɛ́ Ziida tɔ́nɛ a ko, rɩ́wɔ́ cʋɔlɛ Wɩɩsɛ rɛ́. Sɩ́ wɩ́ɩ́ oro wuu cókí tá. 3 Ŋ bɩ́ɩ́nɔ́ rɩ́ ɓa sɩ́ zésí, ká rɩ́ nɛrɔ wuu tɔ́ʋ́ málbɔmɔ. Ŋ bɩ́ɩ́nɔ́ rɩ́ŋ ɔ́wɔ́ bɔ́ŋbɔ́ŋ, a tɩŋ wɩ́bɔma ná ɓa há ɛ́ɛ́ wɩ́ɛ́. Amá rɩ ɓa nɛ́ zésé, ŋ sɩ́ gíríŋ há bɩ́ɩ́nɛ́ rɩ́ŋ ɔ́ʋ́ ná ɓa mɛ́. 4 Ɩ sɩ́ bʋ́lwɔ́ rɩ́ a bʋlɛ́: Ɩ́ ná Nyuutɩna Wɩɩsɛ, há sʋ́ʋ́ ná: “Rɩɩ́wa nɛ́ wɩ́ŋ há sʋ́ʋ́ ná zési, rɩɩ́wa nɛ́ wɩ wɩ́ɛ́ ná ŋ há mákɛ́ pɛ́ɩ́wa tɩŋ, 5 a wɩ́ŋ tʋtʋnna ná há káŋ wɩ́laabʋ́lla ŋ há tʋmɛ́ tɛ́ŋ wuu mí, ɩ́ rɩ́ liŋó zésí, 6 ŋ sɩ́ zɔkɛ Wɩcʋɔlɩjɩzeno né, anɛ ɛ́ ŋ há zɔkɛ Silo ɓɩnɔ ɛ́. Ká rɩ́ŋ a rɩ́ Zerizalɛmɛ nɛ́ a bʋra malla a pá duníé nɩɛ wuu, rɩ́wɔ́ píí bʋrɛ aá hé nɩɛ mɛ́.” »7 Vʋk'ɔɔsa, rɩ́ wɩ́laabʋlla arɩ́ nɩɛ ná wuu fa há mɩŋ Wɩcʋɔlɩjɩzeno wuolo ná sɩɛrʋ nɛ̃ Zeremi wɩ́bʋlɛ́ ná. 8 Zeremi há búóli Nyuutɩna Wɩɩsɛ liŋó ná tenni, a pá ɛ́ nɩɛ wuu, vʋk'ɔɔsa ná rɩ́ wɩ́laabʋlla ná arɩ́ nɩɛ ná wuu kénú ká bʋlɛ́: «Ɩɩ́ sʋ́wɛ́ nɛ́, ɩɩ́ sʋ́wɛ́ nɛ́! 9 Ʋ cɛ́ ɛ́ rɛ́ɛ́wa rɛ́, ɩ sáŋ bʋ́l Nyuutɩna Wɩɩsɛ yɩr mɛ́, rɩ́ Wɩcʋɔlɩjɩzeno sɩ́ zɔkɛ anɛ Silo ɓɩnɔ, ká rɩ́ tɔ́ɔ́ né má zɔkɛ, a a tɔ́ɓóó?»
Ɛ́ nɛ́ nɩɛ ná wuu há mɩŋ Wɩcʋɔlɩjɩzeno wuolo ná sɩɛrʋ kíl Zeremi. 10 Minísiwa ná há mɩŋ Ziida mɛ́ ká nɛ wɩ́ɩ́ ná há tʋ́mɛ́, ɓa lɛ́ kuóro jaa mɛ́ a mʋ́ Wɩcʋɔlɩjɩzeno wuolo sɩɛrʋ, a mʋ́ ké Wɩcʋɔlɩjɩzeno Dánnʋfɛlɔ ná mɛ́. 11 Vʋk'ɔɔsa ná rɩ́ wɩ́laabʋlla ná bʋ́l minísiwa, arɩ́ nɩɛ ná wuu rɩ́ a bʋlɛ́: «Báálɔ né mɔhɔ̃́ rʋ́ʋ́ sʋwɛ nɛ́, bee wɩ́ɛ́ ʋ bʋ́l wɩ́ɛ́ a cɛ́ Zerizalɛmɛ mɛ́, ɩ́ tɩɩ dɩlla nɛ̃.»
12 Amá Zeremi bʋ́l minísiwa ná rɩ́ nɩɛ ná wuu rɩ́ a bʋlɛ́: «Wɩ́ɛ́ ná wuu ŋ há bʋ́lɛ́ a cɛ́ Wɩcʋɔlɩjɩzeno né arɩ́ tɔ́ɔ́ né mí, ɩ́ há nɩ́ɛ́, Nyuutɩna Wɩɩsɛ nɛ́ tʋ́mɩ́ŋ rɩ́ŋ bʋl pɛ́ɩ́wa. 13 Mʋ́l né mí, ɩ́ kánɩ́wa tɩɩ, a tʋŋ ɛ́ ná há cɛ́rɛ́, a tá wɩ́bɔma ɛ́ɛ́. Ɩ́ zesi Nyuutɩna Wɩɩsɛ, ɩ́ Wɩɩsɛ há sʋ́ʋ́ ná. Ɛ́ é, ʋ sɩ́ giri wɩɩla ná ʋ fa há sʋ́ʋ́ sɩ́ héíwa mɛ́. 14 Ŋ é, ŋ mɩ́nɩ́wa nɛ́sɛ mɛ́. Ɩ́ há néé rɩ́ ɛ́ ná cɛ́rɔ́, ɩ́ pii áŋ mɛ́. 15 Ɩ́ taŋa zɩŋ wɩ́ɩ́, rɩ́ɩ́wa nɛ́ ɓʋ́ŋ, ɩ́ zɩŋ rɩ́ nɛrɔ ná há wɩ wɩ́ɩ́ zɔ́kɛ́ nɛ́ ɩ́ ɓʋ́, ʋ ká wɩ́ɩ́ rɛ́ a cɩ́ɩ́nɩ́wa tɩɩ rɩ́ tɔ́ɔ́ né rɩ́rʋ́ nɩɛ wuu. Bee wɩ́ɛ́, Nyuutɩna Wɩɩsɛ nɛ́ ɓɩɛ́na tʋ́mɩ́ŋ rɩ́ŋ bʋ́l wɩ́ɛ́ nyáŋ wuu héíwa dɩlla mɛ́.»
16 Ɛ́ nɛ́ minísiwa ná rɩ́ nɩɛ ná wuu bʋl vʋk'ɔɔsa ná rɩ́ wɩ́laabʋ́lla ná rɩ́ a bʋlɛ́: «Báálɔ né wɩ mɔhɛ̃́ rʋ́ʋ́ sʋwɛ, bee wɩ́ɛ́ Nyuutɩna Wɩɩsɛ, á Wɩɩsɛ nʋɔ wɩ́ɛ́ nɛ́ ʋ ɓɩɛ́na laa bʋl párá.»
17 Tɔ́ɔ́ ná nɩhɩ́ɛ̃́sɛ náŋa má tɩɩ isi a bʋl nɩɛ ná wuu há cíké rɩ́ a bʋlɛ́: 18 «Mise há lɛ́ Moresɛtɛ la Wɩɩsɛ nʋɔ wɩ́ɛ́ a bʋ́l Ziida kuóro Ezekiyasɛ tɛ́ŋ mɛ́, ʋ bʋl Ziida nɩɛ wuu rɩ́ a bʋlɛ́: Ná Nyuutɩna Wɩɩsɛ, Doewuutɩna Wɩɩsɛ há sʋ́ʋ́ ná:
“Ɓa sɩ́ parɛ Sɩɔŋ anɛ baka,
Zerizalɛmɛ sɩ́ a zɩɓoru,
ká rɩ́ tuuni nyʋ tɔ́
Wɩcʋɔlɩjɩzeno paalɔ ná mɛ́.”
19 Ziida kuóro Ezekiyasɛ rɩ́rʋ́ nɩɛ sɩɛ kénú ɓʋ́ rɛ́? Ɓa wɩ Nyuutɩna Wɩɩsɛ héwíŋ fɛ́ɛ́ rɛ́? Ɓa wʋ́ʋ́ sʋ́lɛ́ rʋ́ʋ́ lo rʋ́ʋ́ cɔ́ɛ́ pɔrɛ rɛ́? Ɛ́ nɛ́ Nyuutɩna Wɩɩsɛ bɩrsɛ́ sabɩɩna, a girí wɩɩla ná ʋ fa há bʋlʋ́ wɩ́ɛ́, rʋ́ʋ́ sɩ́ a rɩ́wɔ́ ná. Ɛ́ wɩ́ɛ́, rɩ́ ráá nɛ́ ɓʋ́ báálɔ né, wɩɩla ɓɩzeno rá a ja cɩ́ɩ́nɩ́rá tɩɩ rɛ́?»
Zʋwakimi ɔ́ɔ́ ɓa ɓʋ́ wɩ́laabʋllɔ Uriya
20 Ɛ́ tɛ́ŋ mɛ́ rɩ wɩ́laabʋllɔ nɔ́ŋɔ má fa mɩŋ ráŋ, a la Wɩɩsɛ nʋɔ wɩ́ɛ́ aá bʋl. Ʋ yɩr nɛ́ ká Uriya, Semaya bio ní. Ʋ tɔ́ɔ́ nɛ́ ká Kiriyatɛyarimi. Ʋ fa la Wɩɩsɛ nʋɔ wɩ́ɛ́ a bʋ́l cɛ́ Zerizalɛmɛ tɔ́ɔ́ arɩ́ Ziida tɔ́nɛ wuu mí, anɛ Zeremi. 21 Kuóro Zʋwakimi, rɩ́rʋ́ pʋ́pɔ́ɔ́ra wuu, rɩ́rʋ́ minísiwa nɛ́ Uriya fa há bʋ́lʋ́ ná. Ɛ́ nɛ́ kuóro jɩ́jɔ́ʋ́ ɓʋ́ɩ́. Amá Uriya nɩ́ɔ́, héwíŋ zʋʋ, ʋ fá a mʋ́ Ezipiti. 22 Ɛ́ nɛ́ kuóro Zʋwakimi tʋ́ŋ Akbɔrɛ bio Ɛlnataŋ, arɩ́ báála náŋá Ezipiti mí. 23 Ɓa mʋ́ Ezipiti, a ka Uriya a kaa bɩrkó pá kuóro. Ʋ a ɓa ɓʋ́ʋ́ rɩ́ tókowí, a píí yo hé nɩɛ wuu lɛlbule sɩɛrʋ.
24 Amá Safaŋ bio Ahikaŋ ní fáá pɔ́ Zeremi mí. Ʋ wɩ́ɛ́ nɛ́ tɛ, Zeremi wɩ nɩɛ ná nɛ́sɛ zʋ́ɛ́ rɩ́wɔ́ ɓʋ́ʋ́.