Pirnɔnɔ kúrsí bɛllɛ wɩ́ɛ́
24
1 Babɩlɔɔnɛ kuóro Nabikanezaarɛ há kéŋ Yekoniya há ká Zʋwakimi bio, ká a Ziida kuóro, arɩ́ Ziida dɩtɩ́llɛ minísiwa rɩ́ nɛ́sɛ tʋtʋnna, a súúri Zerizalɛmɛ lukre mí, a kaa col Babɩlɔɔnɛ har mɛ́ nɛ́, Nyuutɩna Wɩɩsɛ mákɛ pirnɔnɔ kúrsí bɛllɛ há bíl Wɩcʋɔlɩjɩzeno dánnʋɔ mɛ́ a páŋ. 2 Kúre ná nɔ́ŋɔ pirnɔnɔ fa cáásɔ́ a wérí, anɛ dʋ́ŋdʋʋ̃́ nɔnɔ, ɓɔrɛ́ tɛ́ŋ mɛ́. Ká kúre ná nɔ́ŋɔ é ɓɩɛ́ fa sʋ́ɔ́rɔ́, a zɔ́kɛ́ ɓóŋ, ɓa báá wʋ́ɔ́ wúó dí.3 Nyuutɩna Wɩɩsɛ bɔ́sɩ́ŋ a bʋlɛ́: «Zeremi, ɩ ná beé rí?» Ɛ́ nɛ́ ŋ sɛ́: «Pɩrnɔnɔ. Náŋá wéró kɩ́ŋkáŋ, a ká hɩɛ̃ŋ, ká náŋá sʋɔrɛ, a zɔkɛ ɓóŋ, a báá wɩ wuó dí.»
4 Ɛ́ nɛ́ Nyuutɩna Wɩɩsɛ páŋ líŋo né a bʋ́lɛ́: 5 «Ná ŋ é Nyuutɩna Wɩɩsɛ, Ɩzɩrayɛl Wɩɩsɛ há sʋ́ʋ́ ná: Anɛ pirnɔŋwéré ná bélé há kéŋ hɩɛ̃ŋ ɛ́, Ziida nɩkɛ́sɛ́ ná ŋ há kírwó rɛ́ɛ́wa ɓa lɩ́ɩ́ mʋ́ Kalde kéŋ hɩɛ̃ŋ ɛ́ nɛ́ a páŋ. 6 Óó, ŋ ha kéŋ sáwér ní aá bélwó, rɩ́ŋ káŋwɔ́ bɩrɛ ko tɔ́ɔ́ né sɩɛrʋ. Ŋ sɩ́ ɔ́sɩ́wɔ́, ŋ báá wʋ́ɔ́ zɔ́kɛ́, ŋ sɩ́ a rɩ́wɔ́ nálúrsí zʋ tíé, ŋ báá wʋ́ɔ́ conni. 7 Ŋ sɩ́ pɔ́wɔ́ sabɩɩna ná há sɩ́ a rɩ́wɔ́ zɩ́ŋ rɩ́ŋ nɛ́ ká Nyuutɩna Wɩɩsɛ. Ɓa sɩ́ bɩrɛ kóŋ rɩ́ arɩ́wɔ́ sɩɛnnʋ wuu. Ɛ́ mɛ́ nɛ́ rɩ́wɔ́ áŋ nɩɛ, ká rɩ́ŋ áwɔ́ Wɩɩsɛ.
8 Amá ná Nyuutɩna Wɩɩsɛ há sʋ́ʋ́ ná a pá Ziida kuóro Sedesiyasɛ, ʋ minísiwa, rɩ́ nɩɛ ná há káánɛ́ Zerizalɛmɛ mɛ́, rɩ́ nɩɛ ná wuu há wɩ tɔ́ɔ́ ná mɛ́ lɩ́ɛ́, arɩ́ nɩɛ ná wuu há mɩ́ŋ Ezipiti mí: Ŋ sɩ́ a rɩ́wɔ́ nɛ pirnɔŋsʋɔrɛ́ nyáŋ há zɔ́kɛ́ ɓóŋ, a báá wɩ wuó dí. 9 Dúníé nɩɛ wuu sɩ́ nówó, rɩ́ héwíŋ zʋ́wɔ́. Ɓa sɩ́ a málla ná há lɔ́rɛ kuódɩtɩ́llɛ ná wuu sɩɛrʋ. Ráŋ ná wuu ŋ há sɩ́ pɩ́sɩ́wɔ́ rɩ́wɔ́ zʋ, rɩ́ ɓa nɛ́ kúé aá bʋl zome wɩ́ɛ́ ɛ́ rá má nɩlɔ́rɔ wɩ́ɛ́, ɛ́ rá má bágɛ wɩ́ɛ́, ɛ́ rá má bʋra wɩ́ɛ́, ɓa wɩ́ɛ́ nɛ́ rɩ́wɔ́ pii máŋsɛ. 10 Ŋ sɩ́ a rɩ́ lal rɩ́ losu arɩ́ pʋɔlɩ́bɔmɔ ɓʋ́ʋ́sɩ́wɔ́ a kaá ja rɩ́wɔ́ nyɩ́ɩ́kɛ tíé ná ŋ há píé pɔ́wɔ́ ɓa rɩ́wɔ́ naabálwa mɛ́.»