Keŋyuo ná há ceŋŋe wɩ́ɛ́
19
1 Ná Nyuutɩna Wɩɩsɛ há sʋ́ʋ́ ná pá Zeremi: «Mʋ́ vimaarʋ rɩ́, a yɔwɛ cʋʋ keŋyuo, a lɩ́sɛ jamáŋ nɩhɩ̃́ɛ́sɛ naŋá arɩ́ vʋk'ɔɔsa nɩhɩ̃́ɛ́sɛ naŋá a súúrí tɩɩ mɛ́. 2 Ɛ́ har mɛ́, rɩ́ɩ́ tuwi Hɩnɔŋ polo há mɩ́ŋ cíŋcelli dánnʋɔ laka. Ráŋ nɛ́ rɩ́ɩ́ buoli liŋó ná ŋ há sɩ́ pii pɛ́ɩ́, a pá nɩɛ. 3 Ɩ sɩ́ bʋlɛ́: Ziida kuóre arɩ́ Zerizalɛmɛ nɩɛ, ɩ́ zesi Nyuutɩna Wɩɩsɛ há bʋlʋ́ ná. Ɩ́ ná Nyuutɩna Wɩɩsɛ, Doewuutɩna Wɩɩsɛ, Ɩzɩrayɛl Wɩɩsɛ há sʋ́ʋ́ ná: Ŋ sɩ́ a rɩ wɩɩla ko dɩhɩ̃́ né. Nɩɛ ná há sɩ́ nɛ ɛ́ wɩ́ɩ́, dɩlla sɩ́ cɩ́ɩ́mɛ anɛ duóŋ há ɓɛ́ɛ́. 4 Beé wɩ́ɛ́, Ziida nɩɛ vɛ́ŋ tá, ká a, nɛ́ŋ baa wɩ ɛ́ dɩhɩ̃́ sɩ́ɛ́ ɛ̃́: ɓa ɔsɛ vʋka ráŋ a pá venni. Ká ɓa rɩ ɛ́ venni fá wɩ wɩ́ɩ́ mɛ́ tʋmɛ́, ɓa ánáwa rɩ́ Ziida kuóre má ɛ́ tɩɩ. Ɓa bɩsɛ nɩyɔɔwa cɛ́llɛ sú ɛ́ dɩhɩ̃́ wuu ní. 5 Ɓa bɩrmɛ dɩɓaarɩ́ a pá Baal, rɩ́wɔ́ fisíwó bɛlɛ ráŋ, a ɔsɛ vʋk'fisé aá pɔ́ʋ́. Ká ŋ há wɩ nyɛ́ wɩ́ɩ́ bɩɩnɛ, a wɩ nyɛ́ wɩ́ɩ́ bʋlɛ, rɩ́ŋ sɩɛ́ bʋ́lwɔ́ a nɛ́.6 «Ɛ́ nɛ́ tɛ́, tápʋl rɩ́ kúé, rɩ́wɔ́ baa sɩ́ ɛ́ dɩhɩ̃́ pii yɩrɛ “Tɔfɛtɛ” ɛ́ rá má “Hɩnɔŋ polo” amá ɓa sɩ́ yɩrʋ́ “Nɩɓʋ́ polo”. Nyuutɩna Wɩɩsɛ nɛ́ bʋ́l ɛ́. 7 Ráŋ tɩɩ nɛ́ ŋ sɩ́ a rɩ Zerizalɛmɛ arɩ́ Ziida sabɩɩna jáŋ a yɔɔ, ká rɩ́ŋ a rɩ́wɔ́ dɩŋdɔma sɩ́wɔ́ susú fá, ká yoo díwó a ɓʋ́ʋ́sɩ́wɔ́, a tá pá bána nyúú díwiisi arɩ́ baka dííre rɩ́wɔ́ dí. 8 Ɛ́ ná ŋ há sɩ́ a tɔ́ɔ́ né sɩ́ maanɛ nɩɛ wuu nʋʋsɛ. Nɩdaarɛ́ ná wuu há sɩ́ nóú nʋʋsɛ sɩ́ maanɛ. Ɓa sɩ́ nóú há zɔkɛ a mɔ́ ɛ́, rɩ́wɔ́ sɩɛnnɛ zɔkɛ rɩ́wɔ́ caasí. 9 Dɩŋdɔma ná há wɩ susú ɛ̃́, sɩ́ ko cɩ́ Zerizalɛmɛ tɔ́ɔ́ mɛ́, a zɔkʋ́, a hóú wɩhála sɩɛrʋ, rʋ́ʋ́ nɩɛ gúl ká gɩr aá dí naŋá heŋbólli rɩ́ tolé namɩŋsa, a ko lɩɩ zʋ́ náŋá dí.
10 «Ká pi ɛ́ koŋyuo yoo yɛrkɛ nɩɛ ná wuu há tɩ́ŋɩ́ mɛ́ aá va sɩ́ɛ́ mɛ́. 11 Ká bʋlwɔ́ rɩ́ a bʋlɛ́: Ná Nyuutɩna Wɩɩsɛ, Doewuutɩna há sʋ́ʋ́ ná: Ŋ sɩ́ yɛrkɛ nɩɛ nyaŋ arɩ́ tɔ́ɔ́ né, anɛ ɛ́ ɓa haa pi cʋʋ koŋuo yoo yɛrkɛ. Ʋ to wɩ́girí.
Tɔfɛtɛ má tɩɩ mɛ́ nɛ́ rɩ́wɔ́ hú sʋsɛ, dɩhɩ̃́ há tó wɩ́ɛ́. 12 Ŋ sɩ́ a rɩ wɩ́ɩ́ ná há tʋŋ Tɔfɛtɛ mɛ́, rʋʋ tɩɩ nɛ́ peri tɔ́ɔ́ né rɩ́rʋ́ nɩɛ. Nyuutɩna Wɩɩsɛ nɛ́ bʋ́l ɛ́. 13 Ká rɩ́ŋ a rɩ Zerizalɛmɛ jɩɩsɛ arɩ́ Ziida kuóre jɩɩsɛ nɩ́ɛ̃sɛ Tɔfɛtɛ dɩhɩ̃́ né: ɓa sɩ zʋ́ busunnú. Oo! Ɛ́ nɛ́ sɩ́ peri ɛ́ jɩɩsɛ, ɓa lúŋse wuu daha, ɓa nyɩkɛ áŋsaŋsɛ a pá bána nyúú caŋwʋllɛ ɓɩkaná ná wuu, ká pi dɩvɛ́ŋ má a satɔrɩpallɛ a pá wɩhʋɔra.»
14 Zeremi há bɩrɛ lɛ Tɔfɛtɛ ko, ráŋ ná Nyuutɩna Wɩɩsɛ fá há tʋmʋ́ ʋ mʋ́ lɔ́ʋ́ nʋɔ wɩ́ɛ́ bʋl ráŋ, ʋ zʋ́ɔ́ cɩ Wɩɩsɛjaa wuólo ná sɩɛrʋ, ká bʋl nɩɛ ná wuu fá há mɩŋ ráŋ rɩ́, a bʋlɛ́: 15 «Ná Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ há sʋ́ʋ́ ná: “Ŋ sɩ́ a rɩ wɩhálawa ná wuu ŋ há bʋlwɔ́ wɩ́ɛ́, a bʋlɩ́ŋ sɩ́ pii cɩ́ tɔ́ɔ́ né mí, rɩ́wɔ́ perú arɩ́rʋ́ laka tɔ́wɩ́ɛ́la wuu. Bee wɩ́ɛ́, ʋ nɩɛ tʋŋ nyúduó, a vɛ́ŋ wɩ́bʋlɛ́ zesé.” »