Ɓa vɔ́wɛ́ Zeremi a ɓarɛ líŋi
20
1 Vʋk'ɔɔsɔ Pasuuri, há ká Ɩmɛɛrɛ bio, ká a Wɩɩsɛ jaa bíbelle nɔhɔ̃́, nɛ̃ Nyuutɩna Wɩɩsɛ wɩ́ɛ́ ná Zeremi há lɛ́ aá bʋl. 2 Ʋ cú wɩ́laabʋllɔ Zeremi ná tɛŋgbɛlɩ́ mɛ́ ká a ɓa kánʋ́ vɔwɛ a ɓarɛ líŋi ná há mɩŋ Wɩɩsɛ jaa dánnʋɔ ná há mɩŋ daha rɩ́ mɛ́, Bɛŋzamɛ dunɩɛ tɩŋ ráŋ aá zʋ́. 3 Tɔ́ɔ́ há pʋlɛ́, Pasuuri ɔ́ɔ́ ɓa puri Zeremi líŋi ná mɛ́ a tá. Ɛ́ nɛ́ ʋ bʋ́lʋ́ rɩ́ a bʋlɛ́: «Nyuutɩna Wɩɩsɛ báá wɩ́ɩ́ káá yɩ́rɛ Pasuuri, amá ɩ yɩr sɩ́ a “Héwíŋ mɩŋ dɩhɩ̃́ wuu”. 4 Bee wɩ́ɛ́, ná Nyuutɩna Wɩɩsɛ há sʋ́ʋ́ ná: “Ŋ sɩ́ a rɩ́ héwíŋ ɓɩzeno zʋ́ɩ́ rɩ́rɩ́ɩ́ naŋnɔ́ŋsɛ wuu. Ɩ naŋnɔ́ŋsɛ dɩŋdɔma sɩ́ dí dóé ɓa nyúú, rɩ́ sɩ́ɩ́ bíbélwó ká rɩ́wɔ́ ɓʋ́ɓʋ́ʋ́sɩ́wɔ́ rɩ́ tókowí. Ŋ sɩ́ kɛsɛ Ziida nɩɛ wuu a hé Babɩlɔɔnɛ kuóro nɛ́sɛ mɛ́, rʋ́ʋ́ kɛ́sɩ́wɔ́ a mʋ́ʋ́ tɔ́ɔ́, a ɓʋ́ʋ́sɩ́wɔ́ rɩ́ tókowí. 5 Zerizalɛmɛ nɩɛ kuóɓɩɛ wuu sɩ́ col Babɩlɔɔnɛ. Ɓa há tʋ́mɛ́ nóú ná wuu, ɓa oŋwere ná wuu, arɩ́ Ziida kuóre kuóɓɩɛ́ wuu, ŋ sɩ́ píwó a pɔ́wɔ́ dɩŋdɔma. Rɩ́wɔ́ píésíwó, a tɩ́llɩ́wɔ́ a kaa col Babɩlɔɔnɛ. 6 Ɩ tɩɩ Pasuur, arɩ́rɩ́ɩ́ jaa nɩɛ wuu, ɩ sɩ́ mʋ́ yomí sɩɛrʋ. Ɩ sɩ́ mʋ́ Babɩlɔɔnɛ, ráŋ nɛ́ rɩ́ɩ́ sʋwɛ, ráŋ má nɛ́ sɩɛ́ rɩ́wɔ́ húí. Ɩ naŋnɔŋsɛ ná má wuu ɩ há nyɛ nyɛnnɛ a pɔ́wɔ́, ɓa má dɩhúí nɛ́ ráŋ.”»Zeremi gáásɛ wɩ́ɛ́ Wɩɩsɛ rɩ́
7 Nyuutɩna Wɩɩsɛ, ɩ cáásɔ́ nyɩ́sɩ́ŋ peri,
ɛ́ nɩ́ŋ cʋʋlɛ a tɩ́ŋɩ́ mɛ́,
ɩ mɩ́lɩ́ŋ vaamɔ́,
ɩ dóé dúkíŋ.
Ŋ nɛ́ ɓaá mɔŋ tápʋ́l wuu,
ŋ nɛ́ ká nɩɛ wuu nɩlaamɔ.
8 Tɛ́ŋ wuu mí, rɩ́ŋ nɩ́ɩ́ já rɩ́ŋ bʋl wɩ́ɛ́,
ŋŋ́ bɔl ká cáási ní a ja saŋɛ,
ká búóli wɩɩla rɩ́ zɔ́krʋ wɩ́ɛ́.
Ɩ nʋɔ wɩ́ɛ́ laa bʋlɛ́
ká nɩlannɛ arɩ́ zome ní páŋ
tápʋ́l wuu.
9 Rɩ́ŋ nɛ́ bɩ́ɩ́nɩ́ŋ tɩɩ mɛ́ rɩ́ɩ́ bʋlɛ́:
«Ŋ báá waá a rɩ́ŋ bɩ́ɩ́nʋ́ wɩ́bʋlɛ́ wɩ́ɛ́,
ŋ baa waá a rɩ́ŋ la Wɩɩsɛ nʋɔ wɩ́ɛ́ bʋl»,
ɛ́ tɛ́ŋ mɛ́, ʋʋ́ dé nɛ́ níŋ nɩ́ɩ́ kánɩ́ŋ
beŋtu sɩɛrʋ,
a zʋ́ʋ́ yákɩ́ŋ heŋgbele mí;
Ŋŋ́ hé dóé rɩ́ŋ nyáŋ ɓarɛ,
amá wɩ́ɩ́ ná ŋ há wɩ wo nɛ́ ɛ́.
10 Wɩ́bɔma ná nɩkaná ná há cónne aá páŋ
ŋŋ́ nɩ́wɔ́ rɛ́.
A hé bágɛ́yɩr páŋ:
“Hewíŋ mɩ́ŋ dɩhɩ̃́ wuu”.
Náŋa sɛ́: «Ɩ́ zɔ́kʋ́ yɩr».
Náŋa má sɛ́: «Oo, á sɩ́ zɔ́kʋ́ yɩr.»
Nɩɛ ná má tɩɩ ŋ rɩ́wɔ́ fa há wéró
ɓaá bállɩ́ŋ rɩ́ŋ sɩ́ɛ́rɛ nɛ́,
ɓaá dɛ́llɩ́ŋ rɩ́ŋ nyɔ́rkɛ nɛ́.
Rɩ́wɔ́ sɩɛ́ bʋlɛ́: «Ʋ ká ɛ́ nɛ́, á sabɩ́ɩ́najáŋ nʋɔ súó,
á sɩ́ dí rá tɛŋbuoró ʋ nyúú.»
11 Amá, Nyuutɩna Wɩɩsɛ ká bɩbár,
ʋ nɩ́ɩ́ yóŋ lal.
Nɩɛ ná há cɩ́nɩ́ŋ mɛ́,
ɓa nɩ́ɩ́ gúlé;
ɓa wáá a rɩ́wɔ́ wóllíŋ.
Hɩɩ̃́sɛ sɩ́ káŋwɔ́ ɓa há gúlé wɩ́ɛ́,
ɓa yɩr sɩ́ múúri a kaá mʋ́ wuu,
nɛ́ŋ wuu waá a rʋ́ʋ́ sʋ́llɛ ɛ́ mɛ́.
12 Ɩ é Nyuutɩna Wɩɩsɛ, Doewuutɩna Wɩɩsɛ,
ɩ ɛ̃ nɛ́ŋ ná há ká nɩtaŋá,
ɩ nɩ́ɩ́ kɩ́ɛ́lɛ nɛ́ŋ ná sabɩŋsɛ há féŋsé.
Ŋ píŋ tɩɩ a pɛ́ɩ́ nɛ́,
ɩ yɩɛla nɛ́ ŋ ká,
aá dɛllɛ rɩ́ŋ ná ɛ́ ná
ɩ há sɩ́ díí tɛŋbuóro
ŋ dɩŋdɔma mɛ́.
13 Ɩ́ dɛnnɛ Nyuutɩna Wɩɩsɛ, ɩ́ píŋsú,
bee wɩ́ɛ́, ʋ nɛ́ lórke aá la wɩɩlɩnáárɔ
nɩbɔma nɛ́sɛ mɛ́ aá tá.
14 Rɩ́ bʋra dí tápʋ́l ná ɓa há lʋ́lɩ́ŋ,
rɩ́ nɛ́ŋ sɩ́ bárka sʋ́l pá tápʋl ná,
ŋ maá há lʋ́lɩ́ŋ dúníé mí!
15 Rɩ́ bʋra dí nɛ́ŋ ná
há kúé bʋ́lɩ́ŋ áná rɩ́ a bʋlɛ́:
«Heŋbóle ní ɓa lʋ́l pɛ́ɩ́!», ʋ tɛŋ wuu pɔrɛ.
16 Rɩ́ wɩ́ɩ́ ná há pérí tɔ́nɛ ná
Wɩɩsɛ há zɔ́kɛ́, a wʋ́ɔ́ susu fɛ́ɛ́
peri tɩ́ná má.
Cɩ́cʋɔ, rʋ́ʋ́ nɛ wííle,
wɔhɔ cɩ́ɩ́ka má, rʋ́ʋ́ nɛ lal cááse.
17 Béé rí tɛ, Wɩɩsɛ fa wɩ lóé rɩ́ŋ sʋ́wɩ́ŋ maá luoru mí,
ká ló ʋ lʋ́lɩ́ŋ?
Rɩŋ maá luoru nɛ́ fa káŋ lɛlbule,
ŋ fa wɩ ráŋ nɩ́ɩ́ mɩŋ rɩ́ɩ́ káá mʋ́mʋ́ wuu rí?
18 Béé rí tɛ, ŋ lɩ́ŋ maá luoru mí,
a mɩŋ sazɔkɔ́ rɩ́ dɔkɔ́ mɛ́,
rɩ́ŋ mʋ́ tenni hɩɩ̃sɛ sɩɛrʋ?