Zeremi mʋ́ vimáárɔ rɩ́
18
1 Nyuutɩna Wɩɩsɛ bʋ́l Zeremi rɩ́ a bʋlɛ́: 2 «Zeremi, isi tuwi vimáárɔ rɩ́. Ráŋ nɛ́, rɩ́ŋ a rɩ́ɩ́ nɛ wɩ́ɩ́ ná ŋ há kené aá já rɩ́ŋ bʋ́lɩ́ rɩ́.»3 Ɛ́ nɛ́ ŋ ɓɩɛ́na isi a tuwi vimáárɔ ná rɩ́. Rʋʋ mɩ́nʋ́ viini dɩmɛ́ aá má viini. 4 Amá vie ná ʋ fá háá mɛ́ɛ́ ʋ nɛ́sɛ mɛ́ fa kéŋ dɩkɔsɔ, ʋ ká ɛ́ nɛ́ tɛ́ŋ nɔ́ŋɔ mɛ́. Ɛ́ nɛ́ vimaarɔ́ ná baa má vie nɔ́ŋɔ, ʋ nɛ ɛ́ ná ʋ háá jɛ́. 5 Ná wɩ́ɛ́ ná Nyuutɩna Wɩɩsɛ há bʋ́lɛ́ a páŋ: 6 «Ɩzɩrayɛl nɩɛ, ŋ wɩ́ɩ́wa wo kaá tʋŋ anɛ ɛ́ ná vimáárɔ né há kéŋ cʋʋ aá tʋŋ? Ŋ é Nyuutɩna Wɩɩsɛ nɛ́ bʋ́l ɛ́. Cʋ́ʋ́ há nɩhɩ̃́ ɛ́ ná vimaarɔ nɛ́sɛ mɛ́, ɩ́ ká ɛ́ nɛ́ ŋ má nɛ́sɛ mɛ́. 7 Tɛ́ŋ nɔ́ŋɔ mɛ́, a mʋ́ tɩɩnɛ duó nɔ́ŋɔ mɛ́, ɛ́ rá má dɩtɩ́llɛ nɔ́ŋɔ mɛ́, ŋŋ́ bʋ́lɩ́ŋ sɩ́ cúnníwó, a ɓʋ́ʋ́sɩ́wɔ́, a zɔ́kwɔ́. 8 Amá rɩ ɛ́ duó nɛ́ tá bɔ́ŋbɔ́ŋ ná ŋ há waá já ɛ́ɛ́, ŋ má sɩ́ tá bɔ́ŋbɔ́ŋ ná ŋ fa háá bɩɩnɛ́ rɩ́ŋ pi áwɔ́ mɛ́. 9 Ká tɛ́ŋ nɔ́ŋɔ mɛ́, a mʋ́ tɩɩnɛ duó nɔ́ŋɔ mɛ́, ɛ́ rá má dɩtɩ́llɛ nɔ́ŋɔ mɛ́, ŋŋ́ bʋlɩ́ŋ sɩ́ sɔ ká cɔ́ŋsɛ. 10 Amá rɩ ɛ́ duó nɛ́ wɩ́ŋ zésé, ká háá a wɩ́bɔma ŋ sɩ́ɛ́ mɛ́, ŋ sɩ́ tá wér ná ŋ fa háá bɩɩnɛ́ rɩ́ŋ aa pɔ́wɔ́.
11 «Mʋ́l né mí, Zeremi, bʋl Ziida nɩɛ arɩ́ Zerizalɛmɛ nɩɛ rɩ́, a bʋlɛ́: “Ɩ́ ná Nyuutɩna Wɩɩsɛ liŋó: Ŋ kéŋ wɩhálá rɩ́ cɩ́nɩ́wa mɛ́, ŋ bɩ́ɩ́nɔ́ rɩ́ŋ pi wɩ́ɛ́ rɛ́ ɛ́ɩ́wa mɛ́. Ɩ́ nɛrɔ wuu mɔhɔ̃́ rʋʋ tɔ́ʋ́ málbɔmɔ. Oo, ɩ́ bélíwa mála rɩ́rɩ́ɩ́wa wɩ́'állɛ mɛ́ rɩ́wɔ́ a wérí.”» 12 Amá ɓa tɩ́ŋwɔ́ sabɩŋtɩɛnnɛ mɛ́ nɛ́, ká bʋlɛ́: «Wɩ́bʋlkana bʋlɛ́ ká yɔ́ɔ́! Á há bɩ́ɩ́nʋ́ ná nɩ́ɩ́ cɩ́nɛ́.»
Ɩzɩrayɛl sʋ́llʋ́ Nyuutɩna mɛ́
13 Ná Nyuutɩna Wɩɩsɛ há bʋ́lʋ́ ná:
«Ɩ́ mʋ́ duówa náŋa sɩɛrʋ a bɔsɛ ná:
ɓa há nɛ́ nyɛ wɩ́ɩ́ duo wɩ́ɛ́,
rɩ́ ɓaá bʋ́lʋ́ rɛ́?
Ɩzɩrayɛl nɩɛ há nɩhɩ̃́ toopéro ná há wɩ bál ɛ̃́, há ɔ́ɔ́ ná
cáásɔ́ lɔrɛ.
14 Tɛ́ŋ rɩ́ mɩnɛ́ rɩ́ Libaŋ nyɛlɔ ná há tuwe aá tɔ́ gɩr bʋ́ɔ́ mɛ́ kaasɛ?
Tɛ́ŋ rɩ́ mɩnɛ́ rɩ́ polcʋɔrɛ nyifɩɛla ná háá palɛ́ hʋ́ʋ̃́sɛ? Ɛ́ toó.
15 Ŋ é nɩɛ sɩɛ́ sʋ́llɩ́ŋ wɩ́ɛ́.
Ɓa ɔsɛ vʋka
aá pá wɩŋsa ná há tó taŋá wɩŋsa nɛ́,
ɛ́ wɩŋsa ɔ́ɔ́, ɓaá gɛ́nnɛ ŋmɛ́ŋsɛ mɛ́,
a tɔ́wɔ́ die ŋmɛ́ŋsɛ,
ká pi ŋmɛ́ŋsɛ ná
ɓa há wɩ bɩ́rmɛ.
16 Ɓa wɩ́'állɛ zɔ́kwɔ́ tɔ́ɔ́,
ʋ belé ka hɩɩ̃sɛ.
Nɩɛ bʋ́bʋ́lʋ́ wɩ́ɛ́ tɛ́ŋ wuu mí,
nɩdaarɛ́ sɩɛrʋ lʋ́ʋ́,
ɓa nʋʋsɛ maanɛ, ɓaá viki nyunni.
17 Ŋ sɩ́ a rɩ́ŋ nɩɛ pɩsɛ náŋá mɛ́,
ɓa dɩŋdɔmɔ sɩ́ɛ́,
anɛ kuŋkulo
wɩɩsɛ dɩpomí poo há pɛ́ɛ́.
Ɓa zɔkɛ́ tápʋl,
ŋ sɩ́ bɩ́rɩ́ŋ har yákwɔ́
ŋ wɩ́ŋ sɩ́ɛ́ wúrí cáásɩ́wɔ́ .
Nɩɛ há cɛ́ wɩ́laabʋllɔ Zeremi mí arɩ́rʋ́ wɩsʋlɔ́ wɩ́ɛ́
18 Nɩɛ naŋá sɛ́: «Tɛ́ŋ péró ráá vʋʋrɛ wɩ́ɛ́ a cɛ́ Zeremi mí. Bee wɩ́ɛ́, á wɩ vʋk'ɔɔsá jaá gúl rɩ́wɔ́ máŋsɛ Wɩɩsɛ wɩ́ɛ́ párá. Á wɩ zɩmɛ́tɩ́náwa jaá gúl rɩ́wɔ́ cáánɩ́rá. Rɩ wɩ́laabʋllɔ́ má nɛ́, á wʋ́ɔ́ jáá gúl rɩ́wɔ́ la Wɩɩsɛ nʋɔ wɩ́ɛ́ bʋl párá. Á já wɩ́ɛ́ baakʋ́, a zɔ́kʋ́ yɩr, a báá sʋ́ʋ́ wɩ́bʋlɛ́ zésú.»
19 Zeremi sɛ́: «Nyuutɩna Wɩɩsɛ, ɓílí dɩllɛ a cáásɩ́ŋ,
zesi nɩɛ ná há cɩ́nɩ́ŋ mɛ́ wɩ́bʋlɛ́.
20 Bɔ́ŋbɔ́ŋ nɛ́ mɔhɛ̃́ rɩ́wɔ́ pi túŋ wɩ́wéro?
Bárá nɛ́ sɩɛ́ ɓa hé aá dɛ́llɩ́ŋ.
Amá, sɩ́ sʋ́llʋ́,
rɩŋ cɩ́nɩ́ sɩ́ɛ́,
a bʋl wɩ́ɛ́ a jáwɔ́ ɔsɛ́,
a bʋl pɔ́rɩ́ cɔ́ɛ́ ɓa nyúú.
21 Ɛ́ wɩ́ɛ́, lo rɩ́ losu zʋ́wɔ́ bɛlɛ,
ká rɩ́ tókowí ɓʋ́ʋ́sɩ́wɔ́ tɩɩ.
Rɩ́wɔ́ háála bɛlɛ sʋsɛ,
rɩ́wɔ́ a yúháála!
Rɩ́ pʋɔlɩ́taarɩ́ ɓʋ́ʋ́sɩ́wɔ́ báála,
ká rɩ́ lal ɓʋ́ʋ́sɩ́wɔ́ heŋbiwafɛlɛ!
22 Rɩ́wɔ́ nɩ́nɛ́ wɩhála cááse ɓa jɩɩsɛ mɛ́,
tɛ́ŋ ná mɛ́ ɩ sɩ́ há tʋ́ŋ lalyoorípúlli rɩ́wɔ́ mʋ́ úríwó mí!
Bee wɩ́ɛ́, ɓa vʋ́ʋ́rɔ́ cɩ́nɩ́ŋ mɛ́,
a féŋsi bárá ŋ naasɛ mʋ́l.
23 Nyuutɩna Wɩɩsɛ, wɩ́féŋsi toó ɩ é rí,
ɓa wɩ́vʋʋrɛ́ ná wuu sɩɛrʋ
ɓa há vʋ́ʋ́rɛ́ aá jáŋ ɓʋ́ɩ́.
Sɩ́wɔ́ wɩ́bɔmɔ píí cɛ́wɔ́,
sɩ́wɔ́ wɩ́zɔkɩ́ ná páá tá.
A rɩ́wɔ́ mʋ́ʋ́nɩ́ sɩ́ɛ́ mɛ́,
cɩ́ŋwɔ́ mɛ́ ɩ cɔwɩɩlɔ́ sɩɛrʋ!