Ziida nɩɛ wɩ́zɔkɩ́ ká nyaamɩ́
17
1 Hɔɔ óŋkaapʋ́ŋsɛ,ɛ́ rá má díamáŋ aóŋkaapʋ́ŋsɛ nʋɔ há cʋ́llɛ́ nɛ́ ɓa píí túúri Ziida nɩɛ wɩ́zɔkɩ́.
Ʋ mɩ́ŋwɔ́ betunni sɩɛrʋ anɛ dáborpʋ́ŋsɛ
ká mɩ́ŋwɔ́ vʋk'ɔ́ɔ́sɩkorsi má nyɩ́sɛ mɛ́.
2 Anɛ ɛ́ ɓa háá bɩ́ɩ́nɩ́wɔ́ bɛlɛ wɩ́ɛ́, ɛ́ tɩɩ nɛ́ ɓaá bɩ́ɩ́nɩ́wɔ́ vʋk'ɔ́ɔ́sɩkorsi ná arɩ́wɔ́ veno Asera dacɔ́ŋsɛ ná wɩ́ɛ́, a mɩ́ŋ tulaarʋ mʋ́ʋ́la há mɩŋ dúŋduome daha.
3 Ziida nɩɛ,
ɩ́ nɩ́ɩ́ mʋ́ dúŋduóŋ ɓaarɛ́, pallɛ daha gɩra sɩɛnnʋ,
ŋ sɩɛ́ sɩ́ a rɩ́wɔ́ píésíwa kuóɓɩɛ́,
ɩ́ oŋpiŋe wuu,
a zɔ́kɩ́wa dɩɓaarɛ́ wuu,
a tɩ́ŋɩ́wa wɩ́bɔmɔ ná ɩ́ há ɛ́ɛ́ ɩ́ tíé wuu mí.
4 Ɩ́ sɩ́ lɛ́ ká tɛ́ɩ́wa tɔ́ɔ́ né,
tɔ́ɔ́ né ŋ fa há píé pɛ́ɩ́wa ɩ́ tɩ́llʋ́.
Ɩ́ sɩ́ ɛ́ɩ́wa dɩŋdɔma yósi
a mʋ́ tɔ́ɔ́ ná ɩ́ há wʋ́ʋ́ ɛ̃ sɩɛrʋ.
Bee wɩ́ɛ́, ɩ́ ɔ́ɔ́ ŋ cɔ́ɛ́ ísí anɛ níŋ,
ʋ sɩɛ́ sɩ́ dí a kaá mʋ́ wuu.»
Tɛŋfɩ́ɛ́l arɩ́ nyɩɛrʋ tɛŋfɩ́ɛ́l wɩ́ɛ́
5 Ná Nyuutɩna Wɩɩsɛ há sʋ́ʋ́ ná:
«Bʋra dí nɛ́ŋ ná
sɩɛrʋ há kɛ́kɩ́ŋ mɛ́,
a púú yɩɛla hé nɩbííne mí
aá já rʋ́ʋ́ dóé lɛ́ nɩbííne sáŋɛ.
6 Ʋ nɩhɩ̃́ sɔkóle há cɛ́ lɛlɔ mɛ́ nɛ́:
ʋ wɩ wér oro wuu wúó ná.
Ʋ mɩ́ŋ gɩrbétéke dɔ́wʋ́ɔ́ sɩɛrʋ nɛ́,
yɛsɛ tíé mí, nɛ́ŋ wɩ ráŋ hiẽsi.
7 Amá nɛ́ŋ ná há púú yɩɛla héŋ mí
a púú tɩɩ tɩ́ɛ́kɩ́ŋ mɛ́,
ŋ é Nyuutɩna Wɩɩsɛ sɩ́ hé bárka a pɔ́ʋ́.
8 Ʋ nɩhɩ̃́ tuu ná há cɔ́ŋsɛ nyii laka nɛ́,
a tɛrʋ nalursi zʋ́ pérí nyii.
Lʋmɔ tɛ́ŋ mɛ́,
ʋ wɩ ɛ̃ rɩ wɩ́ɩ́ mɩnɔ́
ʋ paarʋ a ɓɩláárʋ tɛ́ŋ wuu mí.
Bɩna ná hɩ́lɔ há mɩ́nɔ́, wɩ́ɩ́ wʋ́ʋ́ wálmɛ
ʋ wɩ nɔnɔ mɩ́ɩ́ ɓɩllɛ.
9 «Nɩbííno sɩɛrʋ gollo a kɩ́llɛ oŋ wuu,
nɛ́ŋ wʋ́ʋ́ wuó tʋrɛ,
nɛ́ŋ wʋ́ʋ́ wuó zɩŋ.
10 «Ŋ é Nyuutɩna Wɩɩsɛ,
ŋ nɩ́ɩ́ kɩ́ɛ́lɛ nɩɛ wuu sɩɛnnɛ arɩ́wɔ́ wɩ́bɩɩnɛ́.
Ɛ́ wɩ́ɛ́, ŋ nɛ́ wo nɛ́ŋ wuu aá túŋ a tɩ́ŋʋ́ mála mɛ́,
a cɛ́rʋ́ wɩ́'állɛ mʋɔsɔ.
11 Nɛ́ŋ ná há tʋ́ŋ gɩragɩra a ka ɓɩɛ,
ʋ nɩhɩ̃́ yuó há pɔ́ŋ hala ná há tóú ɓɩɛ nɛ́.
Ʋ mɩɩsɛ ɓarma mɛ́, ʋ ɛ́ ɓɩɛ dɩtenni ní,
kɔ́ʋ́ dɩgirsí, ʋ dee nɛ gɩŋgátɩɩnɔ.»
Nyuutɩna Wɩɩsɛ dʋŋɔ nɩ́ɩ́ pá mɩɩsɛ
12 Púle mí,
kuóɓasa balá rɩ́ mɩnɛ́ ʋ píŋ la dúníé wuu:
á Wɩɩsɛ jaa ná há kɔ́ʋ́ dʋŋɔ dɩhɩ̃́ nɛ́.
13 Nyuutɩna Wɩɩsɛ,
Ɩzɩrayɛl nɩɛ yɩɛla mɩ́nɩ́ mɛ́ nɛ́.
A rɩ́wɔ́ dí hɩɩ̃sɛ,
nɩɛ ná wuu há vɛ́ɩ́ tá!
Nɩɛ ná wuu há bɩ́rwɔ́ har yákɩ́,
lo rɩ́wɔ́ yɩra pʋ́ŋsɛ kúŋkulo sɩɛrʋ.
Bee wɩ́ɛ́, ɓa vɛ́ɩ́ tá,
ɩ é Nyuutɩna Wɩɩsɛ há ká nyibúlbʋɔ ná háá pá mɩɩsɛ.
Zeremi sʋ́l Nyuutɩna Wɩɩsɛ
14 Nyuutɩna Wɩɩsɛ, rɩɩ dúóríŋ, ŋ ɓɩɛ́na ná dúóre ní.
Rɩɩ láŋ tá, ŋ ɓɩɛ́na ná laatɛ́.
Ɛ́ wɩ́ɛ́, ŋŋ́ dɛnnɩ́ rɛ́.
15 Ná nɩɛ há bʋ́lʋ́ ná a páŋ:
«Ká Nyuutɩna Wɩɩsɛ há bʋ́lʋ́ ná, ʋ mɩŋ nɛ́ɛ́?
Ʋ́ʋ́ a rʋ́ʋ́ nʋɔ sú ráá ná!»
16 Nyuutɩna Wɩɩsɛ, ŋ é raa wɩ́ɩ́ mɩ́ɩ́ fɩkɛ,
rɩ́ɩ́ a rɩ́ wɩɩla ko.
Ŋ wɩ́ɩ́ sʋlɛ́ aá já rɩ bɔ́ŋbɔ́ŋ tápʋ́l ko,
ɩ tɩɩ ɛ̃ ɛ́ mɛ́.
Ŋ há sʋ́ʋ́ ná,
ɩ sɩ́ɛ́ mɛ́ nɛ́ ŋ bʋl.
17 Wɩɩla tɛ́ŋ mɛ́, ɩ nɛ́ káŋ dɩyuóli,
Sɩ́ lo rɩ héwíŋ zʋ́ŋ rɩ́ŋ vaklɛ.
18 Rɩ hɩɩ̃sɛ dí nɩɛ ná há ɛ́ɛ́ ŋ nɩná wɩɩla
ká sɩ́ŋ é dí.
Rɩ́wɔ́ vɩ́váklɛ,
ká rɩ́ŋ é sɩ́ váklʋ́!
A rɩ́ wɩɩla tápʋl péríwó,
a zɔ́kɩ́wɔ́ wuu tenni!
Fɩ́ɛ́lɛ́ tápʋl wɩ́ɛ́
19 Ná Nyuutɩna Wɩɩsɛ há sʋ́ʋ́ ná a páŋ: «Mʋ́ cɛ́ Zerizalɛmɛ dánnʋzeno mí, ráŋ ná Ziida kuóre há tɩ́ŋɛ́ zʋ́ kaá lɛ́. Ɛ́ har mɛ́, rɩ́ɩ́ mʋ́ cɛ́ tɔ́ɔ́ ná dánnʋʋsɛ ná náŋa mɛ́. 20 Ná wɩ́ɩ́ ná ɩ há sɩ́ bʋl pɔ́wɔ́: Ziida kuóre rɩ́ Ziida nɩɛ arɩ́ Zerizalɛmɛ nɩɛ ná wuu há tɩ́ŋ ɛ́ dánnʋʋsɛ: “Ɩ́ zesi Nyuutɩna Wɩɩsɛ liŋó. 21 Nóú há bʋ́lʋ́ ná: Ɩ́ pɔ́ wérí saba tápʋl, rɩ́ɩ́wa sɩ́ óŋ cɩ́ɩ́nʋ́ rɩ́ɩ́ kó tɩ́ŋ Zerizalɛmɛ dánnʋʋsɛ nyáŋ oro wuu mí rɩ́ɩ́ daarɛ. 22 Ɛ́ kál, ɩ́ sɩ́ óŋ cɩ́ɩ́nʋ́ rɩ́ɩ́ lɩ́ɩ́wa jɩɩsɛ mɛ́, ɩ́ pɔ́ rɩ́ɩ́wa sɩ́ tʋtʋmɩ́ oro wuu tʋ́mʋ́. Amá ɩ́ lo rɩ́ ɛ́ tápʋl áŋ dʋŋɔ tɩ́llɛ, anɛ ɛ́ ŋ há bílé a pɛ́ɩ́wa naabálwa. 23 Amá ɓa wɩ ɛ́ wɩ́ɛ́ zésé, ɓa wʋ́ɔ́ sáŋɛ́. Ɓa tʋ́ŋ nyúduo, a wɩ lóé rɩ́wɔ́ zʋ́wɔ́ dɩlla, a vɛ rɩ́wɔ́ tɩŋ cáánɛ.”»
24 Nyuutɩna Wɩɩsɛ nɛ́ bʋl ɛ́: «Amá rɩ́ɩ́wa é ní zésíŋ wérí, fɩ́ɛ́lɛ́ tápʋl, rɩ́ɩ́wa nɛ́ wɩ cɩka oro wuu cɩ́ɩ́nɛ́ rɩ́ɩ́ kó tɩŋ tɔ́ɔ́ né dánnʋʋsɛ mɛ́, rɩ́ɩ́wa nɛ́ lóé rɩ́ ɛ́ tápʋl áŋ dʋŋɔ tɩ́llɛ, a sɩ́ tʋtʋmɩ́ oro wuu tʋ́mʋ́; 25 ɛ́ é, kuóre ná há ké Davidi kuóɓasa mɛ́, a ka záksɛ ɛ́ rá má tórkowa aá va, sɩ́ wólli tɔ́ɔ́ ná dánnʋʋsɛ tɩŋ aá lɛ́ tɛ́ŋ wuu mí. Ɓa minísiwa rɩ́ Ziida nɩɛ arɩ́ Zerizalɛmɛ nɩɛ wuu má sɩ́ wóllíwó tɩŋ aá lɛ́. Nɩɛ sɩ́ mɩŋ Zerizalɛmɛ tɔ́ɔ́ mɛ́ a kaá mʋ́ wuu. 26 Nɩɛ sɩ́ lɛ Ziida rɩ́ Zerizalɛmɛ kíle tɔ́nɛ, rɩ́ Bɛŋzamɛ dɩtɩ́llɛ tɔ́nɛ mɛ́, a pɔ́ Seefela mɛ́ a mʋ́ yakɛ paalɔ mɛ́, arɩ́ Nɩgɛɛvɛ dɩtɩ́llɛ tɔ́nɛ mɛ́, a ko Zerizalɛmɛ. Ɓa sɩ́ ko ɔsɛ vʋk'físe ɛ́ rá má vʋka náŋa, a súúri oŋparɛ́ satɔ́ɔ́rɩ́pállɛ mɛ́, áŋsáŋsɛ arɩ́ cʋɔla vʋka Nyuutɩna Wɩɩsɛ jaa sɩɛrʋ. 27 Amá rɩ́ɩ́wa nɛ́ wɩ́ŋ rɩ́ɩ́ zesi, rɩ́ɩ́wa nɛ́ wɩ lóé rɩ́ fɩ́ɛ́lɛ́ tápʋl ná áŋ dʋŋɔ tɩ́llɛ, rɩ́ɩ́wa nɛ́ cɩ́ɩ́nɛ cɩksɛ ɛ́ kal, a tɩŋ Zerizalɛmɛ dánnʋʋsɛ ná lɛ, ŋ sɩ́ hé níŋ tɔ́ɔ́ ná dánnʋʋsɛ mɛ́, rʋ́ʋ́ dí tɔ́ɔ́ ná jɩwere, ká sɩ́ dʋ́sʋ́.»