Zeremi dʋŋɔ léŋ ní káánɛ
16
1 Nyuutɩna Wɩɩsɛ bʋ́lɩ́ŋ rɩ́ a bʋlɛ́: 2 «Ɩ wɩ mɔhɛ̃́ rɩɩ já háálɔ, a lʋl heŋbóle ɛ́ rá má toló tɔ́ɔ́ né sɩɛrʋ. 3 Beé wɩ́ɛ́, ná Nyuutɩna Wɩɩsɛ há sʋ́ʋ́ ná, a pá heŋbólli ná rɩ́ tolé ná ɓa há sɩ́ lʋl dɩhɩ̃́ né, arɩ́wɔ́ ánáwa arɩ́wɔ́ maáwa ná má há sɩ́ lʋ́lwɔ́. 4 Dɩwɩɩla nɛ́ sɩ́ ɓʋ́ʋ́sɩ́wɔ́. Nɛ́ŋ waá mɩ́ŋ rɩ́ɩ́ wíwó yúó, nɛ́ŋ waá mɩ́ŋ rɩ́ɩ́ húwó. Ɓa sɩ́ bɩrmɛ kɔrɔ, a pá tíé. Lal ɛ́ rá má losu sɩ́ ɓʋ́ʋ́sɩ́wɔ́. Duune rɩ́ baka vásɛ sɩ́ díwó namɩŋsa.»5 Ná Nyuutɩna Wɩɩsɛ báá há sʋ́ʋ́ ná a páŋ: «Sɩ́ jaa ná é wuu há kéŋ yúó sɩɛrʋ zʋ́, sɩ́ mʋ́ʋ́ wí yúó. Sɩ́ mʋ́ʋ́ bɔ́llɛ nɛ́ŋ yúó, beé wɩ́ɛ́, ŋ báá wáá lo rɩ nɩɛ nyáŋ náŋ tɛŋfɩ́ɛ́l, ŋ sawér arɩ́rɩ́ŋ susufɔ́ɔ́. Nyuutɩna Wɩɩsɛ nɛ́ bʋ́l ɛ́. 6 Ɛ́ tɔ́ɔ́ sɩɛrʋ, kuóre rɩ́ nɩyaara wuu sɩ́ sʋsɛ. Nɛ́ŋ wʋ́ɔ́ hu, nɛ́ŋ wʋ́ɔ́ yúó wi. Nɛ́ŋ wuu sɩɛrʋ waá zɔkɛ, rʋ́ʋ́ kʋ́sʋ́ tɛŋ ɛ́ rá má rʋ́ʋ́ píérú nyúú, a tɩ́ŋwɔ́ sʋʋ ná wɩ́ɛ́. 7 Nɛ́ŋ wɩ ɓɩdíílí káá mʋ́ pá yúó jaa nɩɛ, rɩ́ bʋ́ɔ́lɩ́wɔ́. Nɛ́ŋ wɩ nyɔɔlɔ́ káá mʋ́ pá nɩɛ ná ánáwa ɛ́ rá má maáwa há sʋ́sɛ́ rɩ́ɩ́ bʋ́ɔ́lɩ́wɔ́.
8 «Jaa ná má sɩɛrʋ ɓa háá dí cana, sɩ́ ráŋ zʋ́, rɩ́ɩ́ rɩ́ nɩɛ hé naŋá mɛ́ a dí ɓɩɛ kaá nyɔ. 9 Bee wɩ́ɛ́, ná Nyuutɩna Wɩɩsɛ, Doewuutɩna Wɩɩsɛ, Ɩzɩrayɛl Wɩɩsɛ há sʋ́ʋ́ ná: “Ŋ sɩ́ a rɩ́ cana díí kʋɔllɛ rɩ́ satɔ́ɔ́rɩ́cááse síklíwa sɩ́ɩ́ mɛ́, dɩhɩ̃́ né mí ká rɩ́ háŋpʋɔla ná rɩ́ toopere ná má háá já naŋá yɩɩla tenni, ɩ́ mɩnɛ́ mɛ́.”
10 «Rɩ́ɩ́ nɛ́ pí liŋó né wuu rɩ́ɩ́ pá nɩɛ nyáŋ, rɩ́wɔ́ bɔ́sɩ́ a bʋlɛ́: “Beé rí tɛ Nyuutɩna Wɩɩsɛ pa ŋmɛ́nɔ rɩ wɩhalzeno né pérírá, beé wɩ́bɔ́ŋ rɛ́, á a, á wɩ́nyɔ́rkɛ nɛ́ ká orí rí Nyuutɩna Wɩɩsɛ á Wɩɩsɛ rɩ́?” 11 Ná ɛ́ ná ɩ há sɩ́ lɩ́sɛ nʋɔ pɔ́wɔ́: “Nyuutɩna Wɩɩsɛ nɛ́ bʋ́l ɛ́, ɩ́ naabálwa há vɛ́ŋ tá, ká tɩŋ venni mí, a ɓírmíwó sɩ́ɛ́, a ɓáárɩ́wɔ́ nɛ́ tɛ nyɛ́ ná ko. Ɓa vɛ́ŋ é tá, a wɩ́ŋ wɩ́makɛ́ tɩ́ŋɛ́. 12 Ɩ́ é ní sɩɛ́ ɔ́sɛ́ a bɔ́ŋbɔ́ŋ a kɩ́llɩ́wa naabálwa. Ɩ́ oro wuu de tɩ́ŋʋ́ sabɩŋtɔ́k mɛ́ nɛ́, ká vɛ́ rʋ́ʋ́ zésíŋ há sʋ́ʋ́ ná. 13 Ŋ sɩ́ kíríwa tɔ́ɔ́ né mí, a hé nɔ́ŋɔ mɛ́, ɩ́ rɩ́rɩ́ɩ́wa ánáwa há wʋ́ʋ́ ɛ̃. Ɩ́ sɩ́ ɓaarɛ wɩŋsa náŋa ráŋ, wɔhɔ rɩ́ tɩ́taŋ wuu. Bee wɩ́ɛ́, ŋ báá wáá a rɩ́ŋ fɛ́ɩ́wa susu.” »
Nɩkɛsɛ́ bɩrkoe wɩ́ɛ́
14 Nyuutɩna Wɩɩsɛ nɛ́ bʋ́l ɛ́, tápʋ́lɛ́ rɩ́ɩ́ kué, ɓa báá wáá a rɩ́wɔ́ bʋ́lɛ́: «Nyuutɩna Wɩɩsɛ ná há wómmó yɩr mɛ́, a a Ɩzɩrayɛl nɩɛ lɛ́ Ezipiti mí”, 15 Amá ɓa sɩ́ bʋ́lɛ́ «Nyuutɩna Wɩɩsɛ ná há wómmó yɩr mɛ́, a a Ɩzɩrayɛl nɩɛ lɛ́ wɩɩsɛ dɩpomí nɛ́gʋɔ tɔ́ɔ́ mɛ́ arɩ́ tɔ́nɛ ná naŋá wuu ʋ fa há kíríwó hé sɩɛrʋ.” Oo, ŋ sɩ́ káŋwɔ́ bɩrko tíé ná ŋ há píé a pɔ́wɔ́ naabálwa mɛ́.»
Nɛrɔ ná wuu há ɛ́ɛ́ zɔkɛ waá lú lɛ́
16 Nyuutɩna Wɩɩsɛ nɛ́ bʋ́l ɛ́, «Ŋ sɩ́ tʋŋ nɩkana anɛ náŋwʋ́ɓʋ́ʋ́ra, rɩ́wɔ́ mʋ́ kɛ́sɩ́wɔ́. Ká tʋŋ nɩkana náŋá má anɛ naŋballa, pallɛ rɩ́ dɩ́ŋdúóme wuu daha arɩ́ bʋ́ɔ́ pɛ́ksɛ má tɩɩ sɩɛrʋ rɩ́wɔ́ kɛ́sɛ Ziida nɩɛ. 17 Ŋ kɩ́ɛ́lɩ́wɔ́ wɩ́'állɛ wuu ní. Ɓa wɩ́'aalɩ́ oro wuu wɩ́ŋ sɩ́ɛ́ mɛ́ féŋsé, ɓa dɩzɔkɛ́ wuu ní ŋ ná. 18 Ŋ sɩ́ a rɩ́wɔ́ túŋwó zɔ́krʋ arɩ́wɔ́ wɩ́bʋma ná wuu kɩ́ŋ naasɩ́ bʋllɛ. Beé wɩ́ɛ́, ɓa tɩ́ŋwɔ́ veŋgúlbɔma ná há wɩ wommi mí, a a busunnú zʋ́ŋ tɔ́ɔ́. Ɓa ɓʋ́ʋ́sɛ pʋsɛ pá nyɩɛrɛ wɩŋsa ná ŋ há bɛ́rwɔ́, a súŋ dɩtɩ́llɛ wuu.»
Nɩɛ wuu sɩ́ zɩŋ Taŋá Wɩɩsɛ
19 Nyuutɩna Wɩɩsɛ, ɩ nɛ́ káŋ dóé,
ɩ nɛ́ káŋ dɩféŋsi,
ɩ nɛ́ káŋ dɩyúóli ŋ wɩɩla tɛ́ŋ mɛ́,
Nɩɛ sɩ́ lɛ́ dúníé toko mí a kóí rí, a bʋlɛ́:
«Á naabálwa há lá onni ná dí ká nyɩɛnnɛ,
onni ná há wɩ nyʋɔrɛ́ kené ní.
20 Nɩbííne há to wɩŋsa,
sɩ́ wólli bɩrmɛ wɩŋsa a pɔ́wɔ́ tɩɩ?»
21 Ɛ́ wɩ́ɛ́, ŋ sɩ́ a rɩ́wɔ́ zɩ́mɩ́ŋ,
mʋ́l né mí é, ŋ sɩ́ a rɩ́wɔ́ zɩ́mɩ́ŋ
tíŋ rɩ́rɩ́ŋ dóé.
Ɓa sɩ́ zɩŋ rɩ́ŋ yɩr nɛ́ ká “Nyuutɩna Wɩɩsɛ”.»