Ziida nɩɛ zɔ́kɛ́ to wɩ́girí
15
1 Nyuutɩna Wɩɩsɛ bʋ́lɩ́ŋ rɩ́ a bʋlɛ́: «Rɩ Moyizi rɩ́ Samɩɛl má tɩɩ có rɩ́wɔ́ kóŋ sɩ́ɛ́ a sʋ́lɩ́ŋ, ŋ wɩ nɩɛ nyáŋ yɔ́ɔ́ tá. A rɩ́wɔ́ tuu lɩ́ŋ laka, a kɛ́kɩ́ŋ mɛ́. 2 Rɩ ɓa nɛ́ bɔ́sɩ́ a bʋlɛ́: “Nɛ́ɛ́ rɛ́ rá sɩɛ́ mʋ́?”, ɩ sɩ́ bʋ́lwɔ́ rɩ́ a bʋlɛ́: “Ná Nyuutɩna Wɩɩsɛ há sʋ́ʋ́ ná:Sʋʋ há mɔhɛ̃́ rʋ́ʋ́ ɓʋ́ nɛ́ŋ ná, ʋʋ́ ɓʋ́ʋ́ nɛ́,
Tokówí há mɔhɛ̃́ rʋ́ʋ́ ɓʋ́ nɛ́ŋ ná, ʋʋ́ ɓʋ́ʋ́ nɛ́,
Losu há mɔhɛ̃́ rʋ́ʋ́ ɓʋ́ nɛ́ŋ ná, ʋʋ́ ɓʋ́ʋ́ nɛ́,
nɛ́ŋ ná há mɔhɛ̃́ rʋ́ʋ́ mʋ́ yomí sɩɛrʋ, ʋʋ́ mʋ́ nɛ́.
3 Nyuutɩna Wɩɩsɛ nɛ́ bʋ́l ɛ́, ŋ sɩ́ pi wɩhálbámmawa baná a cɩ́ŋwɔ́ mɛ́: tókowí sɩ́ ɓʋ́ʋ́sɛ, vásɛ sɩ́ túwó namɩŋsa a mʋ́ dɩbóli, duune arɩ́ baka vasɛ sɩ́ díwó namɩŋsa rɩ́wɔ́ yɩr yʋ́ksɛ. 4 Ziida kuóro Manase há ká Ezekiyasɛ bio wɩ́ɛ́ arɩ́ wɩ́bɔma ná wuu ʋ há ɛ́ɛ́ Zerizalɛmɛ mɛ́ wɩ́ɛ́, ŋ sɩ́ a rɩ́ héwíŋ ká dúníé kuóre wuu.
Nyuutɩna Wɩɩsɛ bɔl Zerizalɛmɛ nɩɛ susúfɔ́ mɛ́
5 Zerizalɛmɛ nɩɛ, áŋ rɛ́ sɩ́ fɛ́ɩ́wa susu,
áŋ rɛ́ sɩ́ wííwa wɩ́ɛ́,
áŋ rɩ́ɩ́ á rʋ́ʋ́ bɔ́sɩ́wa wɩ́ɛ́?
6 Ɩ́ nɛ́ vɛ́ŋ tá,
ɩ́ nɛ́ bɩ́rɩ́wa har yákɩ́ŋ.
Ɛ́ nɛ́ tɛ ŋ má isi cɩ́nɩ́wa mɛ́
rɩ́ŋ zɔ́kɩ́wa tenni,
bee wɩ́ɛ́ ŋ bɔ́lɩ́wa susufɔ́ɔ́ mɛ́,
Nyuutɩna Wɩɩsɛ nɛ́ bʋ́l ɛ́.
7 Tɔ́ɔ́ dánnʋ́ʋ́sɛ wuu mí,
ŋ célwó tá,
ŋ ɓʋ́ʋ́sɩ́wɔ́ bɛlɛ,
ká ɛ́ má, ɓa wʋ́ɔ́ mála bɩ́rsɛ.
8 Ŋ ɔ́ɔ́ ɓa nyúháála púl,
kɩ́llɛ mʋʋ nʋɔ hɩɛl má tɩɩ.
Wɔhɔ cɩ́ɩ́ka mɛ́ nɛ́
ŋ yiki dɩŋdɔŋ hé
lalyooro ná há ká heŋbiwafɛ́lɔ́ maá mɛ́.
Héwíŋ rɩ́ sazɔkɔ́
kánʋ́ naasɩ́ balá.
9 Hál ná fá há kéŋ bɛlɛ balpɛ dóé ténnó,
Ʋ tɩ́ŋ ɛ́ wɩ́ɛ́ sʋwɛ.
Ʋ wɩpomí zʋ wɔhɔ cɩ́ɩ́ka cɛ́rɛ mɛ́ nɛ́.
Hɩ́ɩ̃sɛ púú,
ʋ báá wɩ piŋ.
Ɓa ná má há sɩ́ káánɛ,
ŋ sɩ́ a rɩ́wɔ́ dɩŋdɔma tókowí zɔ́kwɔ́ tenni»,
Nyuutɩna Wɩɩsɛ nɛ́ bʋ́l ɛ́.
Zeremi gáásɛ wɩ́ɛ́, Wɩɩsɛ duórú naasɛ
10 Ŋ maá, náŋ wɩɩla há mɔhɛ̃́ ɛ́,
ɩ há lʋ́lɩ́ŋ!
Tɔ́ɔ́ ná wuu sɩɛrʋ,
nɛ́ŋ wɩ́ŋ wɩ́ɛ́ có,
nɩɛ wuu cɩ́nɩ́ŋ mɛ́.
Ká ŋ kɩŋ to nɛ́ŋ mɛ́,
nɛ́ŋ má kɩ́ŋ tóŋ mí,
ká arɩ́ ɛ́ má, nɩɛ wuu ha bʋr aá héŋ mí.
11 Nyuutɩna Wɩɩsɛ sɛ́:
«Ŋ ŋmɩ́ɛ́sɔ́, ŋ lɛ́ɩ́ tá rɩ́ɩ́ ná wér.
Ŋ nɛ́ ŋmɩ́ɛ́sɔ pɛ́ɩ́,
ŋ sɩ́ a rɩ́ɩ́ dɩŋdɔma jɛ́nnɩ́
ɓa sazɔkɔ́ arɩ́wɔ́ wɩɩla tɛ́ŋ mɛ́.
12 Hɔ́ɔ́ arɛ́ mɩnɛ́
a wolli hɔɔ ná há lɛ́ wɩɩsɛ dɩpomí nɛ́gʋɔ arɩ́ kɔmɔ́ aá zɔkɛ?
13 Nyuutɩna Wɩɩsɛ sɛ́: «Ziida nɩɛ, ŋ sɩ́ a rɩ́wɔ́ píésí kuóɓɩɛ arɩ́rɩ́ɩ́ oŋwere,
ká sɩ́ɩ́ oŋ pá ɓa mʋ́l mɛ́.
Ɩ wɩ́zɔkɛ́ ná wuu ɩ há ɛ́ɛ́
tɔ́ɔ́ ná wuu sɩɛrʋ túme ní ɛ́.
14 Ŋ sɩ́ a rɩ́ɩ́wa ɛ́ɩ́wa dɩŋdɔma yósi,
rɩ́wɔ́ kɛ́sɩ́wa mʋ́ tɔ́ɔ́ ná ɩ́ há wʋ́ʋ́ ɛ̃ sɩɛrʋ.
Oo, ŋ cɔ́ɛ́ púsó anɛ níŋ
ɩ́ nɛ́ sɩɛ́ ʋ sɩ́ dí.»
15 Ɩ é Nyuutɩna Wɩɩsɛ, ɩ ɛ̃́ wɩ́ɩ́ wuu!
Bɩ́ɩ́nɩ́ŋ wɩ́ɛ́, pɛ́ŋ mɛ́.
Yoo láŋ tá nɩɛ ná háá bɛ́ŋsɩ́ŋ nɛ́sɛ mɛ́.
Sɩ́wɔ́ wɩ́'állɛ ná nyammʋ́,
ká rɩ́ŋ nɩ́na wɩɩla.
Zíŋ ɛ́ mɛ́,
ɩ wɩ́ɛ́ nɛ́ tɛ́ ɓaá tʋ́ksɩ́ŋ káŋ nyammɛ.
16 Ɩ wɩ́bʋlɛ́ fa mɩ́nɩ́ŋ dɩlla zʋɩ mɛ́ nɛ́ ká,
ŋ há lɔ́wɔ́ a dí.
Ɓa kéŋ tɛŋpɔrɔ́ a páŋ,
ŋ sɩɛrʋ wuu caasɛ tɔ́rɩ́wɔ́ wɩ́ɛ́.
Bee wɩ́ɛ́, Nyuutɩna Wɩɩsɛ, Doewuutɩna Wɩɩsɛ,
ŋ kɛ́ɩ́ nɩtɩ́llɛ nɛ́.
17 Ŋ wɩ nɩlaama sɩɛrʋ zʋ́ɛ́
rɩ́ɩ́ jʋ́ɔ́sɛ.
Amá ɩ fɩ́kɩ́ŋ mɛ́, ŋ kɛ́kɩ́wɔ́ mɛ́,
beé wɩ́ɛ́, ɩ lóó cɔwɩɩlɔ́ súŋ.
18 Béé rí tɛ ŋ wɩɩla wɩ tokó kené,
ŋ fʋʋ to ɓɩfɩɛlɩ́,
ʋ wɩ váárɛ saŋ?
Taŋá wuu, ɩ bɩrmɛ́ fonaa ná háá nyɩsɛ nɩɛ nɛ́ ŋ sɩ́ɛ́ mɛ́,
nɛ́ŋ wʋ́ʋ́ nyii yɩɛla wuó ká.
19 Ná Nyuutɩna Wɩɩsɛ há sʋ́ʋ́ ná:
«Rɩɩ nɛ́ bɩ́rɛ́ kóŋ rɩ́,
ŋ sɩ́ lo rɩ́ɩ́ ha tʋŋ aá páŋ.
Rɩɩ nɛ́ sáŋɛ́ rɩ́ɩ́ bʋl wɩ́bíé,
ká tá wɩ́yɔ́ɔ́wa,
ɩ báá sɩ́ áŋ wɩ́laabʋ́llʋ́.
Ziida nɩɛ nɛ́ mɔhɛ̃́ rɩ́wɔ́ bɩrkóí rí,
ɩ ra wʋ́ɔ́ rɩ́ɩ́ mʋ́.
20 Ŋ sɩ́ tɩ́ɛ́kɩ́ rɩ́ɩ́ cɛ́ ɛ́ nɩɛ mɛ́ rɩ́ dóé
anɛ kɔmɔ́ zenaa, ɓa há wʋ́ʋ́ wo yiki aá yo.
Ɓa sɩ́ cɩ́nɩ́ mɛ́,
ɓa taŋa waá wóllí dí dóé ɩ nyúú:
Oo, ŋ mɩ́nɩ́ har
rɩ́ŋ yóó lɛ́ɩ́ a tá.
Nyuutɩna Wɩɩsɛ nɛ́ bʋl ɛ́.
21 Ŋ sɩ́ lɛ́ɩ́ a tá nɩbɔma nɛ́sɛ mɛ́,
ŋ sɩ́ lɛ́ɩ́ tá sɔhɔ́tɩ́ɩ́na nɛ́sɛ mɛ́.»