12
1 Nyuutɩna Wɩɩsɛ, ɩ taŋá zénó kɩ́ŋkáŋ,rɩ́ŋ lɩsɛ nʋɔ ɩ rɩ́.
Ŋ taŋa há có rɩ́ŋ tɔ́wɩ́ nʋɔ mɛ́ rɛ́,
a mʋ́ tɩɩnɛ taŋá wɩ́ɛ́:
Béé rí tɛ, nɩbɔma
má wɩ́ɛ́ cɛ́rɛ aá pɔ́wɔ́?
Beé rí tɛ nɩɛ ná há wɩ cɩ́nɛ́ tɩ́kɩ́
má ka tɛŋfɩ́ɛ́l?
2 Ɩ nɛ́ bílwó, ɓa naasɛ zʋ tíé,
ɓa nɛrɛ, a ko aá ká nɔnɔ.
Ɩ yɩr mɩ́ŋwɔ́ nʋʋsɛ mɛ́ tɛ́ŋ wuu mí,
amá ɓa baŋcɩllɛ kɛ́kɩ́ mɛ́.
3 Amá ɩ é, Nyuutɩna Wɩɩsɛ, ɩ ɩ́ŋ,
ɩɩ́ néŋ, ɩɩ́ kɩ́ɛ́lɩ́ŋ sabɩɩna rɛ́,
a zɩŋ rʋ́ʋ́ cɔ́ɩ́ mɛ́.
Ká ɓa é, lɩ́sɩ́wɔ́ tɔ́wɔ́ dʋŋɔ
anɛ pieŋse ná ɓa há kené aá mʋ́ dɩɓʋ́ɩ́,
lɩ́sɩ́wɔ́ é tá, aá dɛllɛ zɔ́krʋ́ tapʋ́l.
4 Kal beé rí, rɩ́ tɔ́ɔ́ nɩɛ wííle tenni ká rɩ́ baksɛ wuu hɩ́lɛ́ má tenni? Balla arɩ́ diíwiisi wuu ní sʋ́sɛ́ aá va, tɔ́ɔ́ nɩɛ saháksɩ́ ná wɩ́ɛ́. Ɛ́ nɩɛ sɛ́: «Ʋ waá a rʋ́ʋ́ ná rá dɩgírsi.»
5 Nyuutɩna Wɩɩsɛ sɛ́:
«Ɩ há wɩ wo fa aá pu naasɛ tɩ́náwa
ɩ rɩ́ záksɛ nɛ́ sɩɛ́ sɩ́ wóllí fá pɛ́ksɛ náŋá?
Ɩ háá ja rɩ́ tɔ́ɔ́ mɩŋ tɛŋfɩ́ɛ́l mɛ́, ká rɩ́ɩ́ baŋcɩla pɩ dɩbalá,
ɩ sɩɛ́ a ɛ rɛ́ɛ́ rɛ́, rɩ́ɩ́ nɛ́ kúó mɩŋ Zʋrdɛŋ fuo nʋɔ gɩrkɔ sɩɛrʋ?
6 «Beé wɩ́ɛ́, ɩ maábináŋa, ɩ jaa nɩɛ má tɩɩ píí yɛ́llɛ rɛ́. Ɓa tɩɩ nɛ́ yíkí nɩkana héí mí, kɛ́ɩ́ wɩ ɛ̃. Sɩ́wɔ́ wɩ́ɛ́ láá dí, rɩ ɓa nɩ́ɩ́ bʋl nʋŋmɔ́ŋ má ɩ rɩ́.»
Wɩɩsɛ vɔ́ʋ́ liwe tá
7 «Ŋ vɛ́ŋ jaa tá
ŋ vɛ́ŋ liwe a tá;
jaa ná ŋ fá há cóú wérí,
ŋ táʋ́ a pɔ́ʋ́ dɩŋdɔma.
8 Nɩɛ ná há káŋ liwe,
ɓa nɛ́ bɩ́rɛ́ cɩ́nɩ́ŋ mɛ́
anɛ baka kɩ́ŋkánáwa:
Ɓa úúró a cɩ́nɩ́ŋ mɛ́.
Ɛ́ nɛ́ tɛ ŋ báá wʋ́ɔ́ có.
9 Nɩɛ ná há káŋ liwe
ɓa bɩ́rmɛ́ diíwie ná pʋsɛ belé há kéŋ hɩɛŋ nɛ́,
diíwinaŋdííre fá lɛ dɩhɛ̃́ wuu, ko aá kílú>>
“Ɩ́ yɩrɛ balla wuu hé naŋá mɛ́!
Ɩ́ a rɩ́wɔ́ ko dí cana!”
10 Penʋɔla akáŋ
a zɔ́kɩ́ŋ vínyi baka,
ɓa naasɛ fɩ́rkɩ́ŋ baka.
Ɛ́ baka fa wér,
ɓa sɩɛ́ ɔ́ɔ́ ʋ bɩrmɛ gɩrbétéke, a ká sazɔkɔ́.
11 Ɓa ɔ́ɔ́ ʋ ká sazɔkɔ́,
Dɩhɩ̃́ wuu ní zɔ́kɛ́, a ká susu ŋ sɩ́ɛ́ mɛ́,
tɔ́ɔ́ ná wuu zɔkɔ́
káŋ nɛ́ŋ sɩ́ɛ́ tóú mí.»
12 Zɔkra níí kué,
ɓa pí gɩrbétéke ŋmɛ́ŋsɛ wuu ní, aá ko.
Nyuutɩna Wɩɩsɛ tókowí sɩ́ zɔkɛ óŋ wuu duo,
a pɔ́ tɔ́ɔ́ lʋlɔŋɛ mɛ́ ká mʋ́ lʋ́ʋ́ lʋlɔŋɛ nɔ́ŋɔ mɛ́, nɛ́ŋ wuu wɩ tɛŋfɩ́ɛ́l ka.
13 Ɓaá dú mɩ́ɛ́ nɛ́,
sɔrɛ nɛ́ sɩɛ́ rɩ́wɔ́ kʋsɛ.
Ɓaá bɔ́lɩ́wɔ́ tɩɩ yɔ́ɔ́ nɛ́.
Ɩ́ lo rɩ́ɩ́wa oŋkʋsɛ́ ká hɩ́ɩ̃́sɛ pɛ́ɩ́wa
a tɩ́ŋ Nyuutɩna Wɩɩsɛ cɔwɩɩlɩ́zeno ná wɩ́ɛ́.
Nyuutɩna Wɩɩsɛ bʋ́l Ɩzɩrayɛl kénnináŋa wɩ́ɛ́
14 Ná Nyuutɩna Wɩɩsɛ há sʋ́ʋ́ ná: Ɩzɩrayɛl nɩɛ ná há káŋ nɩɛ, ɓa kénnináŋa ná há ká nɩbɔ́má tɩ́kɩ́ŋ liwe mí, tíé ná ŋ fa píé pá Ɩzɩrayɛl, ŋ nɩɛ. Ŋ sɩ́ kírwó ɓa tíé mí, ká lɩ́sɛ Ziida nɩɛ má ɓa sɩ́sɩ́ɛ́nnʋ́wa mɛ́. 15 Amá, ɛ́ har mɛ́, ŋ sɩ́ fɔ́wɔ́ susu, a bɩrkáŋwɔ́ oro wuu kóú liwe mí, nɛrɔ wuu tɔ́ɔ́ mɛ́. 16 Ɛ́ nɩɛ nɛ́ fa mákɩ́ŋ nɩɛ ɓaá ŋmɩ́ɛ́sɛ Baal yɩr mɛ́. Amá rɩ́ ɓa nɛ́ bɩ́rɛ́ káŋwɔ́ tɩɩ anɛ ɛ́ ŋ nɩɛ há mɔhɛ̃́ rɩ́wɔ́ káŋwɔ́ tɩɩ, aá ŋmɩ́ɛ́sɩ́ŋ yɩr mɛ́ a bʋlɛ́: «Ŋ ŋmɩ́ɛ́sɛ Nyuutɩna Wɩɩsɛ ná há wómmó yɩr mɛ́ ...», ɛ́ é, ɓa sɩ́ bɩrka dɩkéni ŋ nɩɛ sɩɛrʋ. 17 Nyuutɩna Wɩɩsɛ nɛ́ bʋlɛ́: Rɩ duowa nyáŋ nɛ́ wɩ́ŋ é zesi, ŋ sɩ́ kírwó ɓóŋ, a vɔ́wɔ́ tá rɩ́wɔ́ sʋsɛ.»