Ziida nɩɛ wɩ cɩ́nɛ́ tɩ́kwɔ́ rɩ́ Wɩɩsɛ pɛ́kɛ nʋtʋmɛ ná
11
1 Ná liŋó ná Nyuutɩna Wɩɩsɛ há píé pá Zeremi: 2 «Zésí nʋtʋmɛ né wɩ́bʋlɛ́, a máŋsɛ pá Ziida nɩɛ arɩ́ Zerizalɛmɛ nɩɛ.» 3 Ɩ sɩ́ máŋsɛ nyɛ pɔ́wɔ́, a bʋlɛ́: «Ná Nyuutɩna Wɩɩsɛ, Ɩzɩrayɛl Wɩɩsɛ há sʋ́ʋ́ ná: Wɩɩla pú nɛ́ŋ ná há wɩ nʋtʋmɛ né wɩ́bʋlɛ́ zíl. 4 Ŋ fá lá sɩ́ɛ́ a bílú pɛ́ɩ́wa naabálwa ná ŋ há kené lɛ́ Ezipiti, níŋjaa sɩɛrʋ nɛ́. Ŋ fa sɛ́: “Ɩ́ zésíŋ há sʋ́ʋ́ ná pɛ́ɩ́wa, a tɩ́ŋʋ́. Ʋ ká wɩ́ɩ́ rɛ́, ŋ makɛ a pɛ́ɩ́wa. Ɛ́ é, ɩ́ sɩ́ áŋ nɩɛ, ká rɩ́ŋ má ɛ́ɩ́wa Wɩɩsɛ. 5 Ɛ́ é, ŋ sɩ́ a rɩ́ŋ nʋtalɔ́ ná nʋɔ sú. Ŋ fa tá nʋɔ a pɛ́ɩ́wa naabálwa a bʋlɩ́ŋ sɩ́ pi tɔ́ɔ́ ná nɛ'ɩ́l arɩ́ tʋʋ haá pal ráŋ a pɔ́wɔ́. Ʋ sɩɛrʋ nɛ́ ɩ́ zaá mɩŋ nyɛ.” »Ɛ́ nɛ́ Zeremi sɛ́: «Oo, Nyuutɩna Wɩɩsɛ.»
6 Nyuutɩna Wɩɩsɛ baa bʋ́lɩ́ŋ rɩ́ a bʋlɛ́:
«Mʋ́ búóli liŋó né Ziida tɔ́nɛ sɩɛrʋ arɩ́ Zerizalɛmɛ ŋmɛ́ŋsɛ sɩɛrʋ a bʋlɛ́: “Ɩ́ zesi nʋtʋmɛ́ né wɩ́bʋlɛ́, a tɩ́ŋwɔ́. 7 A de pɔ́ tɛ́ŋ ná mɛ́ ŋ há keníwa naabálwa lɛ́ Ezipiti mí, a ko aá lɛ́ zaa, ŋ cáásɔ́ bʋ́lʋ́ wɩ́ɛ́ fɩ́ɛ́ŋsɛ sɩ́ɩ́ ɓa rɩ́, a bʋlɛ́: “Ɩ́ zésíŋ liŋó”. 8 Amá ɓa wɩ zésé, ɓa vɔ́ɔ́, ká oro wuu tɩ́ŋʋ́ sabɩɩna ná há lɔ́rɛ mɛ́. Ɛ́ nɛ́ ŋ bɛ́ŋsɩ́wɔ́ anɛ ɛ́ nʋtʋmɛ ná ŋ fa há bílé a pɔ́wɔ́ rɩ́wɔ́ tɩ́ŋ, ká ɓa vɛ́, wɩ́bʋlɛ́ há makɛ́.”»
9 Nyuutɩna Wɩɩsɛ baa súúri a páŋ a bʋlɛ́: «Záŋba wɩ́ɩ́ rɛ́ mɩ́ŋ Ziida nɩɛ arɩ́ Zerizalɛmɛ nɩɛ sɩɛrʋ. 10 Ɓa naabálwa ná fa há vɛ́ŋ nʋɔ wɩ́ɛ́ zesé, ɓa wɩ́bɔma ná sɩɛrʋ nɛ́ ɓa mɩ́ŋ. Ɓa bɩ́rɔ́ tɩ́ŋ venni naŋá mɛ́, aá ɓáárɩ́wɔ́. Ɩzɩrayɛl nɩɛ arɩ́ Ziida nɩɛ zɔkɛ nʋtʋmɛ ná ŋ fa há bílíŋ rɩ́wɔ́ naabálwa pɛ́kɛ.
11 «Ɛ́ wɩ́ɛ́, Nyuutɩna Wɩɩsɛ sɛ́: “Ŋ sɩ́ a rɩ́ wɩɩla púwó, rɩ́wɔ́ sɩ́ wóllí lú lɛ. Ɓa sɩ́ búŋsi yɩ́rɩ́ŋ aá ja laatɛ́ɛ́ ká rɩ́ŋ sɩ́wɔ́ rɩ́ zésú. 12 Ɛ́ mɛ́ nɛ́, rɩ́ Ziida tɔ́nɛ nɩɛ arɩ́ Zerizalɛmɛ nɩɛ bɩ́rwɔ́ sɩ́ɛ́ a cáásɛ venni ná ɓa há ɔ́sɛ́ vʋka aá pɔ́wɔ́, ká rɩ́wɔ́ sɩ́ wóllí lɔ́wɔ́ rɩ́ɩ́ tá ɓa wɩɩla tɛ́ŋ mɛ́. 13 Taŋá Ziida, ɩ dɩtɩ́llɛ tɔ́nɛ nʋɔ, ɩ venni má nʋɔ nɛ́ ɛ́. Zerizalɛmɛ, ɩ má ŋmɛ́ŋsɛ nʋɔ há mɔhɛ̃́ ɛ́, ɩ hɩ́ɩ̃́sɛ vʋk'ɔɔsɩkorsi má nʋɔ nɛ́ ɛ́, ɓa ɔsɛ vʋka ráŋ aá pá Baal. 14 Ɩ é Zeremi, sɩɛ́ pɔ́ rɩ́ɩ́ sɩ́ŋ cʋ́ɔ́lʋ́, nɩɛ nyáŋ yɩr mɛ́. Pɔ́ rɩ́ɩ́ háá sʋ́lɩ́ŋ, a jɛ́nnɩ́ŋ nɩɛ nyáŋ yɩr mɛ́, bee wɩ́ɛ́, ŋ waá a rɩ́ŋ zésíwó rɩ́, rɩ ɓa nɛ́ kúé ná wɩɩla, a búŋsi aá yɩ́rɩ́ŋ.»
Ɩzɩrayɛl ká Olívi tuu ní, Nyuutɩna Wɩɩsɛ tɩ́llʋ́
15 Nyuutɩna Wɩɩsɛ sɛ́:
«Ŋ nɩcóllí já beé ŋ jaa mɛ́?
Ʋ wɩ́zɔ́kɛ́ wɩ nʋɔ kené.
Nʋtállɛ ná arɩ́ vʋka ná ɩ há ɔ́sɛ́ aá páŋ
namɩ́ɛ́ sɩ́ wólli kɛ́rɛ rɩ́ wɩɩla sɩ́ɩ́ pérú?
Ɩ bɩ́ɩ́nɔ́ rɩ́ɩ́ sɩ́ lú lɛ́?
16 Ŋ fa hé yɩr pɛ́ɩ́, ʋ nɛ́ ká:
“Olívi tuu ná tɛŋ há fɩ́ɛ́lɔ́,
ʋ nɔnɔ ká hɩɛŋ”.
Amá dɔmɛ ɓɩzeno níí kúé,
ŋ sɩ́ tɩ́ŋʋ́ mɛ́ hé níŋ, ʋ paarʋ mɛ́,
rʋ́ʋ́ hílli sʋsɛ.»
17 Nyuutɩna Wɩɩsɛ, Doewuutɩna nɛ́ cɔ́ŋsɩ́. Ʋ tɩɩ nɛ́ sɩɛ́ báá sɩ́ɩ́ sɩ́ ná wɩɩla, a tɩ́ŋ Ɩzɩrayɛl nɩɛ arɩ́ Ziida nɩɛ há a wɩ́bɔmɔ wɩ́ɛ́. Bee wɩ́ɛ́, ɓa ɔ́sɛ́ vʋka a pá Baal, a a zɔkɛ Wɩɩsɛ mɛ́.
Zeremi jaa nɩɛ tɩɩ ísó cɩ́nʋ́ mɛ́
18 Nyuutɩna Wɩɩsɛ lá sɩ́ɛ́ bʋl páŋ, ŋ zɩ́ŋ ɛ́ mɛ́. Ʋ ɔ́ɔ́ ŋ zɩ́ŋ bɔ́ŋbɔ́ŋ ná ɓa háá bɩ́ɩ́nɛ́. 19 Ŋ é fa nɩhɩ̃́ pewie ná há pɔ́rɛ́ nɛ́, ɓa kaá mʋ́ dɩɓʋ́ɩ́. Ŋ fa wʋ́ɔ́ háá bɩ́ɩ́nɛ́ rɩ́wɔ́ ɔ́ɔ́ ná ŋ mɛ́ ɛ̃. Ɓa fa sɛ́: «Á ɓá tulɔɔ arɩ́rʋ́ nɔnɔ yo, a a rʋ́ʋ́ yʋ́ksɛ nɩwómme sɩɛrʋ, rɩ́ nɛ́ŋ báá sʋ́ʋ́ wɩ́ɛ́ bɩ́ɩ́nʋ́!»
20 Amá ɩ é, Nyuutɩna Wɩɩsɛ, Doewuutɩna,
ɩɩ́ dí sarɩ́ya arɩ́ taŋá.
Ɩ ɛ̃ nɛrɔ wuu sɩɛrʋ arɩ́rʋ́ wɩ́bɩ́ɩ́nɛ.
Ŋ ɩ́ɔ̃́ rɩ́ɩ́ sɩ́ díí tɛŋbúóro ɓa nyúú,
bee wɩ́ɛ́, ŋ yɩɛla wuu mɩ́nɩ́ rɩ́ɩ́ nɛ́.
21 Ɛ́ wɩ́ɛ́, ná Nyuutɩna Wɩɩsɛ há sʋ́ʋ́ ná, a cɛ́ Anatɔtɛ nɩɛ ná háá jɛ́ɩ́ mɩɩsɛ lɩ́sɛ mɛ́, a bʋ́lɩ́ rɩ́ bʋ́lɛ́: «Tá Nyuutɩna Wɩɩsɛ nʋɔ wɩ́ɛ́ laa bʋlɛ́, rɩ́ ɛ́ rá, á sɩ́ ɓʋ́ɩ́.» 22 Sɩɛ́ ná Nyuutɩna Wɩɩsɛ, Doewuutɩna, há sʋ́ʋ́ ná a pɔ́wɔ́: «Ŋ sɩ́ cɩ́ŋwɔ́ mɛ́: Lal sɩ́ ɓʋ́ʋ́sɩ́wɔ́ nɩduoru ká rɩ́ losu ɓʋ́ʋ́sɩ́wɔ́ heŋbólli rɩ́wɔ́ tolé. 23 Bɩna ná ŋ há sɩ́ cɛ́ Anatɔtɛ nɩɛ mɛ́, a a rɩ́wɔ́ bíl nʋɔ, wɩɩla sɩ́ péríwó, nɛ́ŋ waá káánɛ.»