Wɩɩsɛ ná há wómmó rɩ́ venni wɩ́ɛ́
«Ɩ́ sɩ́ duhʋɔra ná
há wɩ Wɩɩsɛ ɛ̃ wɩ́'állɛ césú;
Ɩ́ sɩ́ nyɩnɛwa ná
há mɩŋ bána mɛ́ héwíŋ fá.
Duhʋɔra ná nɩ́ɩ́ fɔ́wɔ́.
3 Duowa ná náŋa wɩcʋ́ɔ́lɩ́ŋmɛ́ŋsɛ ká
poo ní, wɩ́yɔ́ɔ́wa dʋŋɔ.
Dacɔ́ɔ́rɔ́ coki daa gɩr mɛ́,
a pí saa a cɔ́ veno.
4 A cʋɔrɛ salmɛ arɩ́ wárɛ ɓɩ́ɛ́rʋ́.
A ja hámá arɩ́ téŋkúlli
a ɓasɛ hé tíé mí,
rʋ́ʋ́ sɩ́ biksu.
5 Ɛ́ venni nɩhɩ̃́ dakúí ná ɓa há pa gɛkɔ́ŋsa láálʋ nɛ́,
kɔ́ŋkɔ́ŋbɩrɛwa baka mɛ́.
Ɓa wɩ wɩ́ɛ́ bʋl,
ɓa ká ɓɩcɩ́ɩ́nɛ nɛ́,
ɓa wʋ́ɔ́ tɩɩ mɩ́ɩ́ va.
Ɩ́ sɩ́wɔ́ fá:
ɓa wɩ wɩ́ɩ́ wuó zɔkɛ,
ɓa wɩ wɩ́ɩ́ má wuó ɔsɛ.»
6 Ɩ nɔ́ŋ tó, Nyuutɩna Wɩɩsɛ,
Ɩ zénó, ɩ yɩr píŋó.
7 Dúníé wuu kuóro; áŋ rɩ́ wɩ́ɩ́ fá?
ɩ nɛ́ mɔhɛ̃ rɩ́wɔ́ fɛ́ɛ́.
Dúníé zɩmɛ́ tɩ́náwa wuu sɩɛrʋ,
dɩtɩ́llɛ wuu sɩɛrʋ,
nɛ́ŋ tó a nɩ́ɩ́.
8 Nɩɛ nyáŋ wuu cʋ́ʋ́lɔ́, ɓa wɩ wɩ́ɛ́ ɛ̃:
Ɓa venni karmɛ́ ká wɩ́yɔ́ɔ́wa nɛ́, bee wɩ́ɛ́, ɓa ká daasɛ ní.
9 Warɛ ná há pɛ́rsɛ́ ɓa yɔwɛ Tarsiisi mí,
ɛ́ rá má salmɛ ná há lɛ́ Ufaazɛ
ɓa nɛ́ ɓɩ́ɛ́rɛ ɛ́ venni.
Dácɔ́ɔ́rɔ́ arɩ́ lúkró ní bɩ́rmɩ́wɔ́.
A pí kuógɛfɩɛŋsɛ arɩ́ kuógɛmʋ́ɔ́llɛ súwó.
Nɩɛ ná há kéŋ zɩmɛ́
nɛ́ cɔ́ ɛ́ venni wuu.
10 Amá Nyuutɩna Wɩɩsɛ ɓɩ́ɛ́na ká Wɩɩsɛ tɩɩ nɛ́,
ʋ nɛ́ ká Wɩɩsɛ ná há wómmó, ʋ kuorí ká dɩŋɛ́.
Rʋʋ cɔ́ɛ́ wɩ́ɔ́, tíé zígli ní;
rʋʋ cɔ́ɛ́ wɩ́ɔ́, duowa nɩɛ wɩ sɛ́ kené ʋ cɔwɩɩlɔ́ sɩ́ɛ́.
11 Ná wɩ́ɩ́ ná ɩ́ há sɩ́ bʋl pɔ́wɔ́: venni nyáŋ raa wɩ bána arɩ́ tíé ɛ́ɛ́, ɓa yɩra sɩ́ yʋ́ksɛ tíé nyúú rɛɛ́, bána mʋ́l.
12 Nyuutɩna Wɩɩsɛ nɛ́ á tíé, a tɩ́ŋʋ́ dóé mí;
ʋ nɛ́ bíl dúníé, a tɩ́ŋʋ́ zɩmɛ́ mɛ́,
ʋ nɛ́ á bána a tɩ́ŋʋ́ wɩ́zɩŋ mɛ́.
13 Ʋ sɛ́ mɛ́ nɛ́,
bána nyúú nyii híhé náŋá mɛ́,
duobáŋzeŋsi híhé náŋá mɛ́, dúníé tokó mí,
duóŋ tɩŋ duófɩ́llɛ mɛ́ a kúko,
poo lʋ́ʋ́ dɩmɩnɩ́ mɛ́ a lúlú.
14 Nɛrɔ wuu cʋ́ʋ́lɔ́, a wɩ wɩ́zɩmɛ́ kené.
Hɩ́ɩ̃́sɛ kéŋ nɩɛ ná há a venni,
ɓa há tʋ́ŋ ɛ́ wɩ́ɛ́.
Ɛ́ venni ká oŋyɔ́ɔ́wa rɛ́:
Hiẽsó mʋɔ́ má tówó mí.
15 Ɓa ká poo ní, wɩ́yɔ́ɔ́wa.
Ɓa wuu sɩ́ nyɩ́ɩ́kɛ,
kal ná Nyuutɩna Wɩɩsɛ há sɩ́ isi cɩ́ŋwɔ́ mɛ́.
16 Amá, ʋ é Wɩɩsɛ wʋ́ɔ́ nɩhɛ̃́,
ʋ nɛ́ ká Zakɔbɛ Kuorí,
ʋ nɛ́ ká dúníé wuu mɩ́máárɔ.
Ʋ nɛ́ tɛ Ɩzɩrayɛl jɩmʋ́l.
Ʋ yɩr nɛ́ ká: Nyuutɩna Wɩɩsɛ, Doewuutɩna.
Zerizalɛmɛ zɔ́kɛ́ pérí tɛ́sɩ́ɩ́
17 Zeremi sɛ́,
Ɩ é Zerizalɛmɛ,
bɩbara lɛ́rɩ́,
pɛ́ɩ́ cɩksɛ tíé.
18 Bee wɩ́ɛ́, Nyuutɩna Wɩɩsɛ sɛ́:
«Mʋ́l né mí é, ŋ sɩ́ yo tɔ́ɔ́ ná nɩɛ tá dɩbolí
anɛ dɔ́wɩ́yooló dɔ́wɩ́.
Ŋ sɩ́ kɛ́rɩ́wɔ́ hé náŋá mɛ́, rɩ́wɔ́ sɩ́ lúú lɛ.»
19 Zerizalɛmɛ nɩɛ cáásó a bʋlɛ́:
«Nyúbɔ́ŋ pérírá! Beé wɩhála rɩ́ púrá nyɛ!
Á fʋʋ tó ɓɩtenní.
Á bʋ́l rá tɩɩ mɛ́ a bʋlɛ́: Á sɩ́ nyammɛ, wɩɩla ná há mɔhɛ̃́ rʋ́ʋ́ pérírá ní ɛ́.
20 Á táŋtɛjɩɩsɛ zɔ́kɔ,
ɓa ŋmɛ́sɛ wuu conni.
Á báá wɩ bíí oro wuu kené, ɓa wuu cóló.
Á báá wɩ nɛ́ŋ kené,
rʋ́ʋ́ cúólírá táŋtɛ,
rʋ́ʋ́ bɩ́rcíkírá jɩɩsɛ párá.»
21 Zeremi sɛ́:
Sɩ́dííre ná há nɩhɩ̃́ pʋnʋɔla cʋ́ʋ́lɔ́,
ɓa wɩ Nyuutɩna Wɩɩsɛ ja.
Ɛ́ nɛ́ tɛ ɓa wɩ tíŋ kéné,
ká ɓa nɩtɩllɛ́
má wuu pɩsɛ náŋá mɛ́.
22 Ɩ́ zesi dɔ́mɛ́ né haá kué:
vúkme ɓɩzeno níí kué,
ʋ lɛ́ wɩɩsɛ dɩpomí nɛ́gʋɔ rɩ́ɩ́ nɛ́,
rʋ́ʋ́ zɔkɛ Ziida tɔ́nɛ
rɩ́wɔ́ bɩrmɛ tɔ́ɓoru, bakavásɛ dɩféŋse.
Zeremi dú nɛ́sɛ, ʋ dunɩɛ yɩr mɛ́
23 Ŋ ɩ̃́ɔ́ rɛ́, Nyuutɩna Wɩɩsɛ,
rɩ nɩbííno wʋ́ʋ́ tɩɩ wuó ká aá tɩ́ŋ ɛ́ há mɔhɛ̃́.
Ʋ naasɛ wɩ ŋmɛ́nɔ ná
há mɔhɛ̃́ rʋʋ pí wuó tɩŋ.
24 Nyuutɩna Wɩɩsɛ, tʋ́rɩ́ŋ,
amá, aa mɔ́, ká sɩ́ cɔwɩɩlɔ́ dí,
rɩ ɛ́ rá, ɩ sɩ́ tɩ́ksɩ́ŋ.
25 Amá, díí cɔwɩɩlɔ́,
duowa nyáŋ há wɩ́ɩ́ ɛ̃ nyúú,
nɩɛ nyáŋ há wɩ́ɩ́ cʋɔlɛ nyúú.
Bee wɩ́ɛ́, ɓa ɓʋsɛ Zakɔbɛ dunɩɛ,
ɓa caasɔ́ ɓʋ́sɩ́wɔ́ ɓóŋ
ɓa zɔ́kwɔ́ dɩkéni.