Taŋátóó nɩɛ
9
1 Áá! ŋ fá có rɩ́ŋ mɩ́ŋ gɩrbétéke sɩɛrʋ,nɩhʋɔra dɩcɩkɩ́!
Ŋ fa sɩ́ táŋ dunɩɛ,
a kɛ́kɩ́wɔ́ mɛ́ a mʋ́ dɩbólí.
Ɓa wuu ká nɩcɔ́rmá rɛ́,
Káápáára dʋŋɔ púl rí.
2 Ɓa neŋdulí nɩhɩ̃́ tuó ɓa há zɩ́nɛ́ nɛ́.
Taŋá yɩr mɛ́ rá ɓa dí tɔ́ɔ́ sɩ́ɛ́,
amá nyɩ́ɛ́rʋ nɛ́ ɛ́ɛ́ ɓa dí tɔ́ɔ́ sɩ́ɛ́.
Wɩ́bɔma ɛ́ɛ́ dʋŋɔ nɛ́ kɔ́wɔ́ tʋtʋmɩ́,
ɓa vɔ́ɔ́ rɩ́wɔ́ zɩ́mɩ́ŋ,
Nyuutɩna Wɩɩsɛ nɛ́ bʋ́l ɛ́.
3 Nɛrɔ wuu kánʋ́ tɩɩ rɩ́rʋ́ nɔ́ŋɔ!
Nɛrɔ wuu sʋ́ʋ́ maábinɔ́ŋɔ oro wuu láá dí,
beé wɩ́ɛ́, maábinɔ́ŋɔ é wuu ká gɩ́ŋgɩ́rmɩtɩɩnɔ nɛ́.
Nannɔŋɔ é wuu ká susóóro ní.
4 Nɛrɔ wuu gɩ́rmʋ́ nɔ́ŋɔ,
taŋá toó;
ɓa mal nyɩ́ɛ́rʋ nyɛ́.
Ɓa cáásɔ́ tʋtʋŋ bɔ́ŋbɔ́ŋ,
ɓa baa wɩ́ŋ rɩ́ɩ́ wó bɩrɛ aá ko.
5 Bɩbáwɩ́ɛ́ dʋŋɔ nɛ́ ɓaá a,
gɩ́ŋgɩ́rmʋ dʋŋɔ nɛ́ ɓaá a.
Ɓa vɔ́ɔ́ rɩ́wɔ́ zɩ́mɩ́ŋ.»,
Nyuutɩna Wɩɩsɛ nɛ́ bʋ́l ɛ́.
6 Ɛ́ wɩ́ɛ́, ná Nyuutɩna Wɩɩsɛ,
Doewuutɩna há sʋ́ʋ́ ná:
«Níŋ ní ŋ sɩ́ píí mɩ́ɛ́rɩ́wɔ́ a lɩ́sɩ́wɔ́ busunnu
a nówó há kɔ́ʋ́ ná.
Ŋ bee wɩ́'aalɩ́ baa,
ɓa sɔhɔ́ɔ́ há mɔhɛ̃́ nyɛ!
7 Nɩɛ nyáŋ néŋdulí
nɩhɩ̃́ tuhɛ́ŋ ná há sʋ́ɛ́ nɛ́.
Ɓa wɩ́bʋlɛ́ wuu ká nyɩ́ɛ́nnɛ:
ɓa kéŋ nʋŋmɔ́ŋyɔ́ɔ́ a cáásɩ́wɔ́ naŋá rɩ́,
amá ɓa sɩɛnnɛ mɛ́, ɓa hé baráwa nɛ́ aá jɔ́wɔ́.
8 Bee rí ɛ́ɛ́ rɩ́ŋ sɩ́ nɩɛ nyaŋ mɛ́ cɩ́nʋ́?
Beé rí kɛ́rɛ rɩ́ŋ sɩ́ŋ tɛŋbuóro dí duó né duo nyúú?»
Nyuutɩna Wɩɩssɛ nɛ́ bʋ́l ɛ́.
Wííle rɩ́ yúwíírizeŋbíé tɛ́ŋ
9 Pallɛ daha nɛ́, ŋ bɩbɩsɛ sɩ́mɩɩrʋ, aá hĩ́ĩ́ni;
Pʋsɛ dɩnʋɔlɩ́ mɛ́ nɛ́ ŋ ɓɩ́ɓá yúwíírizeŋbí.
Beé wɩ́ɛ́, níŋ díwó,
nɛ́ŋ báá wɩ ráŋ tɩ́ŋɛ́ aá daarɛ.
Ɓa báá wɩ pʋsɛ wííle nɛ́ ráŋ.
Díwíísi rɩ́ pʋsɛ nyɩ́ɩ́kɔ, ɓa wuu fɔ́ɔ́.
10 Nyuutɩna Wɩɩsɛ sɛ́:
«Ŋ sɩ́ a rɩ́ Zerizalɛmɛ tɔ́ɔ́ bɩrmɛ dɔ́wɩ́púlli
bakavasɛ dɩféŋse,
rɩ Ziida dɩtɩ́llɛ tɔ́nɛ, a tɔ́nɛ ná há zɔ́kɔ́,
nɛ́ŋ balá má wɩ ráŋ mɩ́ŋ.»
11 Zɩmɛ́ tɩ́na rɩ́ mɩ́nɛ́, a nɛ̃ wɩ́ɩ́ né Nyuutɩna Wɩɩsɛ há bʋlɛ́ mʋ́l, rʋ́ʋ́ búóli pá nɩɛ?
Rʋ́ʋ́ máŋsɛ wɩ́ɩ́ ná há tɛ tɔ́ɔ́ zɔkɛ́,
níŋ dúú, ʋ nɛ̃ gɩrbétéke,
nɛ́ŋ báá wɩ ráŋ dáárɛ?
12 Nyuutɩna Wɩɩsɛ báá sɛ́: «Ɓa há vɛ́ wɩ́ɛ́ ná ŋ fa há mákɛ́ a pɔ́wɔ́, a wʋ́ɔ́ zésé, a vɛ́wɔ́ tɩ́ŋɛ́ nɛ́ tɛ nyɛ péríwó. 13 Ɓa tɩɩ wɩ́jaalɛ́ nɛ́ ɓa tɩŋ, a ɓáárɛ Baalwa, anɛ ɛ́ ɓa naabálwa fa há ɛ́ɛ́, ɓa mal. 14 Ɛ́ wɩ́ɛ́, Ŋ é Nyuutɩna Wɩɩsɛ, Doewuutɩna, Ɩzɩrayɛl Wɩɩsɛ há nóú ná, ʋ nɛ́ nyɛ: Ŋ sɩ́ a rɩ duó né tʋ́ŋ bákalá, a nyɔ bɛ́rɔ́ nyii. 15 Ŋ sɩ́ a rɩ́wɔ́ pɩsɛ a zʋ́ duówa ná ɓa tɩɩ arɩ́wɔ́ naabálwa há wʋ́ɔ́ ɛ̃ sɩɛrʋ. Ká rɩ́ŋ a rɩ lalyoore kír tɩ́ŋwɔ́ mɛ́, a kaá ja tɛ́ŋ ná mɛ́ ɓa há sɩ́ sʋsɛ tenni.» 16 Ná Nyuutɩna Wɩɩsɛ, Doewuutɩna há sʋ́ʋ́ ná:
«Ɩ́ bɔsɛ, a yɩ́rɛ hágɔkɛ́, rɩ́wɔ́ ko!
Ɩ́ tʋŋ yɩ́rɛ hágɔkbɩbara, rɩ́wɔ́ ko.
17 Rɩ́wɔ́ ko kɩ́kɛ́lɛ,
a ɓá zeŋbíé párá rá wí!
Rɩ sɩ́mɩɩrʋ súrá sɩ́ɛ́,
rɩ sɩ́mɩɩrʋ palrá tɛŋgbɛllɛ mɛ́!»
18 Ɓa nɛ̃ zeŋbíé ɓɛ́ɛ́ Sɩɔŋ mɛ́:
«Zɔ́krʋ púrá,
hɩ́ɩ̃sɛ dí ráá,
á há sɩ́ lɩ́rá tɔ́ɔ́ mɛ́,
á jɩɩsɛ sɩ́ tuwi búkébúké á sɩ́ɩ́ mɛ́!»
19 Ɩ́ é háála, ɩ́ sɩɛ́ zesi
Nyuutɩna Wɩɩsɛ wɩ́bʋlɩ́ né;
ɩ́ wuóllíwa dɩlla, a zésú nʋɔ wɩ́bʋlɛ́.
Ɩ́ pi ɛ́ zeŋbíé a karmɩ́wa tolé,
ɩ́ oro wuu pi ɛ́ zeŋbíé a karmʋ́
kénninɔ́ŋɔ a bʋlɛ́:
20 «Sʋʋ tɩ́ŋrá tókórowa a zʋ,
ʋ tɩ́ŋ ráŋ nɛ́ a zʋ́rá jɩwere sɩɛnnɛ,
a tuoki heŋbiwiisi ŋmɛ́ŋsɛ mɛ́,
a wʋ́ɔ́lɛ heŋbiwafɛlɛ tɔ́ɔ́ dɩjɛlɛ́ mɛ́.»
21 Nyuutɩna Wɩɩsɛ nɛ́ bʋlɛ́:
«Ɩ é Zeremi,
súúrɩ́ŋ há sʋ́ʋ́ ná:
Sʋsɛ nɛ́ ɓɛsɛ tíé
anɛ ɛ́ kɔ́rɔ́ há ɓɛ́sɛ baka mɛ́.
Anɛ ɛ́ mɩ́cike háá káánɛ mɩ́kʋrsa har,
ká nɛ́ŋ tó aá pa.»
Nyuutɩna Wɩɩsɛ zɩmɛ́ nɛ́ ká zɩmɛ́ tɩɩ
22 Ná Nyuutɩna Wɩɩsɛ há sʋ́ʋ́ ná:
«Rɩ zɩmɛ́ tɩ́na sʋ́ʋ́ tɩɩ mákʋ́, ʋ há kéŋ zɩ́mɛ́ wɩ́ɛ́!
Rɩ dóé tɩ́na sʋ́ʋ́ tɩɩ mákʋ́, ʋ há kéŋ dóé wɩ́ɛ́!
Rɩ ɓɩɛ tɩ́na sʋ́ʋ́ tɩ́na mákʋ́, ʋ há kéŋ ɓɩɛ wɩ́ɛ́!
23 Rɩ nɛ́ŋ já rʋ́ʋ́ mákʋ́ tɩɩ, ʋ́ʋ́ makʋ́ tɩɩ ʋ há kéŋ wɩ́zɩmɛ́ a zɩ́mɩ́ŋ wɩ́ɛ́,
a zɩŋ rɩ́ŋ é Nyuutɩna Wɩɩsɛ,
ŋ nɛ́ tɛ́ wér ɛ́ɛ́, yɛ́rɛ arɩ́ taŋá tíé nyúú.
Oo, nɩɛ nyáŋ nɩ́ɩ́ tɔ́rɩ́ŋ sɩɛrʋ»,
ŋ é Nyuutɩna Wɩɩsɛ nɛ́ bʋ́l ɛ́.
Pɛ́ŋcoki dʋŋɔ ká yɔ́ɔ́
24 Nyuutɩna Wɩɩsɛ sɛ́: «Tápʋ́lɛ́ rɩ́ kúé, ŋ há sɩ́ isí cɛ́ nɩɛ ná há cókí tɛŋnamɩ́ɛ́ pɛ́ŋcokí dʋŋɔ mɛ́». Nyuutɩna Wɩɩsɛ nɛ́ bʋ́l ɛ́. Ɓa nɛ́ ká: 25 Ezipiti nɩɛ rɩ́ Ziide nɩɛ rɩ́ Edomi nɩɛ rɩ́ Amɔŋ nɩɛ rɩ́ Mʋwabɛ nɩɛ arɩ́ nɩɛ nyáŋ háá píéríwó tɔŋkɩɛrɩ́wa kaá káánɛ tɔmɔ, a mɩ́ŋ gɩrbétéke mí. Bee wɩ́ɛ́, duówa ná wuu wʋ́ɔ́ pɛ́nɛ coké, Ɩzɩrayɛl nɩɛ má tɩɩ sɩɛ́ ká ɛ́ nɛ́, ɓa sɩɛnnɛ wɩ bɩ́rsɛ́.