8
1 Nyuutɩna Wɩɩsɛ nɛ́ bʋ́l ɛ́: «Ɛ́ tɛ́ŋ mɛ́, ɓa sɩ́ kuusi Ziida kuóre rɩ́ minísiwa heŋgbele, a kuusi wɩ́laabʋlla rɩ́ vʋk'ɔɔsa arɩ́ Zerizalɛmɛ nɩɛ heŋgbele lɛlbulli mí. 2 Ɓa sɩ́ pá ɛ́ heŋgbele, a jɛrɛ wɩpomí rɩ́ cana rɩ́ bána nyúú caŋwʋllɛ mɛ́, bee wɩ́ɛ́, ɓa ɛ́ nɩɛ fa có ɛ́ onni, a káŋwɔ́ tɩɩ a mʋ́ cɔ́wɔ́ mɛ́, a tʋŋ aá pɔ́wɔ́, aá vʋ́rwɔ́ káá ɓaarɩ́wɔ́ má. Ɓa baa wɩ ɛ́ heŋgbelé pá, ɓa wʋ́ɔ́ paa hú ká rɩ́wɔ́ jɛrɛ ɛ́, a sʋɔrɛ bɩ́rmɛ tíé kɔ́rɔ́. 3 Nɩbɔma nyáŋ sɩɛrʋ, nɩɛ ná há sɩ́ káánɛ, a mɩ́ŋ ráŋ ná wuu ŋ há kírwó hé mí, ɓa sɩ́ bʋlɛ́ rɩ́ ɓa fá sʋ́sɔ́ nɛ́ wéré. Nyuutɩna Wɩɩsɛ, Doewuutɩna nɛ́ bʋ́l ɛ́.Dɩlhɔ́ ná há wɩ wuó máŋsɛ
4 Bʋl pɔ́wɔ́ a bʋlɛ́, rɩ Nyuutɩna Wɩɩsɛ sɛ́:
«Rɩ nɛ́ŋ ɓálɔ́,
ʋʋ́ waá isí?
Rɩ nɛ́ŋ tɛ́l ŋmɛ́nɔ́ mɛ́,
ʋ wɩ bɩ́rɛ́ aá kó?
5 Ká beé sɩɛ́ tɛ,
Zerizalɛmɛ nɩɛ nyáŋ é tɛl ŋmɛ́nɔ mɛ́, aá dáánɛ,
ká wɩ bɩrɛ aá kóŋ rɩ́?
Ɛ́ nɩɛ cɩ́nɔ́ tɩ́kwɔ́ nyɩɛnnɛ wɩŋsa nɛ́,
ɓa vɔ́ɔ́ rɩ́wɔ́ bɩrkóŋ rɩ́.
6 Ŋ zésiwó wɩ́bʋlɛ́ ná wérí:
ɓa wɩ tʋ́ʋ́lɛ́.
Oro wuu wɩ fá'ɩ́ɔ̃́ bʋl, ʋ saháksɩ́ wɩ́ɛ́,
oro wuu wʋ́ʋ́ tɩɩ bɔ́sɛ́ a bʋlɛ́:
“Béé rí ŋ a nyɛ!”
Nɛrɔ wuu mɩ́nʋ́ nɩcʋ́lfɛ́ mɛ́ nɛ́,
anɛ záka há nyáásɛ́ lal mɛ́.
7 Tɩláŋtʋɔlí má tɩɩ
háá fil bána nyúú ʋ́ʋ̃́ valɛ́ cɛ́rɛ;
Kʋma, cáálákʋ́wíé rɩ́ ɓalwaarɛ ɩ̃́wɔ́ bɩrɛ́ cɛ́rɛ.
Amá ŋ é nɩɛ wɩ́ŋ wɩ́makɛ́ ná oro wuu ɛ̃.»
Nyɩɛrʋ zɩmɛ́ tɩ́náwa
8 Ɩ́ sɛ́:
«Á kéŋ zɩmɛ́,
Nyuutɩna Wɩɩsɛ wɩ́bilé ná mɩ́ŋrá rɩ́ nɛ́.»
Beé rí sɩɛ́ tɛ, ɩ́ wólli bʋl nyɛ́,
ká ɩ́ nɩɛ ná háá pʋ́ŋsɩ́ŋ wɩ́bilé ná
a nyɛtɩ́ɩ́ná, a káŋwɔ́ mʋ́ʋ́la aá bɩ́rɛ?
9 Hɩɩ̃́sɛ nɛ́, a pá zɩmɛ́ tɩ́náwa;
ɓa báá wʋ́ɔ́ dɩmɩnɩ́ ɛ̃,
ɓa zʋ́ bárá.
Bee wɩ́ɛ́, ɓa vɛ́ Nyuutɩna Wɩɩsɛ wɩ́bʋlɛ́,
ɓa zɩmɛ́ ná sɩɛ́ mɩŋ nɛɛ́?
Wɩlaabʋlla arɩ́ vʋk'ɔɔsa sɩ́ wɩ́ɩ́ tóó
«Ŋ sɩ́ píwó háála pá nɩɛ naŋá
ká rɩ́wɔ́ baksɛ má a ɛ́ nɩɛ tɩllɛ́.
Beé wɩ́ɛ́, a pɔ́wɔ́ heŋbíé mí ká zɩ yakwɔ́ wuu nɔhɔ̃́ mɛ́,
ɓa wuu wɩ́jaalɩ́ nɛ́ kɔ́wɔ́ dʋŋɔ wer wɩ́ɛ́.
A pɔ́ wɩ́laabʋllɔ mɛ́ ká mʋ́ yakɛ vʋk'ɔɔsɔ mɛ́,
ɓa má oro wuu wɩ taŋá kené.
11 Zɔ́krʋ ná há péríŋ nɩɛ,
ɓa wʋ́ʋ́ gíéle rɩ́ sɩ́fɩ́ɛ́ma,
ká bʋlɛ́ : “Wɩ́ɩ́ tó,
tɛŋfɩ́ɛ́l dʋŋɔ nɛ́ mɩnɛ́”,
ká tɛŋfɩ́ɛ́l mʋɔ́ wuu tó.
12 Ɓa wɩ́lɔrɛ ná ɓa há ɛ́ɛ́,
kéŋ hɩ̃́ɩ̃́sɛ rɛ́ a pɔ́wɔ́?
Hɩ̃́ɩ̃́sɛ mʋɔ́ má tɩɩ, ɓa wʋ́ʋ́ ɛ̃́!
A saŋ bʋlwɔ́ ɔɔ zɔ́kɛ́,
wɩ́ɩ́ ná ɓa há wʋ́ʋ́ ɛ̃́ nɛ́ ɛ́.
Ɛ́ nɛ́ tɛ Nyuutɩna Wɩɩsɛ sɛ́:
«Ɓa sɩ́ zʋ́ nɩɛ ná ŋ há sɩ́ zɔ́kɛ sɩɛrʋ,
rɩ́ŋ nɛ́ isé cɩ́ŋwɔ́ mɛ́;
ɓa wuu sɩ́ zʋ́ tíé!
Yɩɛla báá tóó
13 Nyuutɩna Wɩɩsɛ nɛ́ bʋ́l ɛ́:
«Ŋ sɩ́ zɔ́kwɔ́ tenni,
viínyi nɔŋbalá má wɩ viínyi tuu daha káánɛ,
piro nɔŋbalá má wɩ piro tuu daha mɩ́ŋ;
ɓa paarʋ má yuoro.
Ŋ sɩ́ píwó pa nɩdaarɛ́.»
14 Beé rí tɛ á ké dɩbalá nyɛ?
Ɩ́ hé náŋá mɛ́,
rá zʋ tɔ́nɛ ná há sɔ́ɛ́ kɛ́rɛ sɩɛrʋ,
a ké ráŋ aá dɛllɛ sʋʋ.
Bee wɩ́ɛ́, Nyuutɩna Wɩɩsɛ, á Wɩɩsɛ
ɔ́ɔ́ á báá wɩ sɛ́ kené,
ʋ ɔ́ɔ́ á nyɔ bɛrɔ́ nyii,
bee wɩ́ɛ́, á ɔ́ɔ́ zɔ́kʋ́ mɛ́.
15 Á fa yɩ́ɛ́lɛ́ tɛŋfɩ́ɛ́l,
amá wɩ́wér tóó.
Áá yɩ́ɛ́lɩ́rá wɩɩla tenné,
amá héwíŋ ní kéŋrá.
16 Á nɛ́ dɩŋdɔmɔ záksɛ wííle Daŋ mɛ́:
ʋ zákbɩbara wííle ɔ́ɔ́,
tíé wuu zíkli.
Ɓa níí kúé, rɩ́wɔ́ zɔkɛ tíé arɩ́rʋ́ onni wuu,
tɔ́ɔ́ arɩ́rʋ́ nɩɛ.»
17 Nyuutɩna Wɩɩsɛ nɛ́ bʋ́l ɛ́:
«Ŋ sɩ́ a rɩ́ dʋma, netolówɩ́ŋpuwa cɩ́nɩ́wa mɛ́.
Lúrí tóó aá kɛ́rɛ rɩ́wɔ́ sɩ́ɩ́wa ɓíésú,
ɓa sɩ́ ɓíésíwa.»
Zeremi wúú dunɩɛ wɩ́ɛ́
18 Zeremi sɛ́:
Ŋ sazɔkɔ́ wɩ lúrí kené,
ŋ sɩɛrʋ wuu ní víŋsé.
19 Ɩ́ zesi:
Ŋ dunɩɛ mɩ́ŋ tɔ́boli mí,
ká ɓa nɩ́nɩ́wɔ́ há wíé aá ja laatɛ́.
«Nyuutɩna Wɩɩsɛ báá to Sɩɔŋ mɛ́ nɛ́?
Sɩɔŋ báá wɩ kuóro kené ní yá?
Nyuutɩna Wɩɩsɛ sɛ́:
«Beé rí tɛ ɓaá jáŋ nʋɔ mɛ́,
a mʋ́ aá ɓaarɛ venni,
nɩhʋɔra oŋyɔ́ɔ́wa nyáŋ?»
20 Ɓɩɛ kʋsɛ́ ténnó,
tɔ́lɩɩla nɛ́,
ká á ha wɩ laatɛ́ né.
21 Zɔ́krʋ ná há péríŋ dunɩɛ,
ɔ́ɔ́ ŋ sɩɛrʋ zɔkɛ ɓóŋ;
ɛ́ ká sɩ́mɩɩrʋ́ a páŋ,
mɔ́mɔ́ tó a páŋ.
22 Lusɔ́ŋ nɛ́ báá tó Galaadɛ mɛ́,
dɔ́kta nɛ́ too ráŋ, aá váárɛ nɩɛ?
Ká béé rí sɩɛ́ tɛ,
ŋ dunɩɛ waá dúóri?»
23 Áá! rɩŋ nyúú wuu fa ká nyibúlbʋɔ rɛ́,
ká rɩŋ sɩ́ɛ́ fá bubúl sɩ́mɩ́ɩ́rʋ!
Wɔhɔ rɩ́ tɩ́taŋ wuu,
ŋ faá de wíwíŋ dunɩɛ nɩsʋsɛ́ wɩ́ɛ́ nɛ́!