Zɔ́krʋ ɓɩzeno níí ko Zerizalɛmɛ mɛ́
6
1 Bɛŋzamɛ dunɩɛ,ɩ́ lɛ Zerizalɛmɛ mɛ́, a já dɩyúóli.
Ɩ́ mú nyɩ́la Tekʋa mɛ́,
a cɔ́ŋsɛ nyɩnɛ Bɛtkɛrɛmɛ mɛ́,
bee wɩ́ɛ́, wɩɩla nɩ́ɩ́ kué, zɔ́krʋ ɓɩzeno ní
lɛ́ wɩɩsɛ dɩpomí nɛ́gʋɔ aá ko.
2 Tɔ́wéró Sɩɔŋ, ɩ kéŋ hɩɛ̃ŋ,
ká zɔ́krʋ pérí nyɛ!
3 Ʋ rɩ́ nɛ́ pʋnʋɔla arɩ́wɔ́ pʋsɛ kúko.
Ɓa kúó lɛ́rʋ́ wuu, a cɩ́nʋ́ mɛ́,
a cíkwó táŋtɛwa;
oro wuu rɩ́rʋ́ dɩtɩ́llɛ,
aá dɩ́ɛ́sʋ́ pʋsɛ.
4 Ɓa cááso bʋ́lɛ́: «Ɩ́ kánɩ́wa tɩɩ a mʋ́ yo Wɩɩsɛ lal!
Ɩ́ isi! Ɩ́ mʋ́ wɔhɔcɩ́ɩ́ka a yóú!
Bee nyúbɔ́ŋ má ká nyɛ! Wɩɩsɛ pɔrɔ́,
bíno má zʋ.
5 Ɩ́ ísí! Á mʋ́ tɩ́tafɩɛla a yóú,
a zɔ́kwɔ́ jɩwere wuu!
6 Ná Nyuutɩna Wɩɩsɛ,
Doewuutɩna há sʋ́ʋ́ ná:
Ɩ́ conni tuuni,
a hé naŋcolo tɩ́ɛ́kɛ Zerizalɛmɛ zeŋ mí.»
Tɔ́ɔ́ ná há sɩ́ ná bɛ́ŋsɛ́ nɛ́ ɛ́;
ʋ wuu suó rɩ́ bɩbawɩ́ɛ́ nɛ́.
7 Ʋ lóú ʋ sahaksɩ́ pal aá lɛ́
anɛ ɛ́ vil nyii há palɛ aá lɛ́.
Bɩbarɩ́ ná rɩ́ sahaksɩ́ ná háá tʋŋ tɔ́ɔ́ ná sɩɛrʋ
wɩ́ɛ́ nɛ́ ɓaá bʋl.
Wɩɩla arɩ́ nɩbɛ́ŋsɔ́ dʋŋɔ nɛ́
ŋ bel aá ná tɛ́ŋ wuu mí.
8 Zerizalɛmɛ nɩɛ, ɩ́ sɩɛ́ saŋ cáánɛ
rɩ ɛ́ ráá, ŋ sɩ́ fóíwa tá
ká a rɩ́ɩ́wa tɔ́ɔ́ bɩrmɛ tɔ́ɓoo,
tɔ́ɔ́ ná nɛ́ŋ há to ráŋ.»
Dɩlhɔtɩɩna bɛ́ŋsɛ́ wɩ́ɛ́
9 Ná Nyuutɩna Wɩɩsɛ, Doewuutɩna há sʋ́ʋ́ ná:
«Ɓa sɩ́ kɛsɛ nɩɛ ná wuu há káánɛ, a mɩŋ Ɩzɩrayɛl mɛ́,
anɛ ɓa háá kuuni viínyi nɔnɔ wuu ɛ́.
Bɩrɛ tɛ́rɩ́ nɛ́sɛ anɛ nɛ́ŋ ná háá kuuni viínyi hílli daha!»
10 Áŋ rɛ́, rɩ́ŋ bʋl wɩ́ɛ́ pá rʋʋ nɛ̃,
áŋ rɛ́, rɩ́ŋ caanɛ rʋʋ zesíŋ rɩ́?
Ɓa dɩlla wɩ wɩ́ɛ́ nɛ̃,
ɓa waá ja rɩ́wɔ́ zesi wɩ́ɩ́ wuu.
Nyuutɩna Wɩɩsɛ, wɩ́bʋlɛ́ ká mɔ́wɩ́ɛ́ rɛ́ a pɔ́wɔ́.
Ɓa wɩ wɩ́ɩ́ wuu zesé ja.
11 Nyuutɩna Wɩɩsɛ, ɩ cɔwɩɩlɔ́ súŋ,
ŋ báá wʋ́ʋ́ wúó nyammɛ.
Ɛ́ nɛ́ Nyuutɩna Wɩɩsɛ sɛ́:
«Dí ɛ́ cɔwɩɩlɔ́ heŋbíísi ná há mɩŋ ŋmɛ́ŋsɛ mɛ́
arɩ́ heŋbiwafɛlɛ pulli nyúú.
Báála rɩ́ háála,
nɩbɩ́nawa arɩ́wɔ́ ná há dí tɔ́ɔ́ vɔkɛ,
ɓa wuu sɩ́ a nɩkɛsɛ́.
12 Ɓa jɩɩsɛ rɩ́wɔ́ baksɛ arɩ́wɔ́ háála má sɩ́ a nɩɛ naŋá tɩ́llɛ.
Ŋ sɩ́ tɛ́rɩ́ŋ nɛ́sɛ a cɩ tɔ́ɔ́ ná nɩɛ mɛ́.»
Nyuutɩna Wɩɩsɛ nɛ́ bʋl ɛ́.
13 Beé wɩ́ɛ́, a pɔ́wɔ́ heŋbie mí ká zɩ yákwɔ́ nɔhɔ̃́ mɛ́,
ɓa wuu wɩ́jaalɩ́ nɛ́ kɔ́wɔ́ dʋŋɔ wér wɩ́ɛ́.
A pɔ́ wɩ́laabʋlla mɛ́ ká mʋ́ yakɛ vʋk'ɔɔsa mɛ́,
ɓa má oro wuu wɩ taŋá kené.
14 Zɔ́krʋ ná há sɩ́ péríŋ nɩɛ,
ɓa wʋ́ʋ́ gíéle rɩ́ sɩ́fɩɛma,
ká bʋlɛ́ : “Wɩ́ɩ́ toó,
wɩ́ɩ́ toó”,
ká wɩ́ɩ́ mɩ́ŋ.
15 Ɓa wɩ́lɔrɛ́ ná ɓa háá ɛ́ɛ́ kéŋ hɩɩ̃́sɛ,
amá ɓa wɩ hɩɩ̃́sɛ mʋɔ́ má wʋ́ʋ́ ɛ̃!
Ɓa wɩ ɛ̃ rɩ́wɔ́ ɔ́ɔ́ zɔ́kɛ́.
Ɛ́ nɛ́ tɛ Nyuutɩna Wɩɩsɛ sɛ́: ɓa sɩ́ jɛ́rɛ tíé anɛ nɩɛ náŋa wuu,
rɩ́ŋ nɛ́ isé cɩ́ŋwɔ́ mɛ́,
ɓa wuu sɩ́ gɛnnɛ ɓallɛ pɩ tíé!
16 Ná Nyuutɩna Wɩɩsɛ há sʋ́ʋ́ ná:
«Ɩ́ cɛ́ ŋmɛ́ŋsɛ mɛ́ ká kɩ́ɛ́lɛ wérí,
ɩ́ bɔsɛ ŋmɛ́ŋbɩnɛ́wa wɩ́ɛ́.
Ɩ́ já wér ŋmɛ́nɔ, a tɩ́ŋʋ́ nɛ́,
ɛ́ é, ɩ́ sɩ́ ná tɛŋfɩ́ɛ́l.
Amá ɓa vɔ́ɔ́ ká bʋlɛ́:
«Á wʋ́ʋ́ tɩ́ŋ.»
17 Ŋ lɩ́sɛ síŋtírpɔ́ɔ́ra rɩ́wɔ́ pɔ́ɩ́wa mɛ́.
Ɩ́ pɔ́ weri rɩ́ nyɩ́la ní múé!
Amá ɓa vɔ́ɔ́ ká bʋlɛ́:
“Wɩ́yɔɔwa rɛ́ ká nyáŋ á sɩ́ɛ́ mɛ́”.
18 Ɛ́ wɩ́ɛ́, duó wuu nɩɛ, ɩ́ zesi,
púl nɩɛ wuu sɩ́ ná wɩ́ɩ́ ná há sɩ́ péríwó.
19 Tíé, zesi:
Ŋ sɩ́ a rɩ́ wɩɩla peri nɩɛ nyáŋ,
a cɛ́rɩ́wɔ́ wɩ́lɔrɛ́ ná ɓa há ɛ́ɛ́ nʋɔ.
Ɓa wɩ wɩ́ɛ́ ná ŋ fa há bʋlɛ́ a pɔ́wɔ́ gíélé.
Ɓa wɩ́ŋ wɩ́makɛ́ ná zesé.
20 Aŋsáŋsɛwa ná ɩ́ há kené lɛ́ Saba ko aá páŋ nyʋɔrɛ́ nɛ́ ká orí rí ŋ rɩ́,
arɩ́ fuo nyɔ́ɔ́ ná há kéŋ sɔ́ŋ ɓɩwero, ɩ́ há kené lɛ tɔ́bole ko aá páŋ?
Ɩ́ vʋkfíse ná wɩ́ŋ sɩɛrʋ tɔrɛ,
ɩ́ vʋka wɩ hɩ̃́ɛ́ŋ kené ŋ rɩ́.
21 Ɛ́ wɩ́ɛ́, náŋ é Nyuutɩna Wɩɩsɛ há sʋ́ʋ́ ná:
Ŋ sɩ́ bil dɩgɛ́rɛ nɩɛ nyáŋ sɩ́ɛ́,
rɩ́wɔ́ wuu gɛ́nnɩ́wɔ́ mɛ́, a ɓallɛ sʋsɛ:
ánáwa rɩ́ bɛlɛ, kénninaŋá arɩ́ naŋnɔ́ŋsɛ.»
Dɩŋdɔmɔ lɛ́ wɩɩsɛ dɩpomí nɛ́gʋɔ rɩ́ nɛ́ aá ko
«Duó nɔ́ŋ rɩ́ lɛ́ wɩɩsɛ dɩpomí nɛ́gʋɔ tɔ́ɔ́ nɔ́ŋɔ aá ko,
Duo ná há zeno ní lɛ́ dúníé tokó
aá ko.
23 Ʋ sóójiwa kéŋ tóni arɩ́ cɔlma ɓa nɛ́ŋsa mɛ́,
ɓa sɩɛnnɛ haakɩ́, ɓa wɩ nɛrɔ susú fá.
Ɓa kʋɔlɛ zéŋ anɛ mʋʋ nyii dɔ́mɛ.
Ɓa zɛ́ záksɛ nɛ́,
a hé kólli, anɛ lalyoore púlli,
ɓa sɩɛ́ kó rɩ́wɔ́ yóí ní tɔ́wero Sɩɔŋ!»
24 Zerizalɛmɛ nɩɛ sɛ́: «Á há nɛ̃ ɛ́ labáárɛ, á naasɛ yʋ́ɔ́rɔ́,
á sɩɛnnɛ zɔkɛ, á nɩ́ná wɩɩla
anɛ háálɔ háá já rʋ́ʋ́ lʋl.
25 Ɩ́ sɩ́ baksɛ mʋ́,
ɩ́ sɩ́ lɩɩ va ŋmɛ́ŋsɛ mɛ́,
bee wɩ́ɛ́ dɩŋdɔma mɩ́ŋ ráŋ, aá ɓʋ́ nɩɛ;
Héwíŋ mɩŋ dɩhɩ̃́ wuu ní.»
26 Nyuutɩna Wɩɩsɛ sɛ́: «Ŋ nɩɛ, ɩ́ su yuwíírigɛnnɛ,
ɩ́ pa tapʋmmɔ bʋ́kɩ́wa tɩɩ,
ɩ́ púl a a yúwííri wɩ́ɛ́,
ɩ́ a anɛ bibala yúó mí,
ɩ́ ɓa yúhɔ zeŋbí,
bee wɩ́ɛ́, zɔ́krɔ́ sɩ́ ko úríwa mɛ́, a zɔ́kɩ́wa.»
Ɩzɩrayɛl ká kɔmɔ́ ná há wɩ cʋ́ɔ́rɛ́ nɛ́
27 Zeremi, ɩ nɛ́ ŋ lɩ́sɛ, ɩ nɛ̃ nɛ́ŋ ná háá cʋɔrɛ kɔmɔ́, ŋ nɩɛ sɩɛrʋ,
rɩɩ díŋíŋ nɩɛ a ná, a zɩ́ŋwɔ́ mála.»
28 Ɓa wuu ká dɩlhɔtɩɩna há wɩ cáánɛ nɛ̃ nɛ́
ka nɩɛ hé náŋá mɛ́, nɩbííne,
ɓa bacɩllɛ dúóró anɛ kɔmɔ́ arɩ́ hɔɔ,
ɓa wuu ká zɔkra nɛ́.
29 Lukro céwí cefure, rɩ́ níŋ ká nɛ́, rɩ́ kɔmɔ́ mɩ́ɛ́rɛ, rʋ́ʋ́ cʋ́ɔ́rɛ.
Amá lukro bɔ́lʋ́ tɩɩ yɔ́ɔ́ nɛ́,
rɩ kɔmɔ́ busunnú ná nɛ́ wɩ lɩ́ɛ́.
30 Ɛ́ nɩɛ yɩr nɛ́ ká : “Píŋ toó wárɛ”,
Nyuutɩna Wɩɩsɛ wʋ́ɔ́ ja.