Zerizalɛmɛ bɩ́rɔ́ túkú bála Wɩɩsɛ mɛ́, ʋ a dí dúníé wér
62
1 Ŋ wɩ́ŋ wɩ́ŋ nʋɔ wúó taŋŋɛ Sɩɔŋ wɩ́ɛ́,Zerizalɛmɛ wɩ́ɛ́, a sɩ́ wɩ́ɩ́ a,
a kaá já rʋ́ʋ́ táŋa nyɩ́ɩ́sɛ anɛ wɩpomí,
ká rʋ́ʋ́ laatɛ́ má cáánɛ anɛ nyɔduí níŋ.
2 Duówa sɩ́ néí táŋa ná
ká rɩ́ kuóre má wuu néí píŋ ná.
Ɓa sɩ́ yɩ́rɩ́ yɩfɛ́lɔ́ ná
Nyuutɩna Wɩɩsɛ nʋɔ há sɩ́ hé pɛ́ɩ́.
3 Ɩ sɩ́ a kuóneŋcú ná há wéró (kéŋ yɩr)
a mɩ́ŋ Nyuutɩna Wɩɩsɛ nɛ́sɛ mɛ́,
kuónyúbalɔ́ ɩ Wɩɩsɛ nɛ́cɛ́ɛ́ mɛ́.
4 Ɓa baa wɩ́ɩ́ yɩ́rɩ́ bʋlɛ́: «Nɩvɛ́taalɛ́»,
ɓa baa wɩ́ɩ́ tɔ́ɔ́ yɩ́rɩ́ bʋlɛ́: «Tɔ́ɓoo»,
amá ɓa sɩ́ yɩ́rɩ́ bʋlɛ́ «Ŋ nɩcólli»,
ká yɩ́rɩ́ tíé «Bála tɩ́na»,
beé wɩ́ɛ́, Nyuutɩna Wɩɩsɛ sɩɛrʋ sɩ́ tɔ́rɩ́ nyúú,
ɩ tíé sɩ́ ká bála.
5 Beé wɩ́ɛ́, ɩ bɛlɛ sɩ́ jɛ́ɩ́
anɛ ɛ́ bápʋ́ɔ́sɩ́ há já toopéro.
Ɩ Wɩɩsɛ sɩɛrʋ sɩ́ tɔ́rɩ́ nyúú
anɛ ɛ́ háfɛlɔ háá a ʋ bála sɩɛrʋ tɔrɛ.
6 Zerizalɛmɛ, ŋ hé pʋpɔɔra ɩ zekɛrɛ daha;
ɓa wɩ mɔhɛ̃́ rɩ́wɔ́ sikli
wɔhɔ arɩ́ tɩtáŋ wuu:
«Ɩ́ nɩɛ ná háá liisi Nyuutɩna Wɩɩsɛ,
ɩ́ wɩ mɔhɛ̃́ rɩ́ɩ́wa fɩɛlɛ.
7 Ɩ́ sɩ́ lo rʋ́ʋ́ (Wɩɩsɛ) ná fɩ́ɛ́la mʋɔ́ wuu
a kaá já tɛ́ŋ ná mɛ́ ʋ sɩ́ bɩ́rcuoli Zerizalɛmɛ
ká a rʋ́ʋ́ ná “píŋ nyɩɩsɛ tíé nyúú” ».
8 Nyuutɩna Wɩɩsɛ ɓɔ́ʋ́ néduu nɛ́sɛ
arɩ́rʋ́ dóé nɛ́sɛ a ŋmɩ́ɛ́sɛ a bʋlɛ́:
Ŋ baá wɩ́ɩ́ (bile) ɓɩdííle pii pɛ́ɩ́ dɩŋdɔma,
nɩhʋ́ɔ́ra bɛlɛ baá wɩ́ɩ́ dɩvɛ́ŋfɛlɛ ná
ɩ há suóle ká ná nyɔ́.
9 Amá nɩɛ ná há kʋ́sɩ́wɔ́ oŋparɛ́
sɩ́ píwó a dɩ́ɛ́sɩ́wɔ́ tɩɩ,
ká bɛ́ Nyuutɩna Wɩɩsɛ mɛ́,
nɩɛ ná má há ɓɔ́rɩ́wɔ́ víínyi nɔnɔ
sɩ́ nyɔ dɩvɛ́ŋ ŋ jaa wuólo sɩɛrʋ.
10 Ɩ́ lɛ́, ɩ́ lɩ́ɩ́wa tɔ́ɔ́ mɛ́
a kɛ́llɛ ŋmɛ́nɔ́ a pá nɩɛ,
ɩ́ páásɛ, ɩ́ páásɛ (ɩ́ yɩ) ŋmɛ́nɔ́,
ɩ́ tʋ́ɔ́sɛ dɔ́wʋ́ɔ́ ʋ mɛ́
ɩ́ cɔ́ŋsɛ jɔŋjɔŋ nɩɛ sɩ́ɛ́ mɛ́.
11 Ná wɩ́ɩ́ ná Nyuutɩna Wɩɩsɛ há ɛ́ɛ́ nɩɛ nɛ̃,
a mʋ́ yakɛ tíé toko mí:
Ɩ́ bʋl Sɩɔŋ toló (nɩɛ) rɩ́ a bʋlɛ́:
Néí Laataarɔ nɩ́ɩ́ kúé,
Ʋ tume mɩnʋ́ rɩ́,
ʋ sííle lɔ́ʋ́ sɩ́ɛ́.
12 Ɓa sɩ́ káŋwɔ́ aá yɩrɛ «Nɩɛ ná há kɔ́wɔ́ dʋŋɔ»
«Nyuutɩna Wɩɩsɛ nɩyɔwɩlaalɛ́»,
ká yɩ́rɩ́ má «Nɩɛ wuu tɔ́jaalɩ́»,
«Tɔ́ɔ́ ná ɓa há wɩ vɛ́ɛ́ tá».