Nyuutɩna Wɩɩsɛ sɩ́ dúú nɩɛ tɛŋbuóro
63
1 Áŋ rɛ́ ká nɛrɔ né há lɛ́ Edoŋ dɩtɩ́llɛ aá ko,Bɔsɩra tɔ́ɔ́ aá ko, ʋ gɛnnɛ wuu fɛ́l,
ʋ gɛnnɛ tʋ́tʋ́l
aá ko rɩ́ dóé?
Ŋ é níí bʋl wɩ́ɛ́ arɩ́ táŋa,
a ká dóé la nɩɛ aá tá.
2 Beé rí tɛ́ ɩ gɛnnɛ fɛ́l,
beé rí tɛ́ ɩ gɛnnɛ nɩ́ɛ́sɛ
nɛrɔ ná háá nʋɔsɛ víínyi nɔnɔ gɛnnɛ,
ɓa dɩhaasɩ́?
3 Ŋ dʋŋɔ léŋ ní nʋɔsɛ víínyi nɔnɔ,
ɓa dɩhaasɩ́ mɛ́
duówa ná sɩɛrʋ, ɓa nɛ́ŋ bála má fá wɩ́ŋ mɛ́ pɛ́ɛ́,
káŋ nʋɔ́sɩ́wɔ́ ŋ cɔwɩɩlɔ́ sɩɛrʋ,
ŋ táákwɔ́ arɩ́ cɔ́ɛ́;
ɓa nyii ɓenni zɩ́nɩ́ŋ gɛnnɛ
ɛ́ nɛ́ tɛ́ ŋ gɛnnɛ wuu fɛ́l.
4 Beé wɩ́ɛ́, tɛŋbuóro díí wɩ́ɛ́
nɛ́ fá mɩnɩ́ŋ sabɩɩna mɛ́,
ŋ nɩɛ yɔwɛ lɛ́ɛ́ bɩna nɛ́ kúé.
5 Ŋ ja saŋɛ: Ŋ wɩ nɛ́ŋ wuu néí rʋ́ʋ́ sáŋɩ́ŋ mɛ́!
Ŋ sɩɛrʋ zɔkɛ: nɛ́ŋ há toó aá pɛ́ŋ mɛ́ wɩ́ɛ́!
Ɛ́ nɛ́ ŋ váámɔ láŋ tá,
ŋ cɔwɩɩlɔ́ pɛ́ŋ mɛ́.
6 Ŋ cɔwɩɩlɔ́ sɩɛrʋ, ŋ tɩ́ksɛ duówa nɩɛ,
ŋ cɔ́ɛ́ nɩ́ɩ́sɩ́wɔ́ ɓa buki:
ŋ bɩ́sɩ́wɔ́ cɛ́l tá tíé
Áná súsúfɔɔ arɩ́rʋ́ bɛlɛ susu wɩ́ɛ́
7 Ŋ sɩ́ líísi Nyuutɩna Wɩɩsɛ wɩwéré wɩ́ɛ́,
ʋ wɩ́'állɛ ná há tɛ́ á mɔ ráá píŋsú,
wɩwéré ná wuu Nyuutɩna Wɩɩsɛ há ɛ́ɛ́ a párá wɩ́ɛ́
arɩ́ zíl zeno ná ʋ há kéné rɩ́ Ɩzɩrayɛl duó,
wér ná wuu ʋ ɛ́ɛ́ pɔ́wɔ́ a tɩ́ŋʋ́ susufɔɔ
arɩ́rʋ́ cólle mí.
8 Ʋ fá sɛ́: «Ɓa ɓɩɛ́na káŋ nɩɛ nɛ́,
gɩ́rágɩ́rá tówó mí»,
ʋ nɛ́ sɩɛ́ kɔ́wɔ́ laataarɔ má,
9 ɓa sazɔkɔ́ wuu sɩɛrʋ.
Ʋ wɩ nɛ́ŋ ɛ́ rá má malɩka tʋ́mɛ́,
ʋ tɩɩ nɛ́ lɔ́wɔ́ a tá,
ʋ cólle arɩ́ susufɔɔ sɩɛrʋ,
ʋ tɩɩ nɛ́ yɔ́wɛ́ lɔ́wɔ́.
Ʋ nɛ́ die kéŋwó ɓɔ́, a cáálɛ.
10 Amá ɓa ísó cɩ́nʋ́ mɛ́,
a aa zɔkʋ́ Sabɩɩna ná há kɔ́ʋ́ dʋŋɔ mɛ́.
Ɛ́ nɛ́ ʋ bɩ́rmɩ́wɔ́ dɩŋdɔŋ a cɩŋwɔ́ mɛ́,
ʋ tɩɩ nɛ́ kéŋ lal a cɩ́ŋwɔ́ mɛ́.
11 Ɛ́ mɛ́ nɛ́ ʋ nɩɛ sɩɛ́ líísíwó tɩɩ
die tápʋ́lɛ́ ná há dáárɛ, Moyizi tɛ́ŋ mɛ́ wɩ́ɛ́:
«Nɛrɔ ná há lɩ́sʋ́ nɩɛ, ʋ pʋsɛ arɩ́rʋ́ nʋnʋɔla mʋʋ sɩɛrʋ mɩ́ŋ nɛ́ɛ́?
Nɛrɔ ná há tɩ́ŋʋ́ Sabɩɩna ná há kɔ́ʋ́ dʋŋɔ
mɩ́nʋ́ nɩɛ sɩɛrʋ?
12 Ʋ nɛ́ tɛ́rʋ́ píŋ váámɔ́
Moyizi néduu rɩ́ cɔɔ,
a caŋ mʋʋ nyii ɓa sɩ́ɛ́ mɛ́,
ká la yɩr dɩŋɛ a pɔ́ʋ́ tɩɩ.
13 Ʋ nɛ́ kéŋwó va mʋʋ nyii mʋ́l,
anɛ zaka haá va gɩrbétéke sɩɛrʋ
ká ɓa wʋ́ɔ́ naasɛ ŋmɔsɛ (gɛnnɛ).
14 Nyuutɩna Wɩɩsɛ Sabɩɩna kéŋwó a mʋ́ fɩ́ɛ́la dɩhɩ̃́
anɛ pʋsɛ háá tuwi polo sɩɛrʋ.»
Nyɛ nɛ́ ɩ kánɩ́ nɩɛ va
a la yɩpiŋo a pɛ́ɩ́ tɩɩ.
15 Mɩ́ŋ bána nyúú, ɩ dɩmɩnɩ́ ná há kɔ́ʋ́ dʋŋɔ há wéró mí, ká bel, a ná:
ɩ cóllizeno ná rɩ́rɩ́ɩ́ ballɩ́ ná mɩ́ŋ nɛ́ɛ́?
Ɩ colle ná
arɩ́rɩ́ɩ́ susufɔɔ ná ɩ fá há kené rɩ́rɩ́ŋ báá too?
16 Kɛ́ɩ́ é ní kárá áná.
Abrahaŋ wɩ́rá ɛ̃,
Ɩzɩrayɛl má wɩ́rá ɛ̃.
Ɩ é Nyuutɩna Wɩɩsɛ nɛ́ kárá áná,
fól wuu, ɩ nɛ́ kárá laataarɔ, ɩ yɩr nɛ́ ɛ́.
17 Beé rí sɩɛ́ tɛ, Nyuutɩna Wɩɩsɛ,
ɩ lo á tɛ́lɩ́ ŋmɛ́ŋsɛ ná mɛ́, a mʋ́ dɩbolí,
ɩ dúórirá baŋcɩllɛ,
ɓa báá wɩ́ɩ́ fá?
Ɩ tʋtʋnna yɩr mɛ́,
jɩmʋ́ʋ́la ná há kɛ́ɩ́ liwe yɩr mɛ́
bɩ́rko.
18 Ɩ nɩtɩ́llɛ́ há dí tɔ́ɔ́ ná, ʋ wɩ dáánɛ́;
ká á dɩŋdɔmɔ zɔ́kɩ́ dɩmɩnɩ́ ná.
19 A sɩɛ́ pɔ́ ɛ́ wuu mí,
ɩ báá wɩ́ɩ́ dóé makɛ́ párá,
ɩ yɩr báá tórá har!
Aa! rɩ́ɩ́ fa wo bána kaá tɛ́ɩ́ har (aá caŋ)
kaá tuwi rí,
pallɛ fa sɩ́ vaklɩ́ sɩ́ɛ́ mɛ́.