Wɩɩsɛ Sabɩɩna súú Nɩlɩ́sɛ, ʋ duóri wɩlnáára naasɛ ká lɔ́wɔ́ tá
61
1 Nyuutɩna Wɩɩsɛ Sabɩɩna mɩ́nɩ́ŋ mɛ́.Beé wɩ́ɛ́, Nyuutɩna Wɩɩsɛ nɛ́ lɩ́sɩ́ŋ,
a tʋ́mɩ́ŋ rɩ́ŋ bʋl Labaarɩwero
wɩ́ɛ́ pá summe,
rɩ́ŋ bʋɔlɛ sazɔkɔ́ tɩ́náwa,
ká la nɩkɛ́sɛ a tá,
rɩ́ŋ bʋl pá bɩnajaa nɩɛ,
rɩ́ ɓa sɩ́ lɩ́sɩ́wɔ́,
2 rɩ́ŋ bʋl Nyuutɩna Wɩɩsɛ bárka bɩna ná wɩ́ɛ́ a pá nɩɛ,
á Wɩɩsɛ tɛŋbuóro tápʋ́l díí wɩ́ɛ́,
rɩ́ŋ bʋɔlɛ nɩɛ ná wuu háá wié;
3 rɩ́ŋ cú kuóneŋcú
a pá Sɩɔŋ nɩɛ ná háá wié
óó, rɩ́wɔ́ cú ɛ́ kuóneŋcú
ká báá sɩ́ tapʋmmɔ bʋkʋ́,
rɩ́wɔ́ tɩɩsɛ tɛŋpɔ́ɔ́rɛ nʋʋ,
ká baa sɩ́ wi,
rɩ́wɔ́ su gɔkɩ́ gɛnnɛ
ká rɩ́wɔ́ sɩɛnnɛ baa sɩ́ zɔ́kʋ.
Ɓa sɩ́ káŋwɔ́ aá yɩ́rɛ «Táŋa tuɓaarɛ́,
Nyuutɩna Wɩɩsɛ tucɔ́ŋsɛ́ ná
háá mákʋ́ píŋ».
4 Ɓa sɩ́ cuóli zeŋe ná fa há ɓallɛ fól wuu,
ɓa sɩ́ bɩ́rmɛ dɩhɛ̃́ ná fa há zɔ́kɛ
ɓa naabálwa tɛ́ŋ wuu mí,
ɓa bɩ́rsɔ́ tɔ́nɛ ná zeŋe fa há ɓállɛ,
a mɩ́ŋ zɔ́krʋ sɩɛrʋ a dáánɛ peri woo woowa.
5 Nɩhʋ́ɔ́ra sɩ́ lɛ́ dɩhɩ̃́ wuu ko,
aá nʋɔlɩ́wa pʋwɩ́ɛ́la,
nɩhʋ́ɔ́ra bɛlɛ nɛ́
sɩ́ ɛ́ɩ́ paara arɩ́rɩ́ɩ́wa tubelle.
6 Ká rɩ́wɔ́ kánɩ́ɩ́wa tɩɩ aá yɩ́rɛ
«Nyuutɩna Wɩɩsɛ vʋk'ɔɔsa»,
ɓa sɩ́ dɛ́nnɩ́wa a bʋlɛ́
«Á Wɩɩsɛ tʋtʋnna»;
ɩ́ sɩ́ dí duówa kuóɓɩɛ
kaá bɩ́ɩ́wa tɩɩ mɛ́, ɩ́ há lɔ́wɔ́ píŋ.
7 Ɩ́ wɩ hɩɩ̃sɛ bʋllɛ dí
wɩɩla ná nɩɛ há bɩ́ɩ́nɛ rɩ́ɩ́wa sɩ́ dí,
ɩ́ wʋ́ʋ́ dí,
ɩ́ sɩ́ ná kere bɛllɛ ɓa tɔ́ɔ́ mɛ́
ká rɩ́wɔ́ die satɔrɔ́ ná péríwa
a kaá mʋ́ wuu.
8 Beé wɩ́ɛ́, ŋ é Nyuutɩna wɩɩsɛ,
ŋ́ có yɛ́rɛ́,
ŋ́ bɛrɛ gaarʋ rɩ́ bɩbarɩ́,
ŋ sɩ́ siilíwa rɩ́ táŋa:
ŋ sɩ́ bil nʋtʋmɛ
ŋ rɩ́rɩ́ɩ́wa pɛ́kɛ a kaá mʋ́ wuu.
9 Ɓa sɩ́ zɩ́mɩ́wa dunɩɛ nʋɔ mɛ́ duówa sɩɛrʋ,
ɩ́ dunɩɛ waá yʋ́ksɛ nɩɛ sɩɛrʋ;
nɩɛ ná wuu há sɩ́ nówó sɩ́ zɩ́ŋ
rɩ́ duó ná Nyuutɩna Wɩɩsɛ
bárka há mɩ́nʋ́ mɛ́ nɛ́.
10 Ŋ sɩ́ jʋ́ɔ́sɛ, oo, a jʋ́ɔ́sɛ Nyuutɩna Wɩɩsɛ yɩr mɛ́,
ŋ dʋma sɩ́ jʋ́ɔ́sɛ Wɩɩsɛ yɩr mɛ́,
bee wɩ́ɛ́, Ʋ nɛ́ pi laatɛ́ gɛrɔ súŋ,
Ʋ nɛ́ pi taŋá kápooti tɔ́ŋ mɛ́,
anɛ háfɛlɔ bála,
anɛ vʋk'ɔɔsɔ há cú kuóneŋcú,
anɛ ɛ́ háfɛlɔ há hóú tɛŋɓɩ́ɛ́ra.
11 Ʋ ká ɛ́ nɛ́, anɛ tíé háá lo oŋyɩ́sɛ nyʋ́ a lɛ́,
ká záádɛ má lo oŋduo ná má ɓa há dúú mí nyʋ́ a lɛ́,
ɛ́ tɩɩ nɛ́ Nyuutɩna Wɩɩsɛ há ká Wɩɩsɛ
sɩ́ a rɩ taŋá arɩ́ gɔkɩ́ nyɩ́ɩ́sɛ
duówa wuu mí.