Wɩɩsɛ hé pʋmmɔ a Zerizalɛmɛ, ʋ má baa hé pʋmmɔ pá dúníé
60
1 Isi cɛ́ daha, a cáánɛ (tʋ́l) dúníé,bee wɩ́ɛ́, ɩ pʋmmɔ pérí tɛ́sɩ́ɩ́:
Nyuutɩna Wɩɩsɛ píŋ ná nyɩ́ɩ́sɩ́ mɛ́.
2 Ná bino há tɔ́ tíé mí ɛ́,
ká kʋ́ʋ́lɔ má tɔ́ tɔ́nɛ mɛ́ ɛ́,
amá Nyuutɩna Wɩɩsɛ sɩ́ isi anɛ wɩpomí
rʋ́ʋ́ píŋ má nyɩ́ɩ́sɩ́ mɛ́.
3 Duówa sɩ́ kóí pʋmmɔ ná rɩ́
ká rɩ kuóre má caasɩ́ cáánɛ́ (tʋ́lɛ́) ná rɩ́.
4 Ɓɔ́ɩ́ nyúú a bélí kile a ná:
nɩɛ wuu hé náŋá mɛ́, aá kóí rí nɛ́,
ɩ bɛlɛ sɩ́ lɛ́ dɩboli a ko,
ɩ tolé ní ɓa pɛ́kɛ samɩsɛ mɛ́ wérí, a kaá ko.
5 Ɩ sɩ́ɩ́ sɩ́ ná, rɩ́ɩ́ tɛŋ pɔrɛ,
satɔrɔ́ sɩ́ súí rɩ́ɩ́ jɩ́jʋ́ɔ́sɛ,
beé wɩ́ɛ́, mʋʋ óŋwéré wuu sɩ́ pal kóí rɩ́,
duówa nɩɛ kuóɓɩɛ sɩ́ ɛ́ɩ́ tɩ́llɛ́.
6 Nyʋkmawa ɓɩkaná sɩ́ kóí rí,
Madɩaŋ arɩ́ Eyifa nyʋkmɩɓʋɔllɛ wuu
sɩ́ ko súí tɔ́ɔ́ wuu,
Saba nɩɛ wuu sɩ́ ko,
ɓa sɩ́ ká salmɛ arɩ́ áŋsaŋsɛ ko,
ɓa nɛ́ ká nɩɛ ná há sɩ́ bɛ́ Nyuutɩna Wɩɩsɛ mɛ́.
7 Kedaarɛ pʋwɩ́ɛ́la wuu sɩ́ hé náŋá mɛ́, rɩ́ɩ́ tɩ́lwɔ́,
ɩ nɛ́ tɛ́ Nebayɔtɛ peɓallɛ, rɩ́ɩ́ kaá tʋ́ŋ;
ɩ sɩ́ kɛ́sɩ́wɔ́ ɔsɛ vʋkfisé ŋ koro ná daha,
ŋ sɩɛrʋ sɩ́ tɔ́rwɔ́ nyúú;
ʋ ká ɛ́ nɛ́, ŋ sɩ́ a rɩ́ŋ jɩwéró ná ká hɩɛ̃ŋ.
8 Áŋwa rɩ́ɩ́ fɛ́ɛ́ anɛ dobasɛ nyɛ́,
anɛ kuókʋsɛ há file aá jáwɔ́ dallɛ?
9 Ʋ ká ɛ́ nɛ́, mʋʋ sɩɛrʋ tɔ́nɛ nɩɛ sɩ́ kóŋ rí,
Tarsiisi nyidáborzeŋsi ní sɩ́ la sɩ́ɛ́,
a bɩ́rkánɩ́ bɛlɛ lɛ́ dɩboli ko,
a pɛ́ káŋwɔ́ warɛ arɩ́ salmɛ ko pɛ́ɩ́,
Nyuutɩna Wɩɩsɛ, ɩ Wɩɩsɛ yɩr mɛ́,
Nyuutɩna ná há kɔ́ʋ́ dʋŋɔ yɩr mɛ́,
beé wɩ́ɛ́, ʋ púú wér pɛ́ɩ́.
10 Nɩhʋɔra bɛlɛ sɩ́ bɩ́rsɔ́ɩ́ zeŋe pɛ́ɩ́
ká rɩ́wɔ́ kuóre má tʋ́ŋ a pɩ́pɛ́ɩ́,
beé wɩ́ɛ́, ŋ cɔwɩɩlɔ́ sɩɛrʋ, ŋ fa ŋmɔ́wɩ́
amá mʋ́l né mí, ŋ sɩ́ mákɩ́ŋ sawér a pɛ́ɩ́,
a tɩ́ŋɩ́ŋ cólle mí.
11 Tɛ́ŋ wuu mí, ɩ dánnʋʋsɛ sɩ́ wunni cɛ́,
wɔhɔ arɩ́ tɩtáŋ wuu, ɓa waá tɔ́ ná,
a makɛ rɩ duówa arɩ́wɔ́ kuóre hé lɛ́ɛ́wa,
a káŋwɔ́ kuóɓɩɛ a ko pɛ́ɩ́.
12 Zɔkrʋ sɩ́ peri duó ná rɩ́ dɩtɩ́llɛ ná
há sɩ́ vɛ́ rʋ́ʋ́ tʋ́ŋ pɛ́ɩ́, ɓa sɩ́ nyɩ́ɩ́kɛ, zɔ́krʋ sɩ́ peri duówa.
13 Sɩɩpɩrɛ rɩ́ ɔrmɛ arɩ́ biisi
tuuni nyáŋ wuu há ká
Liibaŋ píŋ, sɩ́ ɛ́ɩ́ tɩ́llɛ́,
rɩ́wɔ́ pii ɓɩ́ɛ́rɩ́ŋ jaa ná;
ʋ ká ɛ́ nɛ́, ŋ sɩ́ a rɩ́ŋ dɩmɩnɩ́ ká píŋ.
14 Nɩɛ ná fa háá bɛ́ŋsɩ́
ɓa bɛlɛ sɩ́ ko ɓírmí sɩ́ɛ́,
nɩɛ ná wuu fa háá guóní
ɓa sɩ́ kóí sɩ́ɛ́, a káŋwɔ́ sɩ́ɛ́ cú tíé.
Ɓa sɩ́ pɛ́ɩ́ yɩr: «Nyuutɩna Wɩɩsɛ tɔ́ɔ́»,
«Ɩzɩrayɛl Wɩɩsɛ ná há kɔ́ʋ́ dʋŋɔ tɔ́ɔ́ Sɩyɔŋ».
15 Ɓa fa vɛ́ɩ́ tá, a bɛ́rɩ́,
nɛ́ŋ wuu wɩ kóé aá dásɩ́ɩ́.
Amá ŋ sɩɛ́ sɩ́ a rɩ́ɩ́ dí wér, a kaá mʋ́ wuu,
rɩ woo woowa tɩ́ŋɩ́ mɛ́ a ná wér déŋdéré.
16 Ɩ sɩ́ cʋ́ʋ́sɛ duówa ɩ́l,
ɩ sɩ́ la kuóre kuóɓɩɛ.
Ɛ́ mɛ́ nɛ́ sɩɛ́ rɩ́ɩ́ zɩ́ŋ
rɩ́ŋ é Nyuutɩna Wɩɩsɛ nɛ́ kɛ́ɩ́ Laataarɔ,
rɩ Zakɔbɛ Aŋwóŋ nɛ́ yɔ́wɛ́ lɛ́ɩ́.
17 Ŋ sɩ́ a rɩ salmɛ la kɔmɔ́ nyúú mí,
rɩ warɛ la hɔɔ nyúú mí,
rɩ kɔmɔ́ la daa nyúú mí,
ká rɩ hɔɔ la dɔ́wɩ́ nyúú mí.
Ŋ sɩ́ hé tɛŋfɩ́ɛ́l rʋ́ʋ́ lɛ́ɩ́ sɩ́ɛ́,
ká bíl táŋa má rʋ́ʋ́ ɛ́ɩ́ nyúútɩ́na.
18 Nɛ́ŋ baá waá a rʋ́ʋ́ nɛ̃ bɩbarɩ́ wɩ́ɛ́ ɩ tɔ́ɔ́ mɛ́,
onni zɔkɛ́ ɛ́ ráá má onni ginne
baa wɩ́ɩ́ susubɔnnɛ mɩ́ɩ́ mɩ́ŋ.
Ɩ sɩ́ héí zekɛrɛ yɩr: «Laatɛ́»,
ká yɩ́rɩ́ dánnʋʋsɛ: «Gɔkɩ́».
19 Wɔhɔ, wɩpomí ráá báá
wɩ pʋmmɔ héé pɛ́ɩ́,
tɩ́táŋ, cana ráá báá wɩ́ɩ́ cáánɛ.
Amá Nyuutɩna Wɩɩsɛ tɩɩ nɛ́
sɩ́ a pʋmmɔ dɩŋɛ a pɛ́ɩ́,
ɩ Wɩɩsɛ nɛ́ sɩ́ a rɩ́ɩ́ dí wér.
20 Wɩɩsɛ báá waá zʋ́, ɩ é rɩ́,
caŋbino waá mɩ́ŋ ɩ rɩ́,
beé wɩ́ɛ́, Nyuutɩna Wɩɩsɛ nɛ́
sɩ́ a pʋmmɔ dɩŋɛ a pɛ́ɩ́,
ɩ wííle tápʋ́lɛ́ dáárɔ́.
21 Ʋ ká ɛ́ nɛ́, ɩ nɩɛ wuu sɩ́ a nɩtáŋawa,
ɓa sɩ́ tɩ́llɛ tɔ́ɔ́ ná a kaa mʋ́ wuu;
ɓa nɛ́ káŋ tucɔ́ŋsɛ hilli,
ŋ nɛ́sɛ nɛ́ máwɔ́, rɩ́wɔ́ píŋsíŋ.
22 Ɓa sɩɛrʋ ɓɩwie sɩ́ púl peri bʋ́ɩ́,
ɓa sɩɛrʋ nɩmúúri sɩ́ a duó ná
há sɩ́ púl bʋ́ɩ́ bʋ́ɩ́wa (kɩ́ŋkáŋ).
Rɩ ɛ́ cɛ́rɛ́ nɛ́ péré, ŋ é Nyuutɩna Wɩɩsɛ
sɩ́ a rɩ ɛ́ wɩ́ɛ́ tʋ́ŋ kɩ́kɛ́lɛ́.