57
1 Nɩtáŋa sʋ́wɔ́,
ká nɛ́ŋ wuu wʋ́ʋ́ wɩ́ɛ́ bɩ́ɩ́nɛ,
nɩwéré yʋ́ksɔ́,
ká nɛ́ŋ wuu wɩ kɩ́ɛ́lɛ zɩ́ŋ,
rɩ nɩbɔma bɔmɩ́ sɩ́ɛ́ mɛ́
nɛ́ nɩtáŋa yʋ́ksɛ!
2 Amá tɛŋfɩ́ɛ́l sɩ́ bɩ́rko,
a makɛ rɩ́ nɩɛ ná háá va táŋa sɩɛrʋ
pɩ́ a fɩ́ɛ́lɛ ɓa dɩpɩ́ŋsɛ mɛ́.
3 Háhɩlɔ́ bɛlɛ, ɩ́ é tuuperi rɛ́ɛ́wa,
bácɔ́rmɔ́ arɩ́ mɛ́ŋyɛllɔ bɛlɛ:
4 Áŋ rɛ́ kɛ́ɩ́wa nɩmɔmɩ́?
Áŋ mɛ́ rɛ́ ɩ́ lɩ́sɩ́wa nʋɔ cɔ ɛ́,
aá tʋ́ksɛ?
Nyúdotɩ́ɩ́na bɛlɛ ráá tóíwa rɛ́,
nyɛ́tɩ́ɩ́na duó?
5 Ɩ́ có tuɓaarɛ́,
tuu ná é wuu há kéŋ paarʋ ɓɩkaná laka kené;
ɩ́ ɓʋ́ʋ́sɩ́wa bɛlɛ polli sɩɛnnɛ,
bʋ́bɔnnɛ sɩɛnnɛ.
6 Ɩ kér ní ká polo sɩɛrʋ dɔ́wɩ́solé,
ná, bel néí ɓáálɛ!
Ɩ tórsi nyɔɔlɔ́ aá pɔ́wɔ́ nɛ́,
aá pɔ́wɔ́ satɔ́ɔ́rɩ́pallɛ!
Nyɛ́ ná kéŋ naduóri rí a páŋ?
7 Ɩ bílí basa
paalɔ́ ná há isé kɩ́ŋkáŋ daha,
a zɩ ráŋ nɛ́
aá ɔsɛ vʋka.
8 Ɩ dánʋ́ɔ́ mɛ́, boro har,
ɩ bíl veŋgúle ráŋ.
Ʋ ká ɛ́ nɛ́, ɩ kɛ́kɩ́ŋ mɛ́
a lɔrɩ́ gɛnnɛ tá,
ká zɩ́nɩ́ dɩpɩnɛ́, a bɩ́rmɩ́ basa;
ɩ bíl nʋtʋmɛ
arɩ́ nɩɛ ná ɩ há cówó pɩ́nɛ́,
ɩ cówó pɩ́nɛ́;
ɩ cówó bɛ́llɛ́.
 
9 Ɩ kéŋ nʋʋ a mʋ́ pá kuóro
ɩ kéŋ tuláálewa mʋ́ pɔ́ʋ́,
ɩ tʋ́mɩ́ nɩɛ dɩboli,
ɩ tɩ́ŋ ɛ́ mɛ́ a dí múúre,
a mʋ́ luri lɛ́lɛ́ tɔ́ɔ́ mɛ́.
10 Ɩ bɔ́lɔ́, válɛ́ há nɩ́ɩ́sɩ́ wɩ́ɛ́,
amá ɩ há wʋ́ʋ́ ná ɛ̃ nɛ́ ká,
rɩ́ɩ́ bʋlɛ́: «Yɩ́ɛ́la too!»
Ɩ naasɛ há duóre,
a pɔ́ ɛ́ mɛ́, ɩ báá wɩ bɔlɛ ɛ̃.
11 Áŋ wɩ́ɛ́ rɛ́ kéŋ baŋcɩfɔ́ arɩ́ héwíŋ a pɛ́ɩ́,
a mɔ́ rɩ́ɩ́ nyɛ nyɩ́ɛ́rʋ?
Ɩ wɩ lóé rɩ́ŋ é wɩ́ɛ́ mɩnɩ́ sabɩɩna mɛ́,
ɩ wɩ lóé rɩ́ŋ ná dɩkení ɩ betuu mí!
Fól wuu, ŋ é há sikle,
ɛ́ nɛ́ tɛ́, ɩ wɩ́ŋ fá.
12 Ŋ sɩ́ césí táŋa naasɛ,
arɩ́rɩ́ɩ́ wɩ́'állɛ,
ɓa wɩ nyʋ́ɔ́rɛ
oro wuú ká rɩ́ɩ́ pɛ́ɩ́.
13 Rɩ ɛ́ veŋkaná lɛ́ɩ́ tá
rɩ́ɩ́ nɛ́ cááse!
Polvílmi sɩ́ píésíwó,
poo sɩ́ pɔ́wɔ́ kaa cól.
Amá nɛrɔ ná há sɩ́ yuólíŋ mí,
ʋ sɩ́ ná tíé rʋ́ʋ́ ɔ́ʋ́ liwe,
ká rɩ́ŋ paalɔ́ ná má há kɔ́ʋ́ dʋŋɔ
ɔ́ʋ́ tɩ́llɛ́.
14 Ʋ (Nyuutɩna Wɩɩsɛ) sɩ́ bʋlɛ́:
Ɩ́ kɛ́llɛ ŋmɛ́nɔ, ɩ́ tɔ́ bʋtuónni,
ɩ́ cúri dákuí wuu duó
ŋ nɩɛ ŋmɛ́nɔ mɛ́.
15 Beé wɩ́ɛ́, ná nɛrɔ ná há ká dɩŋɛ,
a ké dɩpiŋó, nyúúri,
ʋ yɩr a par (Kaŋdʋŋɔ) há sʋ́ʋ́ ná:
Ŋ dɩmɩnɩ́ nɛ́ ká nyúúri, ʋ ká pár má,
ŋ nɛ́ mɩŋ summo har,
ká nɛ́ há cɩ tɩkɛ nɛ́múrtɩ́ɩ́nɔ má,
rɩ́ŋ a rɩ nɛ́múrtɩ́ɩ́na ká mɩɩsɛ (sabɩŋsɛ pɛ́ dɩbalá)
ká a rɩ summe má ná wáána (sɩɛnnɛ ká tɛŋfɩ́ɛ́l).
16 Tɛ́ŋ wuu mí rá, ŋ híhe nɛsɛ,
cɛ́rɛ́ wuu mí ráá, ŋ dídí cɔ́ɛ́,
rɩ ɛ́ ráá, ŋ nɩmáálɛ ná
mɩŋsa sɩ́ ténníŋ sɩ́ɩ́ mɛ́.
17 Ɓa onni fore ná nɛ́ tɛ́
ŋ cɔ́ɛ́ wɩ́wɔ́;
ŋ bɛ́ŋsɩ́wɔ́, a vɛ́wɔ́ tá
cɔwɩɩlɔ́ há kéníŋ wɩ́ɛ́:
amá ɓa vɔ́ʋ́, ká há pi ŋmɛ́ŋsɛ ná
ɓa há có;
18 ŋ sɩɛ́ ná ɛ́ ŋmɛ́sɛ má.
Ŋ táŋa há sɩ́ pɔ́wɔ́ tɛŋfɩ́ɛ́l,
ŋ sɩ́ tɩ́ɛ́sɩ́wɔ́,
ŋ sɩ́ bʋ́ɔ́lɩ́wɔ́, ɓa rɩ́ nɩɛ ná
háá wi yuó,
19 káá a rɩ́ gɔ́kɩ́ nɛ́ mɩ́ŋwɔ́ nʋʋsɛ mɛ́.
Rɩ tɛŋfɩ́ɛ́l, tɛŋfɩ́ɛ́l peri
dɩboli nɩɛ arɩ́ dɩtɛ́sɩ́ɩ́ nɩɛ,
Nyuutɩna Wɩɩsɛ nɛ́ bʋlɛ́.
Ʋ ká ɛ́ nɛ́, ŋ sɩ́ pɔ́wɔ́ tɛŋfɩ́ɛ́l!
20 Amá sahɔ́tɩɩna,
ɓa é nɩhɩ̃ mʋʋ nyii háá puse,
a wɩ cɩ́m wuó cɛ́ nɛ́,
ká bɛ́ŋŋɛ busunnú arɩ́ vie aá tá.
21 Kɩrʋ, tɛŋfíɛ́l mʋɔ́ má, sahɔ́tɩɩna waá ná na,
ŋ Wɩɩsɛ nɛ́ bʋlɛ́!