Nyuutɩna Wɩɩsɛ háá jɛ́ɛ́ rɩ́ nʋvɔwɔ arɩ́ saba kal nɛ́ ɛ́ ná
58
1 Buóli ká sɩ́ɩ́ nʋɔ taŋŋʋ́,lo rɩ́ɩ́ líŋo cɩ́ɩ́mɛ anɛ nyɩla,
máŋsɩ́ŋ nɩɛ wɩ́tɩɛnnɛ a pɔ́wɔ́,
máŋsɛ Zakɔbɛ jaa nɩɛ wɩ́bɔma ha pɔ́wɔ́.
2 Ŋ nɛ́ ɓaá sʋl tápʋ́l é wuu,
aá já rɩ́wɔ́ zɩ́mɩ́ŋ ŋmɛ́ŋsɛ ná háá tɔ́rwɔ́ sɩɛnnɛ;
ɓa wɩ táŋa ná ɓa Wɩɩsɛ háá jɛ́ɛ́ vɛ́ɛ́ aá tá
anɛ tɔ́ɔ́ ná nɩɛ há mɩ́ŋ táŋa sɩɛrʋ.
Ɓaá sʋ́llɩ́ŋ rɩ́ŋ dí sarɩ́yawa táŋa sɩɛrʋ,
ɓa wɩ́colli ní ká Wɩɩsɛ tuupéré:
3 «Nʋvɔ́wɔ́ mʋ́l nɛ́ beé rí á rɩ́,
rɩɩ nɛ́ wʋ́ʋ́ néé rʋ́ʋ́ ká wɩ́ɩ́,
á tɩɩ múúre mʋ́l nɛ́ beé rí,
rɩɩ nɛ́ wɩ ɛ̃ rʋ́ʋ́ ká wɩ́ɩ́?»
Ɩ́ nʋvɔ́wɔ́ tápʋ́l,
ɩ́ há có ná nɛ́ ɩ́ ɩ́'a,
kaá bɛ́ŋsɩ́wa tʋtʋnna wuu.
4 Ɩ́ɩ́ vɔsɛ nʋʋsɛ ká nɛsɛ arɩ́ kaapɔsɛ mɩnɩ́wa pɛ́kɛ
ɩ́ gúŋsi nɛ́ŋsa aá yakɛ náŋá rɩ́ sahɔ!
Ɛ́ há mɔhɛ̃́ rɩɩ́wa vʋwɛ nʋɔ, ɛ́ tápʋ́l
rɩ́ɩ́wa liŋó zɩ yakɛ bána nyúúri
ɩ́ wɩ ɛ́ nɩ́ɩ́ tʋ́ŋ.
5 Nɩvɔ́wɔ́ ná ŋ háá jɛ́ɛ́,
kal ná nɩbííno há múúrú tɩɩ
mɔhɔ̃́ rʋ́ʋ́ nɛ́ nyɛ nɛ́?
Nyúú cúré anɛ zɔ́ŋkɛ,
pʋkɛnɔ daha pɩ́nɛ́
arɩ́ tápʋmmɔ sɩɛrʋ pɩ́nɛ́
nɛ́ ká nʋvɔ́wɔ́?
Nyɛ nɛ́ ká nʋvɔ́wɔ́,
kal ná háá tɔrɛ Nyuutɩna Wɩɩsɛ sɩɛrʋ?
6 Nʋvɔ́wɔ́ ná há zʋ́ŋ sɩɛrʋ, ráá tó ŋné rí:
ɩ́ puri sahaksɩ́ vɔɔsɛ tá
ɩ́ puri baŋdábaasɩ́ ŋmɛ́sɛ tá,
ɩ́ lo rɩ nɛ́múrtɩ́ɩ́na tɩ́lwɔ́ tɩɩ,
ɩ́ bonni baŋdábaasɩ́ wuu duó.
7 Ɩ há lóé ɩ rɩ́ losu nɩkanɩ́ tʋ́ŋ gbaŋa mɛ́,
ʋ ráá too nʋvɔ́wɔ́ rɛ́?
ɛ́ ráá má, ɩ há lóé
nɩyáára ná há wɩ dɩzʋ́ɩ́ kené mɩnɩ́ jaa mɛ́,
ɩ há ja gɛrɔ a sú tɛŋɓɩla tɩ́na:
ká wɩ́ɩ́ har pie tɛ́ɩ́ maábinɔ́ŋɔ.
8 Ɛ́ mɛ́ nɛ́ sɩɛ́ rɩ́ɩ́ pʋmmɔ cuoli
anɛ wɩpomí,
ká rɩ́ɩ́ ná tɛŋfɩ́ɛ́l kɩ́kɛ́lɛ́.
Ɩ táŋa (Wɩɩsɛ) sɩ́ lɛ́ɩ́ sɩ́ɛ́
ká rɩ Nyuutɩna Wɩɩsɛ píŋ mɩnɩ́ har
aá pɔ́ɩ́ mɛ́.
9 Ɛ́ tɛ́ŋ, ɩ sɩ́ yɩr Nyuutɩna Wɩɩsɛ, rʋ́ʋ́ saŋ,
ŋ sɩ́ ŋmɔ́wɛ búŋse pɔ́ʋ́, rʋ́ʋ́ bʋlɛ́: «Néŋ ní.»
Rɩ́ɩ́ nɛ́ lóé rɩ baŋdábaasɩ́ (nɩbɛ́ŋsɔ́) kɛ́kɩ́ mɛ́,
néní ná háá sʋ́ʋ́rɛ, wɩ́bʋltɩɛnnɛ,
10 rɩ́ɩ́ nɛ́ píí nʋɔ ɓɩdííli rɩɩ pá losu nɩkanɩ́,
rɩ́ɩ́ nɛ́ pá nɛ́múrtɩ́ɩ́nɔ, rʋ́ʋ́ dí vɔkɛ,
ɩ pʋmmɔ sɩ́ tɔ́ bino mí,
ɩ tɩtáŋ sɩ́ nɩ́ɛ́sɛ wɔhɔ a pɛ́ɩ́.
11 Nyuutɩna Wɩɩsɛ sɩ́ tɩ́ɛ́sɩ́ tɛ́ŋ wuu mí,
dɩhɩ̃́ ná há wɩ ɓɩdííli kené, ʋ sɩ́ a rɩ́ɩ́ dí a vɔkɛ,
ʋ sɩ́ a rɩ́ɩ́ heŋgbele tɩ́ɩ́rɛ wérí.
Ɩ sɩ́ nɛ́ baka ná bana há kóú mí wérí, (záádɛ ná ɓa há gáárɛ nyii wérí),
anɛ nyibúlsɩ́ɩ́ ná
nyii há waá toki.
12 Ɓa sɩ́ tɩ́ŋɩ́ mɛ́, a cuoli óŋ ná die há zɔ́kɛ́
jɩɩsɛ ná mʋ́ʋ́la ɓa bilé a tá bɩŋsɛ ɓɩkaná há dáárɛ (ká woowa ɓɩkaná dáárɛ),
ɩ sɩ́ sɔ́wɔ́ daha;
ɓa sɩ́ hé yɩr né ní a pɛ́ɩ́: «Zeŋkukulewa bɩ́bɩ́rmʋ́,
nɛrɔ ná há cuoli ziɓoru
rɩ nɩɛ wólli zʋ.»
Fɩ́ɛ́lɛ́ tápʋ́l ná háá tɔrɛ Wɩɩsɛ sɩɛrʋ
13 Rɩ́ɩ́ nɛ́ pɔ́ɩ́ tɩɩ mɛ́ rɩɩ fɩ́ɛ́lɛ́ tápʋ́l tʋtʋmɛ́,
arɩ́rɩ́ɩ́ satɔ́ɔ́rɩwɩ́'állɛ ɛɛ ŋ yɩr ná há kɔ́ʋ́ dʋŋɔ yɩr mɛ́,
rɩ́ɩ́ nɛ́ pi fɩ́ɛ́lɛ́ tápʋ́l ná rɩɩ makɛ “satɔrɔ́ tápʋ́l”
rɩ́ɩ́ nɛ́ pi Nyuutɩna Wɩɩsɛ tápʋ́l ná
há kɔ́ʋ́ dʋŋɔ rɩɩ makɛ “tápʋ́l píŋ”
rɩ́ɩ́ nɛ́ tɛ́ɩ́ tʋtʋmɛ́ kaa píŋsú,
rɩ́ɩ́ tɛ́ɩ́ satɔ́ɔ́rɩ́wɩ́ɛ́ ɛ́ɛ́,
arɩ́ wɩ́bʋlɛ kaná ná,
14 ɛ́ é, ɩ sɩ́ ná satɔrɔ́
Nyuutɩna Wɩɩsɛ yɩr mɛ́
ŋ sɩ́ pii rɩ́ lalyóórítórko, a kaá zɩ bána nyúú,
ŋ sɩ́ a rɩ́ɩ́ díí áná Zakɔbɛ liwe.
Oo, Nyuutɩna Wɩɩsɛ nʋɔ nɛ́ sɛ́.