IZAYI KƐNƆ BOTORO NYÚÚ MÍ CƆƆ
(56-66)
Wɩɩsɛ jaa, wɩcʋɔlɩjaa nɛ́ a pá nɩɛ wuu
56
1 Nyuutɩna Wɩɩsɛ nɛ́ bʋ́l nyɛ:Ɩ́ tʋ́tʋ́ŋ yɛ́rɛ́,
kaá tʋ́ŋ táŋa má,
bee wɩ́ɛ́, ŋ laatɛ́ ná pérí tɛ́sɩ́ɩ́,
ŋ táŋa ná nyɩ́ɩ́sɛ́ péró.
2 Nɛrɔ ná háá tʋŋ nyɛ́,
Adaŋ bio ná há cɩ́nɛ́ tɩkɛ wɩ́ɛ́ nyáŋ,
a wɩ fɩ́ɛ́lɛ́ tápʋ́l pie yɩ́rɛ yɔ́ɔ́, kaá zílú,
a pɔ́ rʋ́ʋ́ nɛ́sɛ sɩ́ wɩ́tɔ́k wuu a,
ʋ tɩ́na ná wér.
3 Rɩ́ nɩhʋ́ɔ́rɔ ná
há kenú tɩɩ cɔ́ Nyuutɩna Wɩɩsɛ mɛ́,
sɩ́ bʋ́lʋ́, rɩ́ɩ́ bʋlɛ́:
«Nyuutɩna Wɩɩsɛ sɩ́ cakɛ,
a lɩ́sɩ́ŋ tá ʋ nɩɛ sɩɛrʋ!»,
rɩ́ tʋtʋnnɔ má sɩ́ bʋ́lʋ́, rɩ́ɩ́ bʋlɛ́:
«Ŋ é ká tuhɩl rɛ́.»
4 Bee wɩ́ɛ́, ná Nyuutɩna Wɩɩsɛ há sʋ́ʋ́ ná:
tʋtʋnna ná háá zílíŋ fɩ́ɛ́lɛ́ tápʋ́lɛ́ ná,
há bɛ́llɛ lɩ́sɛ rɩ́wɔ́ tʋ́mɩ́ŋ colle,
ká cɛ́ tɩ́kɩ́ŋ nʋtʋmɛ ná,
5 ŋ sɩ́ má óŋ ŋ jaa sɩɛrʋ,
ŋ jaa zeŋe mí, ɓa yɩr mɛ́;
rʋʋ ká yɩr a kɩ́llɛ heŋbólli arɩ́ tolé;
ŋ sɩ́ a rɩ́wɔ́ yɩra mɩŋ ráŋ a kaa mʋ́ wuu,
ɓa to óŋdʋsɛ́.
6 Nɩhʋɔra bɛlɛ ná
há kéŋwó tɩɩ cɔ́ Nyuutɩna Wɩɩsɛ mɛ́
aá tʋ́mʋ́ tʋtʋ́mɛ́,
a cólli Nyuutɩna Wɩɩsɛ yɩr,
a ɔ́ʋ́ tʋtʋnna,
nɩɛ ná wuu haa zíl fɩ́ɛ́lɛ́ tápʋ́l,
a wʋ́ʋ́ guoni
a cɩ́ tɩkɩ́ŋ nʋtʋmɛ ná,
7 ŋ sɩ́ kaŋwɔ́ kóŋ paalɔ́ ná há kɔ́ʋ́ dʋŋɔ́ nyúú,
ŋ sɩ́ a rɩ́wɔ́ ná satɔrɔ́
ŋ jaa ná ɓa háá cʋ́ɔ́lɩ́ŋ ʋ sɩɛrʋ;
ɓa vʋkfisé ná ɓa há sɩ́ ɔ́sɩ́ŋ kórsi ná daha a páŋ
sɩ́ tɔ́rɩ́ŋ sɩɛrʋ,
bee wɩ́ɛ́, ŋ jaa ná yɩr nɛ́ sɩ́ a:
«Nɩɛ wuu wɩcʋɔlɩjaa.»
8 Nyuutɩna Wɩɩsɛ ná há ɛ́ɛ́
Ɩzɩrayɛl nɩɓɛsɛ ná (nɩɛ fa há ká yosí) hé náŋá mɛ́
nɛ́ bʋ́l ɛ́:
Ŋ baa sɩ́ a rɩ nɩɛ hé náŋá mɛ́ ʋ laka,
a súúríwó ná ŋ fa há la sɩ́ɛ́ a ɓa hé náŋá mɛ́.
Sɩ́dííríyɩryɔ́ɔ́wa/Sahɔtɩ́ɩ́na arɩ́ veŋɓaarɛ wɩ tɛŋfɩ́ɛ́l ná; wɩ́bɔ́ŋ'aara ná há bɩ́rsɛ sɩ́ ná súúri hé arɩ́ barka
9 Baka balla wuu,
ɩ́ é gɩr balla wuu,
ɩ́ ko a bɩ́rdɩ́ɛ́sɩ́wa tɩɩ:
10 Ɩzɩrayɛl pʋpɔ́ɔ́ra wuu ká nyʋ́mma;
ɓa oro wuu wɩ wɩ́ɩ́ ɛ̃;
ɓa ká vasɛ ná há ká dɩltenne ní,
ɓa wɩ wuó hóksi,
ɓa co dóŋ pɩ́nɛ́,
a pɛ́ aá duósi,
11 amá ɓa nɛ́ sɩɛ́ baá ká
vasɛ ná há díé aá dáárɛ má,
ɓa wɩ ɛ̃ rɩ́wɔ́ bʋlɛ́: «Ŋ mɔhɔ̃»
ká ɓa nɛ́ ká pʋnʋɔla!
Ɓa wɩ kɩ́ɛ́lɛ́ aá ná wɩ́ɩ́ wuu,
ɓa oro mɩ́nʋ́ tɩɩ ŋmɛ́nɔ mɛ́ nɛ́,
ɓa oro wuú kírú dʋŋɔ wér har nɛ́:
12 «Ɩ́ kó rɩ́ŋ ká dɩvɛ́ŋ lɛ́,
ráá nyɔ́ sɩ́ŋ ná há duóko bʋrɛ,
cie rɩ́ zaa sɩ́ a balá:
ɓa káánɛ kɩ́ŋkáŋ!»