Wɩɩsɛ yɩ́rʋ́ nɩɛ rɩ́wɔ́ ko púú wɩ́bʋlɛ́ a dɩ́ɛ́sɩ́wɔ́ tɩɩ
55
1 Héí, ɩ́ wuu ko nyii dɩhɩ̃́, ɩ́ é nyinyʋ́ɔ́sɛ nɩkɛ́sɛ́,ɩ́ ko, ɩ́ nɩɛ ná má tɩɩ há wɩ meéwíé kené.
Ɩ́ sʋ́l ɓɩdííle a dí;
ɩ́ ko nyɔ!
Dɩvɛ́ŋ arɩ́ nɛ́'ɩ́l
ká nyɔ́ɔ́ nɛ́, meéwíé ɓɩɛ rá.
2 Óŋ ná há tó ɓɩdííli
yɔ́wɛ́ mʋ́l nɛ́ bee rí,
óŋ ná há tó vɔ́k óŋ
ʋ súóli jɛ́ɛ́ mʋ́l nɛ́ bee rí?
Ɩ́ sɩɛ́ zesi, ɩ́ zésíŋ rɩ́ wérí,
a makɛ rɩ́ɩ́wa dí óŋwéró;
a makɛ rɩ́ɩ́wa ná ɓɩdipɔrɛ́,
a dí jʋ́ɔ́sɛ:
3 ɩ́ ɓílíwa dɩlla, ɩ́ kóŋ rɩ́,
ɩ́ zesi a ká mɩɩsɛ.
Ŋ sɩ́ bíl nʋtʋmɛ dɩŋɛ
ŋ rɩ́rɩ́ɩ́wa pɛ́kɛ,
ʋ ká ɛ́ nɛ́, wɩ́wéré ná ŋ fá há ɛ́ɛ́ pá Davidi,
ŋ sɩ́ ɔ́wɔ́ pɛ́ɩ́wa má.
4 Ná: ʋ nɛ́ fa káŋ daŋsɩ́ɛ́ nɛrɔ, ŋ há lɩ́sɛ́ a pá duówa nɩɛ,
ʋ nɛ́ fa ká tɔ́nɛ nɩɛ sɩ́dííro arɩ́wɔ́ nyúútɩ́na.
5 Ná: ɩ sɩ́ yɩ́rɛ tɔ́ɔ́ ná
ɩ há wʋ́ʋ́ ɛ̃,
rɩ́ tɔ́ɔ́ ná há wɩ́ɩ́ ɛ̃,
isi a fa a kóí rɩ́,
Nyuutɩna Wɩɩsɛ nɛ́ há kɛ́ɩ́ Wɩɩsɛ wɩ́ɛ́,
oo, ʋ ká ɛ́ nɛ́, Ɩzɩrayɛl Wɩɩsɛ ná há kɔ́ʋ́ dʋŋɔ,
wér ná ʋ há píé pɛ́ɩ́ yɩr mɛ́.
6 Ɩ́ já Nyuutɩna Wɩɩsɛ,
tɛ́ŋ ná mɛ́ ʋ há lóé ɩ́ wóllú aá ná,
ɩ́ yɩ́rʋ́, bee wɩ́ɛ́, ʋ mɩ́ŋ tɛ́sɩ́ɩ́.
7 Rɩ nɩbɔmɔ tɔ́ʋ́ ŋmɛ́nɔ,
ká rɩ sɔhɔtɩ́ɩ́nɔ́ má sabɩɩna bɩ́rsɛ.
Ká bɩ́rmʋ́ Nyuutɩna Wɩɩsɛ rɩ́,
rʋ́ʋ́ mákʋ́ sawér pɔ́ʋ́,
ká bɩ́rmʋ́ ráá Wɩɩsɛ rɩ́,
rʋ́ʋ́ caasɛ hóú suúri.
8 Ɩ́ sabɩŋsɛ arɩ́rɩ́ŋ sabɩŋsɛ tó balá,
ŋ ŋmɛ́ŋsɛ arɩ́rɩ́ɩ́wa ŋmɛ́ŋsɛ tó balá,
Nyuutɩna Wɩɩsɛ nɛ́ bʋl ɛ́.
9 Anɛ ɛ́ bána ísé há kɛ́kɛ́ tíé mí ɛ́,
ŋ ŋmɛ́ŋsɛ ká ɛ́ nɛ́,
ɓa kɛ́kɩ́ɩ́wa ŋmɛ́ŋsɛ mɛ́,
ŋ sabɩŋsɛ má arɩ́rɩ́ɩ́wa sabɩŋsɛ pɛ́kɛ ká ɛ́ nɛ́.
10 Anɛ ɛ́ duóŋ ɛ́ rá má nyɛ́lɔ́ (duódɔ́wʋ́ɔ́)
há wɩ bána lɩ́ɛ́ aá tuwi ká bɩ́r aá zɩ́
rʋ́ʋ́ wɩ tíé viile,
rʋ́ʋ́ nɛ́ wɩ ɛ́ɛ́ rɩ oŋbie nyʋ́, a yieri,
rʋ́ʋ́ nɛ́ wɩ ɛ́ɛ́ rɩ oŋdúúro ná oŋduó,
rɩ́ ɓɩdídííro ná ɓɩdííli,
11 ŋ má wɩ́bʋlɛ́ ká ɛ́ nɛ́
rʋ́ʋ́ nɛ́ lɩ́ŋ nʋɔ mɛ́ rɩ́ɩ́ lɛ́:
ʋ wɩ bɩ́rɛ aá kóŋ rɩ́,
rʋ́ʋ́ nɛ́ wɩ tʋ́ŋ tʋ́mɛ́,
rʋ́ʋ́ nɛ́ wɩ́ŋ há sʋ́ʋ́ tʋ́mʋ́ ná tʋ́mɛ.
12 Ɩ́ sɩ́ lɛ́ rɩ́ satɔrɔ́,
ɩ́ sɩ́ va rɩ́ tɛŋfɩ́ɛ́l.
Ɩ́ dɩtɩŋɩ́ wuu, pallɛ arɩ́ dúŋduóme
sɩ́ cáási satɔrɔ́,
ká rɩ baka tuuni má wuu
ŋmɔwɛ nɛ́ŋa a pɛ́ɩ́wa.
13 Sɩɩprɛ tuu sɩ́ cɛ́ sɔkole gbel mí, a wa,
mɩɩrtɛ tuu sɩ́ cɛ́ ɔrsi tuu gbel mí, a wa,
ɛ́ nɛ́ sɩ́ a rɩ́ Nyuutɩna Wɩɩsɛ yɩr lɛ́,
nyɩnɛ́ ná há sɩ́ mɩŋ a kaa mʋ́,
ʋ waá yʋ́ksɛ nɛ́.