a) Wɩɩsɛ fɩkɛ Abɩrahaŋ bɛlɛ mɛ́ rɩ́wɔ́ ká yarda; Wɩɩsɛ sɩ́ dúú kuorí dúníé nyúú rɛ́ɛ́
51
1 Ɩ́ nɩɛ ná háá já táŋa,ɩ́ nɩɛ ná háá já Nyuutɩna Wɩɩsɛ, ɩ́ zésíŋ rɩ́:
Ɓa há cɔ́ɩ́wa a lɩ́sɛ bʋ́ɩ́ ná mɛ́, ɩ́ bɩ́rɩ́wa sɩ́ɛ́ a hóú mí,
arɩ́ butuo ná mɛ́ ɓa há lɩ́sɩ́wa;
2 ɩ́ bélíwa áná Abɩrahaŋ,
arɩ́ Saara há lʋlɩ́wa.
Beé wɩ́ɛ́, tɛ́ŋ ná mɛ́ ŋ há yɩ́rʋ́,
rʋʋ dʋŋ bii né ní fa,
amá ŋ hé barka a pɔ́ʋ́, a a ʋ púl!
3 Ʋ ka ɛ́ nɛ́, Nyuutɩna Wɩɩsɛ mʋ́ʋ́rɛ Sɩɔŋ sɩ́mɩ́ɩ́rʋ,
ʋ bʋ́ɔ́lʋ́ zɔ́krʋwa ná wuu há pérú wɩ́ɛ́;
ʋ ɔ́ɔ́ ʋ gɩrbétéke ná nɩ́ɛ́sɛ Ɛdɛŋ
ká a ʋ tíhɩlɩ́ ná má nɩ́ɛ́sɛ
Nyuutɩna Wɩɩsɛ zaadɛ;
satɔrɔ́ arɩ́ jʋ́ɔ́sɛ́ dɩhɩ̃́ nɛ́,
sííle arɩ́ gɔkɩ́ mɩŋ ráŋ.
4 Ŋ nɩɛ, ɩ́ é ló rɩ́ɩ́wa yɩɛla mɩ́nɩ́ŋ rɩ́,
ɩ́ é duówa nɩɛ, ɩ́ ɓílíwa dɩlla a héŋ rɩ́:
bee wɩ́ɛ́, wɩ́bile a rɩ́wɔ́ lɩ́ŋ nɛ́,
ŋ sɩ́ a rɩ́ŋ sarɩ́ya (táŋa) má nyɩ́ɩ́sɛ,
ʋ nɛ́ ka nɩɛ pʋmmɔ.
5 Ŋ táŋa ná mɩ́ŋ tɛ́sɩ́ɩ́; ŋ laatɛ́ sɩ́ nyɩ́ɩ́sɛ,
ŋ sɩ́ dí nɩɛ sarɩ́ya arɩ́ vadóé;
mʋʋ sɩɛrʋ tɔ́nɛ sɩ́ kánɩ́ŋ yɩɛla
aá dɛ́llɩ́ŋ vaámɔ.
6 Ɩ́ ɓɔ́ɩ́wa sɩ́ɛ́ bána nyúú rí,
ká bel tíé má há mʋ́l rɩ́:
táŋa wuu, bána sɩ́ nyɩ́ɩ́kɛ anɛ nyʋ́ɔ́sʋ,
rɩ tíé má kɔ́sɛ anɛ gɛrɔ
ká rʋʋ nɩɛ sʋsɛ anɛ naŋcʋ́ʋ́sɛ.
Amá ŋ laatɛ́ sɩ́ mɩŋ a kaá mʋ́ wuu,
ŋ táŋa ná waá yʋ́ksɩ́ ná.
7 Ɩ́ nɩɛ ná há ɛ̃́ táŋa, ɩ́ zésíŋ rɩ́,
ŋ wɩ́bile há mɩŋ nɩɛ ná sɩɛnnɛ:
Ɩ́ sɩ́ nɩbííne zome fa,
a sɩ́ lo rɩ́wɔ́ nɩlɔrɔ́ má mʋ́ʋ́nɩ́wa,
8 beé wɩ́ɛ́, mʋkra sɩ́ díwó anɛ gɛrɔ,
saarɛ sɩ́ lɩ́ɛ́rɩ́wɔ́ anɛ kɛnɔ.
Amá ŋ táŋa sɩ́ mɩ́ŋ a kaá mʋ́ wuu,
ká rɩ́ŋ laatɛ́ má peri woo woowa.
9 Isi, Nyuutɩna Wɩɩsɛ vaámɔ, isi, a tʋŋ dóé,
isi, anɛ ɛ́ ɩ fa há la sɩ́ɛ́ tʋ́ŋ,
díé woowa tɛ́ŋ mɛ́.
Ɩ ráá wɩ Bɩbár(Rahaavɛ) tɩ́ksɛ rɛ́,
ká zɔkɛ Dɩragɔŋ rɛ́>>
10 Ɩ ráá wɩ ɛ́ɛ́ mʋʋ nyii,
dɩluŋo kɩ́ŋkáŋ nyii hʋ́ʋ̃́sɛ rɛ́>>
Ɩ ráá wɩ ŋmɛ́nɔ́ túúre mʋʋ nyii mʋ́l
ká rɩ́ nɩɛ ná ɩ há yɔ́wɛ́ la tɩ́ŋ aá dáárɛ rɛ́>>
11 Nyuutɩna nɩyɔwɩláálɛ́ sɩ́ bɩ́rko,
ɓa sɩ́ zʋ Sɩɔŋ tɔ́ɔ́ sɩɛrʋ arɩ́ nɛ́poro,
díé satɔrɔ́ ná nɛ́ sɩ́ ɔ́wɔ́ nyúbalɔ́.
Satɔrɔ́ arɩ́ jʋ́ɔ́sɛ́ sɩ́ tɔ́wɔ́ mɛ́
ká rɩ sazɔkɔ́ arɩ́ hííne nyɩ́ɩ́kɛ.
Beé rí tɛ́ ɩ́ fɩ́fa héwíŋ ŋ nɩɛ>>
12 Ŋ nɛ́, ŋ dʋŋɔ, nɩ́ɩ́ bʋ́ɔ́lɩ́wa.
Beé rí tɛ́ ɩ fɩ́fa nɩbííno háá sʋ́wɛ́,
Adaŋ bio há nɩhɛ̃́ nyɔ́ɔ́>>
13 Rɩ́ɩ́ sʋ́llɛ Nyuutɩna ná há mɛ́ɩ́ wɩ́ɛ́,
há a bána ká a tíé má mɩ́ŋ,
rɩ bɩbár cɔ́wɩ́ɩ́lɔ́ héwíŋ kánɩ́
déŋdéré, tápʋ́l wuu,
anʋ́ há kénú tɩɩ rʋ́ʋ́ zɔ́kɩ́>>
Bɩbár cɔ́wɩ́ɩ́lɔ́ ná sɩɛ́ mɩ́ŋ nɛ́ɛ́ rɛ́>>
14 Nɛ́ŋ ná fa há mɩ́ŋ wɩɩla (bɩnajaa) mɛ́
baá waá dáánɛ káá lɔ́ʋ́ tɩɩ:
ʋ waá sʋwɛ, ʋ to bʋɔ ɓɩzʋ́ʋ́lɩ́,
ʋ wɩ ɓɩdíílí já gúl ábádá!
15 Ŋ nɛ́ ka Nyuutɩna, ɩ Wɩɩsɛ,
ŋ nɩ́ɩ́ a mʋʋ nyii híkli, a a ʋ nyigʋ́gʋ́llɛ dʋdɔ́ŋ
ŋ yɩr nɛ́ ká: Nyuutɩna Wɩɩsɛ, Doewuutɩna.
16 Ŋ píŋ wɩ́bʋlɛ́ a héí nʋɔ,
ká a nɛ́sɛ fɩ́ɛ́l tɔ́ɩ́ mɛ́,
ŋ nɛ́ a bána, ŋ a tíé má
ká bʋl Sɩɔŋ nɩɛ rɩ́ a bʋlɛ́: «Ɩ́ nɛ́ káŋ nɩɛ!» Nyuutɩna Wɩɩsɛ sɩ́ cúóli Zerizalɛmɛ
17 Nyɩ́ɩ́sɩ́ tɩɩ, Zerizalɛmɛ nyɩ́ɩ́sɩ́ tɩɩ, isi daha.
ɩ nɛ́ŋ ná há nyɔ́ Nyuutɩna Wɩɩsɛ nɛ́sɛ cɔwɩɩlɔ́ nyíŋgbaŋa cɔwɩɩlɔ́;
cɔwɩɩlɔ́ ná há kéŋ sɩ́biro,
ɩ nyɔ́ʋ́, a nyɔ́ tenni.
18 Bɛlɛ ná wuu ʋ há lʋlɛ́ sɩɛrʋ,
oro wuu too aá tɩ́ɛ́sʋ́.
Bɛlɛ ná wuu ʋ dɩ́ɛ́sɛ́ sɩɛrʋ,
oro wuu wʋ́ʋ́ nɛ́sɛ mɛ́ cɔ́ɛ́.
19 Wɩ́ɛ́ nyáŋ bɛllɛ nɛ́ pérí:
áŋ lɛ́ɩ́ mɛ́>>
Zɔkɛ́ rɩ́ yɛ́rkɛ́, losu rɩ́ tókowí:
Áŋ rɛ́ sɩ́ bʋɔlɩ́>>
20 Ɩ bɛlɛ nɛ́ ɓállɛ́
a jɛ́rɛ́ ŋmɛ́ŋsɛ wuu nyúnni (nʋɔ),
anɛ wɩ́ɛ́ma há zʋ bára,
Nyuutɩna Wɩɩsɛ nɛ́ dúú cɔwɩɩlɔ́ ɓa nyúú,
ɩ Wɩɩsɛ nɛ́ cɩ́wɔ́.
21 Ɛ́ wɩ́ɛ́, dɩŋbɔŋtɩɩnɔ,
ɩ é nɛ́ŋ ná há bʋrɛ́, ká dɩvɛ́ŋ ráá wɩ́ɩ́ bʋrɛ́
zesi wɩ́ɩ́ né:
22 Néí Nyuutɩna, há ká Nyuutɩna Wɩɩsɛ,
ɩ Wɩɩsɛ ná há lɔ́ʋ́ nɩɛ nɛsɛ yɔwɛ, há sʋ́ʋ́ ná:
Ná, ŋ kéŋ gbaŋa ná há kéŋ sɩ́biro lɛ́ɩ́ nɛ́sɛ mɛ́,
nyiŋgbaŋa ná sɩɛrʋ nyɔɔlɔ́ há káŋ cɔwɩɩlɔ́,
ɩ cie wuu báá wʋ́ʋ́ nyɔ.
23 Ŋ sɩ́ púú hé
nɩɛ ná fá háá wálmɩ́ nɛ́sɛ mɛ́,
nɩɛ ná fá háá bʋ́lɩ́ rɩ́ a bʋlɛ́:
«Pɩ́ tíé, ká ráá dáárɛ»;
ɩ ɓɩ́ɛ́na pɩ́ bayalɛ́ ɩ rɩ́ tíé mɔ́ náŋá,
anɛ ŋmɛ́nɔ, a pá ŋmɛ́ŋválla.