Nyuutɩna Wɩɩsɛ sɩ́ bɩ́rcuóli Zerizalɛmɛ
52
1 Isi, Sɩɔŋ, isi, isi daha rɩ́ dóé,Zerizalɛmɛ, tɔ́ɔ́ ná há ká Wɩɩsɛ tɩ́llɛ
súí gɛwéré,
bee wɩ́ɛ́, tápʋlɛ́ ná háá kúé sɩɛrʋ,
pɛ́ŋkɛnɔ tɩ́na ná há ká busunnú tɩ́na
báá waá bɩ́rkóí rí.
2 Isi kúŋkulo sɩɛrʋ,
pirsí tɩɩ,
isi cɩ́ daha,
ɩ é Zerizalɛmɛ, tɔ́yomo,
cónní baŋ vɔ́ɔ́sɛ tá,
ɩ é Sɩɔŋ, tólyomo.
3 Ʋ ká ɛ́ nɛ́, Nyuutɩna Wɩɩsɛ nɛ́ sɛ́:
ɓa yɛ́llɩ́wa mɔlɛ,
meéwi sɩɛ́ waá a rʋ́ʋ́ lɛ́ ká rɩ́wɔ́ yɔwɛ lɛ́ɩ́wa!
4 Oo, ná Nyuutɩna Wɩɩsɛ nɛ́ há sʋ́ʋ́ ná:
Ŋ nɩɛ la sɩ́ɛ́ a mʋ́ ké Ezipiti mí;
ɛ́ har mɛ́, Asiiri nɩɛ bɛ́ŋsɩ́wɔ́.
5 Mʋ́l né mí, beé rí ŋ sɩ́ kʋ́ŋ rɛ́ɛ́>>
Nyuutɩna Wɩɩsɛ nɛ́ bʋ́l ɛ́.
Bee wɩ́ɛ́, ɓa kɛ́sɩ́ŋ nɩɛ yɔ́ɔ́ a kaa col,
ká nɩɛ ná há dí dóé ɓa nyúú jɩ́jʋ́ɔ́sɛ.
Nyuutɩna Wɩɩsɛ nɛ́ bʋ́l ɛ́.
Ká tápʋ́l é wuu, coktá tóó,
ŋ wɩ yɩwérí kené.
6 A sɩɛ́ pɔ́ nyɛ mɛ́,
ŋ nɩɛ sɩ́ zɩ́mɩ́ŋ yɩr há kɔ́ʋ́ ná,
a pɔ́ nyɛ́ mɛ́, a kaá ja ɛ́ kal,
ɓa sɩ́ zɩ́ŋ rɩ́ nɛ́ ká
Nɛrɔ ná tɩɩ há sɛ́: “Néŋ ní”.
7 Ʋ kéŋ bɔ́lɛ́,
labaarɩtaarɔ ná
naasɛ há zɩ́ pallɛ nyúnni,
a ká tɛŋfɩ́ɛ́l liŋó ko párá,
a cáárɛ labaarɩwéró
a buóli laatɛ́ wɩ́ɛ́ párá,
ká bʋ́l pá Sɩɔŋ a bʋlɛ́:
«Ɩ Wɩɩsɛ nɛ́ ká kuóro.»
8 Ɩ sɩ́ŋtírpɔɔra líŋsi ní!
Ɓa nɛ́ ɓɔ́wɔ́ líŋsi
a hé náŋá mɛ́, a cáási satɔrɔ́
beé wɩ́ɛ́, ɓa sɩ́ɩ́ mɛ́, ɓa nɛ́sɛ mɛ́,
ɓa ná Nyuutɩna Wɩɩsɛ
rʋ́ʋ́ bɩ́rɔ́ aá ko Sɩɔŋ.
9 Zerizalɛmɛ zekulewa
ɩ́ jʋ́ɔ́sɛ, ɩ́ hé náŋa mɛ́ a cáási satɔrɔ́,
beé wɩ́ɛ́, Nyuutɩna Wɩɩsɛ nɩ́ɩ́ bʋ́ɔ́lʋ́ nɩɛ,
ʋ yɔ́wɔ́ a la Zerizalɛmɛ.
10 Nyuutɩna Wɩɩsɛ ɔ́ɔ́ ʋ váámɔ ná
há kɔ́ʋ́ dʋŋɔ (páár) nyɩ́ɩ́sɛ
duówa wuu nɩɛ sɩ́ɛ́ mɛ́,
ká rɩ́ tíé tokó nɩɛ má wuu
nárá Wɩɩsɛ laatɛ́.
11 Ɩ́ col, ɩ́ col, ɩ́ lɛ́ ráŋ;
ɩ́ sɩ́ busunnú óŋ wuu mí tɩ́kʋ́;
ɩ́ lɛ́ Babɩlɔɔnɛ mɛ́,
ɩ́ mʋ́ʋ́rɩ́wa tɩ́ɩ́,
ɩ́ nɩɛ ná háá cɩ́ɩ́nɛ cɩ́ksɛ ná
ɓa há kené aá ɓáárɛ Nyuutɩna Wɩɩsɛ.
12 Ɩ́ sɩ́ kɩ́kɛ́lɛ́ já, rɩ́ɩ́ lɛ́
ɩ́ sɩ́ héwíŋ fá, rɩ́ɩ́ fáá col;
bee wɩ́ɛ́, nɛ́ŋ ná há sɩ́ lɛ́ɩ́wa sɩ́ɛ́,
ʋ nɛ́ ká Nyuutɩna Wɩɩsɛ,
nɛ́ŋ ná má há sɩ́ tɩ́ŋɩ́wa har a pɔ́ɩ́wa,
ʋ nɛ́ ká Ɩzɩrayɛl Wɩɩsɛ.
Nyuutɩna Wɩɩsɛ Tʋtʋnnɔ ná nɩbííne há sɩ́ bɛŋsɛ ká rɩ Wɩɩsɛ ɓɔ́ʋ́, rʋ́ʋ́ a nyúdótɩ́ɩ́na tɛŋfɩ́ɛ́l múkur wɩ́ɛ́
13 Ná, ŋ tʋtʋnnɔ sɩ́ dí hɩ́ɛ̃́sɩ́/nɛrɛ,
ʋ sɩ́ ná dɩkéŋpiŋo, ʋ sɩ́ ná ɓɔ́ɛ́, ʋ yɩr sɩ́ lɛ́ kɩ́ŋkáŋ.
14 Anɛ ɛ́ ʋ wɩ́ɛ́ há hé héwíŋ (sazɔkɔ́) a pá nɩkaná,
ʋ sɩ́ɛ há bɩ́rsɛ wɩ́ɛ́,
ʋ rɩ́ nɩbíŋ baá fa wɩ náŋá nɩhɛ̃́,
ʋ rɩ́ Adaŋ bio baá fa wɩ náŋá nɩhɛ̃́,
15 ɛ́ wɩ́ɛ́, ʋ wɩ́ɛ́ sɩɛ́ sɩ́ ká
satɔrɔ́ a pá duówa ɓɩkaná,
kuóre nʋʋsɛ sɩ́ máánɛ,
beé wɩ́ɛ́, ɓa sɩ́ɩ́ ná wɩ́ɩ́ ná
ɓa dɩlla fa há wɩ nɩ́ɛ́,
ɓa bɩ́bɛllɛ óŋ ná
ɓa fa há wʋ́ʋ́ wɩ́ɛ́ nɩ́ɛ́.