Venni gúlo, Wɩɩsɛ pɔ́ʋ́ nɩɛ mɛ́ a láwɔ́ tá
46
1 Veno Bɛl há ɓírme, ná Nebo má nɛ́ ɓile nyɛ́:
ɓa pɔ́wɔ́ veŋgúlli cɩ́ɩ́nɛ nɛsɛ, a cɩ́ɩ́nɛ pʋsɛ!
Tésíé mí, ɩ́ faá cɩ́ɩ́nɩ́wɔ́ nɛ́, ɓa sɩɛ́ bɩ́rmɛ cɩka,
oŋzime a pɛ́ɩ́wa pʋsɛ ná há bɔlɛ,
2 ɓa nɛ́ŋwɔ́ tɩɩ, a má tuwi ɓírmi.
Ɓa wʋ́ɔ́ veŋgúlli ná wo la aá tá,
ká ɓa káŋwɔ́ má aá mʋ́ yómí sɩɛrʋ.
 
3 Zakɔbɛ dunɩnɩɛ, ɩ́ zesíŋ rɩ́,
Ɩzɩrayɛl nɩkáánɛ wuu,
ɩ́ nɩɛ ná ŋ ha bélíwa mɛ́, rɩ́ɩ́wa ha mɩ́nɩ́wa máá luóru mí,
a cáálɩ́wa rɩ́ɩ́wa ka ɩ́l'ɔ́ɔ́sa.
4 Ŋ é nɩ́ɩ́sɔ́ nɛ́ ɛ́ a kaá jɛ́ɩ́wa nɩ́ɩ́nɛ́,
a kaá jɛ́ɩ́wa nyúnni pɩ́ɩ́rɛ́, ŋ nɛ́ sɩ́ tɩ́ɛ́kɩ́wa,
ŋ nɛ́ tʋ́ŋ ɛ́, ŋ sɩ́ cáálɩ́wa,
ŋ nɛ́ sɩ́ pɛ́ɩ́wa mɛ́, a lɛ́ɩ́wa a tá.
5 Ɩ́ píŋ makɛ áŋ rɛ́, áŋ rɛ́ nɩ́hɩ̃́ŋ>>
Ɩ́ kérsíŋ ɛ́rɛ́ɛ́ rɛ́, ɩ́ sɩ́ŋ rɩ́ áŋ rɛ́ ká balá>>
 
6 Nɩɛ náŋá lɩ́sɩ́wɔ́ lɔkɔ́ salmɛ aá zɔkɛ,
a pí oŋkaakersi aá kersi warɛ,
a yɔwɛ nɛrɔ ná háá cʋ́ɔ́rɛ hɔláárɛm rʋ́ʋ́ píí cʋ́ɔ́rɛ veno,
ɓa sɩɛ́ ɓíɓírmi tíé ʋ sɩ́ɛ́, a káŋwɔ́ sɩ́ɛ́ aá cú tíé.
 
7 Ɓa tɩɩ nɩ́ɩ́ cɩ́ɩ́nʋ́, ɓa vapára mɛ́ a kaá va,
aá bílú ʋ dɩpɩ́nɛ́ rʋ́ʋ́ fɩ́ɛ́lɛ́.
Ʋ dɩbilí, ʋ dɩpɩ́nɛ́ nɛ́, ʋ wʋ́ʋ́ dɩpɩ́nɛ́ mɩ́ɩ́ gɩ́ɩ́kɛ.
Rɩ nɛ́ŋ cáásó hóú mí, ʋ wɩ nʋɔ lɩ́sɛ,
ʋ wɩ nɛ́ŋ lɩ́sɛ, ʋ tɩ́na sazɔkɔ́ sɩɛrʋ.
 
8 Ɩ́ líísi wɩ́ɩ́ né, ɩ́ duóríwa baŋcɩ́llɛ,
nyúdótɩ́ɩ́na, ɩ́ bɩ́ɩ́nʋ́ wɩ́ɛ́ arɩ́rɩ́ɩ́wa sɩɛrʋ wuu,
9 ɩ́ bɩ́ɩ́nɛ wɩ́bɩ́nɛ́wa wɩ́ɛ́, tésíé mí wɩ́ɛ́:
Ʋ ká ɛ́ nɛ́, ŋ nɛ́ ká Wɩɩsɛ, wɩɩsɛ nɔ́ŋ tóó,
ŋ nɛ́ ká Wɩɩsɛ, wɩɩsɛ nɔ́ŋ tóó a mɔ́ŋ é.
10 Ŋŋ́ púl a bʋl wɩ́ɩ́ nɛ́, kɔ́ʋ́ kuko,
fól wuu, rɩ́ ɓa há wɩ kúé.
Ŋ nɛ́ bʋlɛ́: «Ŋ sabɩɩna jáŋ waá giri,
ŋ há có ná wuu ní ŋ ɩ́'a.»
 
11 Ŋ nɛ́ yɩ́rɛ diíwinaŋdííro wɩɩsɛ dɩpomí mí,
tɔ́ɔ́ ná ha boló mí, báálɔ ná há sɩ́ a rɩ́ŋ jáŋwa dí,
ŋ há bɩ́ɩ́nʋ́ ná, ŋ kénú aá gírsi weri,
ŋ há vɔ́wʋ́ ná, ʋ nɩ́ɩ́ cɩ́nɛ́.
 
12 Ɩ́ é nɩɛ ná sɩɛnnɛ há wɩ dɩbalá cɛ́, ɩ́ zésíŋ rɩ́,
ɩ́ nɩɛ ná há kɛ́kɛ́ taŋá mɛ́:
 
13 Ŋ lóó ŋ taŋá ná mɩ́ŋ tɛ́sɩ́ɩ́, ʋ dɩhɩ̃́ baá wɩ bol
ŋ nɛlaatɔ́ɔ́ baá waá dáánɛ;
ŋ sɩ́ a rɩ Sɩɔŋ ná laatɛ́,
ká a rɩ́ŋ píŋ nyɩ́ɩ́sɛ Ɩzɩrayɛl mɛ́.