Wɩɩsɛ mákʋ́ dóé venni sɩ́ɛ́ mɛ́, nɩɛ naasɛ dúóri
41
1 Ɩ́ é mʋʋ sɩɛrʋ tɔ́nɛ, ɩ́ siklíŋ sɩ́ɛ́ mɛ́,ká rɩ duówa nɩɛ má dí nyamma;
a tuu peri a máŋsɛ wɩ́ɛ́!
A céŋ náŋá sarɩ́ya dɩhɩ̃́:
2 Áŋ rɛ́ ɛ́ɛ́ bɩbár nyɩ́ɩ́sɛ wɩɩsɛ dɩpomí
a yɩ́rʋ́, ʋ cɩ́nʋ́ naasɛ mɛ́ aá ko,
a pi duówa a hóú nɛ́sɛ,
a a kuóre dí múúre ʋ sɩ́ɛ́ mɛ́,
a a ʋ tokowíe tɩ́náwa púl anɛ kúŋkúlo,
a a ʋ tuyóóre púl anɛ nyɔ́ɔ́ dopoo há pɛ́ɛ́,
3 ʋ wólli kiri pu nɩɛ náŋá,
aá dáárɩ́wɔ́ ká wɩ́ɩ́ wʋ́ʋ́ a,
kɔ́ʋ́ naa má wɩ tíé nʋ́ɔ́sɛ>>
4 Áŋ ɛ́ɛ́ wɩ́ɛ́ nyáŋ mɩŋ>>
Nɛ́ŋ ná há yɩrɛ woowa púle mí ní:
Ŋ é Nyuutɩna Wɩɩsɛ nɛ́, ŋ nɛ́ ká sɩ́láárɔ,
hatɩnna má sɩɛrʋ, ŋ ha kɔ́ʋ́ nɛ́.
5 Mʋʋ sɩɛrʋ tɔ́nɛ nóú: héwíŋ zʋ́wɔ́,
dúníé toko nɩɛ vɩvaklɛ,
ɓa sɩ́ cɔ́ ɛ́ wɩ́ɩ́ mɛ́ rɛ́,
ɓa mɩŋ ŋmɛ́nɔ mɛ́, aá ko.
6 Nɛrɔ wuu saŋʋ́ kenninɔ́ŋɔ mɛ́
kaá bʋlʋ́ nɔ́ŋɔ rɩ́ a bʋlɛ́: «Ka wérí!»
7 Cɔ́ɔ́rɔ́ nɩ́ɩ́ bɔllɛ nɛ́ŋ ná háá cʋɔrɛ kɔmɔ́,
nɛ́ŋ ná há kéŋ hama aá luki
ʋ máá cʋɔlɛ nɛrɔ ná há kéŋ sɩlɛ aá luki.
Ká bʋl pa nɛrɔ ná
há pa hɔrɛ aá cɔ́ náŋá mɛ́ rɩ́ a bʋlɛ́: «Ʋ cɛ́rɔ́»,
ká ɓásʋ́ rɩ́ tóŋkulli a ɓarɛ tíé
rʋ́ʋ́ sɩ́ biksu.
8 Amá, ɩ é Ɩzɩrayɛl, ŋ tʋtʋnnɔ,
ɩ é Zakɔkɛ ŋ há bɛ́llɛ́ a lɩsɛ,
Abɩrahaŋ dunɛrɔ, ha káŋ naŋnɔŋɔ,
9 ɩ nɛ́ŋ ná há mʋ́ tíé toko mí a ka,
ɩ nɛ́ŋ ná ŋ há yɩrɛ dúníé toko mí,
ɩ nɛ́ŋ ná rɩ́ ŋ há bʋlɛ a bʋlɛ́:
«Ɩ káŋ tʋtʋnnɔ nɛ́,
ŋ bɛ́llɔ́ lɩ́sɩ́ nɛ́, ŋ wɩ́ɩ́ vɛ́ tá»,
10 sɩ́ héwíŋ fa, beé wɩ́ɛ́, ŋ mɩ́nɩ́ har,
sɩ́ lo rɩ́ sazɔkɔ́ mɩ́nɩ́ sɩ́bélé mí, beé wɩ́ɛ́, ŋ nɛ́ kɛ́ɩ́ Wɩɩsɛ.
Ŋ sɩ́ pɛ́ɩ́ dóé, oo, ŋ sɩ́ pɛ́ɩ́ mɛ́,
ʋ ka ɛ́ nɛ́, ŋ sɩ́ tɩ́ɛ́kɩ́ rɩ́rɩ́ŋ néduu nɛ́sɛ ná háá tʋ́ŋ taŋá.
11 Nówó há sɩ́ dí hɩ́ɩ̃́sɛ ɛ́, ɓa yɩr há sɩ́ tʋ́ɔ́mɛ́ ɛ́,
ɓa nɩɛ ná wuu cɔ́ɛ́ fa háá wɩ́ɩ́:
zɔ́krʋ sɩ́ péríwó, rɩ́wɔ́ bɩ́rmɛ oŋyɔ́ɔ́wa,
ɓa nɩɛ ná há kéní aá nɛ́ nɛsɛ;
12 nɩɛ ná há kéní aá lowi,
ɩ sɩ́ bel jáwɔ́ ká sɩ́wɔ́ ná;
nɩɛ ná háá yóí,
sɩ́ bɩ́rmɛ oŋyɔ́ɔ́wa, a nyɩ́ɩ́kɛ.
13 Beé wɩ́ɛ́, ŋ é Nyuutɩna Wɩɩsɛ, ŋ nɛ́ kɛ́ɩ́ Wɩɩsɛ
há cɔ́ɩ́ néduu nɛ́sɛ mɛ́,
kaá bʋlɩ́ rɩ́ a bʋlɛ́:
«Sɩ́ héwíŋ fa,
ŋ nɛ́ sɩ́ pɛ́ɩ́ mɛ́.»
14 Zakɔbɛ, sɩ́ héwíŋ fa, ɩ zaa ha ka deŋdul wɩ́ɛ́,
ɩ zaa ha ka lɛ́l wɩ́ɛ́,
ŋ nɩ́ɩ́ pɛ́ɩ́ mɛ́, Nyuutɩna nɛ́ sɛ́ ɛ́.
Nɛrɔ ná há yɔ́wɛ́ a lɛ́ɩ́,
ʋ nɛ́ ka Ɩzɩrayɛl Wɩɩsɛ ná há kɔ́ʋ́ dʋŋɔ.
15 Ná: ŋ sɩ́ a rɩ́ɩ́ bɩ́rmɛ mɩŋmɔ́wrɛ dáá ná
há ká oŋfɛlɛ, a ka keŋe (nyɩ́la, téŋkúlli) ná há dúóko:
ɩ sɩ́ gɛrɛ pallɛ, a cɔ́nnɩ́wɔ́,
ɩ sɩ́ kulli dúŋduóme rɩ́wɔ́ nɛ́ mɩkɔlɔ,
16 ɩ sɩ́ célwó rɩ poo pɔ́wɔ́,
povilmi sɩ́ pɩ́sɩ́wɔ́.
Ká rɩ́ɩ́ é jɩ́jʋ́ɔ́sɛ Nyuutɩna Wɩɩsɛ yɩr mɛ́,
rɩ́ɩ́ yɩr lɛ́, a tɩŋ Ɩzɩrayɛl Wɩɩsɛ ná ha kɔ́ʋ́ dʋŋɔ yɩr mɛ́.
17 Nɛ́múrtɩ́ɩ́na arɩ́ nɩyáára ná
háá já nyii ká waá ná,
ká nyinyʋ́ɔ́sɛ a ɓa nʋʋsɛ (nɔŋdulé) káásɛ,
ŋ é Nyuutɩna Wɩɩsɛ sɩ́ saŋwɔ́ sʋ́lɛ́,
ŋ é Ɩzɩrayɛl Wɩɩsɛ, ŋ wʋ́ɔ́ vɛ́ɛ́ tá.
18 Ŋ sɩ́ a rɩ polli (mʋnaasɛ>>) nyɩ́ɩ́sɛ dúŋdúóme daha,
ká rɩ nyibúlsɩ́ɛ́ mɩŋ polnaasɛ sɩɛnnɛ,
ŋ sɩ́ a rɩ gɩrbétéke bɩ́rmɛ mʋʋ (fuo)
ká rɩ tíhɩ́lɩ́ bɩ́rmɛ nyii dɩpalɛ́.
19 Ŋ sɩ́ cɔ́ŋsɛ sɛɛdɩrɛ rɩ́ akasɩya (pɩɩnɔ)
rɩ́ mɩrtɛ arɩ́ olívie gɩrbétéke sɩɛrʋ,
ŋ sɩ́ a rɩ sɩɩprɛ rɩ́ ɔrmɛ arɩ́ biisi
wuu hé náŋá mɛ́ tíhɩ́lɩ́ sɩɛrʋ,
20 rɩ nɩɛ sɩ́ɩ́ ná, a zɩ́ŋ,
rɩ Nyuutɩna Wɩɩsɛ nɛ́sɛ nɛ́ ɔ́wɔ́ wuu,
rɩ́wɔ́ kɩ́ɛ́lɛ, a wuu zɩŋ
rɩ́wɔ́ lɛ́ Ɩzɩrayɛl Wɩɩsɛ ná há kɔ́ʋ́ dʋŋɔ nɛ́.
Wɩɩsɛ yeŋŋi venni arɩ́ veŋɓáára. Ʋ tʋtʋnnɔ wɩ́ɛ́
21 Nyuutɩna Wɩɩsɛ nɛ́ sɛ́, ɩ́ máŋsɩ́wa wɩ́kanɩ́,
Zakɔbɛ kuóro nɛ́ bʋlɛ́, ɩ́ bʋlɩ́wa taŋá;
22 ɩ́ a rɩ́ɩ́wa venni ná tú peri
a máŋsɛ wɩ́ɛ́ ná cie há sɩ́ ko, a párá.
Ɩ́ die wɩ́ɛ́ nɛ́ ka bamma rɛ́>>
Ɩ́ píwó fa há cɛ́ ɛ́wa, a máŋsɛ párá:
á sɩ́ zésíwó wérí,
á sɩɛ́ sɩ́ zɩ́ŋwɔ́ dɩgírsi má há sɩ́ cɛ́ ɛ́ ná.
Ɛ́ rá má, ɩ́ a ráá zɩŋ wɩ́ɛ́ ná cie háá kóé,
23 ɩ́ la sɩ́ɛ́ máŋsɛ wɩ́ɛ́ ná háá kóé a párá,
ɛ́ mɛ́ nɛ́ ráá sɩɛ́ zɩ́ŋ rɩ́ɩ́wa ɓɩɛ́na ká wɩ́ŋsa.
Ɩ́ a wɩwér ɛ́ ráá má wɩ́bɔ́ŋ ráá ná,
ɛ́ é, á wuu sɩ́ wúrá sɩ́ɛ́, a ná.
24 Amá ɩ́ (ɩ́ é venni) néíwa há kɔ́ʋ́ ná:
ɩ́ wɩ oŋyɔ́ɔ́ wuu mɔhɛ̃́;
ɩ́ wɩ́'állɛ má wuu wɩ oŋ péré.
Nɛ́ŋ ná há bɛ́llɛ lɩ́sɩ́wa lɔ́rʋ́ tɩɩ.
25 Ŋ ɔ́ɔ́ bál rɛ́ múŋsi a lɛ́ wɩɩsɛ dɩpomí nɛ́gʋ́ɔ́ rɩ́, a ko;
ʋ mɩ́ŋ wɩɩsɛ dɩpomí rɩ́ kaá nʋ́ʋ́ yɩr;
ʋʋ́ nʋ́ɔ́sɛ sɩ́dííre (gʋvɛrnɛɛrɛ) anɛ pɩ́pɛ́rɛ́ nɛ́,
anɛ ɛ́ vimáárɔ háá nʋ́ɔ́sɛ cʋʋ.
26 Áŋ rɛ́ fa la sɩ́ɛ́ bʋ́lʋ́ wɩ́ɛ́ púle mí,
a mɔ́ ráá zɩ́mʋ́, fól wuu
a bʋlɛ́: «Taŋá nɛ́>>»
Aɩ́, nɛ́ŋ wuu fa wʋ́ʋ́ wɩ́ɛ́ bʋ́lɛ;
áɩ́, nɛ́ŋ wuu fa wɩ lóé rɩ́wɔ́ nʋ́ʋ́ wɩ́ɛ́;
áɩ́, nɛ́ŋ wuu fa wɩ́ɩ́wa líŋsi nɩ́ɛ́.
27 Nɛ́ŋ ná há la sɩ́ɛ́ mʋ́ Sɩɔŋ, bʋlɔ́ a bʋlɛ́: Nówó ní!
Ŋ tʋ́ŋ labaarɩwéró cɩ́cáárɔ Zerizalɛmɛ mɛ́.
28 Ŋ béló, ká wɩ nɛ́ŋ balá má néé,
nɛ́ŋ balá má tówó sɩɛrʋ aá cáánɩ́wɔ́!
Ŋ fa sɩ́ bɔ́sɩ́wɔ́, rɩ́wɔ́ lɩsɛ nʋɔ a páŋ!
29 Nówó wuu nɩ́ɩ́sɔ́: oŋyɔ́ɔ́wa!
Ɓa wɩ́'állɛ má wɩ́yɔ́ɔ́wa!
Ɓa venni ka poo, oŋyɔ́ɔ́wa!