Nyuutɩna ŋmɛ́nɔ pʋllɔ gɩrbétéke sɩɛrʋ
35
1 Gɩrbétéke arɩ́ tíhɩ́lɩ́, ɩ́ jɩ́jʋ́ɔ́sɛ,típáŋtaŋɩ́ (pɩ́ŋpɩ́rkɔ́), ló rɩ́ɩ́ tɛŋ pɔrɛ, rɩ́ɩ́ fɩ fɩ́ɩ́la,
2 rɩ baka tufɩ́ɩ́la tɔ́ʋ́ mɛ́,
rʋ́ʋ́ ɓíɓenni, aá gbɔ́ káá cáási satɔrɩ́cááse!
Liibaŋ píŋ nɛ́ pérú,
Karmɛl rɩ́ Saarɔŋ wér nɛ́ pérú,
ɓa sɩ́ ná Nyuutɩna píŋ,
á Wɩɩsɛ wér.
3 Ɩ́ dúóri nɩɛ ná nɛ́ŋsa há bɔ́lɛ́, ɩ́ duóríwó nɛ́ŋsa,
nɩɛ ná naɓííne há yʋ́ɔ́rɛ, ɩ́ tɩ́ɛ́sɩ́wɔ́.
4 Ɩ́ bʋl pá héwíŋ há kéŋ nɩɛ ná a bʋlɛ́:
Ɩ́ sɩ́ héwíŋ fa, ɩ́ pɩrɛ baŋcɩllɛ.
Ɩ́ Wɩɩsɛ mɩnɔ́:
Ʋ sɩ́ dííwa tɛŋbuóro a pɛ́ɩ́wa,
Wɩɩsɛ nɛ́ aa túme.
Ʋ tɩɩ nɩ́ɩ́ kúé rʋ́ʋ́ lɛ́ɩ́wa a tá.
5 Ɛ́ mɛ́ nɛ́ rɩ́ nyʋmma sɩ́ɛ́ wunni,
ká rɩ́ dɩŋtenne má dɩlla nɩnɛ wɩ́ɛ́.
6 Ɛ́ mɛ́ nɛ́, rɩ nɛ́ŋ ná háá duse sɩ́ isi a ɓeri anɛ wɩ́ɛ́ma,
ká rɩ nɛ́ŋ fa há wɩ wɩ́ɛ́ bʋl, cáási satɔrɔ́.
Nyii sɩ́ pal gɩrbétéke sɩɛrʋ,
polcʋ́ɔ́rɛwa sɩ́ mɩŋ tíɓɩ́lɩ́ (pɩ́ŋpɩ́rkɔ́) sɩɛrʋ.
7 Tíé ná fa há hɩlɛ sɩ́ bɩ́rmɛ mʋʋ,
nyibúlsɩ́ɛ́ sɩ́ póŋ dɩtɩ́llɛ ná fa há kéŋ nyinyʋ́ɔ́sɛ mɛ́.
Bakavasɛ dɩféŋsé mí, nyɔɔ sɩ́ nɛ Fuonyɔ́ɔ́ rɩ́wɔ́ duó wuu.
8 Ɓa lɩ́sɛ ŋmɛ́nɔ ráŋ,
rɩ́wɔ́ kaá yɩrɛ “ŋmɛ́nɔ ná há ká Wɩɩsɛ tɩ́llɛ́”.
Busunnu nɛ́ŋ wuu wɩ ráŋ tɩ́ŋ,
(Wɩɩsɛ nɩtɩ́llɛ́ dʋŋɔ nɛ́ sɩ́ tɩtɩ́ŋʋ́) beé wɩ́ɛ́, Nyuutɩna tɩɩ nɛ́ sɩ́ túúri ɛ́ ŋmɛ́nɔ,
nɩcʋ́llɛ wɩ ráŋ ko rɩ́ɩ́ tɛ́l.
9 Kɩ́ŋkáná wɩ ráŋ mɩ́ŋ,
ballɩbɔ́ŋ wuu wɩ ɛ́ ŋmɛ́nɔ pi,
ɓa oro wuu wʋ́ʋ́ tɩŋ.
Wɩɩsɛ nɩtɩ́llɛ́ nɛ́ sɩ́ tɩ́tɩ́ŋ ɛ́ ŋmɛ́nɔ.
10 Nyuutɩna Wɩɩsɛ há yɔ́wɛ́ la nɩɛ ná sɩ́ bɩ́rko,
ɓa sɩ́ cáási satɔrɩ́cáásé a bɩ́rko Sɩɔŋ.
Satɔrɔ́ ná há waá tenni nɛ́ sɩ́ mɩŋwɔ́ sɩ́ɛ́ mɛ́.
Tɛŋpɔ́rɔ́ arɩ́ satɔrɔ́ nɛ́ sɩ́ céŋwó
ká rɩ sazɔkɔ́ arɩ́ sɩ́zúko sɩ́ nyɩ́ɩ́kɛ.