Dúníé nɩɛ wuu sarɩ́ya díí wɩ́ɛ́
34
1 Duówa nɩɛ, ɩ́ pérí a zesi, nɩ́ɛ́wa, ɩ́ ka dɩllɛ.Rɩ tíé arɩ́rʋ́ daha onni má wuu zesi,
rɩ dúníé arɩ́rʋ́ tɩ́llɛ́ má wuu zesi.
2 Nyuutɩna Wɩɩsɛ cɔ́wɩ́ɩ́lɔ́ cɛ́ duówa nɩɛ wuu mí ní,
ʋ cɔ́ɛ́ wɩ́wɔ́ lalyóóre wuu ní.
Ʋ sɩ́ zɔ́kwɔ́ wuu tenni,
ʋ sɩ́ tɩ́ksɩ́wɔ́.
3 Ɓa sɩ́ yówó sʋ́sɛ́ (lɛ́lɛ́) tá vɛ́ɛ́,
ɓa sʋ́sɛ́ sɔ́ŋ sɩ́ káálɛ dɩhɩ̃́ wuu,
ká rɩ́wɔ́ cɛ́llɛ pál lɛ́ pallɛ daha aá tuwi.
4 Baná nyúú onni wuu sɩ́ pɩ́sɛ náŋá mɛ́,
bána sɩ́ kʋ́ʋ́rɛ anɛ kɛŋgúmí,
ká rʋ́ʋ́ onni wuu ɓallɛ
anɛ ɛ́ ná viínyi rɩ́ pírpaarʋ
haá ɓallɛ.
Zɔkrʋ ɓɩzeno há zʋ́ Edoŋ wɩ́ɛ́
5 Nyuutɩna Wɩɩsɛ tókówí nyɔ́ cɛ́l buki bána nyúú,
sɩɛ́ nóú ní tuwi Edoŋ nyúú,
nɩɛ ná ʋ há vɔ́wɛ́ rʋ́ʋ́ zɔ́kwɔ́ tenni ɓóŋ nyúú.
6 Cɛ́l fo Nyuutɩna Wɩɩsɛ tókówí,
ʋ vɔkɛ nʋnnɛ,
pewiisi arɩ́ bʋŋgoŋsi cɛ́l ,
peɓallɛ cʋcowíé nʋnnɛ,
beé wɩ́ɛ́, vʋk'ɔsɔ́ mɩŋ Bɔsɩra mɛ́ Nyuutɩna Wɩɩsɛ yɩr mɛ́,
zɔkrʋ ɓɩzeno mɩŋ Edoŋ mí.
7 Ɛ́ tɛ́ŋ tɩɩ mɛ́ nɛ́ baka nɛsɛ,
rɩ́ naɓallɛ arɩ́ zakwala sɩ́ ɓallɛ:
cɛ́l sɩ́ súwó tɔ́ɔ́,
ká rɩ kúŋkulo nyɔ́ nʋʋ vɔkɛ.
8 Nyuutɩna Wɩɩsɛ tɛŋbuóro kal díí ní,
kɩtumu bɩna nɛ́, Sɩɔŋ yɩr mɛ́.
9 Edoŋ polcʋɔrɛ́wa sɩ́ bɩ́rmɛ gʋdʋrɔŋ dɩhɛ̃́,
ká rɩ́wɔ́ kúŋkulo a jírbi.
Ɛ́ tɔ́ɔ́ sɩ́ bɩ́rmɛ gʋdʋrɔŋ níŋ há kené,
10 ʋ waá dʋsɛ tɩ́taŋ, wɔhɔ má ɛ́ nɛ́,
nyʋ́ɔ́sɛ de i'isi déŋdéré:
ʋ sɩ́ a gɩrbétéke bɩna rɩ́ bɩna (a kaá mʋ́ wuu),
nɛ́ŋ waá a rʋ́ʋ́ tɩ́ŋ ráŋ abádá.
11 Ʋ sɩ́ a kuluku arɩ́ saalɩŋbɛ́sɛ́ dɩmɩnɩ́,
kulukbíno rɩ́ bʋŋga jaa.
Ɓa (Nyuutɩna Wɩɩsɛ) sɩ́ tɩ́ɛ́nɛ ŋmɛ́ŋ dɩwuoli mí,
arɩ́ butoluŋo sɩɛrʋ.
12 Nɩtaŋáwa baá wɩ ráŋ mɩŋ rɩɩ bil kuóro,
sɩ́dííre wuu sɩ́ nyɩ́ɩ́kɛ.
13 Sɔrɛ sɩ́ nyʋ́ʋ́ zekɛrsɛ sɩɛrʋ,
kaalɔ rɩ́ sɔkolli sɩ́ mɩ́nʋ́ ballɩ́ dɩhɛ̃́ ná.
Ráŋ sɩ́ a bakavasɛ dɩféŋse,
otirisiwa (maákabʋnnɛ) jɩɩsɛ nɛ́.
14 Gɩrbétéke balla (bakagbelé) sɩ́ céŋ naŋcewuriwa ráŋ,
bakabʋŋgboksi má sɩ́ yɩ́rɛ náŋá ráŋ.
Kaŋtɔŋ háálɔ ná yɩr há dí Lilite, má dɩmɩnɩ́ nɛ́:
ráŋ nɛ́ sɩ́ ɔ́ʋ́ dɩfɩ́ɛ́lɩ́.
15 Dʋŋ má dɩzʋ́ɩ́ sɩ́ mɩŋ ráŋ,
rʋ́ʋ́ lóú hala ráŋ a pɔ́ŋ,
a pɔ́wɔ́ rɩ́wɔ́ tíési.
Ráŋ nɛ́ dúúne má sɩ́ céŋ náŋá,
oro wuu rɩ́rʋ́ vallɩnɔ́ŋɔ.
Dúúne wɩ́ɛ́
16 Ɩ́ wulli Nyuutɩna Wɩɩsɛ kɛnɔ, a karmɛ:
«Balla nyáŋ oro wuu waá fuoli,
oro wuu wʋ́ʋ́ nɔ́ŋɔ jáá gúl,
beé wɩ́ɛ́, Nyuutɩna Wɩɩsɛ tɩɩ nʋɔ nɛ́ mákɛ ɛ́,
ʋ sabɩɩna nɛ́ sɩ́ héwó náŋá mɛ́.
17 Ʋ tɩɩ nɛ́ sɩ́ yó bíé, a makɛ nɛ́ŋ wuu kér pɔ́ʋ́,
ʋ nɛ́sɛ nɛ́ sɩ́ hé ŋmɛ́ŋ a ka tɔ́ɔ́ ná ɓaa pɔ́wɔ́.
Ɓa sɩ́ tɩ́llʋ́ a kaá mʋ́ wuu,
ɓa sɩ́ mɩŋ ráŋ bɩna rɩ́ bɩna.»