Tíé wuu zɔkɔ́
24
1 Ná Nyuutɩna ha zɔkɛ tíé, a ɓɩ́lʋ́ ɛ́,ʋ hé vúkme tíé nyúú,
ʋ ɔ́ɔ́ nɩɛ pɩ́sɛ náŋá mɛ́,
2 vʋ́k'ɔɔsɔ́ arɩ́ nɩyɔ́ɔ́,
nyúútɩ́na arɩ́rʋ́ tʋtʋnnɔ,
háála arɩ́rʋ́ hátʋtʋnnɔ,
nɛ́ŋ ná háá yɛ́llɛ́ arɩ́ nɛ́ŋ ná háá yɔ́wɛ́,
nɛrɔ ná háá pɛ́ɛ́ arɩ́ nɛrɔ ná há lɛ́ɛ́,
nɛrɔ ná háá hé kɩ́ma arɩ́ kɩ́ŋkɩ́ŋdííro.
3 Tíé wuu sɩ́ zɔ́kɛ,
a cáásɛ zɔ́kɛ ɓóŋ,
anɛ ɛ́ Nyuutɩna há bʋlɛ́.
4 Tíé mɩŋ yúó mí, ʋ ɓɩ́lɛ́ ná wɩ́ɛ́,
dúníé wuu ní zɔ́kɛ, ʋ ɓɩ́lɛ́ ná wɩ́ɛ́,
zɔkrʋ peri tíé nyúú nɩpiŋe.
5 Tíé zʋ busunnu a tɩ́ŋ nɩbííne ná há mɩ́nʋ́ daha,
beé wɩ́ɛ́, ɓa zɔkɛ wɩ́bile,
ɓa kéŋ wɩ́makɛ́ bɩ́rɛ,
ɓa zɔkɛ nʋtʋmɛ dɩŋɛ ná.
6 Ɛ́ nɛ́ sɩɛ́ tɛ bʋra dí tíé,
nɩɛ ná ha mɩ́nʋ́ daha nɛ́ sɩɛ́ dúú wɩɩla.
Ɛ́ nɛ́ tɛ níŋ ka tíé nyúú nɩɛ,
ɓa mʋɔ́ dʋŋɔ́ nɛ́ káánɛ́.
Tɔ́ɔ́ zɔ́kɔ́: sɩ́ŋ baá tóó, satɔrɔ́ má tóó
7 Viínyi tuu hɩ́lɔ́ (káásɔ́), yúó ní a pá dɩvɛ́ŋfɛlɛ,
hííne ní a pá nɩɛ ná wuu sɩɛnnɛ há tɔ́rɛ́.
8 Béŋtérsi satɔ́ɔ́rɩdɔ́mɛ́ siklo,
caŋdííre kʋ́ɔ́llɛ nyɔ́ ráŋ,
cémó tɛŋpɔ́ɔ́rɩliŋó siklo.
9 Ɓa báá wɩ sɩ́ŋ nyɔ́ɛ́ kaá yɩ yɩ́ɩ́la,
sɩ́dúóru háákɔ sɩ́nyɔ́ɔ́ra nʋʋsɛ mɛ́.
10 Tɔ́ɓó yɛ́rkɔ́,
jɩɩsɛ wuu dánʋʋsɛ tɔ́ɔ́, nɛ́ŋ báá wɩ ráŋ zʋ.
11 Ŋmɛ́ŋsɛ sɩɛnnɛ, dɩvɛ́ŋ nɛ́ ɓaá já,
tɛŋpɔrɔ́ mʋɔ́ má báá tóó,
satɔrɔ́ to tɔ́ɔ́ sɩɛrʋ.
12 Sazɔkɔ́ dʋŋɔ́ nɛ́ káánɛ́ tɔ́ɔ́ sɩɛrʋ,
ká dánnʋɔ má kɔ́sɛ, a zɔkɛ.
13 Bee wɩ́ɛ́, tɔ́ɔ́ ná mɛ́, nɩɛ sɩɛrʋ,
ʋ nɩhɩ̃́ tɛ́ŋ ná mɛ́,
ɓa ha ɓɔrɛ olííviwa tenni,
ɓa ha kúúni ɛ́llɛ́wa a tenni ní.
Dúníé nɩɛ wuu (búúró a) jʋ́ɔ́sɛ́
14 Ɛ́ nɩɛ ɓɔ́wɔ́ líŋsi,
aá cáási satɔ́ɔ́rɩcááse;
a cáási rɩ́ tɛŋpɔrɔ́ wɩɩsɛ dɩzʋʋlɩ́ mɛ́,
Nyuutɩna píŋ ná yɩr mɛ́.
15 Ɩ́ píŋsi Nyuutɩna Wɩɩsɛ ráŋ ná pʋmmɔ há cáánɛ́,
tɔ́nɛ ná mʋʋ há kile, ɩ́ píŋsi Nyuutɩna Wɩɩsɛ, Ɩzɩrayɛl Wɩɩsɛ.
16 Á nɛ gɔ́kɩ́ háá ísí dúníé tókó mí:
«Taŋá tɩ́na nɛ́ tɛ́ hʋ̃́ʋ̃́ma!»
Dúníé wuu vúkme wɩ́ɛ́
Amá ŋ sɛ́: Ŋ yʋ́ksɔ, ŋ yʋ́ksɔ.
Nyúbɔ́ŋ péríŋ!
Gɩ́ŋgɩ́rmɩ́tɩ́ɩ́na (zaŋbátɩ́ɩ́na) tʋ́ŋ gɩ́ŋgɩ́rmɔ.
Gɩ́ŋgɩ́rmɔ! Gɩ́ŋgɩ́rmɩ́tɩ́ɩ́na tʋ́ŋ gɩ́ŋgɩ́rmɔ.
17 Tíé nɩɛ, héwíŋ rɩ́ butuo
arɩ́ bara (fiile) nɛ́ a pɛ́ɩ́wa.
18 Héwíŋ ha sɩ́ ká nɛ́ŋ ná rʋ́ʋ́ fa,
sɩ́ ɓal butuo sɩɛrʋ,
nɛ́ŋ ná ha sɩ́ lɛ́ butuo sɩɛrʋ
sɩ́ zʋ bara sɩɛrʋ. wɩ́ɛ́, bána víísewa wúnnó,
tíé mʋ́bíló nɩ́ɩ́ váklɛ́.
19 Tíé yɛ́lɔ́,
tíé pómó,
ʋ cáásɔ́ aá vaklɛ.
20 Tíé níí zííke anɛ sɩ́nyɔ́ɔ́rɔ,
ʋ nɩ́ɩ́ víŋse anɛ lɔ́k.
Ʋ wɩ́bɔmɔ nɛ́ nyaŋŋʋ,
ʋ ɓál, ká báá wɩ wúó isi.
21 Ɛ́ kal bána nyúú, Nyuutɩna
sɩ́ ísí a cɛ́ bána nyúú lalyóóre mí,
ká tíé má nyúú, rʋ́ʋ́ cɛ́ tíé kuóre mí.
22 Ɓa sɩ́ nyáŋ náŋá mɛ́ anɛ bɩnajaa nɩɛ buo sɩɛrʋ,
ɓa sɩ́ zʋ bɩnajaa,
a dáánɛ, ká ɛ́ har mɛ́, ɓa mɔhɔ̃́ rɩ́wɔ́ bíl nʋʋsɛ.
23 Cana sɩ́ dí hɩ́ɩ̃sɛ,
wɩpomí sɩ́ vúkmi.
Bee wɩ́ɛ́, Nyuutɩna, Doewuutɩna
nɛ́ ká kuóro Sɩɔŋ paalɔ́ mɛ́ arɩ́ Zerizaɛmɛ mɛ́.
Ʋ píŋ sɩ́ nyɩ́ɩ́sɛ nɩhɩ́ɛ̃́sɛ sɩ́ɩ́ mɛ́.