Nyuutɩna Wɩɩsɛ nɛ́ ká pʋɔla dɩyuóli
25
1 Nyuutɩna, ɩ nɛ́ káŋ Wɩɩsɛ,ŋ sɩ́ píŋsí, ŋ sɩ́ dɛ́nnɩ́ yɩr,
bee wɩ́ɛ́, ɩ tʋ́ŋ tʋtʋ́ŋzéŋse,
ɩ fa háá bɩ́ɩ́nɩ́wɔ́ wɩ́ɛ́ fól wuu,
a tá ká ɓa wɩ gire.
2 Ɩ ɔ́ɔ́ tɔ́ɔ́ ná bɩ́rmɛ dɔ́wɩ́púúle,
tɔ́ɔ́ ná há sɔ́ɛ́ a kɛ́rɛ bɩ́rmɛ baka ná há zɔ́kɛ́.
Nɩhʋɔra bállɩ́ dɩhɩ̃́ ná báá to tɔ́ɔ́,
nɛ́ŋ báá wáá bɩ́rsɔ́ʋ́.
3 Ɛ́ nɛ́ tɛ duó ná há kéŋ dóé, ʋʋ́ píŋsí,
dúówa ná nɩɛ háá fɔ́wɔ́ (bɩbára tɔ́ɔ́ fɛ́ɩ́), ɓa tɔ́ɔ́ nɩɛ má fɛ́ɩ́.
4 Beé wɩ́ɛ́, ɩ nɛ́ ká pʋ́ɔ́la zekɛ́rɛ,
ɩ nɛ́ ka nɛ́múrtɩ́ɩ́nɔ́ há mɩŋ sazɔkɔ́ sɩɛrʋ zekɛ́rɛ,
ɩ nɛ́ ka dɩyúóli dópoo tɛ́ŋ mɛ́,
ɩ nɛ́ ká fɩ́ɛ́l aá kɛ́rɛ lʋ́mɔ́ mɛ́
beé wɩ́ɛ́, bɩbára mɩŋgbelwie poo nɩhɩ̃́
dópoo ha ísé a cɛ́ zekume mí ní,
5 anɛ tíhɩ́lɩ́ lʋ́mɔ́ nɛ́.
Ɩ nɩ́ɩ́ a nɩhʋ́ɔ́ra sikli,
anɛ dóbána fɩ́ɛ́l háá a lʋ́mɔ́ cɛ́ ɛ́,
ɩ nɩ́ɩ́ tɔ́ bɩbára nyɩ́sɛ líŋsi mí.
Dúówa wuu cana díí wɩ́ɛ́
6 Nyuutɩna, Doe wuu tɩna sɩ́ dí cana,
paalɔ́ né daha
a pá duówa wuu nɩɛ,
namɩ́ŋsɛ ná ha kéŋ nʋnnɛ arɩ́ sɩ́bɩ́nɛ́wa
sɩ́ mɩ́ŋ ɛ́ cana mɛ́,
namɩ́ŋsɛ ná há kéŋ nʋʋ ká pɔrɛ má
arɩ́ sɩ́bɩ́nɛ́wa ná há wɩ busunnu kéné.
7 Ɛ́ paalɔ́ daha,
nyútɔ́lɔ́ ná há tɔ́ nɩɛ wuu mɛ́,
gɛrɔ ná há mʋ́ɔ́lɛ dúówa wuu mɛ́ sɩ́ nyɩ́ɩ́kɛ.
8 Ʋ sɩ́ a, rɩ sʋ́ʋ́ nyɩ́ɩ́kɛ a kaá mʋ́ wuu.
Nyuutɩna Wɩɩsɛ sɩ́ mʋ́ʋ́rɛ nɩɛ wuu sɩ́ɛ́ sɩ́mɩnnɛ
ká lɩ́sʋ́ nɩɛ hɩ́ɩ̃́sɛ mɛ́, tɔ́ɔ́ ná wuu sɩɛrʋ.
Nyuutɩna nɛ́ bʋl ɛ́.
Mʋwabɛ hɩ́ɩ̃́sɛ wɩ́ɛ́
9 Ɛ́ kal, ɓa sɩ́ bʋlɛ́: Ʋ nɛ́ kárá Wɩɩsɛ.
Áá yɩ́ɛ́lʋ́ nɛ́, ʋ sɩ́ la ráá tá.
Ʋ nɛ́ ká Nyuutɩna ná á háá yɩ́ɛ́lɛ́.
Á warɛ (a tɛŋpɔ́rɔ́), á jʋ́ɔ́sɛ ʋ há lárá tá wɩ́ɛ́.
10 Bee wɩ́ɛ́, Nyuutɩna nɛ́sɛ sɩ́ mɩŋ ɛ́ paalɔ́ daha.
Ɓa sɩ́ tɩ́ksɛ Mʋwabɛ buk ná mɛ́,
anɛ ɛ́ ɓa háá nyʋ́ksɛ nyɔ́ɔ́ a hé kɔrɔ bʋɔ sɩɛrʋ.
11 Ráŋ nɛ́ sɩɛ́ rʋ́ʋ́ tɩ́ɛ́nʋ́ nɛ́ŋsa
anɛ ɛ́ nɛ́ŋ ná háá hɛkɛ́ háá tɩ́ɛ́nɛ nɛ́ŋsa kaá hɛkɛ.
Nyuutɩna sɩ́ a rʋ́ʋ́ nyʋ́kɔ́ nyɔ́ ráŋ
arɩ́rʋ́ nɛ́ŋsa loo ná wuu.
12 Ɩ́ zekɛ́rɛ ná há kɛ́ɩ́ bállɩ́ dɩhɩ̃́,
Nyuutɩna sɩ́ gínníwó, a yɛ́rkɩ́wɔ́,
rɩ́wɔ́ rɩ́ tíé mɔ́ náŋá, a pɛ́ kúŋkulo sɩɛrʋ.