Pɔ́ɩ́ tɩɩ mɛ́ Zerizalɛmɛ
22
1 Sarɩ́ya liŋó ná há tɩ́ɩ́nɛ “wɩ́náálɛ́ polo mí”.Beé rí tɛ, ɩ rɩ́rɩ́ɩ́ nɩɛ wuu
zɩ lúŋse daha,
2 ɩ é, tɔ́ɔ́ ná há kéŋ kʋ́ɔ́llɛ, dɔ́mɛ sú dɩhɩ̃́ wuu, a a tɔ́ɔ́ ná há mɩ́ŋ satɔ́rɩscááse mí>>
Ɩ sʋsɛ tó tókówi sʋsɛ,
ɩ nɩɛ waá arɩ́wɔ́ sʋ́sɛ lal mɛ́ nɛ́.
3 Ɩ nɩhɩ́ɛ̃́sɛ wuu hé náŋá a fá;
túyoore kɛ́sɩ́wɔ́ ɓa bɩnajaa nɩɛ.
Ɩ nɩɛ ná wuu hé náŋá mɛ́,
a a bɩnajaa nɩɛ,
tɛ́ŋ ná mɛ́ ɓa fa há fɛ́ɛ́ aá mʋ́ dɩbolí.
4 Ɛ́ nɛ́ tɛ ŋ bʋl pɛ́ɩ́wa:
«Ɩ́ lɩ́sɩ́wa sɩ́ɛ́ ká táŋ,
ɩ́ ló rɩ́ŋ caasɛ wí;
ɩ́ sɩ́ háárɛ bʋɔlɩ́ŋ (rɩ́ŋ táŋŋɩ́ŋ nʋɔ)
ká rɩ́ŋ wi
zɔ́krʋ ná há pú toló ná, ŋ dunɩɛ wɩ́ɛ́.
5 Beé wɩ́ɛ́, kal ná Nyuutɩna Wɩɩsɛ,
Doewuutɩna Wɩɩsɛ
há yíkí vúkme
rɩ́ yeŋŋe arɩ́ héwíŋ a hé
wɩ́naalɛ́ polo mí:
Zéŋ ɓálɔ,
ká ɓa búŋsi a acaasɛ paalɔ.
6 Elamɛ sójiwa láálɛ húúno:
ʋ lalyóóre zʋ́ lalyóóritórkowa,
arɩ́rʋ́ zakzɩnna aá vá,
Kiir sóójiwa
hɔ́kɛ́rɛ́ mɩ́ŋwɔ́ nɛ́ŋsa mɛ́.
7 Zerizalɛmɛ, lalyóóritórkowa
súí polli sɩɛrʋ ɓɩwéré,
ká zákzɩnna cɩ́nɩ́ tɔ́ɔ́ dánnʋ́ɔ́ mɛ́,
8 Ziida baá wɩ kɛ́rɛ kéné.
Ɛ́ kal, ɩ́ bɩ́rɩ́ɩ́wa sɩ́ɛ́
a caasɛ laala ná há pú
jaa ná ɓa haá yɩ́rɛ“Kʋkɔrɔ jaa”.
9 Ɩ́ ná gbelkana ná
há mɩ́ŋ Davidi tɔ́ɔ́ mɛ́,
ɩ́ kɛ́rɛ nyii tá mʋ́l rɩ́ nyibʋɔnnɛ sɩɛrʋ,
rɩɩ́wa cákɩ́wa tɩɩ,
10 ɩ́ dɩ́ɩ́sɛ Zerizalɛmɛ jɩɩsɛ,
ɩ́ zɔ́kɛ jɩɩsɛ
a makɛ́ rɩ́ zekɛ́rɛ ná ká dóé.
11 Ɩ́ sɔ́ nyibʋɔ
zeŋe ná bɛllɛ pɛ́kɛ́
a makɛ rɩ nyibɔbɩnɛ́ nyii ná zʋ́ ráŋ.
Amá ɩ́ wɩ́ɩ́wa sɩ́ɛ́ bɩrɛ a caasɛ
nɛrɔ ná há a wɩ́ɛ́ nyáŋ wuu;
ɩ́ wɩ nɛ́ŋ ná há a wɩ́ɛ́ nyáŋ fól wuu bele.
12 Ɛ́ kal, Nyuutɩna Wɩɩsɛ, Doewuutɩna
fa sɩ́ɩ́wa wí, a hííni,
a kɩ́ɩ́rɩ́wa nyúnni, a láálɛ jɔ́rɛ,
13 amá, ɛ́ ráá tóó, satɔrɔ́ arɩ́ jʋ́ɔ́sɛ́ nɛ́ fa:
ɓa ɓʋ́ʋ́sɛ pʋzeŋsi,
a ɓʋ́ʋ́sɛ pʋwɩ́ɛ́la,
a dí namɩŋsa,
a nyɔ́ dɩvɛ́ŋ:
«Á dí ká nyɔ́,
beé wɩ́ɛ́ á cíé sɩ́ sʋsɛ.»
14 Nyuutɩna Wɩɩsɛ, Doewuutɩna máŋsɛ
wɩ́féŋsi né páŋ:
«Ɩ́ wɩ wɩ́bɔmɔ né suúri ná ábádá,
rɩ́ɩ́wa sʋʋ har mɛ́ rá.
Nyuutɩna Wɩɩsɛ, Doewuutɩna
nɛ́ bʋl ɛ́.
Tʋtʋnnɩhɔ̃́ Sebna mɔhɔ̃́ rʋ́ʋ́ pɔ́ʋ́ tɩɩ mɛ́
15 Ná Nyuutɩna Wɩɩsɛ,
Doewuutɩna há sʋ́ʋ́ ná:
«Mʋ́ a ná tʋtʋnnɩhɔ̃́ Sebna
há ká kuóro zʋ́ɔ́ nɔhɔ̃́,
a bʋ́lʋ́ rɩ́ a bʋlɛ́:
16 Ɩ kéŋ tɩ́llɛ́ rɛ́ rɛɛ́>>
Ɩ kéŋ áŋbii rí rɛ́ɛ́>>
A mɔ́ rɩ́ɩ́ lúí lɛlbule rɛ́ɛ́wa>>
A lú lɛlbule ráŋ ná há ísé mí, (paalɔ daha)
a lɛ́sɛ dɩpɩ́nɛ bʋ́ɩ́ sɩɛrʋ.
17 Ɛ́ wɩ́ɛ́, Nyuutɩna sɩ́ yóí tá dɩbolí,
ʋ sɩ́ gúŋsi hé naŋá mɛ́
18 a víkí rɩ́ɩ́ mʋ́ ɓal a billi
anɛ oŋgígili
tɔ́ɔ́ ná há jɛ́lɔ́ sɩɛrʋ.
Ráŋ nɛ́ rɩ́ɩ́ sʋwɛ,
ɩ rɩ́rɩ́ɩ́ lalyóóritórkowa ná há pɛ́ɩ́ yɩr,
ɩ é nɛ́ŋ ná há hɩ̃́ɩ̃́sɩ́nyúútɩna jaa (yɩ́rɛ yɔ́ɔ́)!
19 Ŋ sɩ́ kírí ɩ dɩmɩnɩ́ mɛ́,
ŋ sɩ́ lɩ́sɩ́ ɩ dɩtʋmɩ́ mɛ́.
20 Ɛ́ kal, ŋ sɩ́ yɩ́rɩ́ŋ tʋtʋnnɔ
Eliyakimi, há ká Hilikia bio.
21 Ŋ sɩ́ súí tʋtʋnnɩgɛrɔ a pɔ́ʋ́,
a píí vɔ́wɛ́, a vɔwɛ pɔ́ʋ́,
ŋ sɩ́ píí tíŋ a hóú nɛ́sɛ mɛ́.
Ʋ sɩ́ a Zerizalɛmɛ nɩɛ,
arɩ́ Ziida jaa áná.
22 Ŋ sɩ́ pi Davidi kuózʋ́ɔ́ borwii hóú nɛ́sɛ mɛ́ (pɔ́ʋ́).
Rʋ́ʋ́ nɛ́ wuri dánʋɔ,
nɛ́ŋ tó aá tɔ́,
ká rʋ́ʋ́ nɛ́ tɔ́ɛ́,
nɛ́ŋ tó aá wúri.
23 Ŋ sɩ́ cɔ́ŋsʋ́ anɛ dapé
dɩhɩ̃́ ná há duóko mí.
Ʋ nɛ́ sɩ́ kuóɓasa ná há kéŋ yɩr a pɔ́ʋ́ jaa.»
24 Óŋ na wuu há kéŋ píŋ a pɔ́ʋ́ jaa nɩɛ sɩ́ ko cɛ́, híllí ɓɩzeŋse arɩ́ ɓɩwɩ́ɛ́la, anɛ hállɩ́cɩ́ksɛ, gbaŋjɛlɛ arɩ́ keŋyúúsi duo wuu. 25 Dácáksɛ ná sɩ́ ɓal kal nɔ́ŋɔ. Nyuutɩna Wɩɩsɛ ná há ka Doewuutɩna nɛ́ bʋ́l ɛ́. Ɓa sɩ́ curi dápé ná ɓa fa há cɔ́ŋsɛ dɩhɩ̃́ ná há duóko mí, a bórú, rʋ́ʋ́ ɓal, ká rɩ́ cɩka ná wuu fa há sákʋ́ mɛ́ yɛ́rkɛ. Nyuutɩna Wɩɩsɛ nɛ́ sɛ́.