Daviidi fɛ́lɔ́
11
1 Zeese múkur ná sɩ́ ɓá kéŋ,ʋ nalúrsi sɩ́ pó hile.
2 Nyuutɩna Wɩɩsɛ Sabɩɩna
sɩ́ mɩnʋ́ mɛ́,
sabɩɩna ná háá pá zɩmɛ́ arɩ́ wɩ́zɩŋ,
sabɩɩna ná háá pá wɩ́ɛ́ caksɛ lɩ́sɛ́ arɩ́ ballɩ́,
sabɩɩna ná háá
pá wɩ́ɛ́ zɩmɛ́ arɩ́ Nyuutɩna Wɩɩsɛ héwífɔ́ɔ́.
3 Ʋ sɩ́ híhiẽsi Nyuutɩna Wɩɩsɛ héwífɔ́ɔ́ sɩɛʋ.
Ʋ wɩ sɩ́ɩ́ nóú sarɩ́yá dí,
ʋ wɩ dɩllɩnɩ́ɔ́ wɩ́bʋ́l bʋl.
4 Amá ʋ sɩ́ dí nɛ́múrtɩɩna sarɩ́ya arɩ́ taŋá,
a cɛ́ tɔ́ɔ́ summe har arɩ́ taŋá.
Ʋ wɩ́bʋ́l sɩ́ ŋmɔwɛ tɔ́ɔ́ nɩɛ
anɛ deŋduke.
Ʋ nʋɔ poo sɩ́ ɓʋ́ nɩbɔmɔ.
5 Taŋá nɛ́ sɩ́ ɔ́ɔ́ tɩŋa vɔ́wɛ́,
ká rɩ́ cɩtɩkɛ́ (tékétéké) ɔ́ʋ́ ɓara ŋmɛ́ŋ.
Náŋcéwúri rɩ́ piẽso sɩ́ cɔ dɩbalá
6 Náŋcéwúri arɩ́ pewie cɔ́ dɩbalá,
ɓee arɩ́ bʋwie sɩ́ tʋŋ dɩpɩnɛ́ mɛ́.
Nɔɓalwie rɩ́ kɩ́ŋkáŋɓʋ́ɔ́l
arɩ́ pʋsɛ ná há vʋ́ɛ́ sɩ́ hé náŋá mɛ́,
ká rɩ́ heŋbólwie nɩ́nʋ́ɔ́lɩ́wɔ́ (káŋwɔ́ aá va).
7 Nɔmaá rɩ́ ''ursi'' sɩ́ tʋŋ ɓɩdííli mɛ́,
ɓa bɛlɛ sɩ́ pɛ́ dɩbalá.
Kɩ́ŋkáná sɩ́ dí nyɔ́ɔ́ anɛ nɔɔ.
8 Bipʋlɛ́ sɩ́ gbe gberu bɔsɔ dɩpɩnɛ,
ká rɩ bio ná há tá ɩ́l púú nɛ́sɛ
a hé dʋɓókó bʋɔ sɩɛrʋ.
9 Nyuutɩna Wɩɩsɛ paalɔ́ ná wuu nyúú,
bɔ́ŋbɔ́ŋ waá mɩŋ, zɔ́krʋ́ waá mɩŋ,
bee wɩ́ɛ́, Nyuutɩna Wɩɩsɛ ɩ́ɩ̃́ sɩ́ sú tɔ́ɔ́ ná
anɛ ɛ́ nyii haá sú mʋʋ.
Ɩzɩrayɛl nɩkírtáálɛ (Yosi, nɩkɛ́sɛ́) bɩrkóé wɩ́ɛ́
10 Ɛ́ kal, Zeese dunɛrɔ ná
sɩ́ ísí anɛ dirapo
a pá dúníé nɩɛ.
Duówa nɩɛ sɩ́ jɔ́ʋ́
ʋ dɩfɩ́ɛ́lɩ́ sɩ́ ká píŋ.
11 Ɛ́ kal,
Nyuutɩna Wɩɩsɛ baá sɩ́ tɛ́rʋ́ nɛ́sɛ, bʋllɛ nyúú mí,
a yɔwɛ a lɔ́ʋ́ nɩkaanɛ,
ná há kéŋ mɩɩsɛ
a mɩŋ Asiiri mí rɩ́ Ezipiti mí,
rɩ́ Patɔɔsɛ rɩ́ Kuusi mí,
rɩ́ Elaŋ rɩ́ Sineyaarɛ mɛ́,
rɩ́ Hamatɛ mí
arɩ́ mʋʋ sɩɛrʋ tɔ́nɛ mɛ́.
12 Ʋ sɩ́ cɔ́ŋsɛ nyɩnɛ
a pá duówa,
ʋ sɩ́ a rɩ́ Ɩzɩrayɛl nɩkɛ́sɛ́ hé náŋá mɛ́
ká a rɩ́ Ziide nɩɛ ná há ɓɛ́sɛ́
a mɩŋ dúníé saŋkere baná mɛ́
rɩ́wɔ́ bɩr céŋ náŋá.
13 Ɩfɩrayɩŋ banɔnnɩ́ sɩ́ tenni,
Ziida dɩŋdɔma sɩ́ nyɩ́ɩ́kɛ.
Ɩfɩrayɩŋ báá wɩ banɔnnɩ́ dí Ziida rɩ́,
Ziida báá wɩ Ɩfɩrayɩŋ mɩ́ɩ́ cɛ́.
14 Ɓa sɩ́ hé náŋá mɛ́,
a mʋ́ wɩɩsɛ dɩzʋ́ɩ́, a zɩ Filisiti nɩɛ pallɛ daha (a yówó),
ɓa sɩ́ mʋ́ wɩɩsɛ dɩpomí, a píési nɩɛ ná há mɩŋ ráŋ ɓɩɛ́,
ɓa sɩ́ dí dóé Edoŋ rɩ́ Mʋwabɛ nɩɛ nyúú,
Amɔŋ nɩɛ sɩ́ múúríwó tɩɩ pɔ́ʋ́.
15 Nyuutɩna Wɩɩsɛ sɩ́ a
rɩ́ Ezipiti mʋʋ naa ná nyii hʋ̃́ʋ̃́sɛ:
Ʋ nɛ́sɛ sɩ́ cɛ́ Ɩfɩratɛ fuo mí
a tɩ́ŋʋ́ poo dóé mí,
ʋ sɩ́ ŋmɔ́wʋ́ rʋ́ʋ́ cáksɛ nyipalnaasɛ balpɛ,
rɩ́wɔ́ vɩ́a ráŋ rɩ́ nɔtɔ́ɔ́sɛ (píílakwa, caaléwétɩwa, nɔtɔ́wɛgbɛllɛ) nɩɛ wólli tɩŋ aá daarɛ.
16 Ŋmɛ́nɔ sɩ́ mɩŋ
a pɔ́ʋ́ nɩkáánɛ ná
há sɩ́ ka mɩɩsɛ a mɩ́ŋ Asiiri mí,
anɛ ɛ́ Ɩzɩrayɛl nɩɛ díé há ná ŋmɛ́nɔ,
ɓa Ezipiti tíé lɩɩ tɛ́ŋ mɛ́.