9
1 Nɩɛ ná haá va tɩtáŋ,ná pʋmmɔ ɓɩzeno.
Nɩɛ ná fa há mɩŋ bino tɔ́ɔ́ sɩɛrʋ (tɔ́ɔ́ ná sʋʋ cúúno há mɩ́ŋ ráŋ),
pʋmmɔ cuólíwó.
2 Nyuutɩna Wɩɩsɛ, ɩ nɛ́ ɛ́ɛ́ duo ná púl (yʋkɛ)
ɩ nɛ́ pɔ́ʋ́ satɔrɔ́ ɓɩzeno.
Ɩ sɩ́ɛ́ nɛ́ ɓaá jʋ́ɔ́sɛ
anɛ ɛ́ ɓaá haá jʋ́ɔ́sɛ ɓɩɛ́ kʋ́sɛ́ tɛ́ŋ mɛ́,
anɛ ɛ́ ɓaá haá jʋ́ɔ́sɛ
lal ɓɩɛ́ ɓɛ́ɛ́ tɛ́ŋ mɛ́.
3 Bee wɩ́ɛ́, ɩ zɔkɛ
dabaasɩ́ ná fa há nyaŋwɔ́,
daa ná fa há sakwɔ́ vayíksi mí
dɩŋdɔmɔ naɓoko ná fa há dɔ́wɩ́wɔ́ mɛ́ dóé,
anɛ ɛ́ ɩ fa há zɔkɛ Madianitiwa.
4 Natɔ́wɔ́ ná wuu há nʋ́ɔ́sɛ tíé ʋ zikli,
kápóóti ná wuu há bɩrɛ cɛ́l,
sɩ́ a níŋ onni, rʋ́ʋ́ dí.
5 Bee wɩ́ɛ́, ɓa lʋ́l bio párá,
ɓa párá heŋbóle.
Ɓa pí tíŋ pɔ́ʋ́.
Baá yɩ́rʋ́:
Cɩ́cáánɩwero,
Wɩɩsɛ ná há dúókó,
Áná ná há mɩnɛ́ wuu,
Tɛŋfɩ́ɛ́l kuóbio.
6 Ʋ sɩ́ jɛ́llʋ́ (tɩ́ɛ́nʋ́) tíŋ,
ká a rɩ́ tɛŋfɩ́ɛ́l mɩŋ a kaá mʋ́ wuu,
Davidi kuóɓasa arɩ́rʋ́
dɩtɩ́llɛ yɩr mɛ́.
Ʋ sɩ́ a yɛ́rɛ́ rɩ́ taŋá mɩ́ŋ, a dóé,
a pɔ́ nyɛ́ mɛ́ ká kaá mʋ́ wuu.
Nyuutɩna Wɩɩsɛ, Doewuutɩna
há bɩ́ɩ́nɛ́ rʋ́ʋ́ ɔ́ʋ́ ná,
ʋ colle ná há zeno yɩr mɛ́, ʋ nɛ́ ɛ́.
Nyuutɩna Wɩɩsɛ cɔ́ɛ́ wʋ́ʋ́ nɩɛ
7 Nyuutɩna bʋl wɩ́ɩ́ rɛ́
a cɛ́ Zakɔbɛ dunɩɛ mɛ́,
ʋ ɓál Ɩzɩrayɛl nɩɛ nyúú.
8 Dúníé wuu sɩ́ zɩŋ ɛ́ mɛ́,
Ɩfɩrayɩŋ dɩtɩ́llɛ arɩ́ Samari nɩɛ,
háá bʋlwɔ́ tɛŋpɔ́ɔ́rɛ wɩ́ɛ́ arɩ́ nyʋkɔ́ a bʋlɛ́:
ʋʋ́ bʋ́lʋ́ a bʋlɛ́:
9 «Warɛwa ɓallɔ́,
á sɩ́ pá dɔ́wɩ́cɔɔlɛ,
Ɓa conni sɩɩkomɔɔrɛ tuuni,
á sɩ́ cɔ́ŋsɛ sɛ́ɛ́dɩrɛ tuuni ɓa gbel mí.»
10 Nyuutɩna Wɩɩsɛ cɛ́ Ɩzɩrayɛl mɛ́,
ʋ pí dóé a pɔ́ʋ́ dɩŋdɔmɔ Rɩsɛŋ;
a yíkú dɩŋdɔma a hóú mí.
11 Sɩrɩɛŋwa mɩŋ wɩɩsɛ dɩpomí rɩ́
Fɩlɩstɛŋwa mɩŋ wɩɩsɛ dɩzʋ́ɩ́ rɩ́.
Ɓa sɩ́ dʋsɛ Ɩzɩrayɛl a cɔ́nnɛ.
Amá, arɩ́ ɛ́ wuu,
Nyuutɩna Wɩɩsɛ cɔ́ɛ́ wɩ pɔ́rɛ́,
kɔ́ʋ́ há tɛ́rʋ́ nɛ́sɛ a cɩ́wɔ́ mɛ́.
12 Ɛ́ nɛ́ Wɩɩsɛ fɩ́rʋ́ nɩɛ,
ká, arɩ́ ɛ́ má wuu, ɓa
há wɩ bɩrɛ kóú rɩ́,
ɓa wɩ Nyuutɩna Wɩɩsɛ, Doewuutɩna jɛ́ɛ́.
13 Ɛ́ nɛ́, kal balá,
Nyuutɩna Wɩɩsɛ coki Ɩzɩrayɛl nyúú arɩ́rʋ́ mudúŋ,
nɔhɔ̃́ arɩ́ sɩ́dííro, ɓa nɛ́ ká nyúú,
nyɩ́ɛ́rʋ wɩ́laabʋllɔ, ʋ nɛ́ ká mudúŋ.
15 Nɩɛ nyáŋ sɩ́dííre nɩ́ɩ́ tɛ́lwɔ́,
ɓa fa háá tɩ́ɛ́sɛ́ nɩɛ ná mɩ́ŋ zɔ́krʋ sɩɛrʋ.
16 Ɛ́ nɛ́ tɛ́ Nyuutɩna
wʋ́ɔ́ nɩpʋsɛ́ pii tá yɔ́ɔ́,
ʋ waá a rʋ́ʋ́ fɔ́wɔ́ bisíŋsi rɩ́wɔ́ yúháála susu.
Bee wɩ́ɛ́, ɓa wuu ká taŋátówa (vɛ́ Wɩɩsɛ) arɩ́ wɩ́bɔ́ŋ'áára nɛ́;
ɓa nʋʋsɛ wɩ́bʋlɛ́ wuu ká nɩcʋlwɩ́ɛ́ nɛ́.
Amá, arɩ́ ɛ́ má wuu,
Nyuutɩna cɔ́ɛ́ wɩ pɔ́rɛ́,
kɔ́ʋ́ há tɛ́rʋ́ nɛ́sɛ a cɩ́wɔ́ mɛ́.
17 Bee wɩ́ɛ́, sɔhɔ nɩ́ɩ́ ka níŋ
aá dí sokólli rɩ́ cɛ́ɛ́wa,
a daarɛ ká gɩr pɩpapuksi,
ʋ nyʋ́ɔ́sɛ isi aá zɩ bána
anɛ povílmi.
18 Tɔ́ɔ́ kéŋ níŋ,
a tɩ́ŋ Nyuutɩna Wɩɩsɛ,
Doewuutɩna cɔwɩɩlɔ́ mɛ́.
Ʋ nɩɛ nɩhɩ̃́
namɩ́ɛ́ nɛ́ a pá níŋ.
Nɛ́ŋ wuu baá wʋ́ʋ́ maábinɔ́ŋɔ susú fa:
19 Ɓaá dí néduu rí,
ká losu há mɩŋ;
aá cɔnnɛ(caamɛ) nɛ́gʋ́ɔ́ rɩ́,
ká vɔkɛ́ too.
Nɛrɔ wuu dúú váámɔ namɩ́ɛ́ nɛ́:
20 Manase jɩmʋ́l
dídí Ɩfɩrayɩŋ,
ká Ɩfɩrayɩŋ má dídí Manase,
ɓa hé náŋá mɛ́ a cɛ́ Ziida mɛ́.
Amá, arɩ́ ɛ́ wuu,
Nyuutɩna Wɩɩsɛ cɔ́ɛ́ wɩ pɔ́rɛ́,
kɔ́ʋ́ ha tɛ́rʋ́ nɛ́sɛ a cɩ́wɔ́ mɛ́.