Lal ɓɩɛ́ tuóké
8
1 Nyuutɩna Wɩɩsɛ bʋ́lɩ́ŋ rɩ́ a bʋ́lɛ́: «Pi wɩɛ (hɔɔ ná háá kɩɛrɛ hɔrʋ naŋá), a pʋ́ŋsɛ wɩ́ɛ́ nyáŋ ɓɩzeŋse, dɔ́wɩ́pɛ́rsɛ zeno daha: Mahɛr-Salal-Haasɛ-Baazɛ“kɩ́kɩ́lɛ́-kuóɓɩɛ́-peri-pɛ́ɛ́.”» 2 Ɛ́ nɛ́ ŋ ka nɩtŋáwa (ɓa wɩ́ɛ́ há mɔhɛ̃́ laadí) a a dáŋsɩ́ɛ́. Ɓa nɛ́ ká vʋk'ɔɔsɔ́ Uuri, arɩ́ Yeberekiya bio Zakari. 3 Ŋ rɩ́rɩ́ŋ Wɩɩsɛ háwɩ́laabʋllɔ zʋ́ basa, ʋ ka puo, a lʋl heŋbóle. Ɛ́ nɛ́ Nyuutɩna Wɩɩsɛ bʋ́lɩ́ŋ rɩ́ a bʋ́lɛ́: «Hóú yɩr Mahɛr-Salaal-Haasɛ-Baazɛ, “kɩ́kɛ́lɛ́-kuóɓɩɛ́-peri-pɛ́ɛ́.” 4 Beé wɩ́ɛ́, ká rɩ́ bio ná zɩŋ "áná" ɛ́ rá má "maá" yɩ́rɛ́, ɓa ka kuóɓɩɛ́ ná ɓa há pɛ́ɛ́ Damaasɛ mɛ́ arɩ́ lal ɓɩɛ́ ná ɓa há pɛ́ɛ́ Samari mí, a kaá mʋ́ a pá Asiiri kuóro.»Asiiri bɩbarɩ́ díí wɩ́ɛ́
5 Nyuutɩna Wɩɩsɛ báá bʋ́lɩ́ŋ rɩ́ a bʋlɛ́:
6 «Nɩɛ nyáŋ vɛ́
Siluwe fuo nyii ná
háá pal bʋɔbʋɔ;
kaá jʋ́ɔ́sɛ Rɩsɛŋ arɩ́ Remaliya bio wɩ́ɛ́.
7 Ɛ́ nɛ́ tɛ́ Nyuutɩna Wɩɩsɛ sɩ́ a
rɩ́ Fonaa (Ɩfɩratɛ) nyikana ná, há kéŋ dóé
kówó mí.
Asiiri kuóro arɩ́rʋ́ píŋ wuu ní.
Ʋ (Ɩfɩratɛ) sɩ́ pɔ́ʋ́ sɩsɩɛnnʋwa mɛ́
ká sú a wáálɛ gíŋgíŋe wuu.
8 Ʋ sɩ́ tɔ́ Ziida mɛ́,
a waalɛ, a báánɛ, a zɩ́ yakɛ baŋ mɛ́.
Ʋ gíŋgíŋe nyii
sɩ́ waalɩ́ tɔ́ɔ́, Ɩmanʋwɛl.»
Wɩɩsɛ mɩ́ŋrá har
9 Duówa nɩɛ, ɩ́ vaklɛ,
rɩ́ héwíŋ zʋ́ɩ́wa!
Tɔ́nɛ ná há mɩŋ dúníé toko mí, ɩ́ pɔ́ ɓílíwa dɩlla.
Ɩ́ vɔ́sɩ́wa lal cɩksɛ, héwíŋ sɩ́ zʋ́ɩ́wa!
Ɩ́ vɔ́sɩ́wa lal cɩksɛ, héwíŋ sɩ́ zʋ́ɩ́wa.
10 Ɩ́ ŋmɔ́wɩ́ɩ́wa jáŋ,
ʋ sɩ́ cuori.
Ɩ́ bʋl wɩ́ɩ́,
ʋ nʋɔ vaá su,
beé wɩ́ɛ́, Ɩmanʋwɛl “Wɩɩsɛ mɩŋrá sɩsɩɛnnʋwa” mɩ́ŋrá har.
Nyuutɩna Wɩɩsɛ dʋŋɔ héwíŋ nɛ́ mɔhɛ̃́ rɩ́wa fa
11 Ná Nyuutɩna Wɩɩsɛ há sʋ́ʋ́ ná páŋ tɛ́ŋ ná mɛ́ ʋ nɛ́sɛ há kéníŋ, ká bʋ́lɩ́ŋ rɩ́, a bʋlɩ́ŋ sɩ́ nɩɛ nyáŋ ŋmɛ́nɔ ná tɩŋʋ́:
12 «Óŋ ná wuu ɛ́ nɩɛ há kené aá yɩrɛ zaŋba»,
ɩ́ é sʋ́ʋ́ ɛ́ ná yɩ́rʋ́,
óŋ ná ɓa haá fɛ́ɛ́, ɩ́ sʋ́ʋ́ fá,
ɩ́ sɩ́wɔ́ fá.»
13 Ɩ́ mɔhɔ̃́ rɩ́ɩ́wa zɩ́ŋ
rɩ́ Nyuutɩna Wɩɩsɛ, Doewuutɩna kɔ́ʋ́ dʋŋɔ rɛ́,
ʋ nɛ́ mɔhɛ̃́ rɩ́ɩ́wa fá,
ʋ héwíŋ nɛ́ mɔhɛ̃́ rʋ́ʋ́ kánɩ́wa.
14 Ʋ sɩ́ a dɩyuóli (dɩhɩ̃́ ná há kɔ́ʋ́ dʋŋɔ),
dɔ́wɩ́ ná há kéŋ wɩɩla,
arɩ́ bʋ́ɩ́ ná nɩɛ háá gɛ́rʋ́ mɛ́,
a pá Ɩzɩrayɛl jɩɩsɛ ná bɛllɛ.
Ʋ sɩ́ a vɔ́wɛ́ arɩ́ bará
a pá Zerizalɛmɛ nɩɛ.
15 Nɩkana sɩ́ gɛ́rʋ́ mɛ́,
a ɓallɛ, a pɩsɛ,
ɓa sɩ́ zʋ bará rʋ́ʋ́ kɛ́sɩ́wɔ́.
Wɩlaabʋllɔ dɛ́llɛ́ arɩ́rʋ́ yɩɛla wɩ́ɛ́
16 Pɔ́ sɩ́ɛ́da né mí, mallɛ wɩ́bilí né bílíŋ karmɩbɛlɛ sɩɛrʋ. 17 Ŋŋ́ dɛllɛ Nyuutɩna Wɩɩsɛ, há tɔ́ sɩ́ɛ́ Zakɔbɛ dunɩɛ nyúú ní; ŋ yɩɛla mɩ́nʋ́ rɩ́ nɛ́. 18 Ŋ tɩɩ arɩ́ bɛlɛ ná Nyuutɩna Wɩɩsɛ há páŋ, ká nyɩnɛwa arɩ́ mallawa nɛ́ Ɩzɩrayɛl mɛ́, a tɩŋ Nyuutɩna Wɩɩsɛ, Doewuutɩna há mɩŋ Sɩɔŋ paalɔ nyúú yɩr mɛ́.
19 Nɩɛ náŋa sɩ́: «Ɩ́ yɩrɛ lɛl nʋʋsɛ ná há múúle aá ná wɩ́ɛ́, a pɔrɛ liŋsi ká lʋɔrɛ (hũŋsi) aá bʋl wɩ́ɛ́. Nɩɛ wɩ mɔhɛ̃́ rɩ́wɔ́ bɔ́sɩ́wɔ́ wɩŋsa, a yɩ́rɛ lɛlɛ nʋʋsɛ nɩwomme wɩ́ɛ́>>» 20 Ɩ́ tɩŋ wɩ́bilí arɩ́ sɩ́ɛ́da mɛ́. Rɩ ɓa wɩ́bʋlɛ nɛ́ wɩ wɩ́ɛ́ nyáŋ mɛ́ tɩ́ɩ́nɛ, ɓa wɩ cɩcʋ́ɔ́ pʋmmɔ ná.
Nɛ́ŋ ná sɩ́ɩ́ há waá a rʋ́ʋ́ ná pʋmmɔ
21 Ɓa sɩ́ tɩŋ tɔ́ɔ́ ná sɩɛrʋ a daarɛ
bɔlɛ arɩ́ losu sɩ́ káŋwɔ́.
Losu sɩ́ zʋ́wɔ́ mɛ́,
rɩ́wɔ́ bʋr héwó kuóro arɩ́wɔ́ Wɩɩsɛ mɛ́.
Ɓa sɩ́ bɩ́rɛ bel bána rɩ́,
22 a bɩ́rɛ bel tíé má.
Ɓa há sɩ́ nóú ná nɛ́ ká sazɔkɔ́,
bino, bino ná há kéŋ wɩɩla,
arɩ́ caŋbino tɩ́ŋtɩ́ŋ sɩɛrʋ nɛ́ ɓa sɩ́ mɩ́ŋ.
Tɛŋfɩ́ɛ́l kuóbio wɩ́ɛ́
23 Amá bino wɩ tɔ́ɔ́ ná fa há mɩ́ŋ sazɔkɔ́ sɩɛrʋ mɩ́ɩ́ tɔ́ rɩ́ɩ́ kaá mʋ́ wuu.
Tésíé mí,
Nyuutɩna Wɩɩsɛ fa ɔ́ʋ́
Zabɩlɔŋ dɩtɩ́llɛ arɩ́ Nɛfɩtalɩ dɩtɩ́llɛ dí hɩ̃́ɩ̃́sɛ.
Amá cíé tápʋ́l,
ʋ sɩ́ a rɩ́ mʋʋ ŋmɛ́nɔ́,
rɩ́ tɔ́ɔ́ ná há mɩŋ Zʋrdɛŋ fuo wɩɩsɛ dɩpomí,
arɩ́ duówa dɩtɩ́llɛ,
yɩra lɛ́ (ná píŋ).