Nyuutɩna liŋó ná há mɔhɛ̃́ rʋ́ʋ́ peri kuóro Ahaazɛ
7
1 Ahaazɛ há ká Yotamɛ bio ká a Ozɩyaasɛ nɩhĩ́ nɛ́ fa ká Ziida kuóro. Ɛ́ tɛ́ŋ mɛ́ Siiri kuóro Rɩsɛŋ arɩ́ Ɩzɩrayɛl kuóro Peka há ká Remaliya bio, ko rɩ́wɔ́ yo Zerizalɛmɛ. Amá ɓa wɩ wólle dí dóé ʋ nyúú. 2 Ɓa bʋl Davidi jaa mɛ́, bʋlɛ́: Araamɛ (Siiri) nɩɛ cíkú púl Ɩfɩrayɩŋ dɩtɩ́llɛ mɛ́. Ɛ́ labaarɛ fúklú (kuóro Ahaazɛ) rɩ́rʋ́ nɩɛ beŋtunni anɛ poo há kéŋ tuuni a fúkli ɛ́.3 Ɛ́ nɛ́ Nyuutɩna Wɩɩsɛ bʋl Ezayi rɩ́ a bʋlɛ́: «Kánɩ́ bio Seyaaryasuubi lɛ́lɩ́ tɩɩ, rɩ́ɩ́wa mʋ́ Ahaazɛ rɩ́. Ʋ mɩŋ daha rɩ́ nyibʋɔ nyipalnaa nʋɔ rɩ́ nɛ́, kɛnʋɔsa dɩtʋmɩ́ ŋmɛ́nɔ́ mɛ́. 4 Ɩ sɩ́ bʋl pɔ́ʋ́ a bʋlɛ́: “Pɔ́ wérí! Kánɩ́ tɩɩ, a sɩ́ héwíŋ fá. Sɩ́ lo rɩ́ Siiri kuóro Rɩsɛŋ arɩ́ Remaliya bio cɔwɩɩlɩ́zeno ná fúklí beŋtu. Ɓa ká níŋdakulewa bɛllɛ nyʋɔsɛ háá lɩ́wɔ́ nʋʋsɛ mɛ́ nɛ́. 5 Ŋ ɩ́ɔ̃́ rɩ́ Siiri nɩɛ rɩ́ Ɩfɩrayɩŋ nɩɛ arɩ́ Remaliyahu kéŋ bɔ́ŋbɔ́ŋ aá jɛ́ɩ́. Ɓa sɛ́: 6 'Á cɛ́ Ziida mɛ́, a hé héwíŋ pɔ́ʋ́. Á zɔ́kʋ́ zekɛrɛ, rʋ́ʋ́ púú tɩɩ párá, ká ráá bil Taabeyɛl bio ráŋ, rʋ́ʋ́ ɔ́ʋ́ kuóro.' 7 Ná Nyuutɩna Wɩɩsɛ há sʋ́ʋ́ ná:
'Ɛ́ waá tʋŋ, ɛ́ waá bil.
8 Bee wɩ́ɛ́, Damaasɛ nɛ́ ká Siiri nyúú,
ká Rɩsɛŋ má a Damaasɛ nyúú.
A kaá mʋ́ bɩŋsɛ mɛɛ́sɩ́botoro rɩ́ bɔmmʋ́ɔ́,
rɩ́ Ɩfɩrayɩŋ zɔ́kɔ, ʋ nɛ́ŋ baá tó ráŋ.'
9 Bee wɩ́ɛ́, Samari ní ká Ɩfɩrayɩŋ nyúú (tɔ́zeno),
Remaliyahu bio ní ká kuór Samari nyúú.
Ɩ́ waá wollí mɩŋ
rɩɩ́wa nɛ́ wɩ Nyuutɩna Wɩɩsɛ lɛɛ dí.” »
Ɩmanʋwɛl lʋ́lɛ́ wɩ́ɛ́
10 Nyuutɩna Wɩɩsɛ báá bʋ́l Ahaazɛ rɩ́ a bʋlɛ́: 11 «Sʋ́l nyɩnɛ ná haá mákɛ́ rɩ́ Nyuutɩna Wɩɩsɛ, ɩ Wɩɩsɛ sɩ́ pɛ́ɩ́ mɛ́. Rʋ́ʋ́ pɛ́ɩ́ nyɩnɛ há sɩ́ lɛ́ dɩluŋó, lɛ́lɛ́tɔ́ɔ́ mɛ́, ɛ́ rá má nyúú rí, bána mɛ́.» 12 Ahaazɛ sɛ́: «Ŋ wɩ óŋ wuu sʋ́l; ŋ wɩ Nyuutɩna Wɩɩsɛ mɩ́lɛ́ ja.»
13 Ɛ́ nɛ́ Ezayi bʋ́lʋ́ rɩ́ a bʋlɛ́: «Davidi dunɩɛ, ɩ́ zesi. Ɩ́ haá bɔ́l nɩbííne ɛ́, ʋ ɛ́ wɩ mɔhɛ̃́ nɛ́ tɛ́, ɩ́ jɩ́já rɩ́wa bɔ́lɩ́ŋ Wɩɩsɛ má. 14 Ɛ́ wɩ́ɛ́, Nyuutɩna tɩɩ sɩ́ pɛ́ɩ́wa nyɩnɛ: Toopero ná há ha wɩ bál ɛ̃ sɩ́ ka puo, a lʋl heŋbóle. Ʋ sɩ́ yɩ́rʋ́ Ɩmanʋwɛl, “Wɩɩsɛ mɩ́ŋrá sɩ́sɩ́ɛ́nnʋ́wa”. 15 Nɛ́'ɩ́l nʋʋ arɩ́ tʋʋ nɛ́ sɩ́ dɩ́ɛ́sɛ bio ná, a kaá já tɛ́ŋ ná mɛ́, ʋ sɩ́ wólli vɛ́ bɔ́ŋbɔ́ŋ ká bɛ́llɛ pi wérí. 16 Ká rɩ́ heŋbólwie ná zɩŋ ko wólli vɛ́ bɔ́ŋbɔ́ŋ ká bɛ́llɛ pi aá pi wérí, kuóre ná bɛllɛ há kéŋ héwíŋ pɛ́ɩ́, dɩtɩ́llɛ sɩ́ a wúóli. 17 Nyuutɩna Wɩɩsɛ sɩ́ a rɩ́ tápʋlɛ́ ná ɓa há wʋ́ɔ́ néé ná, a púl tɛ́ŋ ná mɛ́ Ɩfɩrayɩŋ há cɔ́rʋ́ tɩɩ lɩ́sɛ Ziida mɛ́, nyɩ́ɩ́sɩ́ tɩɩ rɩ́rɩ́ɩ́ tɔ́ɔ́ nɩɛ arɩ́rɩ́ɩ́ áná jaa mɛ́. Asiiri kuóro ní.»
18 Ɛ́ kal, Nyuutɩna Wɩɩsɛ
sɩ́ fuoli yɩ́rɛ naŋcʋʋsɛ ná
há mɩŋ Nil fuonaa (fuonazeno) tokó mí,
arɩ́ tuwie ná há mɩ́ŋ Asiiri mí.
19 Ɓa sɩ́ ko
zʋ paala pɛ́ksɛ (nyipalsɩ́ɛ́) wuu sɩɛrʋ
arɩ́ bʋ́ɔ́ póŋse sɩɛnnɛ,
a sú pɩpapúksi (tuo) wuu
arɩ́ pʋsɛ dɩdíé wuu.
20 Ɛ́ kal,
Nyuutɩna sɩ́ yɔwɛ (sʋl) nyúfʋnɛ́
Ɩfɩratɛ fuo daarɛ́ mɛ́,
Asiiri kuóro ní ká ɛ́ nyúfʋnɛ́
a píéríwa nyúnni
rɩ́rɩ́ɩ́wa tɛŋ pʋsɛ.
Ʋ sɩ́ fɩ́ŋ tɔmɔ má.
21 Ɛ́ tɛ́ŋ mɛ́ sɩɛ́,
rɩ nɛrɔ wuu dɩ́ɛ́sɛ
nɔmáá, pʋzeŋse sɩɛrʋ arɩ́ pʋwɩ́ɛ́la bɛllɛ,
22 há sɩ́ ká nɛ́'ɩ́l kɩ́ŋkáŋ
a makɛ rɩ́wɔ́ wólli nɛ́'ɩ́lnʋʋ ná a dí.
Óó, nɩɛ ná há sɩ́ káánɛ tɔ́ɔ́ ná sɩɛrʋ
sɩ́ dídí nɛ́'ɩ́lnʋʋ arɩ́ tʋʋ nɛ́.
23 Ɛ́ tɛ́ŋ mɛ́,
viínyi tuuni bʋ́ɩ́ há mɩŋ dɩhɩ̃́ ná wuu,
ɓa yɛlɩ́ mɔ meéwicááka bʋ́ɩ́,
sɩ́ káánɛ́ sɔkólli arɩ́ gɩŋgɩ́ɩ́nɔ́ (cɛɛ) sɩɛrʋ.
24 Ɓa sɩ́ ká tuo arɩ́ tuhɛmɛ ko ráŋ,
bee wɩ́ɛ́, ʋ ká ɛ́ nɛ́, tɔ́ɔ́ ná wuu sɩ́ a sɔkólli arɩ́ gɩŋgɩ́ɩ́nɔ́ (cɛɛ).
25 Nɛ́ŋ báá waá saŋ mʋ́
pallɛ ná daha
ɓa fa haá cʋ́ɔ́sɛ rɩ́ derewa,
a tɩŋ sokolli rɩ́ cɛɛwa héwíŋ wɩ́ɛ́.
Ɓa sɩ́ bɩrmɛ nɛsɛ dɩdíí,
ká a pieŋse má dɩvalɩ́.