Ezayi yɩ́rɛ wɩ́ɛ́
6
1 Kuóro Oziyasɛ bɩŋsʋwɩ́, ŋ ná Nyuutɩna rʋ́ʋ́ ké kuódacaka há ísí kɩ́ŋkáŋ sɩɛrʋ. Kɔ́ʋ́ gɛrɔ nʋɔ jɛrɛ a sú Wɩɩsɛ jaa wuu. 2 Malkawa ná ɓa haá yɩrɛ Serafɩŋwa cɩ́nʋ́ nyúú rí. Ɓa oro wuu fá kéŋ kíŋkeru balgo: a ka bɛllɛ aá tɔ́wɔ́ sɩ́ɛ́ mɛ́, a ka bɛllɛ aá tɔ́wɔ́ tɛŋ mɛ́, ká ka bɛllɛ aá fil. 3 Ɓa buólo aá la náŋá mɛ́, a bʋlɛ́:«Páár (dʋŋɔ), páár, páár nɛ́ ká
Nyuutɩna Wɩɩsɛ, Doewuutɩna.
Ʋ píŋ tɔ́ tíé wuu mí.»
4 Ɓa líŋsi ná háá buóle ɔ́ɔ́ bonni múkunni ziziksi, ká nyʋɔsɛ sú Wɩɩsɛ jaa ná. 5 Ɛ́ nɛ́ ŋ sɛ́: «Nyúbɔ́ŋ a páŋ, ŋ́ tó (sʋ́wɔ́). Beé wɩ́ɛ́, ŋ ká nɛ́ŋ nʋkɛnnɛ há kéŋ busunnu ní. Ŋ mɩŋ duo ná nɩɛ nʋkɛnnɛ há kéŋ busunnu ní, káŋ sɩ́ɛ́ ná kuóro, Nyuutɩna Wɩɩsɛ ná há ká Doewuutɩna.»
6 Amá Serafɩŋwa ná nɔŋɔ́ fíló kóŋ rɩ́. Ʋ fa kéŋ níŋhal rɩ́ cɛ́wɛwiisi ʋ nɛ́sɛ mɛ́, ʋ há lɩ́sɛ koro mí. 7 Ʋ kaa ko nyɩ́kɩ́ŋ (tɩ́kɩ́ŋ) nʋɔ mɛ́, ká bʋ́lɛ́:
«Ŋ́né há tɩ́kɩ́ nʋkɛnnɛ mɛ́,
ɩ wɩ́zɔkɩ́ mʋ́ʋ́rɔ́,
ɩ wɩ́bɔmɔ dʋsɔ.»
8 Ɛ́ mɛ́ nɛ́ sɩɛ́, ŋ nɛ̃́ Nyuutɩna Wɩɩsɛ líŋo há bɔ́sɛ a bʋlɛ́: «Áŋ rɛ́ ŋ sɩ́ tʋŋ>> Áŋ rɛ́ sɩ́ a ráá wɩ́laabʋllɔ>>» Ɛ́ nɛ́ ŋ sɛ́: «Néŋ ní, tʋ́mɩ́ŋ.»
9 Ɛ́ nɛ́ ʋ sɛ́:
«Mʋ́ bʋl nɩɛ nyáŋ rɩ́ a bʋlɛ́:
“Ɩ́ sɩ́ zesi wérí,
amá ɩ́ waá a rɩɩ́wa nɛ̃́ wɩ́ɩ́ wuu.
Ɩ́ sɩ́ bel wérí,
amá ɩ́ waá a rɩɩ́wa ná óŋ wuu.”
10 Pɩrɛ duo né baŋcɩllɛ,
a fɛ́sɩ́sɔ́ dɩlla, ká tɔ́wɔ́ sɩ́ɛ́ mɛ́;
a pɔ́ rɩ́wɔ́ sɩ́ɛ́ sɩ́ ráŋ ná,
rɩ́wɔ́ dɩlla má sɩ́ wɩ́ɛ́ nɛ́,
rɩ́wɔ́ sɩɛnnɛ sɩ́ wɩ́zɩmɛ kánʋ́,
rɩ́wɔ́ sɩ́ bɩ́rsʋ́,
rɩ́ɩ́ ná tɛŋfɩ́ɛ́l (duóre).
11 Ŋ sɩɛ́ bɔsɛ a bʋlɛ́: «Nyuutɩna, a kaá já tɛ́ŋ beé rí>> Ɛ́ nɛ́ ʋ sɛ́: «A kaá já tɛ́ŋ ná mɛ́ tɔ́nɛ há sɩ́ zɔkɛ, rɩ́ nɩɛ baá sɩ́ ráŋ mɩnʋ́, rɩ́ jɩɩsɛ a wúóli, ká rɩ́ tíé má zɔkɛ, a bɩrmɛ gɩrbétéke (tíɓɩlɩ́).
12 «Ʋ ká ɛ́ nɛ́, Nyuutɩna Wɩɩsɛ sɩ́ a,
rɩ́ tɔ́ɔ́ ná nɩɛ mʋ́ dɩbólí.
Ká rɩ́ tíé ná ɓa há vɛ́ tá, a ɓɩzeni a káánɛ́ tɔ́ɔ́ ná sɩɛrʋ.
13 Fí sɩɛrʋ, rɩ́ balá má
lúó lɛ́ zɔkrɛ ná mɛ́,
níŋ sɩ́ dúú má,
anɛ sɛɛnɛ arɩ́ terebɛŋtɛ tuuni ɓa há ɓɛ́ɛ́ yo,
ká múkur dʋŋɔ káánɛ.
Amá oŋduó ná há lɛ́ Wɩɩsɛ
mɩŋ ɛ́ múkur mí ní.