7
(Háála)1 «Bɩrko, bɩrko, Oo! Sulamiti;
bɩrko,bɩrko rá bɛ́llɩ́.»
(Boŋzoŋ)
2 Néí naasɛ há wéró ɛ́ ɩ natɔɔsɛ sɩɛrʋ, kuótoló! Ɩ tɩŋa kílo wuu dé nɛ baŋzíŋ lukro nɛ́sɛ há bɩ́rmɛ́ nɛ́. 3 Ɩ púúlemʋ́l dé nɛ sɩnyɔ́ɔ́rɛ́ gbanwie, dɩvɛ́ŋ há wɩ ráŋ kaasɛ nɛ́. Ɩ luoru (file) anɛ mɩ́púl ɓa há cónní nyɔ́fɩɩla lɩkɛ. 4 Ɩ ɩ́la ná bɛllɛ dé nɛ bʋwiisi bɛllɛ nɛ́, anɛ ɓɛɛ bilɩɛnnɛ. 5 Ɩ baŋ wuu anɛ nafara ɓa há pí salmɛ mʋɔlɛ. Ɩ sɩ́ɛ́ yɩ́lá yɩ́lá anɛ Ɩsbɔŋ fuonni nyii, fuonni ná há mɩŋ dánnʋɔ ná nɩkana há tɩŋɛ́ mɛ́. Ɩ mɩɩsɛ má cʋ́ɔ́rɔ́ anɛ Libaŋ nafargbó ná há cɩ́nɛ́ caasɛ Damasɛ, síŋtírípɔ́ɔ́ra zɛ́ cɛ́ nɛ́. 6 Ɩ nyúú há cɔ́ɩ́ baŋ mɛ́, ʋ dé nɛ Karmɛlɛ paalɔ nɛ́. Ɩ nyúpʋ́zʋɔsa (mɛ́sɛ) keŋ́ oŋfɩɛŋsɛ, kuóro bélwó pálɛ a wɩ wuó daarɛ. (ʋ sɩ́ɩ́ lɛ aá ɓal) 7 Ɩ vʋ́ɔ́, ɩ wéró, ŋ cólle; ŋŋ́ hɩɛnɩ́ wɩ́ɛ́ nɛ́. 8 Néí wuu há mɔhɩ̃́ náŋá ɛ́ anɛ habɛ́ tuu, ɩ ɩ́la nɛ́ kɔ́ʋ́ nɔnɔ. 9 Ɛ́ nɛ́ ŋ sɛ́ : «Ŋ sɩ́ zɛ́ habɛ́ tuu a tɩ́kʋ́ nɔnɔ mɛ́!» Lo rɩ́ ɩ́la nɛ viinyi nɔŋcike, ká rɩ́ hiẽsó poo ná há lɩ́ɩ́ mɩɩsɛ mɛ́, rʋ́ʋ́ sɔ́ŋ nɛ pɔmɛwa sɔ́ŋ! 10 Rɩ́ɩ́ nʋɔ mʋsɛ́ a wérí anɛ dɩvɛ́ŋ há wéró ɛ́ nʋɔmɛ́ !
(Házoŋ)
Óó! anɛ divɛŋ were ŋ há píé bílíŋ nɩcólli mí, á nyɔ a pii pɛ́ dóŋ, ká ɓaá pálrá nʋkɛnnɛ mɛ.
11 Ŋ boŋzoŋ nɛ́ tɩ́ŋ, ŋ nɛ́ ʋ hɩ́hɩɛnɛ. 12 Ko, ŋ nɩcólli; ko rá lɛ kíŋker rí a cɔ tufɩɩla sɩɛʋ. 13 A sɩ́ cɔŋ fól a zʋ viinyi tuui sɩɛrʋ, a ná rɩ ɓaá tɔwɛ paarʋ rɛ́, a na ɓaá puri paarʋ rɛ́, ká ná, girenaadɛ tuuni má fɩfɩɩla rɛ́>> Ká rɩ́ŋ kórmí ráŋ. 14 Ná cólle pɔmɛwa sɔ́ŋ nɩ́ɩ́ sʋɔrɛ́ nyɛ. A dánnʋɔ mɛ́ tunɔnɔ rɩ́wɔ́ duó wuu mɩŋ ráŋ, tunɔŋfɛlɛ rɩ́ tunɔŋbɩnɛwa wuu. Ŋ boŋzowéri, ŋ bílwó ɩ mɛ nɛ́.